ᒫᑯᓯᐅᑉ ᐊᒡᓚᖏᑦ 1 - Aglait Ijjurnaittut

Juanasi Paaptitirijiup Ajuriqtuininga

¹ Uqausit tusaruminaqtut pigiarniqaqput Jiisusi Christuusimik, Guutiup Irninganik.

² Suurlu nalauttaiji Aisaiasi titiraqsimangmat: “Takugit, uqariaqtuqtitara sivunirni tilivara, Aqqutiksarnik aaqqiksuiqullugu.

³ Taanna nipiqquqtuluni uqallagumaaqpuq inuqanngittumi; Ataniup aqqutiksanga aaqqiksuqsiuk, Ingirraviginiaqtanga aqqut tukiliaqsitillugu.”

⁴ Juanasi Paaptitiriji saqqilauqpuq inuqanngittumi, ajuriqtuilluni paaptitsivaglunilu qaqialiqullugit ajurnit isumagijunnaiqtauqullugit.

⁵ Inuit amisut nunamit Juutiamit, Jiruusalimmillu tusaajaqtuqput Juanasimik; ajurnirminik qaqialirmata, Juanasiup paaptippait kuungmi Juartanimi.

⁶ Juanasi annuraaqalauqpuq kaamiliup miqqunganik annuraaliarisimajumik, amirmiglu qitirusiqsimalluni, niqiqarlunilu pigliqtaujaaqtunik iguttaillu siirnautinginnik hanimik.

⁷ Inungnut ajuriqtuivuq, uqarluni: “Angut kinguninni tikinniaqtuq uvannit ajunginniqsarjuanguvuq, naluqqutivungalu ukulunga itigagutingitta qilaksimautinginnik piiqsijariamik.

⁸ Imirmut paaptippassi; taassumali paaptittumaaqpaasi Anirnirmut Ijjurnaittumut.”

Jiisusiup Paaptitauninga Uukturluktauningalu

⁹ Tamatuma kinguningagut Jiisusi Naasariitiminngaaqpuq Galiliamit, Juanasimullu paaptitauvuq kuungmi Juartanimi.

¹⁰ Jiisusi imaanit qakingmat, qilangmi angmaqtumik takuvuq Guutiup Anirninga aqqaqtuq tingmiatitut tuuvititut taassumunngarluni.

¹¹ Nipimik qilangmit tusaqsaujuqaqpuq, “Irnirivagit nagligijara; quviasuutigitsiaqpagit.”

¹² Anirniup tavvainnaq aullarutivaa inuqanngittumut.

¹³ Inuqanngittumiilauqpuq ullunik 40-nik, Saataanasimut piunngittumut pijumisaaqtaulluni; nirjutillu nujuaqtut tamaaniilaurivut; aingililli upakpaat ikajurlugu.

Jiisusiup Qaiqujininga Iqalugasuktinik Sitamanik

¹⁴ Juanasiup tigujauningata kingurngani, Jiisusi Galiliamuaqpuq, uqausirnik tusaruminaqtunik Guutimik ajuriqtuijutiqarluni.

¹⁵ Uqarluni, “Maanna nalliutivuq, Guutiup Ataniuvinga qaglivuq; qaqialirissi, uqausit tusaruminaqtut ukpirisigit.”

¹⁶ Jiisusi pisugluni Galiliap tasingata sinaagut, iqalugasuktiingnik marruungnik takugami, Saimuunimik Aanturuumiglu nukariingnik imaani nuluarniaqtuungnik.

¹⁷ Jiisusi taakkungnunga uqaqpuq, “Maliksinnga ajuriqtuutiniarassik qanuq iqalugasuktuksaungmangaassik inungnik.”

¹⁸ Tavvainnaq nuluamingnik qimaillutik Jiisusimik maliksaqpuuk.

¹⁹ Tauvungakkanniq pisukkami, takugivuq nukariingnik, Jaimisimik Juanasimiglu Sipitiup irningingnik, taakkuak umiaminiippuuk nuluamingnik aliksimaniijaillutik.

²⁰ Takugamigik qaiquvaak; ataatamingnik Sipitimik qimaillutik umiamut ilatuaqaliqtillugu pinasuktiqutiminik, Jiisusimik maliliqpuuk.

Angutiup Anirnirlungmik Ilummiqtausimajuup Aaqqiktauninga

²¹ Kapiirniamut tikipput; Sapatiulirmat Juutit ukpirnirmut katimavinganuaqpuq ajuriqtuilirluni.

²² Tusaajut kamaniaqput ajuriqtuininganik, piqujanik ilisaijititut ajuriqtuinngimmat; ajuriqtuingmalli pijunnaqsititausimajutitut.

²³ Ajuriqtuitillugu itiqtuqaqpuq katimavigijangannut angummik anirnirlungmut ilummiqtausimajumik;

²⁴ Qaigalaaliqpuq, “Uvattinnik qanuiliuriaqtuqpit Jiisusi Naasariitimiuq? Uvattinnik asiruijaqtuqpit? Qaujimavunga kinaungmangaaqpit; Guutiup Ijjurnaittuqutigivaatit.”

²⁵ Jiisusiup anirnirluk iniqtiqpaak, uqarluni, “Nipiqanngilaurit, inungmit tavvanngat anigit!”

²⁶ Anirnirluup, inuk aulatimmariliqpaa nilliajualuulluni, taassumangat anivuq.

²⁷ Inulimaat kamaniammarikput, immingnut uqaqatigiilirlutik, “Qanuitturnguna? Nutaamik ajuriqtusiqtaqaliriva? Pijunnarnikkut aniqujivuq anirnirlungmik, naalaktaullunilu.”

²⁸ Tavvainnaq Jiisusiup piniarninga akuniunngittuq tusaumajauliqpuq Galiliap qanigijalimaangani.

Jiisusiup Aaqqiksininga Inungnik Amisunik

²⁹ Jaimisi Juanasilu ilagillugik Juutit ukpirnirmut katimavinganit anivut, Saimuuniup Aanturuullu angirranganut aillutik.

³⁰ Tavvungarmata uqaujjauvuq Saimuuniup sakinga arnaq qanimangmat iglirmi nalalluni, uutirnaqtumik qanimalluni.

³¹ Jiisusiup upaglugu aggangitigut tigullugu ingitippaa, uutirnaqtumut qimaktauvuq; taassuma niritiliqpait.

³² Siqiniq nipingmat, unnuktillugu, qanimajut tamarmik, anirnirlungnullu ilummittausimajut Jiisusimuarutivait.

³³ Iglugasangmiut inulimaangit igluup silataani katinngaliqput.

³⁴ Qanutuinnaq qanimmasilit amisut aaqqikpait, anirnirlungnullu itirviusimajut amisut anititsivigivait; anirnirluit uqarviqaqtinngilait, qaujimangmata kinaungmangaat.

Jiisusiup Ajuriqtuininga Galiliami

³⁵ Ullaammarikkut qaummalauqtinnagu suli, Jiisusi makippuq anilluni iglumit inuqanngittumuaqpuq inutuulluni, tavvani tuksiaqpuq.

³⁶ Saimuuni ilagijangillu iglumit anigivut qinilirlutik Jiisusimik,

³⁷ nanigamijjuk uqautivaat, “Inulimaanut qiniqtauliqputit.”

³⁸ Jiisusiup uqautivait, “Nunalingnut asinginnuaqtuksaulirivugut, ajuriqturiaqarmigakkit; tamanna pijjutigillugu tamaunngaqsimagama.”

³⁹ Taimaimmat ingirralauqpuq Galiliamiittulimaanut nunalingnut, Juutit ukpirnirmut katimavinginni ajuriqtuivagluni, anirnirlungmit itiqtausimajut inuit anititsivigivait.

Jiisusiup Angummik Aaqqiksininga

⁴⁰ Angut sivuuragijaujumik paqtiqtuq Jiisusimuaqpuq, saanganut siiqqurluni Jiisusimut ikajuqtaujumalluni uqaqpuq, “Pijumaguvit, paqtirunniiqtittunnaqparma.”

⁴¹ Jiisusiup nalligiliqpaa, isaglugu akturluniuk, uqautivaa, “Pijumavunga, paqtirunniirit.”

⁴² Tavvainnaq angut sivuuragijaujumik paqtirunniiqpuq.

⁴³ Jiisusiup qimaruutiqulauraniuk iniqtillariglugu uqautivaa,

⁴⁴ “Tamanna kinatuinnarmut uqausirittailiguk; tuksiarvigjuamili tunirrusiqtitsijimut ailirit, taassumunga qaujisaqtauniaravit; inulimaanut qaujijauqullutit aaqqiktautsiarnirnik, Muusisiup tunijauqujanganik tunirrusirniaqputit.”

⁴⁵ Angut qimaruutigami uqaqtailimangitsiarluni uqaqattaqpuq, uqaluarninganut Jiisusi saqqijaatsiarluni nunalingnuarunnaillivuq, inuqanngittumi kisiani iniqarunnaliqpuq; inuit Jiisusimuaqput nakituinnaaqsimajut.