ᒫᑎᐅᓯᐅᑉ ᐊᒡᓚᖏᑦ 23 - Aglait Ijjurnaittut

Jiisusiup Iniqtirininga Maliqujinani Piqujanik Ilisaijinik Paarisiniglu

¹ Tavva Jiisusi inugiakturjuanut ilinniaqtiminullu uqaqpuq,

² “Piqujanik ilisaijiit Paarisillu, pijunnaqsititausimavut tukisinaqsititsijiuqullugit Muusisiup piqujanginnik.

³ Taimaimmat naalagiaqaqpasi maliglusiuglu uqausirijalimaanginnik ilissinnut; piniarningilli maligaksarinngilasi; ajuriqtuijjutigijamingnik aturunnanngimmata.

⁴ Nangmagaksanik qilaksuivut uqumaittunik, inuit nangmangniaqtanginnik; nangminirli mikijumigluunniit aktuijumanatik.

⁵ Sunatuinnarnik pinasuaqattaqput inungnut takujaujumatuinnarlutik; Guutiup uqausinginnik titirarvigisimajut qaurutingit talirmiutangillu, takulauqsiuk angijuutialuit! Uligjuangitalu nigjangit takijuutialuit!

⁶ Nirivigjuaqtuqaqtillugu upigijaujut ininginni iniqarumavut, Juutillu ukpirnirmut katimavinginni initsiavauniqpaani kisiani iniqaqpaglutik;

⁷ niuvirvingnilu ikpigijautsiarlutik nilliujjaujumavakput, inungnut Raappaimik taijaujumavaglutik.

⁸ Raappaimik taijaujariaqanngilasi, iluunnasi qatanngutigiituinnarassi, atausituamigli Raappaiqaqpusi.

⁹ Ataatamiglu taisijuksaunngilasi tamaani nunamiittumik, atausituamik Ataataqarassi qilangmiittumik.

¹⁰ Angajuqqaamik taijaujuksaunngilasi, atausituaq angajuqqaarigassiuk Christuusi.

¹¹ Ilissinni angajuqqaanguniqpaujuq taanna pijigijaujuksauvuq.

¹² Imminik angijuruqtittuq taanna mikiglititauniaqpuq, imminiglu mikiglitiqtuq taanna angijuruqtitauniaqpuq.”

Jiisusiup Takkurmuuqtunik Piunngittualuuniraininga

¹³ “Ilissinnut kappiannamik, piqujanik ilisaijit Paarisillu, takkurmuuqtusi! Guutiup Ataniuvingata ukkuanga ukkuaqsimagassiuk inuit itiqunagit; nangminirlu itiqsimanasi, tavvungalu itirasuaqtut agviarasuaqpasi! [

¹⁴ “Ilissinnut kappiannamik, piqujanik ilisaijit Paarisillu, takkurmuuqtusi! Uiggarniit sangiitturniagarillugit piqutinginnik aqsaarassiuk, takunnaqtaujumallusilu takijunik tuksiutiqattaqpasi! Tamanna pijjutigillugu sugiaqtaunisi anginiqsaujumaaqpuq!]

¹⁵ “Ilissinnut kappiannamik, piqujanik ilisaijit Paarisillu, takkurmuuqtusi! Nunakkut ingirravaktusi imakkullu umiaqturlusi ikaaqpaktusi atausikulungmik maliktitaariaqturlusi; maliktitaaraangassi, kappianaqtuvingmuaqtuksannguqtippasi ilissinnit marruaqtilluaqtumik piunnginniqsauliqtillugu!

¹⁶ “Ilissinnut kappiannamik, tautunngittuullusi tasiuqtiujusi! Ajuriqtuiqattarassi, ‘Guutiup tuksiarvigjuaqutinga taiqasiutilugu uqaviktuqaqpat, taanna qilaktausimannginniraqpasi; Guutiup tuksiarvigjuaqutingata guulunga taiqasiutilugu uqaviktuqaqpat, taanna qilaksuqtauniraqpasi.’

¹⁷ Silaittualuuvusi tautunngittusi! Nalliat aturniqsauva guululuunniit, tuksiarvigjuarluunniit guulumik ijjurnaittunnguqtitsijuq?

¹⁸ Amma ajuriqtuivakkivusi, ‘Tunirrusirvik altari tailugu uqaviktuqaqpat, angirutigijaminut qilaktausimannginniraqpasi; tunirrusirvingmulli tunijausimajuq taiqasiutilugu uqaviktuqaqpat, taanna qilaksuqtauniraqpasi.’

¹⁹ Takunnanngillariktusi! Nalliat aturniqsauva? Tunirrutilluunniit, tunirrusirvigluunniit tunirrutinik ijjurnaittunnguqtitsijuq?

²⁰ Taimaimmat, inuk uqavikkuni tunirrusirvik taiqasiutilugu, taanna tunirrusirvik taiqasiutillugu angiqpuq, tunirrutaujulimaallu piqasiutivait;

²¹ tuksiarvigjuarlu taiqasiutilugu uqaviktuq, taanna tuksiarvigjuaq taiqasiutillugu angiqpuq, Guutilu taiqasiutivaa, Guuti tavvaniimmat;

²² inugli qilangmik taiqasiujjiluni uqavikpat, taanna angiqpuq Guutiup iksivautarjuanga taiqasiutillugu, tavvanilu iksivajuq piqasiutigivaa.

²³ “Ilissinnut kappiannamik, piqujanik ilisaijit Paarisillu, takkurmuuqtusi! Tunisiqattaqtusi Guutimut aglaat niqiit mamaqsautingita tallimaujunginnik, makuninga mintit, tiullu, kuminiiniglu, piqujait ajuriqtuijjutingita pijariaqarniqpaangit naalagumanagit, makua ajjigiiktitsiniq, nikagusungnirlu, ukpirnirlu; tamakkua tamajja aturiaqaqtasi, asingit qujanaanngillugit.

²⁴ Tasiuqtiujusi tautunngittusi! Imirniaqtatsinnik saniijaijjutimut milugianik piijaivaktusi, kaamilialungmigli iisiqattaqpusi!

²⁵ “Ilissinnut kappiannamik piqujanik ilisaijit Paarisillu, takkurmuuqtusi! Imiutit paliallu silatingit salummaqsaqpakpasi, ilungilli tatapput sivuurasaarinirmik, isumagijatuujumanirmiglu.

²⁶ Tautunngittusi Paarisit! Imiutit paliallu ilungit salummaqsaqqaaqsiuk, tavva silataattauq salummatsiarniaqpuq!

²⁷ Ilissinnut kappiannamik piqujanik ilisaijit Paarisillu, takkurmuuqtusi! Iluviqtitut qakuqtamik silataagut amiarijutitut taimaippusi, silatingit takuminaqtualuuvut, ilungilli tatapput saunivinirnik mamaittualungniglu.

²⁸ Taimaatsainnattauq, silatitsigut Guutiup piqujanginnik malitsiaqtuujaaqpusi, ilutsigulli tatappusi takkurmuurnirmik ajurnirmiglu.”

Jiisusiup Nalunaiqsininga Sugiaqtaujumaarninginnik

²⁹ “Ilissinnut kappiannamik piqujanik ilisaijit Paarisillu, takkurmuuqtusi! nalauttaijut iluvingit piusaqpasi, iqqaumajaujjutiksanginniglu titiraqsimajutigut inuusiqatsialauqtunik inuutillugit nalunaiqsisimajusi;

³⁰ uqaqpakpusi, ‘Taissumaniutillugu sivulivinitta inuuvigilauqtanginni inuugajarutta, piniarnirilauqtangititut taimaigajanngilagut, nalauttaijunik tuqutsiqattalauqtutitut.’

³¹ Kisianili nalunaiqsivusi taikkununga kinguvaarijaunissinnik, nalauttaijunik inualauqtunut.

³² Atii, maanna sivulivinisi pigialauqtangat kajusitiliqsiuk pijariirlugu.

³³ Quglugiangujusi, irniujusilu quglugiarjuanut, qanuq ilissinnik saputijunnarasugivisi kappianaqtuvingmit?

³⁴ Taimaimmat nalauttaijunik tilisiviginiaqpassi, silatujuniglu, ajuriqtuijiniglu; ilangit tuqunniaqpasi, ilangillu sanningajulingmut kikiakturlusiuk, ilangit tiigaqturlugit Juutit ukpirnirmut katimavinginni, malikatangniaqpasilu akiraqturlugit nunalingnit nunalingnut.

³⁵ Tamanna pijjutigillugu sugiaqtaunirmut tikitaujumaaqpusi, pasijaksaunngittunik inuaqattarnitsinnut nunarjuarmi, Aipiliup pasijaksaunngittuup inuaqtauninganit, Sakaraiaup Parakaiaup irningata inuaqtauninga tikillugu, taanna inualauqtasi tuksiarvigjuarmi tunirrusirviup ijjurnaittuviullu akunningani.

³⁶ Sulijumik uqautivassi, sugiaqtauniq tamanna tikittumaaqpuq ullumi inuujunut.”

Jiisusiup Ugguarutiqarninga Jiruusalimmik

³⁷ “Uu Jiruusalim, Jiruusalim, nalauttaijunik tuqutsijutit, tilijaujuniglu ujaqqanut milluqtutit! Inuqutitit unuqtuiqsurlunga iqittumaqattalauraluaqpakka, arnaviap qiturngaminik isarurminut katititsivangningatitut, taimaitaujumalaunngittusili!

³⁸ Takugit, tuksiarvigjuaqutisi qimaktaujumaaqpuq inuqarunnairluni.

³⁹ Uqautivassi, takuniarunniiqpassinga uqalauqqaaqtinnasi, ‘Guutiup saimmarliuk Ataniup atingani tikittuq.’”