ᒫᑎᐅᓯᐅᑉ ᐊᒡᓚᖏᑦ 10 - Aglait Ijjurnaittut

Aapuusitalit 12 Qaiqujauningit

¹ Jiisusiup ilinniaqtini 12 qaiquvait, pijunnarniqtaaqtillugit anirnirlungnik anititsijunnaqullugit, qanuittutuinnarniglu aannianaqtunik qanimmasirniglu aaqqiijunnaqsitillugit.

² Aapuusitalit 12 atingit ukuanguvut: sivulliqpaaq, Saimuuni, taijaujuq Piitturuusimik qatanngutaalu Aanturuu; Jaimisikkuglu Juanasikuk nukariik, Sipitiup irningik.

³ Pilippuusi, Patiulumiulu; Tuumasi, Maatiusilu, Ruumamiut kiinaujaiqtitsijiqutingat; Jaimisilu Aulpiasiup irninga, Taatiasilu;

⁴ Saimuunilu Kainanimiumik taijaujuq Juutasilu Iskariat, taassuma Jiisusi pijautilauqpaa.

Taakkua 12 Piliriaksanginnik Uqaujjauningit

⁵ Taakkua 12 Jiisusiup tilivait imaak maligaksaliurlugit, “Juutiunngittut nunanginnut ainiarasi, Samiariarmiut nunanginnuaqtaililusi.

⁶ Makunungali siipinut asiusimajunut ailirissi, Isarialimiut inunginnut.

⁷ Imaak ajuriqtuilusi, ‘Qilaup Ataniuvia qagliliqpuq!’

⁸ Qanimajut aaqqiksigik, tuqungajullu uummaqtillugit, sivuuragijaujuniglu paqtiqtut paqtirunniiqtisigik, anirnirluillu inungnit anitillugit. Akiqanngittumik tunisiviugassi akiqanngittumiktauq tunisiuk.

⁹ Guulunik, siulvirimigluunniit naksarniarasi, kannujanigluunniit kiinaujanik ikpiarjungmiutaqarniarasi;

¹⁰ aullalirussi qinuratiit puuksajanganik naksarniarasi, uvinirukkannirniglu, itigagutikkannirnigluunniit, ajauppiamigluunniit naksarniarasi; pinasuaqti tunisiviujariaqarmat pijariaqaqtanganik.

¹¹ “Iglugasangnut tikikussi nunalingnulluunniit, qaujinasuarissi qinirlusi nalliannituinnaq ilissinnik tunngasuktitsigajaqtumik, tunngasuktitsijuq taanna najuliqsiuk, tavvanngat nunamit aullalauqqaarasi.

¹² Iglumut itirussi, uqarissi ‘Saimaniup ilagilisi.’

¹³ Inunginnit tunngasuktitaugussi, saimaniup najurniaqpaasi; tunngasuktitaunngikkussili saimmaqtissinisi aturnianngilaq.

¹⁴ Nunalingnit tunngasuktitaunngikkussi uqausirijasi naalaktaujumanngippata, tavvanngat aullarissi itigassi saningit katagaqtillugit.

¹⁵ Qularnanngittumik uqautivassi, Iqqaqtuivik Nalliutikpat Guutiup nikaginiqsarilaaqpait Sutuumamiut Gumuuramiullu inungit taakkunangat nunalingnit tunngasuktissinngittunit.”

Akiraqtuqtauniup Tikiutininga

¹⁶ “Takugit siipititut tilivassi amaruit akurngannut; taimaimmat quglugiatitut ujjiqsutiarissi, tuuvititullu piqunniqtigilusi.

¹⁷ Qaujisatsiarissi, angutit ilanginnut tigujaujumaaqpusi iqqaqtuqtauvingmullu aataulusi, isiqujaujunniirumaaqpusilu Juutit ukpirnirmut katimavinginnut.

¹⁸ Uvangalu pijjutigilunga iqqaqtuqtaujumaaqpusi aulatsijiujunut angajuqqaarjuanullu, Uqausirnik Tusaruminaqtunik uqausiqarunnaqullusi taakkununga, Juutiunngittunullu.

¹⁹ Iqqaqtuqtauvingmut aataugussi isumajaarniarasi qanuq uqariaqarniarmangaassi, uvvalu qanuililusi uqausiqarniamangaassi; tamanna nalliutikpat, uqausiksassinnik tunisiviujumaarassi.

²⁰ Uqausirijasi ilissinnit pinianngimmata; Ataatasili Anirninganit pijumaaqput, uqallagumaarmat ilissitigut.

²¹ “Angut pijaukkaijumaaqpuq qatanngutiminik tuqutitauqullugu, ataataujurlu taimaatsainnaq pijumaarivuq qiturngaminut; qiturngarlu angajuqqaamingnik akiraqtulirumaaqput tuqutautissilutik.

²² Inulimaanut uumigijaulirumaaqpusi uvanga pillunga. Ukpirnirminigli tigumianginnarluni isuanut, taanna piulijaujumaaqpuq.

²³ Nunalingnit akiraqtuqtaugussi, tavvanngat qimaagissi nunaup asianut, qularnanngittumik uqautivassi Isarialiup iglugasagjuangit ingirrajariirviginiannginnassiuk, Inuup Irninga tikilauqaaqtinnagu.

²⁴ “Ilinniaqti anginiqsaunngilaq ilisaijiminit; pijilu anginiqsaunngilaq angajuqqaaminit.

²⁵ Taimaimmat, ilinniaqti ilinniaqtitsijimitut taimailiruni tavva naammaksivuq, pijilu angajuqqaaqaqtuq taimaatsainnaq angajuqqaamituuliruni tavva naammaksivuq. Ilagiiktut angajuqqaangat Piulsipaapimik taijauqattaqsimakpat, tavva nangminingit atiqaqtitauniaqput, piunginniqsaukkanniqtumik!”

Kinaa Sivuuragijaujuksauva?

²⁶ “Taimaimmat inungnik sivuuraniarasi; ijiqtausimajut saqqititaujumaaqput, ijiraqtuangujullu qaujijaujumaaqput.

²⁷ Taaqtumi uqautigussi, qaumatsiaqtumi uqausirijaksarivasi; siutikkut isijjugviugussi uqausirijariaqaqpasi igluup qaanginni.

²⁸ Sivuuraginiarasigik timimik tuqutsijut tarnirmigli tuqutsijunnanngittut; sivuuragisiugli, tamainnik asiruijunnaqtuq timimik tarnirmiglu ikumarjuarmi.

²⁹ Kiinaujarmut savirajakulungmut atausirmut qupanuangnik marruungnik niuvirunnaqputit, taimaikkaluaqtillugu qupanuaq atausirluunniit katagnianngilaq nunamut Ataatasi taimaiqunngippagu.

³⁰ Nujasi aglaat niaqussinniittut qatsiungmangaata qaujimajauvut.

³¹ Taimaimmat sivuuraniarasi; qupanuanit unuqtunit pillariuniqsammarialuugassi!”

Christuusimik Uqausiqarniq, Narrunirlu

³² “Kinatuinnaq inungnut uqausiqaqpat uvannik, uvangattauq taimaatsainnaq uqausirilaaqpara Ataatannut qilangmiittumut.

³³ Kinatuinnarli inungnut uqausiqanngippat uvannik, uvangattauq uqausirilaanngivara Ataatannut qilangmiittumut.”

Inuuqatigiitsiarnirmiunngittuq Akiraqtuqtigiingnirmigli

³⁴ “Isumaniarasi inuuqatigiitsialiqtitsijaqturasugilunga nunarjuarmut; inuuqatigiitsialiqtitsijaqtunngilanga, savigjuarmigli pititsivunga.

³⁵ Tikilauqpunga irniq ataatamingnut akiraqtuliqullugu, paniglu anaanaminut akiraqtuliqullugu; ukuarlu sakiminut arnamut akiraqtuliqullugu;

³⁶ inuup akaunginniqpaamik akiraqtuqtiginiaqpait nangminini iglumiuqatini.

³⁷ “Nalliat ataataminik anaanaminigluunniit uvannit ungagijaqarniqsaukpat, taanna uvannut ilagijaujunnanngilaq; nalliallu irnirminik paningminigluunniit uvannit ungagijaqarniqsaukpat, taanna uvannut ilagijaujunnanngilaq.

³⁸ Nalliat sanningajuliksaminik naksanngittuq maligluni uvannik, taanna uvannut ilagijaujunnanngilaq.

³⁹ Inuusirminik annirusuktuq, inuusirminik asiujijumaaqpuq; inuusirminigli annirusunngittuq uvanga pillunga, taanna inuusirminik nagvaarumaaqpuq.”

Akiliqtauniksait

⁴⁰ “Ilissinnik ilaliuqsijuq uvannik ilaliuqsivuq; uvanniglu ilaliuqsijuq tilijinnik ilaliuqsivuq.

⁴¹ Nalauttaijumik ilaliuqsijuq, nalauttaijutut akiliqtaujumaaqpuq; nalliallu ilaliuqsijuq Guutimik ilaqatsiaqtumik, Guutimik ilaqatsiaqtutitut akiliqtaujumaaqpuq.

⁴² Nalliat imirmik niglinaqtumik imiqtitsijuq maliktinnit mikinniqpaujumik, imiqtitaujuup uvannut maliktiuninga pijjutigilugu, taanna sulimmariglunga uqautivassi akiliqtautsiarumaaqpuq.”