ᓘᑲᓯᐅᑉ ᐊᒡᓚᖏᑦ 5 - Aglait Ijjurnaittut

Jiisusiup Qaiqujininga Sivulliqpaanik Ilinniaqtiksaminik

¹ Ulluit ilangannik Jiisusi tasiup Ginisariitiup sinaani nangiqtillugu, inuit iniqarunniiqtiliqpaat imaup kiglingani, tusarumallutik Guutiup uqausinginnik.

² Umiangnik marruungnik takugami nunamut tulaktuungnik, inungit iqaluksiuqtit nunamut niullutik nuluamingnik irruqtuiliqtunik.

³ Jiisusi umiap aippanganut ikivuq, Saimuuniup umianganut, umiaq saavigiakkanniquvaa, qaanganut ingilluni inuit ajuriqtuqpait umiamit.

⁴ Uqallagiirami Saimuuni uqautivaa, “Itijumuariakannirlusi iqaluksiuqatitillu nulualilaurissi iqalugasuglusi.”

⁵ Saimuuniup kiuvaa, “Ajuriqtuiji, unnualimaaq iqalugasulauraluaqpugut iqalulauratalu! Uqausilli maliglugu nulujjirniaqpunga.”

⁶ Nulujjiramik; unuqtualungnik iqalukput, nuluangit aglaat alingniusalirlutik,

⁷ umianguqatitik nuluraqpait ikajuriaqtaujumallutik. Qaingmata umiak atunit usiliqsuqpaat usitturlugik umiangit kiviniusalirlutik.

⁸ Saimuuni Piitturuusi tamatuminga takugami, Jiisusiup saanganut siiqquqpuq, uqarluni, “Qimalaunnga Ataniq piunngittualuugama.”

⁹ Saimuuni ilagijalimaangillu kamajualuuvut, iqaluktatik unuqtualuuningit pijjutigillugit;

¹⁰ taimailaurivut ilagijangit Jaimisi Juanasilu, Sipitiup irningik, Jiisusiup Saimuuni uqautivaa, “Kappiasungnak; maannamit pigiarlutit inungnik iqaluksiuqtiunialiqputit.”

¹¹ Umiatik tulaktinnamigit nunamut, sunalimaatik iparainnarlugit Jiisusi maliliqpaat.

Jiisusiup Aaqqiksininga Angummik

¹² Nunalingniitillugu Jiisusi, angummik qaijuqaqpuq kappiagijaujumik paqtiqtumik; taassuma Jiisusi takugamiuk saanganut paammakpuq, qinuvigillugulu, “Ataniq pijumaguvit, salummarunnaraluaqparma.”

¹³ Jiisusi isagluni aktuqpaa, uqautillugu, “Pijumavunga; salummalirit,” tavvainnaq paqtirunniiqpuq.

¹⁴ Iniqtiqpaa, kinatuinnarmut uqaqunagu; uqautillugu, “Tunirrusiqtitsijimut ailirit qaujisarniarmatit, tunirrutiksamiglu aaqqiktaunirnut tunirrusilutit, Muusisiup piqujininga maliglugu, inungnut qaujijjutauqullugu aaqqiktaunirnik.”

¹⁵ Anginiqsamigli tusaumajauliqpuq ungasiktumit aglaat; inugasagjuallu amisut qaivut tusarumallutik aaqqiktaujumallutiglu aanniamingnit.

¹⁶ Jiisusili taakkunanngat qimaruutivuq inuqanngittumut tuksiarumalluni.

Jiisusiup Aaqqiksininga Nukiqanngittumik

¹⁷ Ulluit taakkua ilanganni, Jiisusi ajuriqtuitillugu, Paarisit piqujaniglu ilisaijit tavvaniiqataulaurivut, tavvunngaqsimallutik nunalingnit Galiliamiittulimaanit, Juutiamillu, Jiruusalimmillu; Ataniup pijunnarninga najuutingmat taassumani, qanimajut aaqqiktaulauqput.

¹⁸ Inuillu tavvunngaujjivut angummik nukiqanngittumik iglirmiitillugu akiraqtaujumik, taanna iglumut itirumagaluaqpaat Jiisusimuarumallugu.

¹⁹ Inugialuarninganulli itirunnannginnamik, igluup qaanganuarutivaat, iglu qulaagut angmarlugu ningitippaat inuit akurngannut, Jiisusiup saanganut.

²⁰ Qaujigami taakkua ukpirniqarmata, angut nalajuq uqautivaa, “Ilannaak, piunngittulinitit isumagijaujunnaiqput.”

²¹ Tavva piqujanik ilisaijit Paarisillu, apiriliqput, uqarlutik, “Sungmanuna Guutimik uqarnirluutiqaqpaa? Guuti kisimi piunngittulinirnik isumagijunnaiqsijunnaqtutuuvuq.”

²² Jiisusiup apiqsuutigijangit qaujigamigit uqautivait, “Sungmat taimaak uummatissinni apiqsuutiqaqpisi?

²³ Nalliat pijariakinniqsauvaa uqaruma, ‘Piunngittulinitit isumagijaujunnaiqput,’ uvvaluunniit uqaruma, ‘Makillutit pisulirit?’

²⁴ Qaujiqullusi Inuup Irninga pijunnarniqarmat nunarjuarmi piunngittulinit isumagijunnairlugit.” Nukiqanngittumut uqaqpuq, “Uqautivagit makittit, nallangaviit tigulugu, angirralirit.”

²⁵ Tavvainnaq makippuq inuit takkuani, nalavigijani tigullugu angirraliqpuq, Guuti niqturlugu.

²⁶ Tavvaniittulimaat kamammariliqput, kappiasuglutik, Guuti niqturlugu uqaqput, “Ullumi takulauqsimanngitattinnik takuvugut.”

Jiisusiup Qaiqujininga Livaimik

²⁷ Tamatuma kingurngagut Jiisusi anivuq, takullunilu Ruumamiut kiinaujaiqtitsijiqutinganik, Livaimik atilingmik, kiinaujaiqtitsivingmi iksivajumik; Jiisusiup uqautivaa, “Malinnga.”

²⁸ Livai nikuvippuq, sunalimaat qimaglugit, Jiisusi maliksaqpaa.

²⁹ Livai iglumini nirivigjuaqtitsivuq Jiisusi nirijaqtuqullugu; Ruumamiullu kiinaujaiqtitsijiqutingit amisut, inuillu asingit tavvani nirijaqtuqsimavut.

³⁰ Paarisit piqujaniglu ilisaijit tavvaniittut Jiisusiup ilinniaqtinginnut naammaksaratik uqaqput, “Sungmat Ruumamiut kiinaujaiqtitsijiqutingit piunngittulijullu niriqatigivisiuk?”

³¹ Jiisusiup kiuvait, “Inuit aannianngittut aanniasiutimit kamagijaujariaqanngilat, qanimajulli kisimi;

³² iluaqtut qaiqujaqtuqsimanngilakka, piunngittulijulli qaiqujaqtuqpakka saagiaqullugit.”

Jiisusiup Ajuriqtuininga Nirittailinirmik

³³ Taakkua Jiisusimut uqaqput, “Juanasiup ilinniaqtingit nirittailivakput akulaittumik tuksiarlutik, Paarisillu ilinniaqtingit taimaippakkivut, ilinniaqtitilli nirivut imirlutiglu.”

³⁴ Jiisusiup uqautivait, “Katititaujunut nirijaqtuqsimajut nirittailitittunnaqpisiuk? Uiksaq tavvaniittillugu?

³⁵ Ulluit nalliutijumaaqput uiksamik aqsaaqtauvingat, tavva tamanna nalliutikpat nirittaililirumaaqput.”

³⁶ Ajjiujumik uqautivait: “Aliksijuqaqpanngilaq annuraamik nutaamik, annuraatuqarmullu ilaliutilugu; taimaikkuni, annuraaq nutaaq suratuinnarniaqpaa, taanna annuraap nutaap ilanga annuraatuqaup ajjigilirunnanngimmagu.

³⁷ Uainimik nutaamik immiqsuijuqaqpanngilaq umajuviniup aminganut uainiqautituqarnut; taimaikkuni, amiq uainiqautituqaq qaarniaqpuq, uaini kuviluni, uainiqautilu asiruqtaugajaqpuq.

³⁸ Uainili nutaaq amirmut nutaamut immiqsuutijaujuksauvuq.

³⁹ Uainituqarmik pivaktut nutaamik uainimik pijumavanngilat; uqaqpaglutik, ‘Pituqaq mamarniqsauvuq.’”