ᓘᑲᓯᐅᑉ ᐊᒡᓚᖏᑦ 7 - Aglait Ijjurnaittut

Jiisusiup Aaqqiksininga Ruumamiut Unataqtuksaqutingata Pijinganik

¹ Jiisusi tamainnik uqallagiirami inungnut Kapiirniamuaqpuq.

² Ruumamiut unataqtuksaqutingita angajuqqaangat tavvani pijiqalauqpuq pinnarijaminik, taanna pijinga qanimavuq tuquligaalluni.

³ Jiisusimik tusarami, Juutit angajuqqaangit tilivait; qaiqujauqullugu pijinganik aaqqiksiniarmat.

⁴ Taakkua Jiisusi upakkamijjuk aksururlutik qinuvigivaat upagutiqullugu, uqarlutik, “Unataqtuksait angajuqqaangat ilingnut ikajuqtaujariaqammarikpuq,

⁵ inuuqativut pinnaringmagit, ukpirnirmullu katimaviksattinnik sanajautitsisimavuq.”

⁶ Jiisusiup tavvunngauqatigiliqpait. Iglunga qaglingmajjuk, unataqtuksait angajuqqaangat ilannarijaminik tilisivuq, uqaqullugit, imaak, “Ataniq, qaijunniirit, naluqqutigama ilingnik itiqujijariaksaq iglunnut;

⁷ ilingnut upagutijariaksaq naluqqutigivunga. Uqatuinnarilli, piqujilutit, pijiga tavva aaqqingniaqpuq.

⁸ Uvangattauq angajuqqaaqarama, unataqtuksaqutiqarlungalu sialaarijannik; ilangannut uqaruma, ‘Ikunngarit’ taikunngaqpuq tavva; asianullu uqaruma ‘Qaigit,’ qaivuq tavva; pijinnut uqaruma ‘Una sanalauruk, sanavaa tavva.’”

⁹ Jiisusiup tamanna tusaramiuk kamaniarutigivaa, inugiaktut maliktini takusarlugit uqautivait, “Uqautivassi, Isarialimiuni taimaak ukpirniqaqtigijumik qaujilaunngilanga.”

¹⁰ Tilijausimajut iglumut utiramik, piji takuvaat aaqqiksimaliqtuq.

Jiisusiup Uummaqtitsininga Uiggarniup Irninganik

¹¹ Kinguningagut Jiisusi nunalingnuarivuq Nainimik atilingmut, ilinniaqtini inugiaktullu ilagillugit.

¹² Nunalinut tikiliqtillugu, takugit, iluviqsijaqtuqtut tuqungajumik agjaqsijut aniliqput, arnaup irnituanganik, taanna uiggarniulluni; inugiaktut tavvanngat nunalingnit ilauvut.

¹³ Ataniup arnaq takugamiuk, nagligimmarikpaa uqautillugu, “Qianngillutit.”

¹⁴ Akiraqtaujuq upakkamiuk aktuqpaa, akiraqtut nuqqaqput, Jiisusi uqaqpuq, “Inuusuktuq, uqautivagit makittit.”

¹⁵ Tuqungajuq ingippuq uqallalirluni. Jiisusiup Anaananganuaqtippaa.

¹⁶ Inulimaat sivuuraliqput; Guuti niqtuqpaat uqarlutik, “Nalauttaijullaringmit tikitauvugut! Guutiup inuqutini upakpait.”

¹⁷ Tamanna Jiisusiup piniarninga unikkausiuliqpuq Juutiami nunaqaqtulimaanit, qanigijanganiittulimaanillu.

Juanasi Paaptitsirijiup Uqariaqtuqtitangit

¹⁸ Juanasi Paaptitsirijiup ilinniaqtingita tamakkuninga Juanasi unikkaarvigivaat.

¹⁹ Juanasi qaiqujivuq ilinniaqtiminik marruungnik, tilillugik Atanirmut apirijaqtuqullugik taassuminga, imaak, “Tainnauvit tikinniarniraqtausimajuq, uvvaluunniit asingnik niriugiaqaqpita?”

²⁰ Taakkuak Jiisusimut tikinnamik uqaqpuuk, “Juanasi Paaptitsirijiup tilivaatikkuk apiriqullunuk imaak, ‘Tainnauvit, tikinniarniraqtausimajuq, uvvaluunniit asingnik niriugiaqaqpita?’”

²¹ Tavvani ikarrami Jiisusi inungnik aanniajunik amisunik aaqqiksivuq, anirnirlungnik inungnit anititsivuq, tautunngittut amisut tautuliqtippait.

²² Taakkuak kiuvaak, “Juanasi uqautijaqtuqsikkuk takujassingnik tusaqtassinniglu: tautunngittut tautuliqput, pisugunnanngittut pisugunnaqsivut, paqtiqtut kappiagijaujumik aaqqiktauvut, tusaanngittullu tusaaliqput, tuqungajullu uummaqput, aktlujut uqaujjauvut uqausirnik tusaruminaqtunik.

²³ Saimaqtitausimajumik inuusiqaqpuq taanna uvannik qularutiqanngittuq.”

²⁴ Juanasiup tilisimajangik tavvaniittunniirmatik, Jiisusi inugiaktunut uqaqpuq Juanasimik pijjutiqarluni, “Juanasi takujaqturassiuk inuqanngittumi, qanuittumik takuniarasugilauqpisi? Iviksugarjuamik anurimut aulataujumik takuniarasugilauqpisi?

²⁵ Sunamigli takujaqtulauqpisi? Angummik annuraatsiaqsimajumik takujaqtulauqpisi? Takugit, annuraatsiariktut ajuqsanngittuullutik, angajuqqaarjuap iglunginni iniqasuunguvut.

²⁶ Sunamik takujaqtulauqpisi? Nalauttaijumik takuniarasugilauqpisi? Ilaak taanna nalauttaijumit pillariuniqsauvuq.

²⁷ Juanasi imaak uqausiusimavuq, ‘Takugit, tilijara pinasuariaqtuqtippara, sivunirni aqqutiksarnik aaqqiksuiqullugu.’”

²⁸ Suli uqaqpuq, “Uqautivassi, Juanasi Paaptitsirijuq anginiqsauvuq arnamut irniarijaulauqsimajunit tamainnit; kisianili nalliat Guutiup Ataniuvingani mikinniqpaujuq taanna anginiqsauvuq Juanasimit.”

²⁹ Tusalauqtut tamarmik Juanasimik Ruumamiullu kiinaujaiqtitsijiqutingit naalalaurmata Guutiup atuqtauqujanganik, Juanasimut paaptitaulauqput;

³⁰ Paarisilli piqujaniglu ilisaijit sulijuqsanngilat Guutiup pinasuarninganik taakkununga, paaptitaujumanatiglu Juanasimut.

³¹ “Sunamulli ukua inuit maanna ajjiutittunnaqpakka? Sunamik ajjiqaqpat?

³² Ajjiqaqput surusikulungnik niuvirvit saniani iksivajunik immingnut uqaqattautijutitut, ‘Nijjausijarvigigaluarassi taanisinngilasi; qiksaaktuqsiutinik nilliagaluaratta qiasinngilasi.’

³³ Juanasi Paaptitsiriji tikilauqpuq nirittailivagluni, uainimik imiqpagani; uqaqpusi, ‘Taanna anirnirlungmik ilummiqtausimavuq.’

³⁴ Inuup Irninga tikimmat nirittailinani imiqtailinanilu; uqaqpusi, ‘Takugit, una niritujualuk aangajaaqtiullunilu, Ruumamiut kiinaujaiqtitsijingita piunngittulijullu ilannaarijangat!’

³⁵ Silatuniup sulitsiarninga saqqititauvuq qiturngalimaangitigut.”

Jiisusiup Pulaariarninga Saimuuniup Paarisiungmijuup Iglunganut

³⁶ Paarisit ilangatta Jiisusi niriqatigijumallugu qaiquvaa igluminut, Jiisusi taassuma iglunganuaqpuq, nirivinganut inngilluni.

³⁷ Tavvani nunalingni arnaqtaqaqpuq ajuqtulijimik, taanna tusarami Jiisusi niriqataungma Paarisiup iglungani, pullaujamik naksarluni tavvunngaqpuq tipitsiarisaummik imalingmik.

³⁸ Jiisusiup tunuani nangiqpuq itigangita saniani, qialluni, quvviminut itigangit qausiliqtiqpait, allaqtirlugillu nujarminut, itigangillu kunikpait, tipitsiariktumik kuvvirillugit.

³⁹ Paarisiup qaiqujisimajuup taanna taimailiurninga takugamiuk, isumaliqpuq, “Una sulijumik nalauttaijuuguni, qaujigajaqpuq arnaq qanuittuungmangaat aktuajigijani; ajuqtulijiuninganik qaujigajaqpaa.”

⁴⁰ Jiisusiup nilliutivaa uqautillugu, “Saimuunii, ilingnut uqausiksaqarama.” Taassuma kiuvaa, “Qanuq ajuriqtuiji.”

⁴¹ “Marruungnik angutitaqalauqpuq akiliksaqaqtuungnik atunit kiinaujanik atuqtitsijimut; aippanga akiliksaqalauqpuq 500-nik, aippangalu 50-nik.

⁴² Taakkuak atunit akiliutiksaqanngimmatik akiliksaqarvigijingikta akiliiqujunniirlugik isumagijunnairvigivaak. Nalliagli taima akiliksaqarvigijaminik nagligusungniqsaugajaqpaa?”

⁴³ Saimuuni kiuvuq, “Isumavunga unurniqsanik akiliksaqalauqtuq.” Jiisusiup uqautivaa, “Sulivutit.”

⁴⁴ Arnamut takusarami Saimuuni uqautivaa, “Una arnaq takuviuk? Iglungnut itirama, imirmik qaitsilaunngilarma itigannut uasautiksannik, taassumali itigakka qausiliqtiqpait quvviminut allaqtirlugillu nujarminut.

⁴⁵ Tunngasuktillunga kunilaunngilarma, taassumali taimanngat itirami itigakka kuniksainnaqpait.

⁴⁶ Niaqura kuvvirilaunngilat napaaqtuup uqsunganut, taassumali itigakka kuvvirivait, tipitsiariktumut.

⁴⁷ Taimaimmat uqautivagit, arnaup piunngittuliningit amisut isumagijunniiqtauvut, taimaimmat angijumik naglingnirmik saqqititsivuq; mikijumigli piunngittulisimajuq isumagijunniirviujuq, mikijumik naglingniqaqpuq.”

⁴⁸ Jiisusiup arnaq uqautivaa, “Ajurnitit isumagijaujunniiqput.”

⁴⁹ Tavva nirijaqtuqsimajut immingnut uqaliqput, “Kinaugamiuna ajurnirnik aglaat isumagijunniiqsijunnaqpa?”

⁵⁰ Jiisusiup arnaq uqautivaa, “Ukpirnivit piulivaatit; isumajaanngillutit anilirit.”