ᒫᑎᐅᓯᐅᑉ ᐊᒡᓚᖏᑦ 24 - Aglait Ijjurnaittut

Jiisusiup Uqausiqarninga Tuksiarvigjuap Siqumitaujumaarninganik

¹ Jiisusi tuksiarvigjuarmit aningmat, ilinniaqtingita upaglugu uqautivaat takuqullugu tuksiarvigjuap sanasimatsiarningani.

² Jiisusiup uqautivait, “Tamakkualimaat takuminarningit takugaluaqtasi, sulijumik uqautivassi, tavvaniittut ujarait inimini qaliriiktuqarunniirumaaqput; iluunnalimaanga siqumitaujumaarmat.”

Kappianaqtut Akiraqtuqtauniillu

³ Jiisusi ingimmat qaqqamut uqsuksaujunnaqtunik paurngarkasuunik napaaqtulingmut, ilinniaqtingita upakpaat taakkutuangullutik, apirillugu, “Uqautilauqtigut, tamakkua qanga nalliutijumaaqpat qanuq tikivviksait nalunaikkutaqarumaaqpa? nunarjuallu isulivviksanga?”

⁴ Jiisusiup kiuvait, “Qaujisatsiaqattarissi, tammaqtitauqunasi nalliannut.

⁵ Amisut uvannik pijjutiqarnirarlutik tikittumaarmata, uqarlutik, ‘Christuusiuvunga,’ unuqtuniglu tammaqtitsijumaaqput.

⁶ Unataqtunik qanigijatsinni tusaajumaaqpusi, ungasigijassinnilu unataqtut uqausiuninginnik tusajumaaqpusi; kappiasuktailigissi; taimaittuqariaqarmat, kisiani tamakkua nalunaiqsinngilat silarjuap naggatiksanganik.

⁷ Inuuqatigiigjuat unatarumaaqput inuuqatigiigjuanut asimingnut, angajuqqauvillu angajuqqauvingnut asimingnut unataqattautijumaarivut, kaangnaqturjuaqarumaaqpuq nanituinnaq nuna naukkutuinnaq sajukpiluqattarumaaqpuq.

⁸ Tamakkuali arnaup irnisuliqtuup ikpingnialirningatut taimaituinnaqput.

⁹ “Kinguningagut tigujaujumaaqpusi kappianaqtumiititaulusi, tuqutaulusilu; inuuqatigiigjualimaanut uumigijaujumaaqpusi pijjutigilunga.

¹⁰ Taimaittumiiliqtillusi amisut ukpirnirmik sapilirumaaqput; immingnullu pijaukkaqattautijumaaqput, immingnut uumigiqattautilirlutik.

¹¹ Nalauttaijunnguaqtut sulinngittut saqqittumaaqpuq unuqtullu tammaqtittumaaqpait.

¹² Ajuqtuliniup pivallianinganut, inuit naglingningit niglivalliajumaaqput.

¹³ Ukpirnimigli tigumianginnarluni isuanut tikittuq taanna piulijaujumaaqpuq.

¹⁴ Uqausit tusaruminaqtut Guutiup Ataniuvinganik uqausilit ajuriqtuijjutaujumaaqput nunarjualimaami nanituinnaq, suliningalu saqqititauluni inuuqatigiigjuanut; tavva silarjuup naggataa nalliutijumaaqpuq.”

Tuksiarvigjuap Takuminaitturjuamik Ilisiviuninga

¹⁵ “Takugussi tuksiarvigjuarmi takuminaitturjuamik ilisiviuninganik nalauttaijuup Taanialiup uqausirisimajanganik, ijjurnaittuvingmiittumik (atuaqsijuup tukisijariaqaqtanga),

¹⁶ tavva Juutiamiittut qimaajariaqarumaaqput qaqqanut;

¹⁷ igluup qaanganiittuq piqutiminik angirraminit aiktlirasuktailili;

¹⁸ piruqsiivingmiittuq angirraminut uligjuaminik aiktlirasuktailili.

¹⁹ Aksualuk kappianarumaaqpuq arnanut nutaraksaqaqtunut mikijulaaniglu qiturngalingnut!

²⁰ Guutimut tuksiarissi qimaaviksasi ukiumi nalliutiqunagu Sapatimiluunniit.

²¹ Kappianaqtuq tamanna ajjiqarrumaanngimmat atuqsimajatsinnit, silarjuup pigiarninganit ullumimut tikillugu, ajjiqarnianngilaq tamatuma kingurngagut.

²² Ulluit taikkua Guutiup naigligianngippagit, nalliannigluunniit inungmik annaktuqarajanngilaq; niruaqsimajanili pijjutigillugit Guutiup ulluit naigligiarumaaqpait.

²³ “Nalliannut uqaujaugussi, ‘Takugit una tavva Christuusi!’ Uvvalu ‘Avani taika!’ Taimailijut ukpiriniarasigik.

²⁴ Christuusiuniraqtut sulinngittut, nalauttaijuuniraqtullu sulinngittut saqqittumaarmata; angijunik kamanaqtuliqattarlutik nalunaikkutarniglu saqqijaaqtitsiqattarumaarmata, tammaqtitsinasuarlutik, aglaat niruaqtausimajut ajurnanngippata tammaqtinnasuarlugit.

²⁵ Takugit, tamakkuninga uqautivassi sivuningagut, suli atulauqtinnagit.

²⁶ “Uvvalu, uqaujjaugussi, ‘Takugit, inuqanngittumiippuq,’ tauvunngaqtailigissi; uqaqpata, ‘Takugit, uvani iglurusirmi ijiqsimavuq,’ ukpiriniarasigik.

²⁷ Suurlu qilangmi qaummaallak ikaasuungungmat siqiniup nuivianit nipivianut, taimaittumaarivuq Inuup Irninga tikiliqpat.

²⁸ “Nanilimaaq tuqungajuqaliraangat, tingmiarjuat niqitusuut timivinirmut katisuunguvut.”

Inuup Irningata Tikinniksanga

²⁹ “Ulluit kappianaqtut kingunitsiangagut, siqiniq taaqsijumaaqpuq, taqqirlu qaumajunniirumaaqpuq, ulluriallu qilangmit katagumaaqput, silaup pijunnarningit inigijamingni sajukpilugumaaqput.

³⁰ Tavva Inuup Irningata nalunaikkutanga qilangmit saqqittumaaqpuq; inuit iluunnatsiatik nunarjuarmiittut qialirumaaqput, takulirutik Inuup Irninganik tikiliqtumik qilaup nuvujangitigut pijunnaqturjuamik niqturnaqturjuarmiglu.

³¹ Tavva tittulautirjuat nipingit nillirumaaqput, aingiliqutini tilijumaaqpait nunarjualimaamut nunaup anuraarvigisuunginnut sitamanut, taakkua katiqsijumaaqput taassuma niruaqsimajanginnik nunaup isuanit isuanut.”

Ilisautiksaq Napaaqtuq Pigilingnik Paurngalik

³² “Ilissivigilauqsiuk napaaqtuq paurngalik; avalangajungit piruliraangata tungujuqsillutik uqaujaqtaaqpallialiraangata, qaujimaliqpakpusi aujallarinngusingmat.

³³ Taimaaktauq, tamakkualimaat takulirussigik, qaujimaniaqpusi silarjuup isua qanittuulirmat, pigiatuinnariaqalirluni.

³⁴ Sulijumik uqautivassi, tamakkua nalliuttuksalimaat nalliutijumaaqput maanna kinguvaanguqatigiit makua nungulauqtinnagit.

³⁵ Qilaglu nunalu nungujumaaqpuuk; uqausikkali nungujumaanngilat.”

Kinamigluunnik Qaujimajuqanngilaq Ullunganik Ikarranganiglu

³⁶ “Kinamigluunniit qaujimajuqanngilaq, silarjuup naggatiksangata ullunganik ikarranganigluunniit; aingilit aglaat qilangmiittut qaujimannginnivut, Irniulluunniit qaujimannginnivaa, Ataatama kisimi qaujimavaa.

³⁷ Inuup Irningata tikivviksanga ajjiqarumaaqpuq, Nua inuutillugu piusirijaulauqtutitut.

³⁸ Ulivigjuap sivuningagut inuit nirilauqput imirlutiglu, nulianikput uiniglutiglu, ulluq Nuap itirvia umiarjuamut tikillugu;

³⁹ qaujimalaunngilat ulivigjuarmut tikitauqqaaratik tamarmik nungutaulauqput, taimaittumaarivuq Inuup Irningata tikivviksangani.

⁴⁰ Tamanna nalliutikpat angutiik marruuk piruqsiivingmiittumaaqpuuk; aippaa aullarujjaujumaaqpuq aippaali qimaktauluni.

⁴¹ Arnaak marruuk niaquujaksanik siqqallititsivingmiittumaaqpuuk; aippaa aullarujjaujumaaqpuq, aippaali qimaktauluni.

⁴² Taimaimmat qaujisatsiarissi, Atanisi tikivviksanga ulluq qaujimannginnassiuk.

⁴³ Una tukisisiuk; igluqaqtuq qaujimaguni tigliktiup tigligiaqturvigigajaqtanganik, taanna pigaarajaqpuq tiglikti itiqunagu igluminut.

⁴⁴ Taimaimmat ilissittauq upalungaiqsimajuksauvusi; Inuup Irninga tikittumaarmat ikarrami niriugviginngitassinni.”

Piji Suqusijuittuq Sangusaraitturlu

⁴⁵ “Kina suqusijuittuulluni silatullunilu pijiuvaa? Taanna angajuqqaangata angajuqqaanguqtitanga pijiuqatinginnut, niqiksanginnik tunisiqattaqullugu tunisiviksanga nalliutijaraangat.

⁴⁶ Taanna angijumik saimaqtitaunaqtumiippuq, tikitauguni angajuqqaaminut taimailiutsiaqtillugu!

⁴⁷ Sulijumik uqautivassi, taanna angajuqqaangata angajuqqaannguqtinniaqpaa piqutilimaaminut.

⁴⁸ Pijitsiavaunngitturli isumaliruni, ‘Angajuqqaara suli akunialuk tikijjaanngilaq,’

⁴⁹ pijiuqatini aanniqsiliqpagit, niriqatiqalirluni imiqatiqarlunilu aangajaaqtinik.

⁵⁰ Tavva pijiup angajuqqaanga tikikkajaqpuq ullungmi taassuma niriugviginngitangani ikarramilu qaujimanngitangani.

⁵¹ Tavva angajuqqaangata sugiarlugu igikkajaqpaa, takkurmuuqtut sugiaqtauvigijanganut; tavvani qianiqarajaqput aglirulaarlutik.