ᒫᑎᐅᓯᐅᑉ ᐊᒡᓚᖏᑦ 22 - Aglait Ijjurnaittut

Ajjiujuq Katititaujuqaqtillugu Nirivigjuaqatigiiktut

¹ Jiisusi amma ajjiujunik aturluni uqausiqakkanniqpuq inungnut.

² “Guutiup Ataniuvinga ajjiqarunnaqpuq, angajuqqaarjuamik nirivigjuaksaliuqtumik irninga katititaunialirmat.

³ Pijini uqautivait qaiqujausimajut nirijaqtuquliqtlugit nirivigjuaqtauniaqtut atuinnaulirmata; taakkuali qaijumanngilat.

⁴ “Tavva pijimi asinginnik tilisikkanniqpuq, imaak uqaqullugit: ‘Qaiqujausimajut uqautilauqsiuk, takugit, nirivigjuaqtaujuksat pijariirmata; angusalluqutikka nurraillu quinijut tuqutaullutik uutaujariirmata, tamarmitsiaq atuinnauliqput; atii qailirissi katititaujuqsiummut nirivigjuarnialiratta!’

⁵ Qaiqujausimajulli tusaqtuujanngilat pinasuaqtamingnik kajusituinnarlutik, ilangat piruqsiiviqutiminuaqpuq, ilangallu niuvirviqutiminuarluni,

⁶ ilangitali taakkua pijit uqariaqtuqsimajut tiguvait, kanngunaqtumiitittlugit aanniqsiqpait, tuqullugillu.

⁷ Tavva angajuqqaarjuaq ninngaktualuuvuq; unataqtuksaqutini tilivait taikkua inuaqtut tuqutauqullugit iglugasangillu ikuallaktaulutik.

⁸ Tavva pijini uqautivait, ‘Katititaujunut nirivigjuaksaqutikka atuinnauliqput, qaiqusimajakkali tavvunngaqtuksaunngilat.

⁹ Taimaimmat aqqutinut ailirissi, takujalimaassinnik qaiqujilirissi katititaujunut nirivigjuaqatauqullugit.’

¹⁰ Tavva pijit aqqutinuaqput takujalimaamingnik inungnik katittivut, piujunik piunngittuniglu qanuittutuinnarnik; taannalu katititauvingmi nirivigjuarvik tatatsiaqpuq inungnik.

¹¹ “Angajuqqaarjuap takujaqturami inungnik nirijatuqtunik, takuvuq angummik katititaujuqaqtillugu annuraarijauvaktutitut annuraaqsimanngittumik.

¹² Angajuqqaarjuap apirivaa, ‘Ilannaak, qanuq tavvunngaqpit katititaujuqsiutinik anuraaqsimanatit?’ Taannali nillinngilaq.

¹³ Tavva angajuqqaarjuaq pijiminut uqaqpuq, ‘Aggangit itigangillu qilaksurlugit, igisiuk silamut taaqturjuamut; tavvani qianiqarumaaqpuq aglirularlunilu.’

¹⁴ “Qaiqujausimajut unuqput, ununngittulli niruaqtauvut.”

Jiisusiup Apiqsuqtauninga Taaksiirutimik Akiliiqattariaqarnirmik

¹⁵ Tavva Paarisit asianuarlutik isumaksaqsiuqatigiiliqput Jiisusimik apiqsurlugu piviksairujjinasuarumallutik.

¹⁶ Tavva tilisivut ilinniaqtimingnik, Iruutasiullu ikajuqtingita ilanginnik, uqaqullugit, “Ajuriqtuiji, qaujimavugut sulitsiaqtumik uqaujjiqattaravit, ajuriqtuiqattaravillu Guutiup inungnut piniaqtauqujanganik sulitsiaqtumik, inuit qanuq isumaqarmangaata isumaginagit, qanuittuuninginnik kamanginnavit.

¹⁷ Uqautilauqtigut, qanuq isumavit? Piqujavut taaksiijarutinik akiliiqujivaat Siisarimut, uvvalu akiliiqujinngilat?”

¹⁸ Jiisusi ikpigusukkami piunngittumik isumaqatigiiksimaninginnik, uqautivait, “Sungmat uuktuqpisinnga? Takkurmuuqtusi!

¹⁹ kiinaujaq akiliutigisuusi takulaurlagu!” Tavva kiinaujaq Jiisusimut tunivaat.

²⁰ Jiisusiup apirivait, “Kia una kiinannguanga, kialu atinga?”

²¹ Taakkua kiuvaat, “Siisariup,” tavva Jiisusiup uqautivait, “Taimaimmat, Siisarimut tunisiuk pigingmagu, Guutilu tunilugu pinginnik.”

²² Tamatumingali tusaramik, angijumik kamaniaqput; Jiisusi qimakpaat tavvanngallu qimaruutillutik.

Jiisusiup Apiqsuqtauninga Tuqungajut Makittumaarninginnik

²³ Ullumi tavvanitsainnaq Saajjusit Jiisusimuaqput, ukpirijaqaqtut tuqungajunit makittuqalaanginninganik;

²⁴ uqarlutik, “Ajuriqtuiji, Muusisi uqalauqpuq, ‘Angut qiturngaqtaalaurani tuqukpat, nukangata arnaq uiggaqsimajuq nuliaqtaarijaksarivaa, qiturngaqtaarunnaqullugik angajunganut qiturngarijauniraqtauqullugit.’

²⁵ Taissumani ilattinnik nukariiktaqalauqpuq 7-nik; angajugliqpaangat nulianiqpuq, qiturngilauranilu tuqungmat, nuliani qimakpaa nukarminut.

²⁶ Amma tungalinga taimaatsainnaaulaurivuq, amma pingajungat, kingulliqpaanganut tikillugit.

²⁷ Kingulliqpaullunili, arnaq tuqulaurivuq.

²⁸ Tuqungajulli makippata, nalliannut 7-nut arnaq taanna nuliarijaulaaqpaa? Taakkualimaat nuliarilaurmajjuk.”

²⁹ Jiisusiup kiuvait, “Tammaqsimajumik tukisiumavusi! Guutiup uqausinginnik qaujimannginnassi, Guutiullu pijunnarninga qaujimanagu.

³⁰ Tuqungajunit makittut nulianigiaqarumaanngilat aippaqtaaqattanngillutiglu, aingilititut qilangmiutatitut taimaittumaaqput.

³¹ Tuqungajut makivviksanginni: atuaqsilauqsimanngilasi Guutiup uqausirijanginnik ilissinnut? Imaak uqalauqpuq;

³² ‘Uvanga Aiprahaam Guutinga, Aisakiullu Guutinga, Jaikuullu Guutinga,’ tuqungajulli Guutiginngilaat, inuujulli kisimi.”

³³ Inugasagjuat tamatuminga tusaramik, Jiisusiup ajuriqtuusinginnik angijumik kamaniaqput.

Piqujaq Pillariuniqpaaq

³⁴ Paarisit tusaramik Jiisusiup Saajjusit uqausiksairutingmagit, immingnut kativut,

³⁵ piqujanik ilisaijit ilangatta, uukturlugu apirivaa,

³⁶ uqarluni, “Ajuriqtuiji, nalliat piqujani pillariuniqpauva?”

³⁷ Jiisusiup kiuvaa, “Ataniq Guutisi nagligijaksarivasi uummatissinnut tamainnut, tarnissinnullu tamainnut, isumassinnullu tamainnut.

³⁸ Taanna tavva piqujaq pillariuniqpaaq sivulliqpaullunilu piqujalimaanit.

³⁹ Aippangali imailingavuq, ‘Inuuqatisi nagligijaksarivasi nangminiq nagliginissitut.’

⁴⁰ Taakkungnunga piqujaangnut marruungnut piqujalimaat, nalauttaijullu ajuriqtuijjutingit tunngaviqaqput.”

Christuusiup-Misaiasiup Miksaanut Apiqsurniq

⁴¹ Paarisit ilangit katinngaqatigiiktillugit, Jiisusiup apirivait,

⁴² uqarluni, “Qanurli Christuusi isumagivisiuk? Kinamut kinguvaarijauva?” Taakkua kiuvaat, “Taivitiup kinguvaarivaa.”

⁴³ Jiisusiup uqautivait, “Sungmalli taima, Anirniup Taiviti uqaqtilluniuk, Atanirminik tailauqpauk? Uqarmat,

⁴⁴ ‘Ataniq Ataninnut uqaqpuq, “Uvani taliqpinni iksivagit, akiraqtuqtingnik ilisiqqaaqtinnanga itigavit ataanut.”’

⁴⁵ “Taivitiup ‘Atanirminik’ taiguniuk, qanurli Taivitiup kinguvaarijunnaqpauk?”

⁴⁶ Taakkuali kiujjutiksaqarunniilauqput, ullumit tavvanngat pigiarlutik apirikkannirumajuqarunniilauqpuq taassumunga.