ᒫᑎᐅᓯᐅᑉ ᐊᒡᓚᖏᑦ 9 - Aglait Ijjurnaittut

Jiisusiup Nukiqanngittumik Aaqqiksininga

¹ Jiisusi umiamut ikigami tasiup akianut nunatuqaminut utirivuq,

² inuit ilangita aatsivigivaat angummik nukiqanngittumik, iglirmi nalajumik; Jiisusiup qaujimagamigit ukpirniqarninginnik, angut nukiqanngittuq uqautivaa, “Irniik quviasulirit! Ajurnitit isumagijaujunnairmata.”

³ Takugit, piqujanik ilisaijit ilangit immingnut uqaqatigiiliqput, “Una Guutimik uqarnirluutiqaqtuq!”

⁴ Jiisusiup qaujigamigit sunamik isumangmangaata, uqautivait, “Sungmat taimaak isumaqaqpisi piunngittualungmik?

⁵ Nalliat pijarnirniqsauva? Uqarluni, ‘Ajurnitit isumagijaujunnaiqput,’ uvvalu uqarluni, ‘Makillutit pisulirit’?

⁶ Qaujiniarassi, Inuup Irninga pijunnarniqarmat, tamaani nunarjuarmi ajurnirnik isumagijunnaiqsijunnarnirmik,” taimaimmat nukiqanngittumut uqaqpuq, “Makittit, nallangaviit tigulugu, angirralirit!”

⁷ Angut makinnami angirraqpuq.

⁸ Inuilli tamatuminga takunnaqtut, kamaniammarikput, Guutimik niqtuilirlutik, inungnut pijunnarnirmik tunisisimaninganut.

Jiisusiup Qaiqujininga Maatiusimik

⁹ Jiisusi tavvannga qimaruutilirluni, takuvuq Ruumamiut kiinaujaiqtitsijiqutingannik, Maatiusimik atilingmik, pinasuarvingmini iksivajumik; uqautivaa, “Malinnga.” Nikuvinnami, Jiisusi maliliqpaa.

¹⁰ Kinguningagut Jiisusi nirijaqtuqatauvuq Maatiusiup iglungani, Ruumamiut kiinaujaiqtitsijingit amisut ajuqtulinirmut narrunarniraqtaujut qaiqataugivut, Jiisusi ilinniaqtingillu nirivingmi niriqatigilirlugit.

¹¹ Paarisit ilangita tamanna takugamijjuk Jiisusiup ilinniaqtingit apirivait, “Sungmanuna ilisaijisi kiinaujaiqtitsijinik ajuqtulijuniglu niriqatiqaqpa?”

¹² Jiisusiup tusaramigit uqautivait, “Qanimanngittut aanniasiutiqariaqanngilat, qanimajulli kisimi.

¹³ Atii qaujisatsialaurissi, Guutiup uqausinginni qanuq tukiqarmangaat, imaak uqaqsimajuq: ‘Nikagusungniq pijumavara, uumajunik tunirrusirniunngittuq.’ Nalaaguutsiaqtunik tikijjutiqaqsimanngilanga, ajuqtulijunigli qaiqujijaqtuqpunga.”

Nirittailinirmik Jiisusiup Apirijauninga

¹⁴ Taissumani Juanasi Paaptitsirijiup ilinniaqtingit Jiisusimuaqput, apirillugu, “Sungmat Paarisillu nirittailivakpita? Ilinniaqtitilli nirittaililauqsimatinnagit?”

¹⁵ Jiisusiup kiuvait, “Katititaujuqaqtillugu quviasuglutik niriqatigiiktillugit qaiqujausimajut qiksaagiaqaqturivisiuk, uiksaq suli tavvaniitillugu? Taimaisuungunngilat! Ullurli nalliutijumaaqpuq uiksamik aqsaaqtauvingat, tavva taakkua nirittaililitainnarumaaqput.

¹⁶ “Annuraatuqarmik ilasijuqaqpanngilaq nutaamik iqijattumik, taassuma nutaap iqiliruni annuraatuqaq alikturajarmagu, annuraatuqaullu angmajunga angiglikkannituinnarajaqpuq.

¹⁷ Ammattauq uainimik nutaamik kuvisijuqaqpanngilaq uainiqautituqarmut uumajuviniup aminganut; uainiup nutaap uainiqautituqaq suratuinnarniarmagu, uainilu kuvituinnarniaqpuq, uainiqautituqaq atuqtuksaujunniirluni; uainili nutaaq kuvijauguni uainiqautimut nutaamut, tavva taakkuak tamarmik asirunngittuinnaugajaqpuuk.”

Angajuqqaap Paninga Arnaullu Jiisusiup Annuraanganik Aktuqsininga

¹⁸ Jiisusi suli tamakkuninga uqallaktillugu, takugit angajuqqaamit upaktauvuq, Jiisusiup saanganut siiqqurluni, uqaqpuq, “Paniga tuqurataarmat; upalauruk patimmijaqturlugu, tavva inuuniaqpuq.”

¹⁹ Jiisusi nikuvilluni angut maliliqpaa, ilinniaqtingillu malikkivut.

²⁰ Takugit arnaq iluanngijutiqaqtuq aunaanginnarnirminut arraagunik 12-nik, Jiisusi maligluniuk kinguninganit, annuraangata sinaagut aktuqpaa.

²¹ Imaak isumaqalirami, “Annuraangaluunniit akturunnarukku, aaqqiktauniaqpunga.”

²² Jiisusi tunummut qiviarluni arnaq takuvaa, uqautillugu, “Paniik quviasulirit! Ukpirnivit aaqqikpaatit,” tavvatsainnaq arnaq aaqqiktautsiaqpuq.

²³ Jiisusi tikiutivuq angajuqqaap iglunganut itirluni, nijjausijaqtunigli iluviqsijuqsiutinut takugami, inungniglu nipiqquqtujunik,

²⁴ uqaqpuq, “Anilaurissi! Una niviaqsaaq tuqunngimmat sinituinnaqpurli!” Taakkualu mitautigiliqpaat.

²⁵ Inuit aningmata iglumit, Jiisusi niviaqsaap najuqtanganuaqpuq aggangitigut tiguvaa, niviaqsaaq makippuq.

²⁶ Tamanna piniarniurataaqtuq siammaqtitauliqpuq namutuinnalimaaq tavvani nunaqaqtunut.

Jiisusiup Tautunngittuungnik Tautuliqtitsininga

²⁷ Jiisusi tavvanngat qimaruutilluni pisuliqtillugu, tautunngittuuk marruuk maliksaqpuuk, qaigalaarlutik uqaqpuuk, “Taivitiup Irninga naakkigitiguk!”

²⁸ Jiisusi iglumut itirmat, tautunngittuuk tavvunngaqpuuk; Jiisusiup apirivaak, “Ukpirusukpisik ilissinnik tautuliqtitsijunnarninnik?” Taakkuak kiuvuuk, “Ukpirusukpuguk, Ataniq!”

²⁹ Ijingiktikkuglu akturlugik uqaqpuq, “Ukpirusungnisik maliglugu taimailirli.”

³⁰ Taakkuaglu tautuliqpuuk. Jiisusiup iniqtimmariglugik uqaqpuq, “Tamanna kinatuinnamut qaujijautittailisikkuk!”

³¹ Taakkuagli tavvanngat anigamik Jiisusiup piniarninga uqausiriliqpaak namutuinnalimaaq tavvani nunaqaqtunut.

Jiisusiup Tusaanngittumik Tusaaliqtitsininga

³² Taakkuak angutiik marruuk tavvanngat aningmatik, Jiisusimuarujjijuqaqpuq angummik uqarunnanngittumik, anirnirlungmut itiqtausimajumik.

³³ Anirnirlugli inungmit anititaungmat, taanna uqarunnanngittuq uqallaliqpuq, inuillu kamaniammariliqput, uqarlutik, “Taimaak takulauqsimanngimmarikpugut Isarialimi!”

³⁴ Paarisilli uqaliqput, “Una anirnirluktut angajuqqaangannut pijunnarniqaqtitaujuq anititsijunnarnirmik taimaittunik.”

Jiisusiup Inungnik Nagligusungninga

³⁵ Jiisusi nunaliktigut iglugasaktigullu ingirravuq, Juutit ukpirnirmut katimavinginni ajuriqtuivagluni, uqallaglunilu Uqausirnik Tusaruminaqtunik Guutiup Ataniuvinganik, inuillu qanutuinnaq aannialit, qanimajullu aaqqikpait.

³⁶ Inugiakturjualli takugamigit, ilatsugiliqpait, isumajaarmata ikajuqtiksaqaqtuujaaratik, siipititut paiqsijiqanngittutitut.

³⁷ Taimaimmat ilinniaqtini uqautivait, “Piruqtut katiqsugaksait angijuuvut, pinasuaqtuksailli amigaqput.

³⁸ Taimaimmat piruqtut katiqsugaksat ataningat tuksiarvigisiuk tilisiqullugu pinasuaqtuksanik, katiqsuiniaqtunik piruqtunik nakatirivingmi.”