ᒫᑎᐅᓯᐅᑉ ᐊᒡᓚᖏᑦ 4 - Aglait Ijjurnaittut

Jiisusiup Pijumisaaqtauninga

¹ Tavva Anirniup Jiisusi tasiuqpaa inuqanngittumut, uuktuqtauluni pijumisaaqtauqullugu Saataanasimut.

² Ullunik unnuaniglu 40-nik nirilaunnginnami, kaaliqpuq.

³ Pijumisaarijiup tikippaa uqautillugu, “Guutiup Irnirikpatit, ukua ujarait niaquujannguqtilaukkit.”

⁴ Jiisusiup kiuvaa, “Guutiup uqausinginni titiraqsimavuq, ‘Inuk niaquujatuinnarmik inuujjutiqanngilaq, Guutiulli uqausinginnik qaninganit anijunik tamainnik inuujjutiksaqaqpuq.’”

⁵ Tavva Saataanasiup Jiisusi Jiruusalimmuarutivaa iglugasangnut ijjurnaittunut, qavviqtillugu tuksiarvigjuap puqtuniqpaanganut.

⁶ Uqautillugu, “Guutiup Irnirikpatit, taununga ilingnik kataktilaurit, Guutiup uqausinginni titiraqsimangmat, ‘Aingiliiqutini tiliniaqpait pillutit; Aggangmingnut tigumiarniaqpaatit, Itigatit aanniqunagit ujaqqanut.’”

⁷ Jiisusiup kiuvaa, “Guutiup uqausinginni titiraqsimagivuq, ‘Atanirmik Guutingnik uukturlugu pijumisaarijuksaunngilatit.’”

⁸ Amma Saataanasiup Jiisusi aullarutivaa qaqqamut puqtujualungmut, takutillugu silarjuarmiut angajuqqauvinginnik takuminarninginniglu.

⁹ Uqautillugu, “Tamakkualimaat tuniniaqpakka ilingnut, saannut siiqqurlutit tuksiarvigiguvinga.”

¹⁰ Tavva Jiisusiup kiuvaa, “Saataanasi uvannit aullarit! Guutiup uqausinginni titiraqsimangmat, ‘Atanirmut Guutingnut tuksiaqtuksauvutit taanna kisimi pijitsiqtaksarivat!’”

¹¹ Tavva Saataanasiup qimakpaa; takugillu, aingilit Jiisusi upaglugu ikajuliqpaat.

Jiisusiup Pinasualirninga Galiliami

¹² Jiisusi tusarami Juanasiup tigujauninganik, Galiliamuaqpuq.

¹³ Iglugasait Naasariiti qimaglugit Kapiirniami nunaqariaqtuqpuq, tasiup sinaaniittumi, Sipuluniup Naaptaliullu ilanganiittumut.

¹⁴ Taimailauqpuq nalauttaijuup Aisaiasiup uqausingit nalautsiliqullugit, uqaqtut:

¹⁵ “Sipuluniup nunanga, Naaptaliullu nunanga, Imarmut turaangajuup aqqutinganiittuuk, Juartaniup Akiani, Galilia Juutiunngittut nunangat,

¹⁶ Tavvani inuit taaqtumiittut Qaumajurjuaq takuvaat, Tuquullu tarralininganiittunut qaumajuq saqqippuq.”

¹⁷ Tavvanngat pigiarlugu Jiisusi ajuriqtuisivuq, uqarluni: “Qaqialirissi, Qilaup Ataniuvia qaglilirmat!”

Jiisusiup Iqaluksiuqtinik Sitamanik Qaiqujininga

¹⁸ Jiisusi Galiliap tasirjuangata sinaagut pisugluni, takuvuq nukariingnik marruungnik, Saimuunimik Piitturuusimik taijaujuq qatanngutaaniglu Aanturuumik, nulujjirasuaqtuungnik tasirmut, iqaluksiuqtiugamik.

¹⁹ Jiisusi taakkungnunga uqaqpuq, “Maliksinnga, inungnik iqalugasuktutitut pinasuaqtilaarassik.”

²⁰ Tavvainnaq nuluatik qimaglugit, Jiisusi maliksaqpaak.

²¹ Tavvangat pisulirmigami, nukariingniktauq marruungnik takugivuq, Jaimisimik Juanasimiglu Sipitiup irningingnik, taakkuak umiamiippuuk ataatatik Sipiti ilagillugu, nuluamingnik angmajuijaijuuk, taakkuaktauq qaiquvaak.

²² Tavvainnaq umiaq ataatatiglu qimakpaak, Jiisusi maliglugu.

Jiisusiup Ajuriqtuininga Aanniajuniglu Aaqqiksininga

²³ Jiisusi Galilialimaami namutuinnaq aiqattaqpuq, ajuriqtuivagluni Juutit ukpirnirmut katimavinginni, uqausiqarluni uqausirnik tusaruminaqtunik Guutiup Ataniuvinganik, ajjigiinngittunik aannialit qanimajullu inuit aaqqikpait.

²⁴ Tusaumajauliqpuq nunami Sirialimaami, inuit tavvunngaujjivut qanimajuqutimingnik, ajjigiinngittunik qanimmasiqaqtunik, iliqqusirluktuniglu, anirnirlungmullu itirviusimajunik, qiiqsuqpaktuniglu, nukiqanngittuniglu, Jiisusiup tamarmik aaqqikpait.

²⁵ Inugiakturjuat malikpaat Galiliamit Tikapuliisimillu, Jiruusalimmillu, Juutiamillu, Juartaniullu akianit pisimajulimaat malikpaat.