ᓘᑲᓯᐅᑉ ᐊᒡᓚᖏᑦ 3 - Aglait Ijjurnaittut

Juanasi Paaptitsirijiup Ajuriqtuininga

¹ Arraagunik 15-nik Siisari Taipiriasi angajuqqaarjuanguliqtillugu, Puuntiusi Pailaatuusi aulatsijiutillugu Juutiami; Iruutasi angajuqqaarjuangutillugu Galiliami, Iruutasiup qatanngutaa Pilippuusi angajuqqaangutillugu Aituriami Turaakunaitisimilu, Laisaniasi angajuqqaangutillugu Apilinimi,

² Aanasi Kaiapaasilu tunirrusiqtitsijinut angajuqqaangutillugik, Juanasi Sakaraiaup irninga Guutiup uqarvigivaa inuqanngittumiitillugu.

³ Juanasi kuungmi Juartanimi qanigijalimaanganilu pinasualilauqpuq, ajuriqtuilluni paaptitauniup nalunaikkutauninganik saagiarnirmut ajurnit isumagijunnaiqtauninginnut.

⁴ Nalauttaijuq Aisaiasi uqaqsimangmat, “Inuqanngittumi qaigalaaqtuqaqpuq: ‘Ataniup aqqutiksanga aaqqiksuqsiuk; Aqqutiksanga tukiliaqsitillugu.

⁵ Naqsait tamarmik nangaqtiqtaujumaaqput, Pinguit qaqqaillu pukkiglititaujumaarlutik, Aqqutit sanguingajut tukiliaqsititaujumaaqput, Maniittut maniqqaksarlugit.

⁶ Inulimaat takujumaaqput Guutiup piulijauviksautitanganik.’”

⁷ Inugiaktut Juanasimuarmata paaptitaujumallutik, Juanasiup uqautivait, “Quglugiangujaaqtusi! Kia qimaaquvaasi Guutiup ninngausinganit tikittumaaqtumit?

⁸ Atii saqqititsilirissi saagiarnisi nalunaiqtaujjutinganik, isumattailigissi imaak: ‘Guutiup inuqutigivaatigut Aiprahaam kinguvaaringmatigut.’ Imaak uqautivassi; Guuti makuninga ujarangnik Aiprahaammut kinguvaannguqtitsijunnaqpuq!

⁹ Maanna ulimaut upalungaiqtausimaliriiqpuq napaaqtut manguksimaningitigut nakatiqtauqullugit; taimaimmat napaaqtulimaat paurngaqanngittut nakatauniaqput igitaulutik ikumamut.”

¹⁰ Inuit Juanasi apirivaat, “Qanurli tavva pijariaqaqpita?”

¹¹ Juanasiup kiuvait, “Marruungnik uviniruqaqtuup, aippanga tunijaksarivaa piqanngittumut; niqiqaqtuq, nirijaksaqanngittumik pititsijuksauvuq.”

¹² Ruumamiut kiinaujaiqtitsijiqutingit qailaurivut paaptitaujaqturlutik, Juanasimut uqarlutik, “Ajuriqtuiji, qanuq pijuksauvita?”

¹³ Juanasiup uqautivait, “Kiinaujaiqtitsiqujaunissi ungataanut piqattariaqanngilasi.”

¹⁴ Amma unataqtuksait Juanasi apirigivaat, “Uvagulli qanuq pijuksauvita?” Juanasiup uqautivait, “Suungusangnirmut tigliqattanngillusi kiinaujanik sagluqitsinirmulluunniit, kiinaujjaliasi naammagisiuk.”

¹⁵ Inuit niriungniqaqpallialiqput, isumaqalirlutiglu Juanasi Christuusiunasugillugu.

¹⁶ Juanasiup tamarmik uqautivait, “Imirmut paaptippassi; uvannilli pijunnarniqsaq tikinniaqpuq, naluqqutivunga taassuma itigagutinginnik singiijjaaqsijariaksaq; taassuma paaptittumaaqpaasi Anirnirmut Ijjurnaittumut ikumamullu.

¹⁷ Taassuma iviijaijjutini tigumiaqpaa, niaquujaksalirivvingmini niaquujaksat iviijarniaqpait, niaquujaksat puuqqarlugit niaquujaksakkuvingminut, iviuningit ikinniaqpait ikumamut qamisuittumut.”

¹⁸ Ajjigiinngittutigut Juanasi ajuriqtuilauqpuq inungnut uqausirnik tusaruminaqtunik.

¹⁹ Juanasiup Iruutasi angajuqqaaq iniqtilauqpaa Iruutiasimik nuliaqalilaurmat nukangata nulianganik, asinginniglu piunngittulijjutigijalimaanginnik.

²⁰ Iruutasi piunngittulinirijami piunngiqqijanginnik piunngittulilauqpuq Juanasimik tigujautitsilaurmat.

Jiisusiup Paaptitauninga

²¹ Inulimaat paaptitausimaliqtillugit, Jiisusi paaptitaulaurivuq. Tuksiaqtillugu, qilak angmaqpuq,

²² Anirniup Ijjurnaittuup aqqarvigivaa takuksaulluni tingmiatitut tuuvititut, nipimik qilangmit nilliqtuqaqpuq, “Irnirivagit nagligijara; quviagitsiaqtara.”

Jiisusiup Sivuliviningit

²³ Jiisusi pinasuariasitillugu 30 qanigijaani arraaguqalilauqpuq, taanna Juusipiup irnirivaa, inuit isumagijangitigut, Juusipi Hiliup irnirivaa,

²⁴ Hili Maatatiup irnirivaa, Maatati Livaip irnirivaa, Livai Milkaip irnirivaa, Milkai Jaanaip irnirivaa, Jaanai Juusipiup irnirivaa,

²⁵ Juusipi Matataiasiup irnirivaa, Matataiasi Aimuusiup irnirivaa, Aimuusi Naihumiup irnirivaa, Naihumi Isliup irnirivaa, Isli Naaggaip irnirivaa,

²⁶ Naaggai Maatiup irnirivaa, Maati Matataiasiup irnirivaa, Matataiasi Siiminiup irnirivaa, Siimini Juusikiup irnirivaa, Juusiki Juutaup irnirivaa,

²⁷ Juuta Juananaup irnirivaa, Juanana Riisaup irnirivaa, Riisa Jirupapiul irnirivaa, Jirupapi Sialtiup irnirivaa, Sialtiul Niraiup irnirivaa,

²⁸ Nirai Milkaip irnirivaa, Milkai Aatiup irnirivaa, Aati Kuusamiup irnirivaa, Kuusami Ilmatamiup irnirivaa, Ilmatami Iriup irnirivaa,

²⁹ iri Jaasuap irnirivaa, Jaasua Ilaisariup irnirivaa, Ilaisari Jurimiup irnirivaa, Jurim Maatatiup irnirivaa, Maatati Livaip irnirivaa,

³⁰ Livai Simiuniup irnirivaa, Simiuni Juutaup irnirivaa, Juuta Juusipiup irnirivaa, Juusipi Juunamiup irnirivaa, Juunami Iliakimiup irnirivaa,

³¹ Iliakim Miliap irnirivaa, Milia Minnaup irnirivaa, Minna Mataataup irnirivaa, Mataata Naitaniup irnirivaa, Naitani Taivitiup irnirivaa, Taiviti Jisiup irnirivaa,

³² Jisi Upitiup irnirivaa, Upiti Puasiup irnirivaa, Puasi Saalmaniup irnirivaa, Saalman Naisanaup irnirivaa,

³³ Naisana Aminataup irnirivaa, Aminatap Atminiup irnirivaa, Atmini Aarniup irnirivaa, Aarni Hisraniup irnirivaa, Hisran Pirisiup irnirivaa, Pirisi Juutaup irnirivaa,

³⁴ Juuta Jaikuup irnirivaa, Jaiku Aisakiup irnirivaa, Aisaki Aiprahaap irnirivaa, Aiprahaam Tiiraup irnirivaa, Tiira Nahuriup irnirivaa,

³⁵ Nahuri Sirugiup irnirivaa, Sirugi Riup irnirivaa, Riu Piligiup irnirivaa, Piligi Ipriup irnirivaa, Ipri Siilaup irnirivaa,

³⁶ Saila Kainaniup irnirivaa, Kainani Arpaaksatiup irnirivaa, Arpaaksati Siimiup irnirivaa, Siimi Nuap irnirivaa, Nua Laimikiup irnirivaa,

³⁷ Laimiki Mituusalaup irnirivaa, Mituusala Inuukiup irnirivaa, Inuuki Jaritiup irnirivaa, Jariti Mahalaliup irnirivaa, Mahalaliu Kainaniup irnirivaa,

³⁸ Kainani Inuusiup irnirivaa, Inuusi Siitiup irnirivaa, Siiti Aatamiup irnirivaa, Aatami Guutiup irninga.