ᒫᑎᐅᓯᐅᑉ ᐊᒡᓚᖏᑦ 7 - Aglait Ijjurnaittut

Asitsinnik Iqqaqtuiniarasi

¹ “Asitsinnik iqqaqtuiniarasi, iqqaqtuqtauqunasi.

² Iqqaqtuinisi maliglugu taimaalluaq iqqaqtuqtaujumaarivusi, pinasuarnisi maliglugu taimaalluaq pinasuarviujumaarivusi.

³ Sungmat inuuqativit ijjisimautinga mikijukuluk takuviuk? Uvva nangminiq ijingniittuq napaaqtuvinialuk ikpiginagu?

⁴ Uvvalu qanuq inuuqatingnut uqarunnaqpit ‘Ijjisimautiinuna mikijjukuluk piilaurlagu,’ uvva nangminiq napaaqtuvinialungmik ijingniittuqaqtillugu?

⁵ Takkurmuuqtutit! Ijingniittuq napaaqtuvinialuk piiqqaalauruk, tavva takutsiarunnaqsiniaqputit inuuqativit ijjisimautinganik piiqsinasualiruvit mikijukulungmik.

⁶ “Ijjurnaittumik tunisiniarasi qimminut; sapangaqutisilu akitujut iginniarnagit kuukkuusit sivuningannut, taakkunanngat tulliraqtautuinnarajarmata ilingnullu saallutik paajautuinnariaqaravit.”

Tuksiarniq, Qinirniq, Tiglukturniq

⁷ “Tuksiarissi, tunisiviugajaqpusi tavva; qinirissi, nanisigajaqpusi tavva; tiglukturissi matuirujjaugajaqpusi tavva.

⁸ Tuksiaqtut tamarmik tunisiviugajaqput; qiniqtullu nanisigajaqput; tigluktuqtullu matuirujjaugajaqput.

⁹ Nalliat ataataujusi irnisinnut tuksirarviugussi niaquujamik, ujaqqamik aitturajaqpisiuk?

¹⁰ Uvvalu qiturngasi iqalungmik tuksiraqtillugu, quglugiamik aitturajaqpisiuk?

¹¹ Piunngittuugaluaqtusi, piujunik tunisijariaksaq qiturngassinnut qaujimagassi; Ataatasili qilangmiittuq piujunik tunisijariaksaq qaujimatsiarniqsauvuq tuksiarvigijiminut.

¹² “Taimaimmat inuuqatissinnut pinasuarviujumanitsititut, taimaalluaq pinasuaqtuksauvusi: tamanna taimailiurniq Muusisiup piqujangita tukigingmagu, nalauttaijullu ajuriqtuijjutigilluniuk.”

Itirvik Nirukittuq

¹³ “Itirvikittukkut itirissi, itirvik nirutungmat kappianaqtuvingmut turaangajuq, aqqutinga pijarniqtuulluni, amisut tamanna atuqpaat.

¹⁴ Itirvik nirukittuuvuq inuusirmut nungusuittumut turaangajuq, aqqutinga pijarninngittuulluni, ununngittut tamanna nanivaat.”

Napaaqtut Piruqtunginnut Qaujimajaujunnaqput

¹⁵ “Qaujisatsiarissi nalauttaijuujaaqtunik sulinngittunik; taikkua silatimiktigut siipiuqquujinasuarlutik ilissinnuarniarmata, ilumiktigulli paajumajutitut amaruqtitut taimaipput.

¹⁶ Piniarningitigulli qaujimajunnarniaqpasi. Uqpigait kakinnaqtulit paurnganik pirurviusuungunngilat, uqpigaujaaqtullu kakillarnaqtulit aqpiujaaqtunik pirurviuvanginnivut.

¹⁷ Napaaqtuq uummatsiaqtuq piujunik pirurviuvakpuq, napaaqturli piunngittuq piunngittunik pirurviuvakpuq.

¹⁸ Napaaqtuq uummatsiaqtuq pirurnirlugviuvanngilaq, napaaqturlu piunngittuq piujunik pirurviuvannginnivuq.

¹⁹ Napaaqtuq nalliat piujunik pirurviunngittuq, nakatauluni igitauniaqpuq ikumamut.

²⁰ Taimaaktauq, Guutimut nalauttaijuqutigijaujuujaaqtut sulinngittut, piniarninngitigut qaujimaniaqpasi.”

Qaujimalauqsimanngilassi

²¹ “Uvannik Ataniqarniraqtulimaat Guutiup Ataniuvinganut itirnianngilat, Ataatamali qilangmiittuup pinasuaqtauqujanganik naalaktut kisimi.

²² Iqqaqtuqtauviup ullungani, amisut uvannut uqarumaaqput, ‘Ataniq, Ataniq! Atirni Guutiup uqaqtauqujanganik uqallaqattalauqpugut, atirnilu anirnirluit amisut inungnit anitiqattalauqpavut, unuqtuniglu kamanaqtulinirnik saqqititsiqattalauqpugut!’

²³ Tavva kiujumaaqpakka, ‘Qaujimalauqsimanngilassi; tamaaniinngilaurissi! Ajuqtulijualuujusi!’”

Igluliuqtiik Marruuk

²⁴ “Taimaimmat, nalliat uqausirijannik tusaqtuq, aturlugillu, taanna ajjiuvuq angummut silatujumut qaiqtumi igluliuqtumut;

²⁵ tavva silalummarilirmat, kuut qaamilirlutik, iglu anuraarviummarilirluni, urrunngilaq, qaiqtumut tunngagami.

²⁶ “Nallialli uqausirijannik tusaqtuq atuliranilu, taanna ajjiuvuq angummut silaittumut siurarmi igluliuqtumut.

²⁷ Tavva silalummarilirmat, kuut qaamilirlutik, iglu anuraarviummarilirluni, urruvuq; siqumimmarigluni!”

Jiisusiup Pijunnaqtitauninga Kamaniarijauvuq

²⁸ Jiisusiup tamakkua uqausit uqausirijariirmagit, inugiakturjuat kamaniaqput ajuriqtuilluni piusirijanganik.

²⁹ Ajuriqsuingmat pijunnarniqaqtutut piqujanik ilisaijitituunngittuq.