ᒫᑎᐅᓯᐅᑉ ᐊᒡᓚᖏᑦ 20 - Aglait Ijjurnaittut

Pinasuaqtiit Piruqsiivingmi Uainiliksami

¹ “Guutiup Ataniuvinga ajjiqaqpuq angummik ullaammarikkut qiniriaqtumik inungnik pinasuaqtiksaminik paurganik uainiksauniaqtunik piruqsiiviqutimini.

² Pinasuaqtit angiqatigijariiramigit akiliutausuumik akilirumallugit, siulvirimik atausirmik ullumut atausirmut, tilivait paurganik uainiksauniaqtunik piruqsiiviqutimini pinasuariaqtuqullugit.

³ Kinguningagut 9-muaqtillugu anigivuq, takulluni angutinik niuvirvingni nangituinnaqtunik pinasuagaksaqannginnamik.

⁴ Tavva uqautivait, ‘Ilissittauq pinasuariaqtulirissi paurganik uainiksauniaqtunik piruqsiiviqutinnit, akilirniaqpassi akiliutauvaktutitut.’

⁵ Asuilaak taakkua pinasuariaqtuqput. Tavva kinguningagut taimaatsainnaq qiniriarivuq 12-muaqtillugu ullukkut, amma unnusakkut 3-muaqtillugu taimailiurivuq.

⁶ 5-mualiqtilluguli niuvirvingmut aqqutimiittumuarivuq, takulluni angutinik tavvani nangituinnaqtunik. Taakkua apirivait, ‘Sungmat ullulimaaq tavvaniituinnaqpisi pinasuarasi?’

⁷ Taakkua kiuvaat, ‘Pinasugiaqtuqujauluta tilijaulaunnginnatta.’ Taassuma uqautivait, ‘Pinasuariaqtulirissi paurganik uainiksauniaqtunik piruqsiivingmi.’

⁸ “Unnungmat piruqsiiviqutilik pinasuaqtinut angajuqqautitaminut uqaqpuq, ‘Pinasuaqtit qaiqulugit akililikkit akiliutausuumik, kingulliqpaullutik pinasuasigiaqqaujunit pigiaqqaarlutit sivulliqpauqqaujunut tikillugit.’

⁹ Angutit pinasuariasiqqaujut 5-nguliqtillugu, akiliqtauvut siulvirimik atausirmik atunit.

¹⁰ Kinguningagut taakkua angutit sivulliqpaullutik tilijauqqaaqaujut akiliqtauliramik, anginiqsamik akiliqtauniarasugivut; atunilli tunisiviugivut siulvirimik atausirmik.

¹¹ Kiinaujaqtaamingnik pijariiramik uqaqattautiliqput naammaksaratik pinasuaqtitsijigijamingnik.

¹² Uqarlutik, ‘Ukua angutit kingulliqpaullutik tilijauqqaujut ikarramik atausituinnarmik pinasuarataaqtut, uvattititulluatuinnaq akiliqpatit! Uvagulli ullulimaaraluk pinasuaqtugut siqiniq uqquujualuutillugu’

¹³ taassuma nangminiliup piruqsiivingmik kiuvait, ‘Piqannarijakka silairrinngilassi; angiqatigiiqqaunngilagut ullulimaaq pinasuaqullusi siulvirimik atausirmik akiliqtauniarlusi?

¹⁴ Akiliutigijaujut kiinaujaqtaasi pilusiuk angirralirissi; angut kingulliqpaulluni tiliqqaujara tunisivigijumavara ilissingnut akiliutigijama ajjinganik.

¹⁵ Isumaqsuriaqanngilanga nangminiq kiinaujannik? Uvvalu ajjigiiktitsituinnarninnut pitsiaqtaunasugijunniiqpisi?’

¹⁶ “Taimaimmat kingullit sivulliujumaaqput, sivullillu kingulliujumaaqput.”

Jiisusiup Tuqutauniksaminik Uqausiqarninga Pingajungannik

¹⁷ Jiisusi Jiruusalimmuarnialirami, ilinniaqtini 12 aqqummit avalautillugit, pisukpallialutik uqautiliqpait taakkutuutillugit.

¹⁸ “Takugit, Jiruusalimmualiqpugut; tavvani Inuup Irninga aittuutaulaaqpuq tunirrusiqtitsijit angajuqqaanginnut piqujaniglu ilisaijiujunut, taakkua tuqutaksannguqtilaaqpaat.

¹⁹ Tunirrutigilaaqpaallu Juutiunngittunut, mitautigijauqullugu, tiigaqtuqtaulunilu kikiaqtuqtaulaaqpuq, ulluilli pingajuanni makilaaqpuq.”

Sipitiup Nuliangata Qinuninga

²⁰ Tavva Sipitiup nulianga Jiisusimuaqpuq irnirminik marruungnik ilaqarluni, saanganut ukuvuq, pijumajaminik uqarumalluni.

²¹ Jiisusiup uqautivaa, “Sunamik pijumavit?” Arnaq uqaqpuq, “Piqujilaurit angajuqqaarjuannguruvit ukuak irniikkak iksivaqulugik Ataniuvingni aippanga taliqpingni aippangalu saumingni.”

²² Jiisusiup kiuvaak, “Apiqqusirijassingnik qaujimanngilasik, imiutimik imirniaqtannik imirunnaqpisik?” Taakkuak kiuvaa, “Imirunnaqpavuuk.”

²³ Jiisusiup uqautivaak “Imirniaqtannit imirunnaraluaqpusik, kisianili taliqpinni sauminnilu iksivajuksanik uvanga initaaqtitsijunnanngilanga, Ataatama upalungaiqsimajanginnut kisiani iniksarijauvut.”

²⁴ Ilinniaqtit ilangit qulit tamatuminga tusaramik, taakkungninga nukariingnik akauksarunniiqput.

²⁵ Jiisusiup qaiqullugit uqautivait, “Qaujimavusi Juutiunngittut angajuqqaangit inuqutimingnut pijunnarniqarmata, tasiuqtingit suunguniqammariglutik.

²⁶ Ilissili akunnassinni taimailiuqattautijuksaunngilasi; nallisi angajuqqaangujumajuq ilissinnut pijigijaujuksauvuq;

²⁷ nallisilu akunnassinni sivulliqtiujumajuq taanna sialaarijaujuksauvuq.

²⁸ Inuup Irninga tikilaunngilaq pijitsiqtaujaqturluni pijitsiriaqturlunili, inuusirminiglu tunisiluni inuit amisut akiliijjutillunigit utiqtitaujjutiksanginnut.”

Jiisusiup Angutiingnik Marruungnik Tautuliqtitsininga

²⁹ Jiisusi ilinniaqtingillu Jirikuumit aullaliqtillugit, inugiaqturjuat maliksaqput.

³⁰ Takugit, angutiik marruuk tautunngittuuk aqqutiup saniani iksivajuuk, tusaqpuuk Jiisusiup aqqusaarninganik, tavva qaigalaaliqpuuk, “Taivitiup Irninga, naakkigitiguk!”

³¹ Inugiaqturjuanit iniqtiqtauvuuk, nipiqaqujaunatik; taakkuagli nipiqquqtusikkannituinnarlutik qaigalaaliqpuuk, “Ataniq, Taivitiup Irninga, naakkigitiguk!”

³² Jiisusi nuqqarluni taakkungninga qaiqujiliqpuq, uqarluni, “Uvannut qanuq pinasuarviujumavisi?”

³³ Taakkuak kiuvuuk, “Ataniq, ilingnut tautuliqtitaujumavuguk!”

³⁴ Jiisusiup nagligilirlugik ijingiktigut aktuqpaak; tavvainnaq takujunnaqsivuuk, Jiisusimik malilirlutiglu.