ᒫᑎᐅᓯᐅᑉ ᐊᒡᓚᖏᑦ 14 - Aglait Ijjurnaittut

Juanasi Paaptitsirijiup Tuquninga

¹ Taissumani Iruutasi Galiliami aulatsijiujuq Jiisusimik tusaqtitaugami quviagijauninganik.

² Angajuqqaaqutini uqautivait, “Juanasi Paaptitsirijillariunasugivara, tuqungajunit makittuviniq; taimaimmat pijunnarniqaliqpuq kamanaqtulinirnik pinasuarunnarluni.”

³ Tamatuma sivuningagut Iruutasiup Juanasi tigujauqulauramiuk, attungirlugu tigujausimavingmuaqtautilluniuk, taimailiulauqpuq Iruutiasi pijjutigillugu, qatanngutingata Pilippuusiup nulianga.

⁴ Tamatuma sivuningagut Juanasiup Iruutasi uqautilaurmagu, “Tammallarikputit Iruutiasimik nuliaqtaarlutit!”

⁵ Iruutasiup Juanasi tuqutautittumalauraluaqpaa, Juutilli sivuuragivait, Juanasimik nalauttaijiunasugiksingmata.

⁶ Iruutasiup inuulirviksiurvingani Iruutiasiup paninga taanisiqpuq nalliunniqsiuriaqsimajulimaanut takunnaaqtaulluni, Iruutasiullu quviagimmarikpaa.

⁷ Uqalauqpuq sulilariktinniaqtaminik sangutinianngitaminiglu, tunisivigijunnaqpagit sunatuinnarmik pijumajarnik.

⁸ Niviaqsaaq anaanaminut apirilaurluni, anaanangata pijauqujanganik maligluni Iruutasi pijumavigivaa, uqarluni, “Maanna tunisivigilaunnga uvani Juanasi Paaptitsirijiup niaqunganik allirarmiitillugu!”

⁹ Angajuqqaarjuaq quviasugunniiqpuq; angimmarigluni uqaviqqaugami takunnaariaqsimajut tusaatillugit, taassuma pijumajanga kajusititauquvaa.

¹⁰ Taimaimmat Juanasi niaquiqtauquvaa tigujausimavingmi.

¹¹ Juanasiup niaqua allirarmiitillugu niviaqsaamut aittuutauvuq, niviaqsaap anaanaminuarutivaa.

¹² Juanasiup ilinniaqtingit tavvunngaramik, timinga aillugu annisivaat, iluvirlugu; tavvanngat Jiisusimuaqput tamatuminga uqautillugu.

Jiisusiup 5,000-nik Nirititsininga

¹³ Jiisusiup tamanna tusaramiuk, tavvanngat umiakkut aullaqpuq inuqanngittumut inutuujaturluni. Inugasagjuat tusaramik, nunamingnit aullaqput malilirlugu pisuglutik.

¹⁴ Jiisusi umiamit niugami inugasagjuanik takuvuq, ilatsugilirlugit, qanimajiangit aaqqikpait.

¹⁵ Unnuktillugu ilinniaqtingita upakpaat uqautillugu, “Maanna unnulualirmat, tamannalu najuqtavut iglutaqarani; inuit aullaqtilaukkit nunalingnuarlutik immingnik niriniaqtamingnik niuvirniarmata.”

¹⁶ Jiisusiup kiuvait, “Ukua aullariaqanngittut, ilissi niqiksanginnik tunisivigilauqsiuk.”

¹⁷ Ilinniaqtingita kiuvaat, “Niaquujanik tallimainnarnik pitaqaqpugut, iqaluungniglu marruungnik.”

¹⁸ Jiisusiup uqautivait, “Atii, taakkua qailauqsiuk.”

¹⁹ Tavva inugasagjuat nunamut ivilingmut iksivaquvait; niaquujait tallimat iqaluuglu marruuk tigullugit qilangmut takusarluni, Guuti qujagivaa, niaquujait agguqpait ilinniaqtiminut tunillugit, ilinniatingillu inungnut tuniuqqaivut.

²⁰ Tamarmik nirivut naammaksillutik. Tavva ilinniaqtit iviujanik 12-nik tigusivut, amiakkunik agguqsimajunik taakkua tatatauvut.

²¹ Angutit nirilauqtut 5,000 qanigijanganiipput, arnait surusillu naasaqtauqatautinnagit.

Jiisusiup Pisungninga Imaup Qaangagut

²² Tavva Jiisusiup ilinniaqtini umiamut ikiquliqpait tasiup akianut ikaaqullugit sivunirmini, nangminirli Jiisusi inungnik aullaqtitsivuq

²³ inuit aullaqtittariiramigit, qaqqamut majuraqpuq inutuuluni tuksiarumalluni. Unnuktillugu tavvaniippuq inutuulluni;

²⁴ umialli nunamit ungasiktumiiliqput tasirmi, umiangat puukaqtammariliqpuq ingiulingnut; anurimut agguraramik.

²⁵ Ullaakkut siqirngujaq 3-lu 6-siullu akunninganiitillugu, Jiisusiup upaliqpait, imaup qaangagut pisugluni.

²⁶ Ilinniaqtit takugamik imaup qaangagut pisuktumik kappiasummariliqput, uqarlutiglu, “Tuurngaalunguna!” Nipituinnarmik ilangit nilliqput kappiasumut.

²⁷ Tavvainnarli Jiisusiup uqarvigivait, uqarluni, “Quaqsaanganasi! Uvangauvunga. Kappiasugasi!”

²⁸ Piitturuusi nilliqpuq uqarluni, “Ataniq, ivillariuguvit, imaup qaangagut ilingnut qaiqulaunnga.”

²⁹ Jiisusiup kiuvaa, “Qailirit!” Tavva Piitturuusi umiamit niulluni, imaup qaangagut pisuliqpuq Jiisusimut.

³⁰ Ikpigiummiliramiup anuriup sanngininga, kappiasuliqpuq, kivisillunilu imaanut nillirluni, “Ataniq! Piulinnga.”

³¹ Tavvainnaq Jiisusiup isaglugu tiguvaa uqautillugu, “Ukpirnikiluaravit! Sungmaat qulaliqpi?”

³² Tamarmik umiamut ikingmatik, anuri ikullaqpuq.

³³ Ilinniaqtingit umiamiittut saanganut paammaktiqput, uqarlutik, “Sulillariktumik Guutiup Irnirivaatit.”

Jiisusiup Qanimajunik Aaqqiksininga Ginisariitimi

³⁴ Tasirmik ikaaramik, nunaaqput Ginisaritimik atilingmut,

³⁵ inuit ilitaqsigamik Jiisusimik, tavvani qanigijanganiittut tamarmik uqaujjauvut qanimajullu tamarmik Jiisusimuarutivait.

³⁶ Inuit ilangit qinuvut Jiisusiup annuraangita sinaagutuinnarngunnit qanimajut aktuqsijunnaqullugit; Jiisusiup annuraangita sinaanik aktuqsijulimaat aaqqiktauvut.