ᓘᑲᓯᐅᑉ ᐊᒡᓚᖏᑦ 6 - Aglait Ijjurnaittut

Jiisusiup Sapatimik Uqausiqarninga

¹ Sapatiutillugu piruqsiivingmi niaquujaksalikkut Jiisusi pisuktillugu, ilinniaqtingit niaquujaksait nuvunginnik piiqsivaglutik aksaliglugit niriliqput.

² Tavva Paarisit ilangit uqaqput, “Suuq Sapatimi piqujanut piqujaunngittumik pivisi?”

³ Jiisusiup kiuvait, “Uqalimaalauqsimanngilasi Taiviti kaalirami ilagijangillu pinasualaurninginnik?

⁴ Guutiup iglunganut itilauqpuq; niaquujat Guutimut tunijausimajut nirilauqpait ilagijani niriqatigillugit, taimaak piqujat piqujisimanngitillugit tunirrusiqtitsijit niaquujanik Guutimut tunijausimajunik niriqujaujutuungmata.”

⁵ Jiisusiup uqautivait, “Inuup Irninga Ataniungmat Sapatimut.”

Inuup Aggangit Nukiqanngittut

⁶ Sapatiuttauq taassuma asiagut, Jiisusi itirivuq Juutit ukpirnirmut katimavingannut, tavvani ajuriqtuilirluni, tavvani angutitaqaqpuq aggangit taliqpingit nukiqanngittumik.

⁷ Piqujanik ilisaijit, Paarisillu qaujisaqpaat patsitiksaqarumallutik, Sapatimi aaqqiksiniarmangaat.

⁸ Jiisusiup isumangit qaujimagamigit, angummut aggangit nukiqanngittumut uqaqpuq, “Nikuvillutit maunga qaigit.” Taanna nikuvinnami Jiisusi upakpaa.

⁹ Jiisusi inungnut uqaqpuq, “Apirivassi piqujat Sapatimi piujumik piqujivaat, piunngittumigluunniit? Inungmik inuuliksiqujivaat, tuqutsiqujivalluunniit?”

¹⁰ Tavvaniittulimaat Jiisusiup takusaqpait, angummut aggangit nukiqanngittumut uqaqpuq, “Aggatit isakkit.” Tavva isakpait, aggangit qanuittunniiqput nukiqalirlutik.

¹¹ Juutit ninngakput uqaqatigiilirlutik qanuq Jiisusi piniarmangaarmijjuk.

Jiisusiup 12-nik Aapuusitalingnik Niruarninga

¹² Ulluni taakkunani Jiisusi qaqqamut majuaqpuq tuksiariaqturluni; unnuaq naallugu tavvani tuksiaqpuq Guutimut.

¹³ Ullunnguqtillugu ilinniaqtini qaiquvait, niruarluni taakkunanngat 12-nik, taakkua attiqpait aapuusitalingnik;

¹⁴ Saimuuni, Piitturuusimik atiqtaaqtippaa, Aanturuulu taassuma qatanngutaa; Juanasilu Jaimisilu, Pilippuusilu, Patiulumiulu,

¹⁵ Maatiusilu, Tuumasilu, Jaimisilu Aulpiasiup irninga, Saimuunilu Paitturiammik taijaujuq,

¹⁶ Juutasilu Jaimisiup irninga, Juutasilu Iskariat, taanna Jiisusimik pijautitsilauqtuq.

Jiisusiup Ajuriqtuininga Aaqqiksiningalu

¹⁷ Jiisusi qaqqamit ammuakkami aapuusitalit ilagillugit natirnamuurami nangiliqpuq, ilinniaqtini inugiakturjuallu ilagillugit asingillu tusaajaqtuqsimajut Juutiamit, Jiruusalimmillu, tariullu sinaanit Tairimit Saitunimillu pisimajut taakkua tamaunngaqsimavut Jiisusimik tusaajumallutik aaqqiktaujumallutiglu qanimmasimingnit.

¹⁸ Anirnirlungnut ilummiqtausimajut tavvunngalaurivut aaqqiktaullutik.

¹⁹ Inugiaktut Jiisusimik aktuinasuaqput, pijunnarniq taassumangat aningmat aanniajulimaat aaqqikpait.

Jiisusiup Ajuriqtuininga Quviasungnirmik Qiksaangnirmiglu

²⁰ Jiisusiup ilinniaqtini takusarlugit uqautivait: “Saimaqtitaunaqtumiippusi ajuqsaqtusi; Guutiup Ataniuvinga pigilirassiuk.

²¹ Saimaqtitaunaqtumiippusi maanna kaaktusi, naammaksilusi nirititaujumaarassi. Saimaqtitaunaqtumiippusi maanna qiajusi; iglarumaarassi.

²² “Saimaqtitaunaqtumiippusi inuit uumigikpasi, narrugikpasilu uqarnirluutigikpasilu, piunngittualuuniraqpasilu, Inuup Irninga pijjutigillugu!

²³ Taimaitaulirussi quviasugissi, qiggiqtarlusi taanisirlusilu quviasungnirmut, angijumik akiliqtaujumaarassi qilangmi; sivulivininngittauq taimailiurilaurmingmata nalauttaijunik.

²⁴ Kappianaqtumiippusili maanna ajuqsanngittusi, pijariakittumik inuusiqariirassi.

²⁵ Kappianaqtumiippusi maanna aqiattusuktusi; kaalirumaarassi. Kappianaqtumiippusi maanna iglaqtusi, ugguarlusi qiajumaarassi.

²⁶ “Kappianaqtumiippusi inungnit piugijaullusi uqausiutsiaqattaqtusi, sivullingittauq taimailiulaurmingmata nalauttaijuniraqtunik sulinngittunik.”

Jiisusiup Ajuriqtuininga Akiraqtuqtittinnik Nagligusuqujilluni

²⁷ “Tusaajusi uqautivassi, akiraqtuqtisi nagligisiuk, pitsiaqpaglugillu ilissinnik uumisuktut,

²⁸ ilissinnik uqarnirluutiqaqtut saimmaqtitauqusiuk, ilissinnik pitsianngittut tuksiutisigik.

²⁹ Uluakkut patiktauguvit, igluattauq maniliruk; annuraat silalliq pijaukpat, ilulliqtauq annuraat tunilauruk.

³⁰ Ilingnit sunamik pijumajut tamarmik tunisivigisiuk; pigijarnik pijuqaqpat utiqtiqulugu uqautiniarnagu.

³¹ Inuuqatingnit qanuq piniarviujumaguvit, taimaaktauq taakkunannga piniarviugajannguarlutit piniarvigikkit.

³² “Nagligijitit nagligijatuariguvigit, sunamik akiliqtaujjutiksaqaqpit? Piunngittulijut aglaat nagligijimingnik nagligusukpakkivut.

³³ Pitsiaqtingnullu kisiani pitsiaqattaruvit, sunamik akiliqtaujjutiksaqaqpit? Piunngittulijut aglaat taimaippakkivut pitsiaqtimingnut.

³⁴ Atuqtitsivakkuvit taakkununga utiqtitsiviuniarasugilutit, sunamik akiliqtaujjutiksaqaqpiit? Piunngittulijut aglaat atuqtitsivakput piunngittulijunut taimailluaqtunik utiqtitsiviujumallutik.

³⁵ Akiraqtuqtisi nagligisiuk, pitsiarvigilugillu, atuqtippaglugillu utiqtitsiviuniariaksaq isumanngillusi; tavva akiliqtauniksasi angijualuujumaaqpuq, quttingniqpaangujuup irniriniaqpaasi; taanna pitsiarmat qujalinngittunut piunngittulijunullu.

³⁶ Nikagusugissi, Ataatasitauq nikagusungmat.”

Asittinnik Iqqaqtuiniq

³⁷ “Iqqaqtuiniarasi, iqqaqtuqtauqunasi; pasijaksannguqtitsiniarasi, pasijaksannguqtitauqunasi; isumagijunaiqsiqattarissi, tavva isumagijunairviuniarivusi.

³⁸ Tunisigissi, tavva tunisiviulaarivusi; uuktuummut tatattumik, sitisaqsimajumik, aulatillugu tatatiqsimajumik, amiganngiluaqtumik tavva tunisiviugajaqpusi. Asissinnut pinianiriqattaqtasi maliglugit piniarviujumaarivusi.”

³⁹ Ajjiujumik uqautivait: “Tautunngittuq asiminik tautunngittumik tasiuqsijunnaqpa? Tamarmik itiqsamut katagajanngilak?

⁴⁰ Ilinniaqti qaujimaniqsaunngilaq ilisaijiminit, ilinniariirunili ilisaijimitut qaujimatigilirniaqpuq.

⁴¹ “Sungmat, inuuqativit ijjisimautinga mikijuq takunnaqpiuk uvva nangminiq ijjisimautiit qijualuk kamaginagu?

⁴² Sungmallu inuuqatingnut uqarunnaqpit ‘Inuuqatiik, ijjisimautit ijingniittuq piilaurlagu,’ uvva nangminiq ijingniittuq ijjisimautiit qijualuk kamaginagu? Takkurmuuqtutit, ijjisimautiit nangminiq ijingnit piiqqaaruk, taututsiarlutit inuuqativit ijjisimautinganik mikijumik piiqsijunnarniaravit.”

Jiisusiup Uqausiqarninga Napaaqtumik Paurnganginniglu

⁴³ “Napaaqtuq qanuingitsiaqtuq piunngittunik paurngaqarunnanngilaq, napaaqtuq piunngittuq piujunik paurngaqarunnannginnivuq;

⁴⁴ napaaqtut tamarmik qaujimajauvut paurngangitigut, paurngait pigilingnik kakillautilingnit pijauvanngilat, paurngaillu uainiksait uqpingnit kakillautilingnit pijauvannginnivut.

⁴⁵ Inutsiavak piujunik saqqititsivakpuq ilumini pigijaminik. Piunngittulijurlu piunngittunik saqqititsivakpuq ilumini pigijaminik piunngittunik; inuk ilungata tatajjutinginnik qaninga uqasuungungmat.”

Igluliuqtiik Marruuk

⁴⁶ “Qanuimmat Ataniiriniraqataqpisinnga uqallusi, ‘Ataniq, Ataniq,’ atuqujanniglu maligasi?

⁴⁷ Uvannut qaijulimaat uqausinni tusaqtut maliglugillu, taakkua ajjigijanganik uqautiniaqpassi.

⁴⁸ Imaak ajjiqaqput; inuk igluliuqtuq; nuna ilutujumik itiqsaliurlugu, qaiqtuq tikinnamiuk tunngaviliarivaa igluliaminut; kuugaaluk qaamilirmat, iglumullu kuulirmat, iglu aulajjagunnanngilaq tungaviqatsiarmat,

⁴⁹ uqausinnigli tusaqtut malignagillu ajjiqaqput angummik igluliuqtumik tunngaviliutsiaqsimanngittumik; kuungmut qaamittumut tikitaugami, iglu tavvainnaq urruvuq, asiruqtaummarigluni.”