ᒫᑎᐅᓯᐅᑉ ᐊᒡᓚᖏᑦ 25 - Aglait Ijjurnaittut

Arnait Qulit Silatujut Silaittullu

¹ “Guutiup Ataniuvinga ajjiqarunnaqpuq arnanik qulinik naniruamingnik naksarlutik uiksamik parriaqtunik.

² Taakkua tallimat silaittuuvut, tallimallu silatullutik.

³ Silaittut naniruamingnik naksaqput, uqsuksaggiratik,

⁴ silatujulli naniruamingnik uqsuksamingniglu naksaqput.

⁵ Uiksaq tikinnasaalirmat, arnait najangaqattaliqput sinilirlutik.

⁶ “Unnuaq qitiraliqtillugu nipiqaqtuqaliqpuq, ‘Takugit uiksaq tikiliqpuq! Qailirissi parriarlugu.’

⁷ Arnalimaat tupakkamik naniruamingnik ikitsivut.

⁸ Silaittut silatujunut uqaqput, ‘Uqsuksassinnit tunisivigitigut, naniruavut palilirmata.’

⁹ Silatujulli kiuvut, ‘Uqsuksavut amigatuinnariaqarmata avigasukkutigu; niuvirvingnut uqsuksassinniq nangminiq niuvirialirissi.’

¹⁰ Arnait silaittut niuviriaqsimaliqtillugit; uiksaq tikippuq, arnait tallimat upalungaiqsimajut katititaujut nirivigjuarvinganut itiqatigivaat; ukkuangat tavva ukkuaqtauvuq.

¹¹ “Kinguningagulli arnait ilangit tikipput, uqarlutik, ‘Ataniq! Ataniq! Ukkuirutitigut.’

¹² Uiksaulli kiuvait, ‘Sulijumik uqautivassi, kinakkuungmangaassi ilitarinngilassi!’

¹³ “Taimaimmat qaujisarissi, ulluq ikarrarlu qaujimannginnassiuk.”

Ajjiujut Pijiit Pingasut

¹⁴ “Guutiup Ataniuvinga ajjiqarunnarivuq angummik angirraminik qimainialiqtumik ungasiktumut aullarniaqtumik; pijini qaiquvait piqutilimaaminut kamajiuqullugit angajuqqaannguqtippait;

¹⁵ atuni pijunnaqtanginnik pijaksaqtaaqtippait; ilangat kiinaujanik 5,000-nik tunisivigivaa, ilangallu 2,000-nik, ilangallu 1,000-nik tunisivigivaa. Tavva ungasiktumut aullaqpuq.

¹⁶ Piji kiinaujaqtaaqtitaujuq 5,000-nik tavvainnaq atuqtuaqtautippait; kinguningagullu kiinaujaqtaakkanniqpuq asinginnik 5,000-nik.

¹⁷ Taimaatsainnaq piji kiinaujaqtaalauqtuq 2,000-nik kiinaujaqtaakkannirivuq asinginni 2,000-nik.

¹⁸ Pijili kiinaujaqtaaqtitaulauqtuq 1,000-nik, nunamik itiqsaliurilluni angajuqqaangata kiinaujangit ijiqpait.

¹⁹ “Tamatuma kinguningagut akuni nipamalaurluni pijit angajuqqaangat utiqpuq, kiinaujanginnik qaujisaqatigiliqpait.

²⁰ 5,000-nik kiinaujaqtaalauqtuq qaivuq, asinginnik 5,000-kannirnik tunisivuq, uqarluni, ‘Angajuqqaak, kiinaujanik 5,000-nik tunisivigilauravinga, takugit, 5,000-nik ilakkannilauqpakka.’

²¹ Angajuqqaangata uqautivaa, ‘Naammagivagit pijiullutit pinasuatsiaqtutit suqusijuittuugavit; kiinaujanik mikijunik suqusijuittuullutit kamatsialauravit, maanna kiinaujanik anginiqsanik kamajinnguqtinniaqpagit; qailutit angajuqqaat quviasuqatigiliruk.’

²² Tavva piji kiinaujanik 2,000-nik tunisiviusimajuq qaigivuq uqarluni, ‘Angajuqqaak, kiinaujanik 2,000-nik tunisivigilauravinga; takugit 2,000-kannirnik ilakkannilauqpakka.’

²³ Angajuqqaangata uqautivaa, ‘Naammagivagit pijiullutit pinasuatsiaqtutit suqusijuittuugavit; kiinaujanik mikijunik suqusijuittuullutit kamatsialauravit, maanna kiinaujanik anginiqsanik kamajinnguqtinniaqpagit. Qailutit angajuqqaat quviasuqatigiliruk.’

²⁴ Tavva piji kiinaujaqtaalauqtuq 1,000-nik qaigivuq, uqarluni; ‘Angajuqqaak, qaujimagakkit iliranaqtutit; piruqtunik katiqsuivakkavit kanngaqsulaunngitarnik, niaquujaksaniglu katiqsuivaglutit kanngaqsuutigilaunngitarnik.

²⁵ Sivuuralirama, kiinaujait ijiriaqtulauqpara nunamut. Takugit, tavva piqutitit pilikkit.’

²⁶ Angajuqqaangata uqautivaa, ‘Pijitsiavaunngittutit iqiasuktutit! Qaujigavinga piruqtunik katiqsuivakkama kanngaqsulaunngitannik, niaquujaksaniglu katiqsuigama kanngaqsuutigilaunngitannik?

²⁷ Taimali kiinaujaqutikka kiinaujakkuvingmut iligajalauraluaqpatit qiturngiuqtuksaliarilugit, tikikkumalu nangminikka tigulirajaqpakka ilaqaliqtillugit.

²⁸ Taimaimmat kiinaujait pisimajangit tigujaulirlit, tunijaulutit 10,000-nik kiinaujaqaqtumut.

²⁹ Piqaqtut tunisiviukkannirniaqput, piqalualiqullugit; piqanngittulli, aqsaaqtauniaqput mikijumik pisimagaluaqpata.

³⁰ Taanna piji atuutiksaqanngittuq igitaulirli silamut taaqturjuarmut; tavvani qianiqarumaaqput aglirulaarlutiglu.’”

Iqqaqtuqtauniq Kingulliqpaaq

³¹ “Inuup Irninga angajuqqaarjuanguluni tikikkuni, aingililimaat ilagilugit, iksivautarjuarminut pinnarnaqturjuarmut ingittumaaqpuq.

³² Inuuqatigiigjuanit tamainnit pisimajut saanganut katiqsuqtaujumaaqput, tavvani avitittumaaqpait marruililugit suurlu siipiliriji avititsivangmat siipinik guutsiniglu.

³³ Siipit taliqpingminuarumaaqpait, guutsilli saumingminuaqtillugit.

³⁴ Tavva angajuqqaarjuaq taliqpingminiittunut uqarumaaqpuq, ‘Qaigissi, Ataatama nagliktangit, Ataniuvik kingurngutiliqsiuk upalungaijaqtausimajuq ilissinnut nunarjuap pinnguqtitaulirninganit;

³⁵ kaaktillunga niritilaurassinnga, imiruktillunga imiqtilaurassinnga, niurruangutillunga tunngasuktilaurassinnga.

³⁶ Annuraaqanngitillunga annuraaqtilaurassinnga, qanimatillunga pulaarialaurassinnga, tigujausimavingmiitillunga upalaurassinnga.’

³⁷ Tavva iluaqtut kiujumaaqpaat, ‘Ataniq, qanga kaaktillutit niritilauqpattigit qangalu imiruktillutit imiqtilauqpattigit?

³⁸ Qangalu niurruangutillutit tunngasuktilauqpattigit, qangalu annuraaqaqtinnak annuraaqtilauqpattigit?

³⁹ Qangaluunniit qanimatillutit tigujausimavingmiitillutilluunniit takulauqpattigit pulaalauqpattigillu?’

⁴⁰ Tavva angajuqqaarjuap kiujumaaqpait, ‘Sulijumik uqautivassi, qatanngutima mikinniqpaarijanginnut pinasuarviqaraangassi, tamatuminga pinasuarvigilauqpassinnga!’

⁴¹ “Tavva saumingminiittunut uqarumaarivuq, ‘Tamaaniinngilaurissi Guutimut narrunaqtusi, ikumarjuarmut nungusuittumuarissi upalungairutausimajumut Saataanasimut aingiliqutinginnullu;

⁴² kaaktillunga niritilaunnginnassinnga, imiruktillunga imiqtilaunginnassinnga;

⁴³ niurruangutillunga tunngasuktilaunnginnassinnga, annuraaqaqtinnanga annuraaqtilaunnginnassinnga; qanimatillunga tigujausimavingmiitillunga pulaarialaunnginnassinnga.’

⁴⁴ Tavva taakkua kiujumaarivaat, ‘Ataniq, qanga takulauqpattigit kaaktillutit imiruktillutillu niurruangutillutit annuraaqanngitillutillu qanimatillutit tigujausimavingmiitillutilluunniit, ikajulaunngilattigit?’

⁴⁵ Tavva kiujumaaqpait, ‘Sulijumik uqautivassi, mikinniqpaujut pinasuarviginnginnassiuk, tavva uvannik pinasuarviqalaunngilasi.’

⁴⁶ Taakkua sugiaqtauvingmut nungusuittumut pititaujumaaqput, iluaqtulli inuusirmut nungusuittumut pititauliqtillugit.”