ᒫᑎᐅᓯᐅᑉ ᐊᒡᓚᖏᑦ 21 - Aglait Ijjurnaittut

Jiisusi Niqtuqtaummarigluni Jiruusalimmut Itirninga

¹ Jiisusi ilinniaqtingillu Jiruusalimmut tikisaqtuqpallialirlutik, Pitpaigimut tikipput, qaqqamut uqsuksaujunnaqtunik paunngaqasuunik napaaqtulingmut, tavvanngat ilinniaqtiminik marruungnik tilisivuq sivunirminut aiqullugik.

² Imaak uqautillugik: “Nunalingnuarittik sivunissinniittunut, tavvunngarussik takuniaqpusik siutiqquqtujumik ipiqsimajumik nurrangalu sanianiinniaqpuq; taakkuak ipiijjaarlugik qaijjutiniaqpasik.

³ Uqaujjaugussigli qanutuinnaq, uqautiniaqpasik, ‘Ataniup aturumangmagik’; tavvainnaq ilissingnut pijauqulirniaqpaak.”

⁴ Tamanna piniarniulauqpuq nalauttaijup uqausirijaviningit nalautsiqullugit imailijut:

⁵ “Saiuniup iglugasangit uqautisiuk, Takugit, angajuqqaarjuasi qailiqpuq! Imminik mikilitirluni siutiqquqtujuup qaangani ikimalluni, Siutiqquqtujuup nurrangani.”

⁶ Tavva ilinniaqtingik tavvunngaqpuuk pinasuarlutik taimaak pinasuaqujaugamik:

⁷ siutiqquqtujumik tavvunngaujjivuuk nurranganiglu, annuraamingnik ikimmavilirlugu, Jiisusi qaanganut ikivuq.

⁸ Inugasagjuat ilangit uligjuamingnik aqqutimut isivitirivut, ilangilli napaaqtuup avalangajunginnik nakatirillutik aqqutimut isivitirivut.

⁹ Inugasagjuat Jiisusiup sivuningani pisuktut, kinguninganiittullu qaigalaaliqput, “Huusaana Taivitiup Irninga niqtuqtauli, Guutiup saimmarliuk Ataniup atingani tikittuq! Huusaana niqtuqtauli quttingniqpaaq!”

¹⁰ Jiisusi Jiruusalimmuarmat, nunalilimaat tavvaniittut quaqsaangaliqput, inuillu uqaqput, “Kinauna?”

¹¹ Inugasagjuat uqaqput, “Una nalauttaiji Jiisusi Naasariitimit Galiliamiittumit pijuq.”

Jiisusiup Tuksiarvigjuarmuarninga

¹² Jiisusi tuksiarvigjuarmuarami tavvaniittulimaat anitippait niuvirasuktut niurrutiqaqtullu, kiinaujaniglu tauqsiijit saangit urrutippait aqiggiujaaqtuniglu niurrutilit iksivautangit urrutikkivait,

¹³ uqautillugit, “Guutiup uqausinginni uqaqsimavuq; ‘Igluga taijaujariaqpuq tuksiarvingmik’; ilissili tigliktinut ijiqsimaviutippasi!”

¹⁴ Tautunngittut tusiattullu Jiisusimuaqput tuksiarvigjuarmi, taakkua aaqqikpait.

¹⁵ Tunirrusiqtitsijilli angajuqqaangit piqujaniglu ilisaijit ninngaumaliqput, takugamik Jiisusiup piniarninginnik kamanaqtunik, surusillu tavvani tuksiarvigjuarmi qaigalaarninginnut, “Huusaana Taivitiup Irninga!”

¹⁶ Tavva taakkua Jiisusi uqautivaat, “Tusaavit, surusit qanuilingmangaata?” Jiisusiup kiuvait, “Tusaatsiaqpakka, Guutiup uqausinginnik uqalimaalauqsimanngilasi imailijunik, ‘Surusikulungnit nutaralaanillu amamaktunit atuinnaruilauqputit qaningitigut niqtuqtaujumallutit.’”

¹⁷ Tavva qimaglugit, tavvanngat iglugasangnit aullaqpuq Pitanimuarluni, tavvani unnuami siniktaqpuq.

Jiisusiup Napaaqtumik Paurngalingmik Uqarnirluujjininga

¹⁸ Ullaakkut Jiisusi Jiruusalimmut utiqpallialirluni, kaaliqpuq.

¹⁹ Napaaqtumiglu paurngaliksamik aqqutiup sanianiittumik takugami upakpaa, nanisinngilarlu piruqtunginnik uqaujaqatuinnarmat. Napaaqtuq uqautivaa, “Pirurviukkannilauqsimajjaajunniiqputit!” Tavvainnaq napaaqtuq paurngaliksaq tuqulivuq.

²⁰ Ilinniaqtingilli tamatuminga takunnaaramik kamaniaqput uqarlutik, “Qanualunguna napaaqtuq paurngaliksaq qilamikuluk tuqulikauqtuqpa?”

²¹ Jiisusiup kiuvait, “Sulijumik uqautivassi, ukpirussi qulangitsiarlusi, taimaaktauq pijunnaqpusi piniarnirirataaqtattut napaaqtumut, taimaittutuinnarmuunngitturli, aglaat qaqqamut uumunga uqarussi, ‘Tavvanngat qangattarlutit imaanut katalirit,’ tavva taimainniaqpuq.

²² Sunatuinnatsiamiglu tuksiarussi, tavva tunisiviuniaqpusi, ukpirussi.”

Jiisusiup Apirijauninga Nakit Pijunnarniqaqtitauninganik

²³ Jiisusi tuksiarvigjuarmut itirmat, ajuriqtuiliqtillugu tavvani, tunirrusiqtitsijit angajuqqaangit Juutillu angajuqqaangit Jiisusimuaqput uqarlutik, “Nakit pijunnarniqaqtitaullutit tamakkuninga pinasuaqattaqpit, kinamut pinasuarunnaqtitaugavit?”

²⁴ Jiisusiup kiuvait, “Apiriniaqpassittauq apiqqusirmut atausirmut; kiujunnarussinnga, tavva uqautiniaqpassi nakit pijunnarniqaqtitaungmangaarma pinasuarunnaqullunga tamakkuninga.

²⁵ Juanasiup paaptitsiqattarninga nakit pijunnarniqaqtitauva, Guutimit, uvvalu inungnit?” Tavva immingnut uqaqattautiliqput, “Uqarutta, ‘Guutimit pivuq,’ uqautiniaqpaatigut, ‘Sungmalli ukpirilaunngippisiuk?’

²⁶ Uqarmiguttali, ‘Inungnit pivuq,’ inugasagjuanik kappiasukpugut; inuit qulangitsiarmata Juanasi nalauttaijuuninganik”

²⁷ tavva Jiisusi kiuvaat, “Qaujimanngilavut.” Jiisusiup uqautivait, “Uvangattauq uqautinianngilassi nakit pijunnarniqaqtitaullunga pinasuakattarmangaarma.”

Nukariik Marruuk Ajjiutitauningak

²⁸ “Qanurli isumavisi? Angutitaqalauqpuq marruungnik irnilingmik; irninilu angajugliq upaglugu uqautivaa, ‘Irniik, ullumi paurganik uainiksauniaqtunik piruqsiiviqutini pinasuariaqtulaurit.’

²⁹ Taassuma kiuvaa, ‘Tauvunngarumannginnama,’ kinguningagulli qaqialirami piruqsiiviliaqpuq.

³⁰ Tavva ataatanga nukaqtlirmut upagutigivuq taimaatsainnaq uqautilluniuk; taassuma kiuvaa, ‘Ii, tauvunngarniaqpunga,’ pinasuariaqtulauranilu.

³¹ Nalliak taima ataatami pinasuaqtauqujanganik pinasualauqpaa?” Taakkua kiuvaa, “Taanna angajuktliq.” Tavva Jiisusiup uqautivait, “Sulijumik uqautivassi, Ruumamiut kiinaujaiqtitsijiqutingit angunniaqtillu atugaullutik sivulliulutik ilissinnit Guutiup Ataniuvinganuaqqaarumaaqput.

³² Juanasi Paaptitsiriji ilissinnualauqpuq takutitsilluni aqqummik nalaaguuqtumik atuqtaujunnaqtumik, ukpilaunngilasili; Ruumamiut kiinaujaiqtitsijiqutingit angunniaqtillu taassuminga ukpirusulauqput; tamatuminga takuliraluarassi kinguningagut qaqialilaunngilasi Juanasilu ukpirilaurnasiuk.”

Uainiliksamik Kamajit Ajjiutitauningit

³³ Jiisusi uqaqpuq, “Tusakkannilaurissi ajjiujuup asianik; taissumani nunaqutilik paurganik uainiksauniaqtunik piruqsiiviqutimini kanngaqsuilauqpuq, taanna piruqsiiviqutini avaluliuqpaa, itiqsaliurlugillu uainiqautiksanik aaqqiksuilauqpuq, puqtujumik qaujisarviksami sanalluni, piruqsiivik atuqtautippaa piruqsiivingmik kamajinut, nunaullu asianut aullaqtluni.

³⁴ Paurnganigli katiqsivik nalliutilirmat, pijini tilivait piruqsiivingmik kamajinut katiqsuqtanginnik paurngani piqataujumalluni;

³⁵ piruqsiivingmigli kamajit piqutiliup pijingit tiguvait, ilangat aanniqsiqpaat, ilangat tuquttlugu, ilangallu ujaqqanut milluqpaat.

³⁶ Kinguningagut suli tilisikkanniqpuq pijiminik, sivullirmit unurniqsanik; taakkuali piruqsiivingmik kamajit taimaatsainnaq piniarvigigivait.

³⁷ Kingulliqpaamigli irnini tililirivaa taakkununga, uqarluni, ‘Qularnanngilaq irnira iliraginiaqpaat.’

³⁸ piruqsiivingmigli kamajit, piqutiliup irninga takugamijjuk, immingnut uqaqput, ‘Una piqutiliup irninga; atii tuqulaurlavut kingurngutijaksangit pitaariniarattigu!’

³⁹ Tavva tiguvaat, tavvanngallu piruqsiivingmit anitippaat, tuquttlugu.

⁴⁰ “Kinguningagut piruqsiivingmik piqutilik tikikkuni, taakkua qanuiliulirajaqpait kamajiujut piruqsiivingmi?”

⁴¹ Taakkua uqaqput, “Nikagingitsiarlugit piunngittulijut tuqukkajaqpait, piruqsiivik kamajinut asinginnut kamagijautilirajaqpaa piruqtunginnik piqatautitsiqattarajaqtunut katiqsuivik nalliutijaraangat.”

⁴² Jiisusiup uqautivait, “Guutiup uqausinginnik uqalimaalauqsimanngilasi imailijunik? ‘Ujarak tunngaviksaq igluliuqtinit narrugijaujuq Taanna pillarialunnguqpuq tiriqquulirluni; Tamanna Ataniup nangminiq pinasualauqpaa; uvattinnullu kamanaqtualuuvuq!’

⁴³ “Taimaimmat uqautivassi, Guutiup Ataniuvinganik aqsaaqtaujumaaqpusi tunijaungaarluni inungnut piruqtuqaqtitsijunnaqtunut. [

⁴⁴ Nalliat tavvunga ujarangmut kataktuq siquminniaqpuq; ujarak nalliannut katakkuni, katagvigijaminik siqallisiniaqpuq.]”

⁴⁵ Tunirrusiqtitsijit angajuqqaangit Paarisillu, Jiisusiup ajjiujurijanganik tusaagamik, qaujivut uqausirijaunirmingnik.

⁴⁶ Taimaimmat tigunasuaraluaqpaat, inugasagjuanigli sivuuravut, taakkua isumaqarmata nalauttaijuunasugillugu.