ᒫᑎᐅᓯᐅᑉ ᐊᒡᓚᖏᑦ 27 - Aglait Ijjurnaittut

Jiisusiup Pailaatuusimuarujjauninga

¹ Qauliqtillugu ullaammarikkut, tunirrusiqtitsijit angajuqqaangit, Juutinullu angajuqqaujulimaat angiqatigiikput Jiisusi tuqutauqullugu;

² atsungirlugu Pailaatuusimuarutivaat, Ruumamiut nunalingni aulatsijiqutinganut.

Juutasiup Tuquninga

³ Juutasi pijautitsisimajuq, qaujilirami Jiisusiup tuqutaksannguqtitauninganik, qiksaammarigluni qaqialiqpuq, kiinaujait siulvirit 30 utiqtippait tunirrusiqtitsijit angajuqqaanginnut Juutinullu angajuqqaujunut.

⁴ Uqarluni, “Ajuqtulisimavunga pasijaksaunngittumik angummik pijautitsigama tuqutauqullugu.” Taakkua kiuvaat, “Tamanna taimaitinngilavut, ivvit taimaititatuarivat!”

⁵ Juutasiup kiinaujait tuksiarvigjuarmut igillugit; tavvanngat anivuq; imminik qimittaqturluni.

⁶ Tunirrusiqtitsijilli angajuqqaangita kiinaujait tigullugit uqaqput, “Ukua kiinaujait aungmik akiqarmata, piqujattinni taimaittut kiinaujait tuksiarvigjuap kiinaujakkuvinganut ilijauqujaunngilat.”

⁷ Angiqatigiikkamik, taakkua kiinaujait atuqtauliqput marralirijiup piruqsiiviqutinganik niuviutigillugit, iluviqsiviksauqullugu nunalituqaunngittunut.

⁸ Taimaimmat taanna piruqsiivik suli taijauvakpuq “Piruqsiivik auktalik” ullumimut tikillugu.

⁹ Tavva nalauttaijuup Jirimaiaup uqausirilauqtangit nalautsivut imailijut, “Kiinaujait siulvirit 30 tiguvait, Isarialimiut inungita angiqatigiigutigilauqtangit taassumunga akiliutauqullugit,

¹⁰ kiinaujait atuqtauvut marralirijiup piruqsiiviqutinganik niuvirutigijaullutik, suurlu Ataniup taimaak piqulaurmanga.”

Pailaatuusiup Apiqsurninga Jiisusimik

¹¹ Jiisusi nangiqpuq Ruumamiut nunalingni aulatsijingata saangani, taassuma apirivaa, “Juutinut angajuqqaarjuanguvit?” Jiisusiup kiuvaa, “Tavva uqariiqputit.”

¹² Tunirrusiqtitsijit angajuqqaanginnut Juutinullu angajuqqaujunut pasiksirasuktunut atausiarluniluunniit kiulaunngilaq.

¹³ Tavva Pailaatuusiup uqautivaa, “Ukua tusaanngitatit ilingnut pasiksirutigijangit ajjigiinngittut?”

¹⁴ Jiisusili kiunngilaq, pasiksirutaujunut atausirmulluunniit kiulaunnginnivuq; tamatumunga aulatsijiujuq angijumik kamaniaqpuq.

Jiisusiup Tuqutaksannguqtitauninga

¹⁵ Qaangiqtauvingmigli nalliunniqsiurviuliraangat Ruumamiut aulatsijingit piusiqaqpakput tigujausimajut ilangannik atausirmik anititsiqattarlutik inuit anititauqujanganik.

¹⁶ Taissumani qaujimajaullariktumik tigujausimajuqalauqpuq Jiisusi Parapaasimik atilingmik.

¹⁷ Inugasagjuat katingmata, Pailaatuusiup apirivait, “Nalliannik anititsiquvisinnga Parapaasimik uvvalu Jiisusimik taijaujumik Christuusimik?”

¹⁸ Qaujimagami Juutit angajuqqaangita Jiisusi tavvunngautisimangmajjuk inungnut saanngajauniqsauninganik akauksaratik.

¹⁹ Pailaatuusi iqqaqtuivingmi iksivaaqtillugu, nuliangata uqaujjaujaqtuqtippaa: “Una angut pasijaksaunngittuq kamagijariaqanngitait, unnuaq sinnaktuumallunga angijumik uqumaiksarutiqaqqaugama taanna pillugu.”

²⁰ Tunirrusiqtitsijit angajuqqaangit Juutinullu angajuqqaujut inungnik isumaliurivut Parapaasimik qinuqullugit, Jiisusi tuqutauqullugu.

²¹ Tavva Pailaatuusi apirikkanniqpuq inugiaqturjuanik, “Ukuak marruuk nalliannik anititsiquvisinnga?” Inugiakturjuat uqaqput, “Parapaasimik!”

²² Pailaatuusiup uqautivait, “Unali qanuq piniarviginiaqtara Jiisusi Christuusimik taijaujuq?” Inugiaqturjuat kiuvut, “Kikiaktuqtauli!”

²³ Pailaatuusilu uqaqpuq, “Sunamik tuqutaujjutiksamik pisimangmat?” Tavva qaigalaaliqput nipiqquqtullutik, “Kikiaktuqtauli!”

²⁴ Pailaatuusili tukisilirami pivalliatitsinnginnirminik, inugasagjuat pirajatuinnariaqaqtuujaalirmata, imirmik kuvisilluni aggani uasaqpait inugasagjuat saanginni, uqarluni, “Taassuma tuqutauninganut pasijaksaunngilanga; ilissi tuqutautippasi.”

²⁵ Inugasagjuat kiuvut, “Taassuma tuqutaksannguqtitauninga uvattinnut qiturngattinnullu pasijaksaujjutaulirli!”

²⁶ Tavva Pailaatuusiup Parapaasi anitippaa taakkununga; Jiisusi tiigaqtuqtautittariiramiuk, aittuutigivaa kikiaktuqtauqullugu.

Unataqtuksait Jiisusimik Mitautiqarningat

²⁷ Tavva Pailaatuusiup unataqtuksaqutingita Jiisusi angajuqqaap iqqaqtuivinganuarutivaat, unataqtuksaillu unuqtuq tavvunngaqtitaugivut.

²⁸ Jiisusi annuraijaqpaat uligjuamik aupallariktumik atitillugu.

²⁹ Uqpiujanik kakillarnaqtunik niaquutiliurlutik niaquanut ilivaat, sullulingmik ajauppialirlugu; saanganut siiqqurlutik mitautigillugu uqaqput, “Niqtuqtauli Juutit angajuqqaarjuangat!”

³⁰ Tivvulukpaat, ajaupiamut sullulingmut niaquagut anauliqpaat.

³¹ Mitautigijariiramijjuk, uligjuanga piiqpaat annuraatuqanginnik atitillugu, aularutiliqpaat kikiakturiaqtuqtlugu.

Jiisusiup Kikiaktuqtauninga

³² Tavvanngat anillutik, angummik katisivut Sairinimiutarmik, Saimuunimik atilingmik; taanna unataqtuksanit aksuruujjaulluni agjaqsititauvuq Jiisusiup sanningajuliksanganik.

³³ Guulgaatamuaramik, atinga tukiqaqtuq “Niaquviniqtalingmik.”

³⁴ Tavvani Jiisusi uainimik qasilinaqtumik ilalingmik imiqtinnasuaqpaat; Jiisusiup uukturamiuk, imirumanngilaa.

³⁵ Tavvani kikiakturiiramijjuk; annuraangit pitaarinasuaqpait nalauttaarutinik atuqtlutik.

³⁶ Tavvani iksivaaliqput Jiisusi qaujisarlugu.

³⁷ Niaqungata qulaagut titiraqsimajunik ilisiviuvuq kikiaktuqtaujjutinganik nalunaiqsijunik, imailijunik, “Taanna Jiisusi, Juutit angajuqqaarjuangat.”

³⁸ Angutiingnik marruunik pirajaktiingnik kikiaktuqtauqatiqaqpuq, aippanga taliqpiani, aippangali saumiani.

³⁹ Tavvuuna aqqusaaqtut iliqitamaarlutik uqarnirluaqattaqput Jiisusimut: uqarlutik;

⁴⁰ “Tuksiarvigjuarmik suraktirinialauqtutit ullullu pingajuanni makitikkannirmilugu, ilingnik piulilirit! Guutiup Irnirikpatit, sanningajulingmit aqqalirit!”

⁴¹ Tunirrusiqtitsijittauq angajuqqaangit, piqujaniglu ilisaijit, Juutillu angajuqqaangit, mitautiqarivut uqarlutik:

⁴² “Asini piulilauqpait; imminik piulijunnanngilaq. Isarialimiunut angajuqqaarjuanguguni maanna sanningajulingmit aqqalirli, tavva ukpirilirniaqpavut.

⁴³ Guutimik tatiqarmat; maanna, takunnaliqta Guutimut piulijautillugu, saputijumaguniuk; uqalaurmat, ‘Guutimut Irniuvunga.’”

⁴⁴ Taakkuaktauq pirajaktiik kikiaktuqtauqatigisimajangikta taimaatsainnaq uqarnirluutigigivaak.

Jiisusiup Tuquninga

⁴⁵ Ulluq qitiraliqtillugu nunarjuaq taaqsilauqpuq, ikarranik pingasunik taalauqpuq.

⁴⁶ 3-muaqtillugu, Jiisusi qaigalaaliqpuq nipiqquqtulluni, “Ilai, Ilai, laama sapaqtaani?” Imaak tukilik, “Guutiga, Guutiga, suuq qimakpinga?”

⁴⁷ Inuit tavvaniittut ilangita tusaramijjuk uqaqput, “Una Ilaijjamik qaiqujiliqtuq!”

⁴⁸ Ilangat tavvainnaq ullagluni puvaujamik tigusivuq uainimik ilasimajumut itsaktirluniuk, ajauppiamut kapummitaarlugu, Jiisusi imiqtippaa.

⁴⁹ Ilangit uqaqput, “Utaqqikainnaqta, Ilaijjaup piulijaqturniangmangaagu!”

⁵⁰ Jiisusi nipiqquqtulluni qaigalaakkannirami anirniqarunniiqpuq.

⁵¹ Takugit, taalutarjuaq tuksiarvigjuarmiittuq qupivuq marruulilluni, qulaanit ataanut tikilluni; nunarjuarlu sajukpilukpuq, ujaraillu siquttiqtlutik.

⁵² Iluvit matuiqput, unuqtullu Guutiup inuqutingit tuqungajut makipput inuulirlutik.

⁵³ Iluvirnit anillutik; Jiisusiup tuqungajunit makinningata kinguningagut, iglugasangnuaqput ijjurnaittumut; tavvani inungnit unuqtunit takujauqattalauqput.

⁵⁴ Unataqtuksait angajuqqaangatta unataqtuksaillu tavvaniiqattigijangita Jiisusimik qaujisaqtut, nunaup sajukpillangninga asingillu tamakkua piniarnirijaujut takugamigit, angijumik kamalirlutik uqaqput, “Una ilaak Guutiup sulijumik Irnirivaa!”

⁵⁵ Tavvanittauq arnaqtaqalaurivuq amisunik, ungasigijangani takunnaaqtunik, Jiisusimik maliksimajut Galiliaminngaaqtillugu, ikajulauqtunik Jiisusimik;

⁵⁶ taakkua ilangit ukuanguvut; Miari Maaktaliini, Miarilu Jaimisiup Juusipiullu anaananga, Sipitiullu nulianga.

Jiisusiup Iluviqtauninga

⁵⁷ Unnungmat, angut ajuqsanngittuq Arimatiamiutaq tavvunngaqpuq; Juusipimik atilik, taannattauq Jiisusimik maliktinut ilagijauvuq.

⁵⁸ Taanna Pailaatuusimualauqpuq Jiisusiup timinganik pititaujumalluni. Pailaatuusi tilisivuq Jiisusiup timinga Juusipimut tunijauqullugu.

⁵⁹ Juusipiup Jiisusiup timinga pigamiuk, qallunaaqtamut nutaamut qakuqtamut immusiqpaa,

⁶⁰ iluviksaminut nangminirminut ilivaa, qaiqtumi iluliuqsimajaminut; matuksanganiglu ujaragjuarmik aksakaatsilluni matullugu, qimakpaa.

⁶¹ Miari Maaktaliini taassumalu asia Miari tavvani iksivavuuk, iluvirmut saanngallutik.

Qaujisaqtit Iluvirmi

⁶² Qautillugu, Sapatiuliqtillugu, tunirrusiqtitsijit angajuqqaangit Paarisillu Pailaatuusimik katimaqatiqaliqput,

⁶³ uqarlutik, “Angajuqqaaq, iqqaigatta tainna saglutujualuk suli inuulluni uqalaurmat, ‘Ullut pingajuanni makittumaaqpunga inuulirmilunga.’

⁶⁴ Taimaimmat tilisilaurit taassuma iluvinga qaujimajaunasuaqtauqulugu ullut pingasut naalaunnginninginni, taassuma ilinniaqtingit timinganik tigligiaqtuqunagit, inungnullu uqaqattaliqunagit, tuqungajunit makisimanirarlugu, tamanna uiviriksiniq sivuninganit piunnginniqsauliqunagu.”

⁶⁵ Pailaatuusiup uqautivait, “Qaujisaqtiqutiqarassi unataqtuksanik; tilisilirissi, iluviq kamagitsiarlugu qaujimanasuaqtautiliqsiuk.”

⁶⁶ Tavvanngat anigamik, iluvirmuarlutik iluviq attunngiqsuqpaat nalunaikkusirlugu naqijjutimik taanna ujarak, qaujisaqtit qaujimanasuarnialiqtillugit qimaktauvut.