ᒫᑎᐅᓯᐅᑉ ᐊᒡᓚᖏᑦ 15 - Aglait Ijjurnaittut

Sivuliviningita Ajuriqtuijjutiviningit

¹ Tavva Paarisit ilangit, piqujaniglu ilisaijit Jiruusalimminngaarlutik Jiisusimuaqput uqarlutik,

² “Sungmanikkua ilinniaqtitit sivulitta ajuriqtuutinginnik naalanngilat? Aggangmingnik uasaqattanngimmata nirinialiraangamik!”

³ Jiisusiup kiuvait, “Sungmat Guutiup piqujanginnik nalaanngilasi sivulitsi ajuriqtuutinginnik malingaarlusi?

⁴ Guuti piqujilaurmat, ‘Ataatangnik anaanangniglu ikpigusutsiarit,’ ammalu ‘Nalliat ataataminik anaanaminiglu uqarnirluutilik taanna tuqutaujuksauvuq.’

⁵ Ajuriqtuivakpusili qiturngarijaujuq ataataminut anaanaminutlu ikajutiksaminik pisimajuq. Uqarussi, taanna Guutimut pigijaujuq,

⁶ tavva ataataminik anaanaminiglu upigusunngikkaluaqpat qanuigivanngitasi. Taimailiuqtillusi Guutiup maliktauqujanganik malinngilasi. Malingaarumallusi nangminiq ajuriqtutigivaktatssinnik.

⁷ Takurmuuqtusi! Aisaiasi sulitsiarluni uqalauqpuq ilissi pijjutigillusi! Uqarluni:

⁸ ‘Ukua inuit uqausirmigut isumagitsiaqpaanga, Uummatingitali ungasigivaanga.

⁹ Sulinatik tuksiarvigivaanga, Ajuriqtuijjutiqaramik inuit aqqiktavininginnik ukpirnirmut tunngaviuniraqtamingnik.’ Guutiup piqujangititut piniarutautillugit!’”

Makua Tamajja Inungmik Salumajunniiqtitsijut

¹⁰ Tavva Jiisusiup inugasagjuat imminut qaiquvait, uqautillugit, “Naalatsiarissi tukisilusi!

¹¹ Inuup qaningagut itiqtut inungmik narrunaqtitsinngilat; inungmilli anijut uqausit taakkua inungmik narrunaqtitsivut.”

¹² Tavva ilinniaqtingita upaglugu uqautivaat, “Qaujimavit Paarisit uqausirijarnut iluarunniiqtitaungmata?”

¹³ Jiisusiup kiuvait, “Piruqtut Ataatama qilangmiittuup kanngaqsuutigilaunngitangit amaangitigut nusuktaujumaaqput,

¹⁴ ilissi isumaalutigijariaqanngitasi! Tasiuqtiungmata tautunngittuullutik, tautunngittuuqatimingnik tasiuqsinasuaqtut tautunngittuinnaugutiglu itiqsamut katakkajaqput.”

¹⁵ Piitturuusi uqaliqpuq, “Ajjiujut uqausirijatit nalunailaukkit uvattinnut.”

¹⁶ Tavva Jiisusiup uqautivait, “Suli qaujimaniqsaunngilasi asitsinnit?

¹⁷ Tukisinngilasi sunatuinnaq inungmut qaningagut itiqtuq, aqiarunganuarmat, kinguningagullu timinganit anigilluni.

¹⁸ Inuulli qaninganit anijut inuup uummatinganinngaaqput, tamakkua tavva inungmik narrunaqtitsijut.

¹⁹ Inuup uummatinganit isumait piunngittut saqqipput, pijaariluni tuqutsiniq, nuliariingnirmik asinniarniq, katititausimaqatiginngitamik innangaqatiqarniq; tiglingniq, inuuqatimik saglutiqarniq, uqautiqarlungniq.

²⁰ Tamakkua tamajja inungmik narrunaqtitsivut; nirilunili aggait uasaqsimanngikkaluaqtillugit inungmik narrunaqtitsinngilat.”

Arnaup Ukpirninga

²¹ Jiisusi tavvanngat aullarami nunalit Tairiup Saituniullu qanigijaanuaqpuq.

²² Takugit, arnaq Kainanimiuq tamaani qanigijaani nunaqaqtuq Jiisusimuaqpuq nipiqquqtulluni uqaqpuq, “Ataniq, Taivitiup Irninga nikaginnga; paniga anirnirlungmut itiqtausimangmat aksuruqtitaullunilu.”

²³ Jiisusi arnamut kiunngilarluunniit. Tavva ilinniaqtingita Jiisusi upaglugu qinuvigivaat, uqarlutik, “Una arnaq aullaqtilauruk, uvattinnik malikatagluni nipilialutuinnaungmat!”

²⁴ Tavva kiuvaa, “Tilijausimatuinnaqpunga siipinut asiusimajunut Isarialimiunut.”

²⁵ Arnaq Jiisusiup itiganginnut siiqqurluni, uqaqpuq, “Ataniq ikajulaunnga!”

²⁶ Jiisusiup kiuvaa, “Naammanngimmat qiturgarijaujut niriniaqtanginnit tigusiluni qimminullu igillugit.”

²⁷ Arnaup kiuvaa, “Sulivutit Ataniq, qimmilli niriqattaqput nirinirlukunit angajuqqaangita saanganit katagaqtaunikunik.”

²⁸ Tavva Jiisusiup kiuvaa, “Arnaaq ukpirniit angijuuvuq! Pijumajarnik tunisiviunialiqputit.” Tavvainnaq arnaup paninga aaqqikpuq.

Jiisusiup Aaqqiksininga Inungnik Amisunik

²⁹ Jiisusi tavvanngat aullarami Galiliap tasingata sinaagut pisuliqpuq. Qaqqamut majurarluni, qaanganuarami ingippuq.

³⁰ Inugasagjuallu amisut Jiisusimuaqput, tusiattunik pisugunnatsianngittunik naksarlutik, tautunngittuniglu, naukkutuinnarlu itigangmigut aggangmigullu aanniqsimajunik, uqarunnanngittuniglu, asinginniglu inuit qanimmasilit amisut Jiisusiup saanganuarujjauvut; Jiisusiup aaqqikpait.

³¹ Inuillu kamavut takuliramik uqarunnanngittut uqallalirmata, naukkutuinnarlu iliqqusirluktut qanuinngitsialirmata, tusiattut pisutsialirmata, tautunngittullu tautulirmata; Isarialimiut Guutinga niqtuqpaat.

Jiisusiup Inungnik 4,000-nik Nirititsininga

³² Tavva Jiisusiup ilinniaqtini imminut qaiqullugit uqautivait, “Ukua inugasagjuat ilatsugivakka, ullunik pingasunik uvanniimmata nirilauratik; kaaktillugit aullaqtituinnarumanngilakka, angirrarasualirlutik aqqutimingni nukiirutituinnariaqarmata.”

³³ Tavva ilinniaqtingita uqautivaat, “Nakilli taakkununga naammaktunik niqiksaqtaarniaqpita? Tamaani sunaqajuittumi inugasagjuat nirititauqullugit?”

³⁴ Jiisusiup uqautivait, “Qatsinik niaquujaqaqpisi?” Taakkua uqaqput, “7-nik niaquujaqaqpugut, iqalukulungniglu mikijunik ununngittunik.”

³⁵ Tavva Jiisusiup inugasagjuat nunamut iksivaquvait.

³⁶ Niakuujait 7 iqaluillu tiguvait, qujaliqqaarlunilu agguqpait ilinniaqtiminut tunillugit, ilinniaqtingitalu tuniuqautigivait inugasangnut.

³⁷ Tamarmik nirivut naammaksillutik; tavva 7-nik iviujanik tigusillutik amiakkunginik agguqsimajunik taakkualu tatapput.

³⁸ Nirijut angutainnait unurniqaqput 4,000-nik, arnait surusiillu naasaqasiutinagit.

³⁹ Jiisusiup inugasagjuat aullaquliqpait, umiamulli ikilluni nunamut Maagatanimik atilingmut ikaaliqpuq.