ᒫᑎᐅᓯᐅᑉ ᐊᒡᓚᖏᑦ 13 - Aglait Ijjurnaittut

Ajjiujuq Piruqtuksanik Kanngaqsuiji

¹ Ullumi tavvanitsainnaq Jiisusiup iglu taanna qimaglugu tasiup sinaanuaqpuq.

² Inugiakturjuat tavvani katimajut Jiisusiup avataani, unuqtummarialuulirmata umiamuaqpuq, tavvanilu iksivaarluni, inugasagjuat tasiup sinaani nangiqtillugit.

³ Ajjiujunik aturluni amisunik uqallagvigivait, imaak uqarluni: “Taissumani angutitaqalauqpuq niaquujaksanik kanngasuijaqtuqtumik.

⁴ Piruqsiivingmut kanngaqsuiliqpuq piruqtuksanik, ilangit aqqusinirmut katakput, tingmiat tamaunngaramik tamakkua pukuliqpait.

⁵ Ilangilli ijjukittumut qaiqsumut katakput, tamanna ijjukittuungmat; piruqtuksait tavvainna pirukautigivut, tamatuma ijjuup saattuuninganut.

⁶ Siqiniq nuingmat, piruliqtuugaluat uutauvut; amaaqannginnamik akuniunngittuq paniqput.

⁷ Ilangilli piruqtuksait katakput uqpingnut kakillautilingnut, taakkua piruramik, ipititauvut uqpingnut kakillautilingnut.

⁸ Ilangilli piruqtuksait katakput nunamut ijjutsiariktumut, piruqtuit piruramik niaquujaksaqaliqput: ilangit 100-nik, ilangit 60-nik, ilangillu 30-nik.”

⁹ Jiisusilu uqaqpuq, “Tusaajunik siutilit, tusarlit!”

Ajjiujuup Taassuma Uqausirijaujjutigijanga

¹⁰ Tavva ilinniaqtit Jiisusimuarlutik apirivaat, “Sungmat ajjiujutigut inuit ajuriqtuqpigit?”

¹¹ Jiisusiup kiuvait, “Guutiup Ataniuvingata nalunarninganik qaujititauvusi, taakkuali qaujititaunngilat.

¹² Piqaqtuq tunisiviukkannirajaqpuq piqaluakkanniqullugu, piqanngitturli aqsaaqtaugajaqpuq mikijumigluunniit piqaraluaqpat.

¹³ Taakkununga ajjiujunik uqausiqaqattaqpunga imainninganut, takunnaraluarlutik takujunnanngimmata, tusaagaluarlutik tusarunnanngilat, tukisijunnaratiglu.

¹⁴ Aisaiasiup uqausirilauqtangit nalautsivut imailijut: ‘Tusaatsiarniaqpusi tukisinianngilasili; Takutsiarniaqpusi, suqquiqsinianngilasilu.

¹⁵ Isumangit kigliqatsiaqtitsijunniirmata, Siutingillu tusaatsiarunniirlutik. Sikunngingallutiglu, sikunngingikkutik takutuinnariaqaramik, Siutimingnullu tusaatuinnariaqaramik, Uummatimigullu tukisituinnariaqaramik, Uvannullu saagiatuinnariaqaramik uvangalu aaqqikkajaqpakka.’

¹⁶ “Ilissili, quviasuktuksauvusi! Ijisi takunnarmata, siutisilu tusaallutik.

¹⁷ Sulijumik uqautivassi, nalauttaijut amisut, Guutiullu inuqutingit amisut, takujumalauqput takujassinnik, takulaunngilallu, tusarumammarilauqput tusaajassinnik, tusalauratiglu.”

Jiisusiup Nalunaiqsininga Kanngaqsuijuup Ajjiujuuninganik

¹⁸ “Naalalaurissi, kanngaqsuijuup ajjiutitauningata tukinganik.

¹⁹ Taakkua uqausirnik tusaqtut Guutiup Ataniuvinganik tukisinatiglu, ajjiqaqput piruqtuksanik taikkununga aqqusinirmut kataktunik, piunngittuq tikinnami piijaivuq kanngaqsuutigijaujunik taakkununga.

²⁰ Piruqtuksait nunakittumut qaiqtumut kataktut imaittumik tukiqaqput, uqausirnik tusaqtunut quviasulirlutiglu tusaramik.

²¹ Kisianili itijumik tunngaviktaaqtitsinginnamik akuniunngittuq nuqqaqput, quviananngittunut uvvalu akiraqtuqtaunirmut tikitauliramik, taakkua uqausit pillugit, tavvainnaq sapilikautigivut.

²² Piruqtuksailli kataktut uqpit kakillautilit akurngannut imaittumik tukiqaqput, uqausirnik tusaqtunut; tamatumali inuusiup isumajaarnarninganut ajuqsanngittuujumanirmullu uqausit ipititauvut, pirurviunatiglu.

²³ Piruqtuksailli nunamut ijjuriktumut kataktut imaittumik tukiqaqput; uqausirnik tusaqtunut tukisillutiglu; piruqtitsiliqtunut, ilangit 100-nik, ilangilli 60-nik, ilangillu 30-nik.”

Pirurnirluktut Ajjiutitauningat

²⁴ Jiisusiullu uqautikkanniqpait ajjiujumik asianik: “Guutiup Ataniuvinga imaittumik ajjiqaqpuq; angut kanngaqsuivuq kanngaqsuutiksanik piujunik piruqsiiviqutiminut.

²⁵ Unnuakkulli sinilirmata, akiraq piruqsiivingmuaqpuq kanngaqsuillunilu pirurnirluktuksanik niaquujaksait akurngannut, aullarluni.

²⁶ Piruqtulli pirulirmata nuvungit niaquujaksait aaqqikpallialirmata, tavva pirurnirluktut saqqikkivut.

²⁷ Piruqsiiviqutiliup pijingit angajuqqaamingnuaqput uqarlutiglu, ‘Angajuqqaak, kanngaqsuutiksanik piujunik kanngaqsuilauravit piruqsiiviqutingnut; makuali? Pirurnirluktut nakit pijuvini?’

²⁸ Taassuma kiuvait, ‘Akiraup tamanna pinasuaqtavinia,’ taakkua apirivut, ‘Pirurnirluktunik amusijaqtuquvitigut?’

²⁹ Taanna kiuvuq, ‘Aakka, tamakkuninga pirurnirluktunik katitsiliqtillusi, niaquujaksait ilangit amuqasiutituinnariaqarassiuk.’

³⁰ Taimaimmat niaquujaksait, pirurnirluktullu, piruqatigiituinnalaurlit katiqsuiviksaq nalliutilaunnginningani, katiqsuivigli nalliutikpat nakatirijit uqautijumaaqpakka: pirurnirluktut nakatiqqaarlugit, qilaksuqsigit katillugit ikuallagaksauqullugit, kinguningagulli niaquujaksait katisigik katiqsivinnuarlugit!”

Ajjiujuq Piruqsiaksaq Mikittukuluk

³¹ Jiisusiup uqarvigikkanniqpait ajjiujumik asianik: uqarluni, “Guutiup Ataniuvinga piruqsiaksatut mustarttut taimaippuq angutiup piruqsiaksaq tigugamiuk piruqsiiviqutiminut kanngaqsuutigivaa.

³² Taanna piruqsiaksalimaanit mikinniqpauvuq, pirurami piruqtulimaanit anginiqpauliqpuq napaaqtuulirluni, tavva tingmiat tavvani ulluliuliqput napaaqtuup avalangajunginni.”

Puvallaqqutiup Ajjiutitauninga

³³ Jiisusiup suli ajjiujumik asianik uqautikkanniqpait: “Guutiup Ataniuvinga imaittumik ajjiqaqpuq, arnaq puvallaqqummik tigusivuq, niaquujaksaliaminut angijumut akuppaa, taannalimaarlu puvallaqtippaa.”

Jiisusiup Ajjiujunik Aturninga

³⁴ Jiisusi ajjiujunik kisiani uqausiqarluni tamakkuninga uqallakpuq inugasagjuanut; ajjiujut asinginnik aturluni ajuriqtuinngilaq.

³⁵ Tavva nalauttaijuup uqausingit nalautsiliqput imailijut: “Ajjiujunik aturlunga uqarviginiaqpakka; Uqautiniaqpakka ijiqsimalauqtunik silarjuap pinnguqtitauninganit.”

Jiisusiup Nalunaiqsininga Pirurnirluktuup Ajjiujurijauninganik

³⁶ Jiisusi inugasagjuanit qimaruutigami iglumut itirmat, ilinniaqtingita upakpaat uqarlutik, “Uqautilauqtigut ajjiujuq pirurnirluktuq piruqsiivingmiittuq qanuq tukiqarmangaat.”

³⁷ Jiisusiup kiuvait, “Angut piruqtuksanik piujunik kanngaqsuijuq, taannauvuq Inuup Irninga;

³⁸ piruqsiivik, tavva silarjuaq, piruqtuksait piujut tavva inuit Ataniuviup pingit; pirurnirluktut tavva inuit Saataanasiup pingit;

³⁹ akiraqtuqti pirurnirluktuksanik kanngaqsuijuq taannauvuq Saataanasi; nakatirivvik tavva silarjuup isua, katiqsuijit tavva aingilit.

⁴⁰ Taakkua pirurnirluktut katitaullutik ikitaungmata ikumamut, taimaatsainnaqtauq pijuqarumaaqpuq silarjuup isuani:

⁴¹ Inuup Irninga aingiliqutiminik tilisijumaaqpuq, katiqsuijaqtuqullugit tavvanngat Ataniuvingminit, inungnik ajuqtulititsijunik tamainnik, asinginniglu ajuqtulinirmik pinasuaqtunik,

⁴² taakkua igittumaaqpait ikumarjuarmut; tavvani qiajumaaqput aglirularlutiglu aannianirmut.

⁴³ Iluaqtulijulli qaumaniqarumaaqput siqiniqtut Ataatangatta Ataniuvingani. Tusaajunik siutilik tusarli!”

Ajjiujuq Piquti Illirnaqtuq Ijiqsimajuq

⁴⁴ “Guutiup Ataniuvinga ajjiqaqpuq piqutimik illirnaqtumik ijiqsimajumik piruqsiivingmi, angutiup nanigamiuk ijikkannirivaa; aksualuk quviasulirami piqutilimaani niurrutigivait utirami taanna piruqsiivik niuviarivaa.”

Ajjiujuq Sapangaq Pijuminaqtuq

⁴⁵ “Ammattauq, Guutiup Ataniuvinga ajjiqaqpuq niuviqtimik qiniqtumik sapangarmik pijuminaqtumik.

⁴⁶ Nanisigamilu akitujuksajammariungmat angirraqpuq, piqutilimaani tamarmik niurrutigivait utirami sapangaq pijuminaqtuq niuviarivaa.”

Iqalugasuktuup Ajjiujurijauninga

⁴⁷ “Ammattauq, Guutiup Ataniuvinga iqalungniutititut nuluatitut taimaippuq imaanut ningititaujutitut qanuittutuinnaalungnik nuluaqtitsijutitut.

⁴⁸ Nuluat tatammata, iqalugasuktinit nunamuarujjauvut nunamuaramik iksivaalirlutik iqalungnik pijailiqput iqalutsiavait katillugit qattaujanut piunngittulli igippait.

⁴⁹ Taimaittumaarivuq silarjuup naggataani. Aingilit tikittumaaqput piijaijaqturlutik piunngittunik taakkunanga iluaqtulijunit,

⁵⁰ piunngittut igittumaaqpait ikumarjuarmut; tavvani qiajumaaqput aglirularlutiglu aannianirmut.”

Ajuriqtuusituqaq Ajuriqtuusirlu Nutaaq

⁵¹ Jiisusiup apirivait, “Uqausirijakka tukisivisiuk?” Taakkua kiuvaat, “Tukisivavut.”

⁵² Jiisusiup uqautivait, “Taimaimmat piqujanik ilisaijit Guutiup Ataniuvinganik ilinniaqtitausimajut ajjiqaqput iglumik nangminiqaqtutut sirluarmingnit saqqititsijutitut nutaanik nutaunngittuniglu.”

Naasariitimiut Jiisusimik Narruningat

⁵³ Jiisusiup tamakkua ajjiujut uqausirijariiramigit, tavvanngat najuqtaminit aullaqpuq.

⁵⁴ Nunatuqaminut utirami Juutit ukpirnirmut katimavinganni ajuriqtuiliqpuq, tusaajulimaat kamaniammarikput, uqarlutik, “Nakinuna silatuniqtaaqtuviniq kamanaqtulijunnaqsillunilu?

⁵⁵ Qijulirijiumuna irnirinngila? Una Miarimik anaanaqanngilaq? Qatanngutingillu ukuangunngilaat Jaimisi, Juusipi Saimuuni, Juutasilu?

⁵⁶ Najangillu uvattinnimiutaunngilaat? Nakilliuna tamakkuninga pitaaqtuviniq?”

⁵⁷ Taimaimmat narrugiliqpaat. Jiisusiup uqautivait, “Nalauttaijuq nanituinnaq upigijautsiasuunguvuq nunatuqaminili nangminirijaminilu ilamini, upigijautsiasuungunngilaq.”

⁵⁸ Tavvanili kamanaqtulinirnik amisunik pinasualaunngilaq, ukpirusunginningit pijjutigillugit.