ᒫᑎᐅᓯᐅᑉ ᐊᒡᓚᖏᑦ 6 - Aglait Ijjurnaittut

Ajuqsaqtunik Ikajurniq

¹ “Kamatsiarissi ukpirnirmik pinasuarnisi asitsinnut, inungnut takuksaunasutuinnarlusi piqunasi; inungnut takuksaunasutuinnarussi, akiliqtauniksaqannginnassi Ataatasinnit qilangmiittumit.

² “Taimaimmat tunirrusirussi, tunisinisi qaujijaunasuarlusi tittulautimik nilliqtitsijariaqanngilasi, takkurmuuqtutitut taakkua Juutit ukpirnirmut katimavinginni aqqutinilu, taimailiuqpangmata inungnut niqtuqtaujumallutik. Sulijumik uqautivassi, akiliqtaujariiqput.

³ Tunirrusiruvilli, saumiit qaujititaksarinngilat taliqpikpit tunirrutinginnik.

⁴ Tunirrusirniit qaujijaunianngimmat; Ataatavillu tamainnik takunnaqtuup akilirumaaqpaatit.”

Qanuq Tuksiaqtuksaungmangaatta

⁵ “Tuksialiraangassi takkurmuuqtutitut taimaittuksaunngilasi; taikkua inungnut takunnaqtaujumatuinnaqtlutik tuksiasuungungmata nangirlutik, Juutit ukpirnirmut katimavinginni aqqutinilu. Sulijumik uqautivassi, taakkua akiliqtaujariiqput.

⁶ Tuksialiraangassili, inutuuvigijunnaqtassinnut itirissi, ukkuanga ukkuarlugu, Ataatasi takuksaunngittuq tuksiarvigiliqsiuk, Ataatasi tamainnik takunnaqtuup akilirumaaqpaasi.

⁷ “Tuksiaraangassi, uqausirnik taakkuningatsainnaq takilitillugit atuqtuksaunngilasi, ukpinngittutitut; taikkua amisunik kisiani uqausiqarlutik tusaqtaujunnarasugingmata.

⁸ Taikkuatitut taimaittuksaunngilasi, Ataatasi qaujimajariirmasi sunamik pijariaqarmangaassi, tuksialauqtinnasiluunniit.

⁹ Taimaimmat imaak tavva tuksiaqtuksauvusi: ‘Ataatavut qilangmiittutit: atiit ijjurnaittuq isumagijautsiarli;

¹⁰ Ataniuniit qailaurli; pijumajait maliktauli nunami, Suurlu qilangmi maliktaungmat.

¹¹ Ullumi niqiksattinnik tunisivigitigut.

¹² Piunngittulinivut isumagijunnaikkit, Taimaaktauq inuuqatitta piunngittuliningit isumagijunnairattigu.

¹³ Piunngittumik pijumisaaqtautittailitigut, saputitigulli Saataanasimit. [Ataniuniq ajugaqannginnirlu inuuqannirjuarnirlu pigigavigit isuqanngittumut, aamin.]’

¹⁴ “Inuuqatissi piunngittuliningit isumagijunnairniarussiuk, Ataatasittauq qilangmiittuup piunngittulinisi isumagijunnairniarivait.

¹⁵ Inuuqatissili piunngittuliningit isumagijunnairniangikkussigik, Ataatasittauq piunngittulinisi isumagijunnairniannginnivait.”

Nirittaililuta Qanuq Pijuksaungmangaata

¹⁶ “Nirittailijaraangassi, takkurmuuqtutitut taimaittuksaunngilasi kiinarmingnik takuminarunniiqtitsijutitut, tauttumigut takuksaunasuaqpangmata nirittailinirmingnik qaujijaujumallutik. Sulijumik uqautivassi, akiliqtaujariiqput.

¹⁷ Ilissili nirittailijaraangassi, kiinasi salummaqsatsiarlugu illairlusilu pijuksauvusi,

¹⁸ asitsinnit qaujijaunianginnassi nirittailinissinnik Ataatasi kisimi, takuksaunngittuup qaujimaniaqpaasi; Ataatasi inutuutillusi piniarnissinnik takunnaqtuup, akilirumaaqpaasi.”

Qilangmi Ajuqsanngijjutiksat

¹⁹ “Nangminiq ajuqsanngijjutiksassinnik katiqsuiniarasi tamaani nunami, qupirrunut qallunaaqtanik nirisuunut, manngiqturimullu sukkutaujunnaqtunik, tigliktinullu isaaqtaulutik tigliktaujunnaqtunik.

²⁰ Nangminirli ajuqsanngijjutiksassinnik katiqsuingaalirissi qilangmi, qupirrunut qallunaaqtanik nirisuunut, manngiqturimullu sukkutaujunnanngittunik, tigliktinullu isaaqtaujunnanngittumik tigliktaujunnanngittumiglu.

²¹ Piqutinnarijavit iningani uummatiittauq taikaniinniarivuq.”

Timiup Qaummaqqutinganik

²² “Ijiik naniruanguvuuk timimut. Ijiikkik taututsiaqpatik timilimaat qaumaniaqpuq;

²³ ijiikkigli takpiittuukpatik, timilimaat taaqtumiinniaqpuq. Qaumajuq ilingniittuq taaqsikpat, taaqtummarialuuniaqpuq!”

Piqutillu Guutilu

²⁴ “Angajuqqaangnut marruungnut atautsikkut pijitsiqtuqarunnanngilaq; aippaa uumigigajaqpaa aippangalu nagligilugu; aippaa kamagitsiarajaqpaa aippangalu narrugilugu. Taimaaktauq atautsikkut pijitsirunnanngilasi Guutimik kiinaujaniglu.

²⁵ “Taimaimmat uqautivassi: inuusissinnik isumajaarutiqarniarasi niqinik, imiksatsinnigluunniit, annuraaksatsinnigluunniit. Inuusisi annirnarniqsaunngilaq niqinit, timisilu aturniqsaunngilaq annuraanit?

²⁶ Tingmiat takusigik qangataqattaqtut: piruqsiaksanik kanngaqsuivanngilat, katiqsuivagatiglu niqikkuvingmingnut; taimaikkaluaqtillugit Ataatasi qilangmiittuup niritiqattaqpait! Pillariuniqsaunngilasi tingmianit?

²⁷ Nallisi inuusirminik uigusijunnaqpaa isumajaarutigiluniuk?

²⁸ “Sungmat annuraat isumajaarutigijariaqaqpisiuk? Takulauqsigik makua takuminaqtut nunarait, qanuq pirurmangaata; sananngimmata immingniglu annuraaliuratik.

²⁹ Uqautivassi Suulumuuni Angajuqqaarjuaq ajuqsanngittuugaluarluni annuraaqsimavalaunngilaq nunaraqtitut takuminaqtigijunik.

³⁰ Piruqtut makua Guutiup taimaak takuminaqtimmagit, ullumi tamaaniittut qaukpat pitaqarunniirniarmijut, ikitaulutik qijugijauniarmata, Guutiup annuraaksassinnik tunisivigijunnarniqsarinngilasi ukpirnikittusi!

³¹ “Taimaimmat isumajaarutiqarniarasi isumalusi imaak; nakilli nirijaksaqarnialiqpita? Uvvaluunniit nakilli imiksaqarnialiqpita? Sunamiglu annuraaksaqarnialiqpita?

³² Tamakkua taimailiurnit Guutimut ukpinngittunit isumagijaunginnaqpangmata. Ataatasili qilangmiittuup qaujimavaasi tamakkuninga tamainnik pijariaqarnissinnik.

³³ Guutiup Ataniuvinga pinasuaqqaaqsiuk, piniaqtauqujanga sivulliutilugu, tavva tamakkuninga tamainnik pijariaqaqtassinnik tunisiviginiaqpaasi.

³⁴ Taimaimmat isumajaarutiqarniarasi qaukpauniaqtumik; ulluuniaqtuq nangminiq isumajaarutiqalaarmingmat. Ulluup atausiup quviananngittuqtaqarningit ilakkanniriaqanngimmata.”