ᒫᑎᐅᓯᐅᑉ ᐊᒡᓚᖏᑦ 26 - Aglait Ijjurnaittut

Jiisusiup Tuqutaksanguqtitauninga

¹ Jiisusili tamakkuninga ajuriqtuijjutigijaminik pijariirami, ilinniaqtiminut uqaqpuq,

² “Qaujimavusi ulluuk marruuk aniguqpatik Qaangiqtauvingmik nalliunniqsiurviunialirmat, Inuup Irninga tunijaulaaqpuq kikiaktuqtauqullugu.”

³ Taissumani tunirrusiqtitsijit angajuqqaangit Juutillu angajuqqangit katinngaliqput, Kaiapaasiup iglurjuangani tunirrusiqtitsijit angajuqqaammaringatta,

⁴ Jiisusimik tigusijumallutik isumaqatigiikput qaujijauttailillutik tuqutautittumallugu.

⁵ Imaak uqaqatigiikput, “Nalliunniqsiurnautillugu tigujariaqanngilavut, inuit uimajaaluaqunagit.”

Jiisusiup Nunami Pitanimi Uqsuqtiqtauninga Tipitsiariktumut

⁶ Jiisusili Pitanimiitillugu Saimuuniup iglungani, kappiagijaujumik paqtilauqtumi.

⁷ Arnamit upaktauvuq pullaujarmik akitujumik tipitsiariksaummik naksaqtumit, taassuma Jiisusiup niaquanut kuvivaa nirivingmiitillugu.

⁸ Ilinniaqtingitali tamanna takugamijjuk, angijumik akauksarunniiqput uqarlutik, “Sungmat atunngittumut atuqtauvaa?

⁹ Taanna tipitsiariksaut niurrutaugajaruni kiinaujaqtaarutaugajaqpuq unuqtualungnik, tunijaungaarlutik ajuqsaqtunut!”

¹⁰ Jiisusiulli qaujimagamigit, uqautivait, “Sungmat arnaq agviarasuaqpisiuk? Taassuma piujumik naammatsiaqtumiglu piniarvigivaanga.

¹¹ Taimanngalimaaq ajuqsaqtunik najuqtiqainnarniaqpusi, kisianili uvannik najuqtiqainnarnianngilasi.

¹² Taassuma arnaup timinnut tipitsiariksaummik kuvisinirminut upalungaijaqpaanga iluviqtauniksannut.

¹³ Sulijumik uqautivassi, nanituinnalimaaq nunarjuarmi uqausit tusaruminaqtut uqausiuliraangata, taassuma arnaup piniarnirijanga uqausiuqattarumaaqpuq iqqaumajaujjutigilugu.”

Juutasiup Angirninga Jiisusimik Pijautitsijumalluni

¹⁴ Tavva ilinniaqtit 12 ilangat, Juutasi Iskariatimik atilik, tunirrusiqtitsijit angajuqqaanginnuaqpuq

¹⁵ apirilluni, “Sunamik uvannut tunisigajaqpisi Jiisusi ilissinnut pijautikukku?” Taakkua 30-nik siulvirinik tunisivut Juutasimut.

¹⁶ Tavvanngat pigiarluni Juutasi piviksaqsiuliqpuq Jiisusimik pijauktitsiviksaminik tunirrusiqtitsijinut.

Jiisusiup Ilinniaqtiminik Niriqatiqarninga Qaangiqtauvikksiutimik

¹⁷ Puvallaqqutiqanngittunik niaquujaqturviup ullungita sivulliqpaangani ilinniaqtingit Jiisusimuarlutik apirivaat, “Nani atuinnaruiquvitiguut Qaangiqtauvingmik niriqatigiigviksattinnik?”

¹⁸ Jiisusiup uqautivait, “Iglugasangnut ailirissi, angummut tavvaniittumut uqarlusi: ‘Ajuriqtuiji uqarmat, piviksara nalliutingmat; iglungni Qaangiqtauvingmik niriqatigiingniaqpugut ilinniaqtikka ilagilugit.’”

¹⁹ Ilinniaqtingit taimailiuqput Jiisusiup uqausirijangatut, aaqqiksuillutik Qaangiqtauvingmik niriqatigiigviksamik.

²⁰ Unnungmat, Jiisusi ilinniaqtini 12 niriqatigiglutik iksivaliqput;

²¹ nirilutik, Jiisusiup uqautivait, “Sulijumik uqautivassi, ilassinnut pijautitauniaqpunga.”

²² Ilinniaqtingilli qiksaammarilirlutik Jiisusimut atunit apiriqattaliqput, “Ataniq, uvannik pinngikkaluaqpit?”

²³ Jiisusiup kiuvait, “Niaquujamik puugutarmut misuksiqatigijama, taassuma pijauktinniaqpaanga.

²⁴ Inuup Irninga pinasuarviuniaqpuq Guutiup uqausinginni uqausiusimaninga maliglugu, kappiannamigli Inuup Irninganik pijautitsiniaqtuq! Akauniqsaugajalauqpuq taanna irniangulaungikkuni!”

²⁵ Juutasilu pijaukkainiaqtuq uqaqpuq, “Raappai uvannik pinngikkaluaqpit?” Jiisusiup uqautivaa, “Tavva uqariiqputit.”

Ataniup Unnugummitarninga

²⁶ Suli niriqatigiiglutik, Jiisusi niaquujamik tigusivuq, qujalilluni tuksiutigamiuk, niaquujaq avikpaa, ilinniaqtiminut tunillugu uqaqpuq, “Tigulugu nirisiuk, tavva timiga.”

²⁷ Amma imiut tiguvaa, qujalijjutigijariiramiuk ilinniaqtiminut tunivaa, uqarluni, “Tamassi tavvanngat imirissi;

²⁸ tavva auga angirutiup nalunaikkutanga, kuvijaujuq amisut ajurningita isumagijaujunnaiqtaujjutiksanginnut.

²⁹ Uqauppassi uainimik imikkannirniarunniiqpunga ulluq nalliutiqqaaqtinnagu nutaamik imiqatigiigviksavut Ataatama Ataniuvingani.”

³⁰ Pisirmik inngiriiramik, tavvanngat anivut qaqqamut napaaqtulingmut uqsuksaujunnaqtunik paurngaqasuumut.

Jiisusiup Uqausiqarninga Piitturuusimut Saglujjutauniarnirminik

³¹ Tavva Jiisusiup uqautivait, “Maanna unnuk tamassi qimaaniaqpusi qimaglusinnga; aglangni uqaqsimangmat, ‘Paiqsiji tuqunniaqpara, siipiqutingillu namutuinnaq siammangniaqput.’

³² Tuqungajunilli makisimaliruma, sivunissinni Galiliamualaaqpunga.”

³³ Piitturuusiup uqautivaa, “Ukualimaat ilingnik qimaigaluaqpata, uvanga qimalauqsimanianngilagit!”

³⁴ Jiisusiup uqautivaa, “Sulijumik uqautivagit, maanna unnuk, angutiviaq nilliqqaaqtinnagu, pingasuiqturlutit qaujimannginnirarniaqparma.”

³⁵ Piitturuusiup kiuvaa, “Tuquqatiginiaraluarukkit aglaat qaujimannginnirarnianngilagit.” Ilinniaqtittauq taimailiqataugivut.

Jiisusiup Tuksiarninga Gitsimanimi

³⁶ Tavva Jiisusiup ilinniaqtini ilagillugit Gitsimanimuaqput, ilinniaqtini uqautivait, “Tavvani iksivagissi, avunga qanittumut tuksiariaqturniarama.”

³⁷ Ukua ilagilauqpait Piitturuusi Sipitiullu irningik marruuk, tavva Jiisusi qiksaangnirmut angijurjuamut uqumaiksarnirmullu tikitauvuq.

³⁸ Ilagijani uqautivait, “Tarnikkut angijumik uqumaiksarnirmut tikitaugama, aglaat tuqutuinnariaqaqtuujaalirama; tavvaniigissi qaujisaqatigilunga.”

³⁹ Tauvunngakkannituinnaqtluni maniqqamut paammagluni tuksiaqpuq, “Ataataak, ajurnanngippat, una imiut uvannit piilauruk! Pijumajaraunngitturli, pijumajailli aturli.”

⁴⁰ Ilinniaqtiminut pingasunut utirami; siniktut upakpait; Piitturuusi uqautivaa, “Qaujisaqatigijunnanngilassinngaa ikarramik atausirmingunnit?

⁴¹ Qaujisarisi tuksiarlusilu piunngittumut pijumisaaqtaunirmut tikiqunasi; anirniq pijumatsiaraluaqpuq, timili sanngiippuq.”

⁴² Suli aippanganik, Jiisusi tuksiariaqtukkanniqpuq uqarluni, “Ataataak, una imiut uvannit piirunnanngippat imirlugu kisianiukpat, pijumajait aturli.”

⁴³ Ilaminut utirmigami; siniktut upakpait; aglaat uisajunnaillilaurmata uirngarnirmut.

⁴⁴ Tavva qimakkillugit, pingajungannik tuksiariaqturivuq, uqausirnik taakkuningatsainnaq aturluni.

⁴⁵ Tavva kinguningagut ilinniaqtiminut utirami uqautivait, “Suli sinikpisi taqaiqsirlusilu? Takugit, ikarraq nalliutivuq; Inuup Irningata pijaukkaqtauvinga inungnut ajuqtulijunut tigujauluni.

⁴⁶ Makillusi, pisuliqta; takugit, angut uvannik pijautitsijuq tikiliqpuq.”

Jiisusiup Tigujauninga

⁴⁷ Jiisusi suli uqallaktillugu, Juutasi ilinniaqtit 12 ilangat, tikippuq, ilaqarluni inugasagjuanik sugiusijaqtunik savigjuanik anautaniglu, tilijausimajunik tunirrusiqtitsijit angajuqqaanginnut, Juutillu angajuqqaanginnut.

⁴⁸ Pijautitsijuuq inugasagjuat qaujijjutiksanginnik uqautisimavait, “Angut kuniktara, taannauniaqpuq pijumajasi; taanna tiguniaqpasi!”

⁴⁹ Juutasi Jiisusimut upagutilluni uqautivaa, “Raappai, saimmaqtitaugit!” Iqillugulu kunikpaa.

⁵⁰ Jiisusiup kiuvaa, “Ilannarijaak, pijariaqaqtarnik pilirit.” Tavva angutit upagutillutik Jiisusi tiguvaat, atsungirlugu.

⁵¹ Jiisusiulli ilagijangita ilangat savigjuarmik amusilluni, tunirrusiqtitsijit angajuqqaammaringatta pijinga siutingagut ulimaqpaa, siutinga nakallugu.

⁵² Tavva Jiisusiup uqautivaa, “Savigjuat puunganut utiqtiliruk; savigjuarmik atuqtulimaat savigjuarmut tuqujurmaaqput.

⁵³ Qaujimanngilatiit Ataataga ikajuqtaujumalunga uqautigukku, tavvainnaq tilisijunnarmat aingilinik 12-liqangajunik Lijjannik unurniqsaujunik?

⁵⁴ Taimaititsigumali, qanuq Guutiup uqausingit nalautsigajaqpaat, tamanna piniarnirijaujuq taimaitsariaqarnirarlugu uqaqsimajut?”

⁵⁵ Tavva Jiisusi uqaqpuq inugasagjuanut, “Savigjualijarlusi anautalijarlusilu uvannut qaijariaqaqpisi tigujauqullunga, pirajaksimajutitut? Qautamaat tuksiarvigjuarmi iksivaarlunga ajuriqtuiqaqtalauqpunga, tiguqattalaunngilassinnga.

⁵⁶ Tamakkualimaat piniarniuvut, nalauttaijuup uqausirilauqtangit nalautsititauqullugit.” Ilinniaqtilimaangittali Jiisusi qimappaat qimaallutik.

Katimajirjuat Saanganiititauninga Jiisusiup

⁵⁷ Tavva Jiisusimik tigusijut Kaiapaasiup iglunganuarutivaat, tunirrusiqtitsijit angajuqqaammaringanut, tavvani piqujanik ilisaijit, Juutinullu angajuqqaujut katinngaqatigiingmata.

⁵⁸ Piitturuusili ungasigijaaniilluni malikpuq, tunirrusiqtitsijit angajuqqaammaringata iglungata avaluata iluanut tikilluni, tavvunngalu tikinnami kamajinut iksivaqatauliqpuq, qaujisarasuarluni Jiisusi qanuiliuqtauniarmangaat.

⁵⁹ Tunirrusiqtitsijilli angajuqqaangit katimajirjualimaallu saglullutik pijjutiksaqsiurasuaqput Jiisusimik tuqutautitsijumallutik;

⁶⁰ nanisijunnanngilalli pijjutiksamingnik, amisut saglullutik uqarasuqattaraluaqput, nanisijunnaratigli pijjutiksallaringmik. Kingulliqpaamigli inuuk marruuk tamaunngarivuuk

⁶¹ uqarlutik, “Una angut uqalauqtuq, ‘Guutiup tuksiarvigjuaqutinga siqumittunnaqpara, ulluilli pingajuanni utiqtillugu nappaqtittunnarivara.’”

⁶² Tunirrusiqtitsijit angajuqqaammaringa nikuvilluni Jiisusimut uqaqpuq, “Tamakkununga pasijaujjutigijarnut kiujjutiksaqanngilatit?”

⁶³ Jiisusili nillinngilaq. Tavva tunirrusiqtitsijit angajuqqaammaringatta uqarvigikkanniqpaa, “Guutiup tuqusuittuup atingani uqaqullariliqpagit, uqautilauqtigut Christuusiungmangaaqpit, Guutiup Irninga.”

⁶⁴ Jiisusiup kiuvaa, “Tavva uqaqputit. Tamassili uqautivassi, tamatuma kingurngani Inuup Irninga takujumaaqpasi pijunnarniup taliqpiani iksivajuq, qilaullu nuvujangitigut tikiliqtillugu.”

⁶⁵ Tavva tunirrusiqtitsijit angajuqqaammaringa tamatuminga tusarami annuraani alikpait uqarluni, “Guutimik uqarnirluutiqaqpuq! Qaujisimajumik tusakkanniriaqarunniiqpugut, tavva tusaaqpasi Guutimik uqarnirluutiqaqtillugu.

⁶⁶ Qanurli isumavisi?” Taakkua kiuvaat, “Pasijaksaunirmut tuqutaksauvuq.”

⁶⁷ Tavva Jiisusi kiinangagut tivvulukpaat, tigluglugulu; ilangitali kiinangagut patikpaat,

⁶⁸ uqautillugu, “Nalauttaliqtigut Christuusi! Kinamuut tigluktauvit!”

Piitturuusiup Jiisusimik Qaujimannginnirarninga

⁶⁹ Piitturuusi iksivalauqpuq tunirrusiqtitsijit angajuqqaammaringatta iglungata avaluata iluani. Tunirrusiqtitsijillu angajuqqaammaringata pijingata arnaup upagluniuk uqautivaa, “Ivvittauq Jiisusi Galiliamiuq ilagilauqpat.”

⁷⁰ Taakkua tavvaniittulimaat tusaatillugit, Piitturuusi qaujimannginniraqpuq, uqarluni, “Qaujimanngilanga uqausirijarnik.”

⁷¹ Tavvanngat aniliqtillugu, pijikataattauq arnaup uqaqqaujuup asiata takugamiuk, qanigijaminiittunut uqaqpuq, “Una Jiisusimik Naasariitimiumik ilaqalauqtuq.”

⁷² Piitturuusi qaujimannginnirarluni uqarivuq, “Sulitsiaqpunga angut taanna qaujimanngimmarikpara!”

⁷³ Akuniuluaqtinnagu nangiqtut ilangatta Piitturuusi upaglugu, uqautivaa, “Taakkunangat ilagijauvutit, uqallausiqpit nalunailingmatit!”

⁷⁴ Tavva Piitturuusi uqaqpuq, uqavigasuarluni, “Sulillarikpunga Guutiup sugiarniaqpaanga sulinngikkuma! Una angut qaujimanngitsiaqtara!” Tavvainnaq angutiviaq nilliqpuq,

⁷⁵ Piitturuusi iqqailiqpuq Jiisusiup uqautilaurmagu, “Angutiviaq nilliqqaaqtinnagu, pingasuiqturlutit qaujimannginniralaaqparma.” Piitturuusi tavvanngat anilluni, qiavigjualiqpuq ugguarnirmut.