ᒫᑎᐅᓯᐅᑉ ᐊᒡᓚᖏᑦ 18 - Aglait Ijjurnaittut

Kina Pillariuniqpauva?

¹ Taissumani ilinniaqtit Jiisusimuaqput, uqarlutik, “Kina pillariuniqpauva Guutiup Ataniuvingani?”

² Jiisusi surusirmik qaiqujivuq, taakkua saanganut nikuvitillugu,

³ uqaqpuq, “Sulijumik uqautivassi, piusissinnik asijjirlusi kisianiuvuq surusikuluktut taimailirlusi, asijjinngikkussi Guutiup Ataniuvinganut itirunnarnianngimmarikpusi.

⁴ Imminik mikiglitiqtuq uutunaq surusikuluktitullu taimailirluni, taanna Guutiup Ataniuvingani pillariuniqpauvuq.

⁵ Nalliat surusikuluktitut taimaittumik ilaliuqsijuq uvanga pillunga, taanna uvannik ilaliuqsivuq.”

Pijumisaaqtauniq Ajurnirmut

⁶ “Nalliat taimaittukulungnik ukpirninganik uvannut agviaqsikpat ajuqtulititsiluni, taanna akauniqsaugajaqpuq niaquujaksanik siqallisijjutiup ujaraalunganik qungasingagut qilaksiviuluni imavingmut itijumut kivititauguni.

⁷ Kappianammarikpuq silarjuarmiunut katagutaujunnaqtunik ajuqtulinirmut pinasuaqpaktut! Taimailiuqtuqatsainnarniaraluaqpuq; kappiannamigli inuk katagutaujunnaqtunik aqqutigijaujuq!

⁸ “Aggakpit itigakpilluunniit ajuqtulitippatit, nakakkit igillugit; ilingnut piuniqsaugajaqpuq inuusirmut itiruvit igluinnarmi aggaqarlutit, igluinnarmigluunniit itigaqarlutit tusiallutillu. Igluktut aggaqarlutit, igluktullu itigaqarlutit igitautuinnarajarnirnit ikumarjuarmut nungusuittumut.

⁹ Ijivit ajuqtulitippatit, piilauruk igillugulu; ilingnut piuniqsaugajaqpuq inuusirmut itiruvit igluinnarmik ijiqarlutit, igluktut ijiqaraluaruvit igitautuinnarajarnirnit ikumarjuarmut kappianaqtuvingmut.”

Ajjiujuq Siipi Asiusimajuq

¹⁰ “Qaujilirissi tamakkuakuluit narrugijariaqannginnassiuk; sulillunga uqaqpunga taakkua aingiliqutingita Ataatama qilangmiittuup kiinanga takuinnaqattaqpaat.

¹¹ Inuup Irninga tikisimangmat asiusimajut qiniriarlugit.

¹² “Qanurli isumavisi angut 100-nik siipiqutilik, taakkua ilangat atausiq asiukpat, taakkua siipit 99 qimakkajanngilait qaqqamut qiniriarluni siipimik asiusimajumik?

¹³ Sulillunga uqautivassi, naniguniuglu, quviasuutiginiqsariniaqpaa siipinit 99-nit asiusimanngittunit.

¹⁴ Taimaatsainnaqtauq, Ataatasi qilangmiittuq tamakkuningakuluk asiuqujinngilaq.”

Inuuqatiit Ajuqtulijuq

¹⁵ “Ukpiqtuuqativilli ajuqtulivigikpatit, upaguk tammarninganik uqautilugu, inutuuqatigilugu uqaqatigiguk. Tavva taassuma naalakkunitit, tavva ukpiqtuuqatiit utiqtinniaqpat.

¹⁶ Taassumali naalanngippatit, atausirmik marruungnigluunniit ilaqarlutit, ‘Marruukpatik qaujisimajuuk pingasulluunniit, pasijaksannguqtitsijunnaqput.’ Taimaak Guutiup uqausinginni uqaqsimangmata.

¹⁷ Sulili taakkuangutillusi naalagumanngippat, tavva uqautigiliqsiuk ukpiqtuuqatigiinut ilagiiktunut; taakkuningali ilagiiktunik suli naalagumanngippat, tavva ukpinngittutitut taimaittuutiliruk, uvvalu Ruumamiut kiinaujaiqtitsijiqutingititut.”

Qilaksuqtaujut Qilarujjaaqtaujullu

¹⁸ “Sulijumik uqautivassi, nunarjuarmi qilaksuqtasi taakkua qilangmi qilaksuqsimajumaarivut, qilarujjaaqtasilu nunarjuarmi taakkuattauq qilarujjaaqsimajumaarivut qilangmi.

¹⁹ “Suli uqautikkanniqpassi, nunarjuarmi marruulusik angiqatigiikkussik sunatuinnarmik tuksiarutiqarumalusik, tamatuminga tavva tunisiviuniaqpusik Ataatannut qilangmiittumut.

²⁰ Marruuk pingasulluunniit katinngaliqpata atinni, tavvaniinniaqpunga ilagilugit.”

Ajjiujuq Piji Saimmaujjiluni Isumagijunnairviqarumanngittuq

²¹ Tavva Piitturuusi Jiisusimuaqpuq uqarluni, “Ataniq, ukpiqtuuqatima ajuqtulivigiqattaqpanga, qatsiiqturlunga isumagijunnairvigijaksarivara? 7- iqsurlunga naammakpa?”

²² Jiisusiup kiuvaa, “7-iqtutuinnaqulutit uqautinngilagit, 70-lli 7-iqturlugit,

²³ taimaimmat Guutiup Ataniuvinga imaak ajjiqarunnaqpuq; taissumani angajuqqaarjuaqtaqalauqpuq, taanna isumataalauqpuq pijini akiliksanginnik aaqqiiqatigijumallugit.

²⁴ Kamanasuasigiaqtillugu pijingatta ilangat isiqtitauvuq angajuqqaarjuarmut akiliksalik kiinaujanik taalintinik 10,000-nik.

²⁵ Piji akiliutiksaqanngimmat, tavva angajuqqaarjuap niuvianguquliqpaa piqutititut pitaarijauqullugu, nuliangalu qiturngangillu piqutilimaangillu, akiliksangit akiliqtauqullugit.

²⁶ Piji angajuqqaarjuap saanganut siiqquqpuq, qinulluni uqaqpuq, ‘Angajuqqaak, qinuisaarvigilaunnga, akililaaqpagit iluunnanginnik.’

²⁷ Angajuqqaarjuaq taassuminga ilatsugusulirami, isumagijunnairvigivaa akiliksalimaanginnik; aniqulirlugulu.

²⁸ “Taanna angut tavvanngat anigami pijiuqatiminik katisivuq akiliksaqarvigijiminik kiinaujanik ununngittunik; upaglugu tuqqujaaksivaa uqautillugu, ‘Akiliilaurit uvannut akiliksarijarnik.’

²⁹ Pijiuqatingalu taanna siiqqurluni saanganut qinuvigivaa, ‘Qinuisaarvigilaunnga, akililaaqpagit.’

³⁰ Taanna anginngilaq tigujausimavingmullu pitippaa akiliksaminik akiliilaunnginningani.

³¹ Pijiuqatingita tamanna takugamijjuk, quviasunngijjutigimmariliqpaat, angajuqqaamingnut upagutillutik uqautigivaat piniarnirijaujulimaanik.

³² Tavva angajuqqaarjuap pijini itiqtitauquliqpaa; itirmat uqautivaa, ‘Piunngittualuujutit! Isumagijunnairvigilauqpagit qinuvigigavinga iluunnalimaanginnik uvannut akiliksarijarnik.

³³ Nikagusuktuksaulauraluaqputit pijiuqatingnut, suurluttauq nikagilaurakkit.’

³⁴ Angajuqqaarjuaq tavva ninngaktualuuvuq, taanna tigujausimavingmuaqtautippaa, sugiaqtauqullugu akiliksarijaminik iluunnanginnik akiliilaunnginnilimaangani.

³⁵ “Taimaaktauq Ataatama qilangmiittuup piniarvigigajarivaasi ukpiqtuuqatissinnik isumagijunnairviqarnianngikkussi, uummatissinnit pijumik.”