ᒫᑎᐅᓯᐅᑉ ᐊᒡᓚᖏᑦ 17 - Aglait Ijjurnaittut

Jiisusiup Takuksakut Asinnguqtitauninga

¹ Ulluit pingasuujuqtut kinguningagut Jiisusiup Piitturuusi Jaimisikkuglu Juanasikkuk nukariik, ilagillugit qaqqamut puqtujumut majuarutivait, ilatuarillugit.

² Ilinniaqtit takunnaaqtillugit Jiisusiup takuksauninga asinguqtitauvuq, kiinanga qaummakpuq siqiniup qaumaningatut, annuraangillu qaumajurjuangulirlutik.

³ Takugit, taakkununga saqqittuqaqpuq Muusisimik Ilaijjamiglu Jiisusimik uqaqatiqaqtuungnik.

⁴ Piitturuusi uqaqpuq Jiisusimut, “Ataniq, tavvani quvianalualirmat; pijumaguvit, tavvani siniktarviliurumavunga pingasunik, ilingnut, Muusisimullu, Ilaijjamullu.”

⁵ Uqallaktillugu suli, takugit, nuvujamut qaumajumut tikitauvut, nipi nuvujamit uqaqpuq, “Taanna tavva Irnira nagligijara, quviagitsiaqtara; taanna naalaksiuk!”

⁶ Ilinniaqtit tamatuminga tusaramik, nunamut punngaliqput, kappiasuluarnirmut.

⁷ Jiisusiulli upaglugit aktuqpait, uqarluni, “Makigissi, kappiasungillusi.”

⁸ Ilinniaqtilli takusaramik, inungmik takunngilat Jiisusiup asianik.

⁹ Qaqqamit aqqalirlutik, Jiisusiup iniqtiqpait, uqarluni, “Tamatuminga takutitaunissinnik kinatuinnarmut uqaqtailigissi; Inuup Irninga makilauqqaaqtinnagu tuqungajunit.”

¹⁰ Ilinniaqtit apirivaat, “Sungmanikkua piqujanik ilisaijit uqaqattaqpat Ilaijja sivulliuluni tikittariaqarnirarlugu?”

¹¹ Jiisusiup kiuvait, “Ilaak Ilaijja sivulliulluni tikisimavuq, taassuma tamarmik upalungaijarniaqpait,

¹² uqautivassili, Ilaijja tikittariiqsimavuq, inuillu ilitarinngilaat, piniarvigilauqpaallu isumaqsuutigillugu. Taimaaktauq Inuup Irninga taakkunanngat aanniatitaujumaarivuq.”

¹³ Tavva ilinniaqtit tukisivut Juanasi Paaptitsirijimik uqausiqarninganik.

Jiisusiup Nukappiamik Anirnirlungmut Itiqtausimajumik Aaqqiksininga

¹⁴ Inugasagjuanut utirmata, angut Jiisusimuaqpuq, saanganullu siiqqurluni,

¹⁵ uqaqpuq, “Ataniq, irnira nikagilauruk, qiiqsuqattarmat, qiiqsuliraangami urruqattarmat ikumamut imarmulluunniit.

¹⁶ Ilinniaqtingnulli aaqqaugaluaqpara, taakkuali aaqqigunnanngilaat.”

¹⁷ Jiisusiup kiuvaa, “Ukpirniqanngittusi tammaqsimajualuujusilu, qanuq akuniutigijuq najuriaqaqpassi? Qanurlu akuniutigijuq qinuisaarvigijariaqaqpassi? Nukappiaq uvannut maunga qaitilauruk.”

¹⁸ Jiisusiup anirnirluk iniqtirlugu tavvanngat aniquvaa, anirnirluk nukappiamit anivuq, tavvatsainnaq nukappiaq aaqqikpuq.

¹⁹ Tavva ilinniaqtit Jiisusimuaqput inutuulirmat apirivaat, “Sungmalli anirnirluk anitittunnanngilavut?”

²⁰ Jiisusiup kiuvait, “Ukpirnikiluarassi, sulijumik uqautivassi, ukpirniqarussi piruqsiaksaup kanngaqsuutiksaqtangatut mikijukuluktitut mastarttut, uumunga qaqqamut uqarunnaqpusi, ‘Uvanngat nuugit avunga,’ tavvanngallu nuunniaqpuq; sunalimaanik ajuqtaqarnianngilasi.” [

²¹ Tamakkuali anirnirluit tuksiarnirmut nirittailinirmullu kisiani anititaujunnaqput; asiagulli anititaujunnanngilat.]

Jiisusiup Uqausiqakkannirninga Tuqutauniksaminik

²² Ilinniaqtit katinngalirmata Galiliami, Jiisusiup uqautivait, “Inuup Irninga inungnut pijaukkaqtaujariaqaqpuq.

²³ Taakkunanngallu tuqutaujumaaqpuq; ulluilli pingajuanni makittumaarivuq.” Ilinniaqtillu qiksaammariliqput.

Tuksiarvigjuarmi Akiliujjiniq Taaksitigut

²⁴ Jiisusi ilinniaqtingillu Kapiirniamut tikimmata, tuksiarvigjuarmi taaksitigut akiliqsuititsiji, Piitturuusimuaqpuq apirillugu, “Una ilisaijisi tuksiarvigjuap taaksinginnik akiliivanngittuq?”

²⁵ Piitturuusiup kiuvaa, “Akiliisuungungmijuq.” Piitturuusi iglumut itirmat, Jiisusiup nilliriaqqaalluni uqautivaa, “Saimuunii, qanurli isumaqaqpit? Nalliat akiliijariaqaqpa aturutimingnik taaksinigluunniit nunarjuarmi angajuqqaarjuangujunut? Taakkualuunniit tamaani nunatuqalit angajuqqauvigijangit, uvvaluunniit niurrusimajut?”

²⁶ Piitturuusiup kiuvaa, “Taakkua niurrusimajut.” Jiisusiup kiuvaa, “Taimaimmat, nunatuqalit akiliijariaqanngilat,

²⁷ taakkuali agviarutiksaliurniannginnattigu; taimaimmat, tasirmut iqallialaurit; sivulliqpaarlu iqaluktait, qaninga aittaqtinniaqpat, qaninganillu kiinaujanik nanisiniaqputit akiliutilluaqtattinnik tuksiarvigjuarmut; taakkua kiinaujat pilugit akiliutiginiaqpatit akiliutigijariaqaqtattinnut taaksinut.”