ᓘᑲᓯᐅᑉ ᐊᒡᓚᖏᑦ 9 - Aglait Ijjurnaittut

Jiisusiup Tilisininga Ilinniaqtiminik 12-nik

¹ Jiisusiup ilinniaqtini 12 katiqullugit qaiquvait, pijunnarnirmik angajuqqaunirmiglu tunisivigivait anirnirlungnik anititsijunnaqullugit, aanniajuniglu aaqqiksijunnarnirmik.

² Tilivait ajuriqtuiqullugit Guutiup Ataniuvinganik aanniajuniglu aaqqiksiqullugit.

³ Uqautillugillu “Aulaniriniaqtassinnut sunatuinarmik naksaqtailigissi, ajauppialijarasi, ikpiarjulijarasiluunniit, niqiksagirasiluunniit, kiinaujalijarasiluunniit; atijaksakkannirmik annuraaginngillusi.

⁴ Nalliannutuinaq iglumut itirussi, tavvaniinginnarissi, nunalingnit aullalaunginnissinni.

⁵ Tunngasuktitaunngikkussili, nunalingnit tavvanngat aullalirussi saaniit itigassinnit katagaqtisiuk naammagijaunnginninginik nalunaikkutauniarmat.”

⁶ Ilinniaqtingit aullaqput, nunalilimaanut aqqusaaqattarlutiq, ajuriqtuillutik uqausirnik tusaruminaqtunik qanimajut aaqqikpait nanituinnaaq.

Iruutasiup Nalulirninga

⁷ Iruutasi Galiliami angajuqqaangujuq tusaqattalirami piniarnirijauvalliajunik, naluliqpuq, inuit ilangit uqaqattarmingmata Juanasi Paaptitsiriji tuqungajunit makinniraqtaulluni,

⁸ ilangillu uqaqattarmata Ilaijja saqqinniraqtaulluni, ilangillu uqaqattarillutik nalauttaijut ilangat uummaqsimaniraqtaulluni.

⁹ Iruutasi uqaqpuq, “Juanasi niaquiqtautilauqpara; kinaliinna angut tusaqattaqpara tamakkuninga pinasuaqtuq?” Tavva Jiisusi takunasuaqpaa.

Jiisusiup Nirititsininga Angutinik 5,000-nik

¹⁰ Aapuusitalit utiramik qanuiliurnirilauqtamingnik unikkaaqput Jiisusimut. Ilagillugit aullaqput nunalingnut Pitsaitamik atilingmut.

¹¹ Inugiaktut qaujigamik, maliksaqpaat; Jiisusiup tunngasuktippait uqallagvigillugit Guutiup Ataniuvinganik, aaqqiktaujarialit aanniajut aaqqikpait.

¹² Siqiniq akpalirmat unnuliqtillugu; ilinniaqtingit Jiisusimuaqput uqautillugu, “Inuit aullaqulikkit, nunalingnuarlutik qanigijanginnullu siniktarvingnuarlutik nirijasaqtaarniarmata; maani inuqanngittumiikkatta.”

¹³ Jiisusiup uqautivait, “Ilissi niritilauqsiuk.” Ilinniaqtingit uqaqput, “Tallimainnarnik niaquujaqaqpugut iqaluungniglu marruungnik, niuviriaquvitigut? Ukua inugiagaaluit nirijaksanginnik?”

¹⁴ Tavvaniittut 5,000 qanigijaaniilauqput angutit. Ilinniaqtini uqautivait, “Inuit ingiqulauqsiuk avikturlugit 50-unaaqtirlutik.”

¹⁵ Ilinniaqtingit taimaak pinasuaqput, inulimaat iksivaalirmata.

¹⁶ Tavva Jiisusiup niaquujait tallimat iqaluuglu marruuk tigullugit qilangmut aarluqpuq, Guuti qujagijariiramiuk avikpait, ilinniaqtiminut tunillugit inungnut tuniuqqaiqullugit.

¹⁷ Inulimaat nirivut aqiatturlutik; ilinniaqtingita amiakkut agguqsimajut nuappait iviujanut 12-nut.

Piitturuusiup Nalunaiqsininga Jiisusimik

¹⁸ Jiisusi inutuulluni tuksiaqtillugu, ilinniaqtingita upakpaat; ilinniaqtini apirivait, “Inungnit kinaunasugijauvunga?”

¹⁹ Ilinniaqtingit kiuvut, “Juanasi Paaptitsirijiunasugijauvutit; ilanginillu Ilaijjaunasugijaullutit, ilangitalu nalauttaijut ilangat uummaqtuviniunasugivaatit.”

²⁰ Jiisusiup apirivait, “Ilissili, kinaunasugivisinnga?” Piitturuusiup kiuvaa, “Misaiasiuvutit Guutimit pisimajuq.”

Jiisusiup Uqaujjininga Aanniatitauniksaminik Tuqutauniksaminiglu

²¹ Jiisusiup ilinniaqtini iniqtimmarikpait uqaqunagit tamatuminga kinatuinnarmut.

²² Uqautillugit, “Inuup Irninga angijumik aanniatitaujariaqaqpuq, narrugijauluni Juutit angajuqqaanginnit, tunirrusiqtitsijillu angajuqqaanginnit, piqujaniglu ilisaijinit, tuqutaulaaqpuq, ulluit pingajuannik makilaarivuq.”

²³ Jiisusiup tavvaniittulimaat uqautivait, “Uvannik maligumajuqaqpat, isumaminik inuujumajuksaunngilaq, sanningajuliksaminik qautamaat agjaqsijuksauvuq maliglungalu.

²⁴ Nalliat inuusirminik pisimanasuluaqtuq inuusirminik asiujijumaaqpuq; nallialli inuusirminik asiujijuq pijjutigilunga, inuusini piulijumaaqpaa.

²⁵ Inuk sunamik pivallirutiqarajaqpaa, silarjualimaaq pitaarigaluuruniuk, nangminirlu inuusirminik asiujingaarluni atuutiksaqarunniitikkuniuk?

²⁶ Inuup nalliatta kanngusuutigikpanga inungnut ajuriqtuijjutigijakkalu, taannattauq Inuup Irningata kanngusuutigijumaarivaa niqturnaqturjuanguluni tikikkuni Ataataup niqturnarnirjuangani aingilillu ijjurnaittut ilagilugit.

²⁷ Sulijumik uqautivassi, maanna uvani nangiqatigijasi ilangit tuqunianngilat, Guutiup Ataniuvinganik takulauqqaaratik.”

Jiisusiup Takuminaqsititauninga

²⁸ Tamatuma kingurngani pinasuarusiq naasimaliqtillugu taakkuninga uqausiqalaurluni, qaqqamut tuksiariaqtuqpuq Piitturuusi Juanasilu Jaimisilu ilagillugit.

²⁹ Tuksiaqtillugu, kiinangata tauttua ajjigijunniiqpaa, annuraangit qakuqsivut qilliqsillutik.

³⁰ Takugit, angutiingnik marruungnik uqaqatiqaliqpuq, Muusisimik Ilaijjamiglu,

³¹ taakkuak saqqiqpuuk takuminaqtualungmik qaumaniqarlutik Jiisusiup akuniunngittuq aullarnialirninganik uqausiqarlutik, aturniaqtanganik Jiruusalimmi.

³² Piitturuusi ilangillu uirngarnirmut sinilauqput, iqqummaramik Jiisusiup niqturnarnirjuanga takuvaat angutiiglu marruuk nangiqatigijangik.

³³ Qimaruutilirmatik Jiisusimit, Piitturuusi uqaqpuq, “Ajuriqtuiji, uvaniinnivut quvianaqtualuuvuq; siniktaviliulauqta pingasunik, ilingnut Muusisimullu Ilaijjamullu”, taimaak uqaraluarami imminik ikpigilaunngilaq.

³⁴ Piitturuusi uqariituarmat, nuvuja saqqippuq taakkua ulikpait; ilinniaqtit kappiasuliqput nuvujamut uliktaugamik.

³⁵ Nuvujamit nipi tusaqsauliqpuq uqaqtuq, “Una Irnira, niruaqsimajara; taanna naalaksiuk!”

³⁶ Nipi nipangirmat, Jiisusi taannatuuliqtuq ujjiriliqpaat. Taakkua tamatuminga kinamulluunniit uqausiqalaunngilat, taissumaniutillugu takulauqtamingnik.

Jiisusiup Anirnirlungmik Anititsininga Surusirmit

³⁷ Qautillugu, qaqqamit ammuangmata, inugiakturjuanit Jiisusi upaktauvuq.

³⁸ Inugiaktunilli angut qaigalaaliqpuq, “Ajuriqtuiji, qinuvigivagit irnira takulauruk, qiturngatuarigakku;

³⁹ anirnirluup tikiqattarmagu, tikitsaraingmagu tavvainnaq nillialiqattaqpuq; aulatitaalugilluniuk sukangajualuutiqattarmagu, qaninga qapualiqtualuulluni; taimaaglu aanniatiqattaqpaa qimagunnaillivaglugu.

⁴⁰ Ilinniaqtitit taassuminga anirnirlungmik anititsiqulauraluaqpakka, ajuqpaalli.”

⁴¹ Jiisusiup kiuvait, “Ukpirniqanngittusi, tammaqsimallusilu, qanuq akuniutigijuq najuriaqaqpassi, qanurlu akuniutigijuq qinuisaarutigijariaqaqpassi?” Angut uqautivaa, “Irniit maunga qaitilauruk.”

⁴² Surusiq qailiqtillugu, anirnirluup nunamut urrutippaa sukatitaalugillugu. Jiisusiup anirnirluk iniqtirlugu aniquvaa, surusiq aaqqikpaa, ataatanganut utiqtillugu.

⁴³ Inulimaat kamavigjuaqput Guutiup ajunnginnialuanik. Inuit kamajualuutillugit suli Jiisusiup piniarninganik, ilinniaqtini uqautivait,

Jiisusiup Suli Tuqutaulaarnirminik Uqausiqarninga

⁴⁴ “Ukua uqausiriniaqtakka puiguqtailisiuk; Inuup Irninga pititaugiaviliqpuq inuit pijunnarninginnut.”

⁴⁵ Ilinniaqtingilli tamatuminga uqaqtanganik tukisilaunngilat, uqausit nalunaqtitaulaurmata taakkununga tukisilaunngilat; iliragivaalu apirijariaksaq tamatuminga.

Kina Pillariuniqpaanguva?

⁴⁶ Jiisusiup ilinniaqtingit aivaqatigiiliqput nalliat pilariuniqpaungmangaat.

⁴⁷ Jiisusiup qanuq isumaqarmangaata qaujigamigit, surusirmik tigusivuq saniminut nangiqsitillugu,

⁴⁸ taakkua uqautivait, “Nalliat uuminga surusikulungmik ilaliuqsijuq pijjutigilunga uvannik ilaliuqsivuq, uvanniglu ilaliuqsijuup uvannik tilisijuq ilaliurivaa; ilissinnit mikinniqpaangujuq taanna pilariuniqpaanguvuq.”

Nalliatta Ilissinnik Akiraqtunngittuup Ilagivaasi

⁴⁹ Juanasi uqaliqpuq, “Ajuriqtuiji, inungmik takulauqpugut anititsiqattaqtumik anirnirlungnik ivvit atingani, taanna iniqtilauqpavut taimailiuqunagu ilaginnginnattigu.”

⁵⁰ Jiisusiup uqautivaa, “Taimailiuqtuq iniqtirniarasiuk; ilissinnik akiraqtunngittuup ilagivaasi.”

Samiariamiut Nunaliit Jiisusimik Ilaliuqsijumanngittut

⁵¹ Jiisusiup qilangmuaqtitauviksanga qaglivallialirmat, kajusijumaliqpuq Jiruusalimmut aijumalirluni.

⁵² Upangniaqtaminut uqariaqtuqtitsivuq, Samiariarmiut nunalingita ilangannut siniktarviginiaqtamingnik upalungaiqsiqullugit;

⁵³ Samiariamiulli ilaliunngilaat, nalunanngimmat Jiisusi Jiruusalimmuaqpalliangmat.

⁵⁴ Ilinniaqtingita Jaimisiup Juanasiullu tamanna tusaramikkuk, Jiisusimut uqaqpuuk, “Ataniq, qilangmit ikumamik kataktuqaqullugu tuksiaquvitikkuk ilaliuqsijumanngittut nungutauqullugit?”

⁵⁵ Jiisusiup takusarlugik iniqtiqpaak; [uqarluni, “Anirnirmut qanuittumut qiturngarijaungmangaassik naluvusik; Inuup Irninga tikisimanngimmat inungni asiruijaqturluni, piulijaqturlugilli.”]

⁵⁶ Jiisusi ilinniatini ilagillugit nunalit asinginnuaqput.

Jiisusimik Maliktiujumajut

⁵⁷ Aqqutikkut pisuglutik angummit Jiisusi uqaujjauvuq, “Malingniaqpagit namutuinnaq aigaluaruvit.”

⁵⁸ Jiisusiup kiuvaa, “Tiriganiat sitiqaqput, tingmiallu ulluqaqtlutik; Inuulli Irninga nanituinnaq sinigviksaqanngilarluunniit.”

⁵⁹ Amma asianut uqarivuq, “Ivvit malinnga.” Taanna kiuvuq, “Ataniq, ataataga iluviriaqtuqqaalaurlagu.”

⁶⁰ Jiisusiup kiuvaa, “Tuqungajut tuqujiamingnik iluviqsilirli; ivvit Guutiup Ataniuvinganik uqausiqariaqtulirit.”

⁶¹ Suli ilangat uqarivuq, “Ataniq, maligumavagit; ilakkali tavvauvutiiriaqtuqqaalaurlakka.”

⁶² Jiisusiup kiuvaa, “Nalliat piruqsiiviliurutiminik tigusijuq sanasigiarluni, kingumut qiviaruni, atuqtaujunnanngilaq Guutiup Ataniuvinganut.”