ᒫᑎᐅᓯᐅᑉ ᐊᒡᓚᖏᑦ 19 - Aglait Ijjurnaittut

Ajuriqtuiniq Katititausimalutik Avitsijumajunik

¹ Jiisusi tamakkuninga uqausiqariirami, Galiliamit aullaqpuq Juutiap nunanganuarluni Kuup Juartaniup akianut.

² Inugasagjuanillu maliktauvuq, tavvani qanimmasilit aaqqikpait.

³ Paarisilli ilangit Jiisusimuaqput uukturlugu apirivaat, “Piqujavut angummik avitsillarigunnaqtitsivaat nuliamingnik, sunatuinnarmik pijutiksaqaraluarutiik?”

⁴ Jiisusiup kiuvait, “Guutiup uqausinginnik atuaqsilaunngilasi? Uqaqtuqarmat, ‘Pigiarnirmi pinnguqtitsijuq pinnguqtitsilaurmat angummik arnamiglu.’

⁵ “Guuti uqaqsimavuq, ‘Taimaimmat angutiup ataatani anaananilu qimangniaqpaak nuliani katimaangarumalugu, taakkuaglu marruuk timikkut atausiulirniaqpuuk.’

⁶ Taimaimmat taakkuak marruujunniiqpuuk timikkulli atausiuliqpuuk. Taimaimmat Guutiup katititangik, inuup avititaksarinngilaak.”

⁷ Tavva Paarisit uqautivaat, “Sungmalli taima Muusisi piqujamik aaqqiksilauqpa angut avitsillarikkuni titiqqanik avitsijjutiminik nalunaiqsijunik nuliani tunisivigijaksarivaa, aullaqtillugulu?”

⁸ Jiisusiup kiuvait, “Muusisiup piqujamik taimaittumik aaqqiksivigilauqpaasi avitsillarigunnaqsititsinirmik nuliassinnik, ajuriqtuqtaujariaksaq sitijualuunisi pillugu, kisiani tamanna taimailingalaunngilaq pinnguqtitauliqtillugit.

⁹ Taimaimmat uqautivassi; nalliat nuliaminik avitsillarikpat, asinniarnirmik pijjutiqanngilluni, asianiglu nulianigluni taanna nuliarilauqtaminik asinniaqpuq.”

¹⁰ Tavva ilinniaqtingita uqautivaat, “Tavvali taimailingaliqpat angutit arnaillu nulianiqattanngillutik piuniqsauvuq!”

¹¹ Jiisusiup kiuvait, “Tamanna uqausirijara tamainnut ilinganngilaq, tunisiviusimajunulli kisiani turaangavuq.

¹² Ajjigiinngittunik pijjutiksalingnik angutinik nulianijuittuqtaqarmat: ilangit irniangunirmingnit taimaittuujut: ilangilli inuuqatimingnit nulianigunnaillititausimajut; ilangilli nuliaqanngilat immingnik taimaitittunik Guutiup Ataniuvinga pillugu. Tamatuminga uqausirijannik ilaliuqsijunnaqtuq, ilaliuqsilirli.”

Jiisusiup Surusikulungnik Saimmaqtitsininga

¹³ Ilangilli surusikulungnik Jiisusimuarujjivut patimminiarmagit tuksiutilunigillu. Ilinniaqtingitali tavvunngaujjijut iniqtiqpait.

¹⁴ Jiisusi uqaqpuq, “Surusikuluit uvannut qaititaulit, agvianngillusiuk; taimaittunut Guutiup Ataniuvinga pigijaungmat.”

¹⁵ Jiisusiu patimmivait, kinguningagullu tavvanngat aullaqpuq.

Inuusuktuq Angut Ajuqsanngittuq

¹⁶ Taissumani angummik Jiisusimuaqtuqaqpuq uqarluni, “Ajuriqtuiji, qanuq piujumik piniaqtuksauvungaa, inuusirmik nungusuittumik pijunnaqullunga?”

¹⁷ Jiisusiup kiuvaa, “Sungmat apirivinga suna piungmangaat? Atausiq kisimi piujutuuvuq. Inuusirmut nungusuittumut itirumaguvit piqujanik malitsialirit.”

¹⁸ Taassuma uqautivaa, “Nalliannik?” Jiisusiup uqautivaa, “Inuaqtuksaunngilatit; asinniaqtuksaunngilatit; tigliktuksaunngilatit; inuuqatingnik sulinngittumik uqausiqaqtuksaunngilatit;

¹⁹ ataatangnik anaanangniglu upingusutsiaqtuksauvutit; inuuqatisilu nagligijaksarivat nangminiq nagliginiqtut.”

²⁰ Inuusuktuup uqautivaa, “Tamakkua piqujalimaat malilauqpakka, sunamik suli pinasuariaqaqpunga?”

²¹ Jiisusiup uqautivaa, “Naammatsiarumaguvit, piqutilimaatit niurrutigijaqtukkit, kiinaujaqtaatillu ajuqsaqtunut tunirrutigilugit, tavva piqutiqatsiarniaqputit qilangmi; atii qailirit, maliglunga.”

²² Inuusuktuup tamanna tusaramiuk tavvanngat qimaruutiliqpuq qiksaalirluni, ajuqsanngittualuugami.

²³ Jiisusi ilinniaqtiminut uqaqpuq, “Sulijumik uqautivassi: inungnut ajuqsanngittunut Guutiup Ataniuvinganut itiriaksaq ajurnakasangniaqpuq.

²⁴ Suli uqautikkanniqpassi; aglaat ajurnannginniqsauvuq kaamili miqqutiup ijingaguurianga, ajuqsanngittuup isirajarninganit Guutiup Ataniuvinganut.”

²⁵ Ilinniaqtit tamatuminga tusaramik angijumik kamaliqput, uqarlutik, “Kinali taima piulijaujunnarniaqpa?”

²⁶ Jiisusiup takusarlugit uqautivait, “Tamanna inungnut ajurnaqpuq; Guutimulli sunalimaanik ajurnaqtuqanngilat.”

²⁷ Piitturuusi nilliqpuq uqarluni, “Takugit, sunalimaattinnik qimailauqpugut ilingnik maligluta. Sunamik piqarumaaliqpita?”

²⁸ Jiisusiup uqautivait, “Sulijumik uqautivassi: Inuup Irninga iksivautarjuarminut piviarnaqtumut ingilluni nutaamik pigiakkanniliqpat, tavva ilissi maliktiujusi uvannut, iksivaqataujumaaqpusi iksivautarjuani 12-ni, Isarialimiut kinguvaariit 12 angajuqqauvigilugit.

²⁹ Kikkulimaat iglumingnik qimaisimajut qatanngutimingnigluunniit najamingnigluunniit ataatamingnigluunniit anaanamingnigluunniit qiturngamingnigluunniit nunamingnigluunniit, uvanga pijjutigilunga, taakkua pititaukkannirumaaqput 100-iqtulluaqtunik, tunisiviulutiglu inuusirmik nungusuittumik.

³⁰ Amisut sivulliujut kingulliujumaaqput, unuqtullu kingulliujut sivulliujumaaqput.”