ᒫᑎᐅᓯᐅᑉ ᐊᒡᓚᖏᑦ 16 - Aglait Ijjurnaittut

Kamanaqtuliqujillutik Ajuinnaqtut

¹ Paarisit ilangit Saajjusillu Jiisusimuaqput uukturumallugu; taimaimmat kamanaqtuliquvaat, takutitaujumallutik nalunaikkutarmik qilangmit pijumik.

² Jiisusiup kiuvait, “Siqiniq nipiliqtillugu uqaqpakpusi, ‘Silatsiavaulaalirivuq; nuvujait aupaqsingmata.’

³ Ullaammarikkullu uqaqpakkivusi, ‘Ullumi silalungniaqpuq, nuvujait aupaqtuullutik Qirniqtaungmata.’ Silamik nalauttaijunnaqtusi takunnaarlusi qilangmik, tukisijunnanngilasili nalunaikkutarnik nalliutiliqtunik maannaujumik!

⁴ Ullumi inuit piunngittuulijut Guutiqanngittullu kamanaqtunilirmik takujumavut, uuminga kisiani tunisiviuniaqput Juunaup kamanaqtulininganik.” Tavva qimakpait aullarluni tavvanngat.

Paarisit Saajjusiillu Puvallaqqutingit

⁵ Ilinniaqtit tasikkut ikaarlutik akianuaramik, niaquujamik naksariaksaq puiguqtuviniuvut.

⁶ Tavva Jiisusiup uqautivait, “Kamatsiarissi ikpigusutsiarlusilu Paarisit Saajjusillu puvallaqqutinginnik.”

⁷ Taakkua immingnut uqaqatigiiliqput, uqarlutik, “Taimaanguna uqatuq niaquujamik naksalaunnginnittinnut.”

⁸ Jiisusiup qaujimagamigit qanuq uqausiqarmangaata, uqautivait, “Sungmat ilissinnut uqaqatigiikpisi niaquujaggiqsimannginnissinnik? Ukpirniqanngiluarassi!

⁹ Suli tukisinngilasi iqqaumanasilu niaquujanik agguilaurama tallimanik 5,000-nut pijauniaqtunik? Qatsinik iviujanik tatailauqpisi?

¹⁰ Ammaluttauq puigurivisiuk niaquujanik 7-nik agguilaurama 4,000-nut pijauniaqtillugit? Qatsinik iviujanik tatailauqpisi?

¹¹ Sungmalli tukisinngilasi niaquujamik pijjutiqarlunga uqannginnama? Ilissinnik ikpigusutsiarissi Paarisit Saajjusillu puvallaqqutinginnik!”

¹² Tavva ilinniaqtit tukisiliqput uluriasuqujaunnginnirmignik niaquujamut puvallaqqutimik, Paarisilli Saajjusillu ajuriqtuininginnik taakkuningatuaq.

Piitturuusiup Nalunaiqsininga Jiisusimik

¹³ Tavva Jiisusi Sisaria Pilipaip nunangata qanigijaanuaqpuq, tavvani ilinniaqtini apirivait, “Inuup Irninga inungnit kinaunasugijauva?”

¹⁴ Taakkua kiuvaat, “Ilangit Juanasi Paaptitsirijiuniraivut, ilangilli Ilaijjauniraivut, ilangilluttauq Jirimaiauniraivut uvvalu nalauttaijut ilangat.”

¹⁵ Tavva Jiisusiup uqautivait, “Ilissili kinaunasugivisinnga?”

¹⁶ Tavva Saimuuni Piitturuusiup kiuvaa, “Misaiasiuvutit, Guutiup uumajuup Irninga.”

¹⁷ Jiisusiup uqautiva, “Saimuunii Juanasiup irninga nalaagut uqaqputit! Tamanna qaujititauniit inutuinnarmit pinngilaq, Ataatamali qilangmiittuup tamatuminga tukisitippaatit.

¹⁸ Taimaimmat uqautivagit, Piitturuusiuvutit, qaiqtuq; qaiqtumut tavvunga ilagiiktuqutikka tunngaviqaqtillugit aaqqiksurniaqpakka, kappianaqtuviullunniit isiqtarvingata saalagijunnarnianngilaq.

¹⁹ Tunisiviginiaqpagit Guutiup Ataniuvingata ukkuirutinginnik; nunarjuami qilaksurniaqtatit qilangmi qilaksuqtausimajumaarivut, nunarjuamilu tamaani qilarujjaarniaqtatit qilangmittauq qilarujjaaqtaujumaarivut.”

²⁰ Tavva Jiisusiup ilinniaqtini iniqtiqpait kinamulluunniit uqaqunagit Christuusiunirminik.

Jiisusiup Aanniatitauniksaminik Tuqutauniksaminiglu Uqausiqarninga

²¹ Tavvanngat pigiarluni Jiisusi nalunanngitsiaqtumik ilinniaqtiminut uqausiqaliqpuq, “Jiruusalimmuariaqaqpunga tavvani aanniatitaujumaaqpunga angijumik Juutinut angajuqqaujunut, tunirrusiqtitsijillu angajuqqaanginnut, piqujaniglu ilisaijinut, tuqutaujumaaqpunga, ulluilli pingajuanni makittumaarivunga.”

²² Piitturuusiup saniminuaqtilluniuk iniqtimmariliqpaa; uqarluni, “Guutiup tamanna nuqqaqtilliuk, Ataniq! Tamanna ilingnut tikilauqsimanianngilaq!”

²³ Jiisusiup Piitturuusi saattlugu uqautivaa, “Saataanasi, tununnuarit! Aturiaqaqtannik agviarasuaravit; tamanna isumagijait Guutimit pinngimmat, inutuinnarmilli pivuq!”

²⁴ Tavva Jiisusiup ilinniaqtini uqautivait, “Nalliat uvannut maligumajuq, pinasuarumajaminik qujanaaqsijuksauvuq, sanningajuliminik agjaqsiluni, maliktuksauvuq uvannik.

²⁵ Inuusirminik annirusuktuq inuusirminik asiujijumaaqpuq, nallialli inuusirminik asiujijuq uvannik pijjutiqarluni taanna inuusirmik nanisiniaqpuq.

²⁶ Inuk sunamik pivalliutiksaqarajaqpaa silarjualimaamik pitaaruni, inuusirminiglu asiujiluni uvvalu sunamik tunijaksaqarajaqpa? Inuusirminik utiqtitsijunnaqullugu?

²⁷ Inuup Irninga tikittumaarmat aingiliqutini ilagilugit Ataatangata niqturnarnirjuanganit, tavvani atunit akilirumaaqpait piniarnirilauqtangit maliglugit.

²⁸ Sulijumik uqautivassi! Uvaniittuqaqpuq Inuup Irningata angajuqqaarjuangurniriniaqtanganik takulauqqaaratik tuqunianngittunik.”