ᓘᑲᓯᐅᑉ ᐊᒡᓚᖏᑦ 24 - Aglait Ijjurnaittut

Jiisusiup Makinninga

¹ Ullaraarjukkut pinasuarusiup ullungita sivulliqpaangani, arnait iluvirmuaqput, tipitsiariksautinik atuinnarulauqtamingnik naksarlutik.

² Iluviup matunga ujaraaluk aksakaqtitaviniq takuvaat,

³ iluanut itiramik Ataniup Jiisusiup timinga takunngilaat.

⁴ Tavvani naluliuqqatillugit, takugit, nangiqatiqaliqput angutiingnik marruungnik qaumajunik qilliqtunik annuraaliingnik.

⁵ Kappiasungnirmut nunamut paammakput, taakkunanga uqaujjauvut, “Sungmat makisimajuq tuqungajuni qiniqpisiuk?

⁶ Tamaaniinngilaq makisimavuq. Iqqailirissi uqautilaurmasi, Galiliamiilluni suli,

⁷ ‘Inuup Irninga tunijaujariaqaqpuq ajuqtulijunut, kikiaktuqtaulunilu, ulluillu pingajuanni makilaarivuq.’”

⁸ Arnait iqqailiqput uqausinginnik,

⁹ iluvirmit utiramik tamakkualimaat uqausirivait 11-nut ilinniaqtinut asilimaanginullu.

¹⁰ Arnait ukuangulauqput Miari Maaktaliini, Juanalu, Miarilu Jaimisiup Anaananga; arnanik asimingnik ilaqarlutik unikkaalauqput aapuusitalingnut;

¹¹ taakkua uqausinnguatuinnaujuriksivut, ukpirusugatik taakkuninga.

¹² Piitturuusili nikuvilluni iluvirmut ullaksivuq, iluanut itsuarami, takuvuq qallunaaqtat immutivinit taakkuatuat tavvaniittut, utirlunilu, isumaksaqsiuliqpuq qanualuk tamakkua pinnirmangaata.

Nunalingnut Imaiasimut Pisuqatigiiktut

¹³ Ullumi taissumanitsainnaq marruuk Jiisusiup maliktingik pisulauqpuuk nunalingnut Imaiasimut, immaqaa 7-mailimik ungasingniqaqtumut Jiruusalimmit,

¹⁴ taakkuak uqaqatigiikpuuk uqausiqarlutik piniarniulauqtunik tamainnik.

¹⁵ Uqaqatigiiktillugik suli, Jiisusi nangminiq upagutivuq taakkungnunga pisuqatigilirlugik.

¹⁶ Taakkuak taassuminga ilitaqsijunnaqtitaulaunngilaak.

¹⁷ Jiisusiup uqautivaak, “Sunamik uqaqatigiigutiqaqpisik pisuktillusik?” Taakkuak nuqqaqpuuk, qiksaaglutik.

¹⁸ Aippangata Kiliupaasimik atiliup, kiuvaa, “Ivvituaq Jiruusalimmuaqsimajunit ulluni tamakkunani pijuqalauqtumik qaujimanngittutuuvit?”

¹⁹ Jiisusiup apirivaa, “Sunamik pijuqalaurmat?” Taakkuak uqaqpuuk, “Jiisusi Naasariitimiuq pillugu, taanna nalauttaijulauqpuq pijunnarniqarluni piniarnirmigut uqausirmigullu Guutiup inuillu saangani.

²⁰ Tunirrusiqtitsijitta angajuqqaanngitta aulatsijittalu pijautilauqpaat tuqutauqullugu, kikiaktuqtaulauqpuq sanningajulingmut.

²¹ Uvagulli niriulauqpugut taassumunga Isarialimiut uqumaiksarunniiqtitauniarasugillugit. Taimanngalli maanna ullut pingajugiliqpaat taimailiuqtaulauqtillugu.

²² Ammattauq, arnait ilagijatta quaqsaaqtiqqauvaatigut, ullaaq qaummaliqtillugu iluvirmuaramik;

²³ timinganik takuqqaunngimmata; utiramik unikkaaqqauvut aingilimik takutitaunirarlutik, uqaujjaunirarlutiglu Jiisusi makisimaniraqtautillugu.

²⁴ Ilagijatta ilangit iluvirmualauqput takullutik arnait unikkausiriqqaujangititut taimaalluaq, kisianili Jiisusimik takunatik.”

²⁵ Jiisusiup uqautivaak, “Silaittualuujusik, ukpirusulirunnanngittusiglu nalauttaijut uqausirisimajanginnik!

²⁶ Qaujimanngilasik Christuusi taimaak ilungiqsuqtitaunikkut iniqunarnirjuarmut pititaujuksauninganik?”

²⁷ Jiisusiup nalunaiqsivigitsiaqpaak pigiarluni Muusisiup aglanginnit nalauttaijullu aglanginnit aglalimaat nalunaijaqpait imminik uqausiqaqsimajulimaat.

²⁸ Nunalingnut upaktamingnut tikiliramik, Jiisusi qaangiutiniaqtuujaaliqpuq,

²⁹ taakkuak nuqqaqujiliqpuuk, uqautillugu, “Uvattinniilaurit, unnulilirmat taaqsivallialirluni.” Jiisusiup iglumuaqatigivaak taakkunaniilirluni.

³⁰ Ingippuq niriqatiginiarlugik, niaquujaq tiguvaa, qujalilluni, avikpaa, taakkungnunga tunillugu.

³¹ Ijingik tavva takutitauliqpuuk ilitarillugulu; Jiisusili tavvanngat takuksaujunniiqpuq.

³² Taakkuak immingnut uqaliqpuuk, “Uunaqsijualuuqqaugaluaqpuguk iluttingni uqallaktillugu aqqutikkuuqtilluta, aglangnik uqarvigingmatikkuk nalunaiqsivigillunuglu.”

³³ Taakkuak nangiqsivuuk, tavvainnaq Jiruusalimmut utilirlutik; ilinniaqtit 11 upakpait ilagijangillu katimajut.

³⁴ Taakkuak uqaqpuuk, “Ataniq ilaak sulijumik makisimavuq, Saimuunimut saqqilauqtuq!”

³⁵ Tavva angutiik unikkaaliqpuuk aqqutimi qanuinniriqqaujamingnik, qanurlu Atanirmik ilitaqsiniriqqaujamingnik, niaquujamik aviksiliqtillugu.

Jiisusiup Saqqinninga Ilinniaqtiminut

³⁶ Taakkuak unikkaaqtillugik suli tamatuminga, Ataniq nangminiq akunninganni nangiliqpuq uqarluni, “Saimaniqarissi.”

³⁷ Taakkuali quaqsaangaliqput kappiasuglutik, tuurngarmik takunasugillutik.

³⁸ Jiisusiup uqautivait, “Sungmat quaqsaangavisi sungmallu qularniqaqpisi uummatissinni?

³⁹ Aggakka takuliqsiuk itigakkalu, uvangallariuvunga; aktuliqsinnga, qaujilirissi anirnituinnaq uviniqaranilu sauniqanngimmat takuvusili uviniqarlungalu sauniqarama.”

⁴⁰ Taimaak uqariirami, aggaminik itigaminiglu qimirrutippait.

⁴¹ Suli ukpirusunngimmata quviasuluarnirmut, kamanirmullu; Jiisusiup uqautivait, “Uvani nirijaksaqaqpisi?”

⁴² Iqalungmik uusimajumik tunisivigivaat,

⁴³ tigullugu nirivaa takkuanni.

⁴⁴ Tavva uqautivait, “Tamakkuninga tavva uqautiqattalauqpassi najurlusi suli, titirausiqaqsimajulimaat uvannik Muusisiup piqujanginni, nalauttaijullu aglanginni inngirutinilu nalautsijariaqalaurmata.”

⁴⁵ Tavva qaujitippait aglangnik tukisiqullugit,

⁴⁶ uqautillugit, “Imaak tavva titiraqsimavuq, Christuusi aanniatitaujariaqaqpuq ulluillu pingajuanni makitsariaqaqpuq tuqungajunit,

⁴⁷ Christuusiup atingani saagiariaqarnirmik ajurnillu isumagijunnaiqtaujunnarningit ajuriqtuijutaujariaqaliqput inuuqatigiigasagjuanut, Jiruusalimmit pigiarluni.

⁴⁸ Ilissi tavva tamakkuninga qaujisimajuqutigivassi.

⁴⁹ Takugit, nangminiq tilisiviginiaqpassi Ataatama angirutigisimajanganik; ilissili Jiruusalimmi utaqqijariaqaqpusi, pijunnarnirmik qilangmit tunisiviunginnissinni.”

Jiisusiup Qilaliarninga

⁵⁰ Iglugasagjuanillu aullarutivait Pitanimut tikillutik, isaagvigillugillu saimmaqtippait.

⁵¹ Saimmaqtigiituaramigit, qimaliqpait qilaliaqtitaulirlunilu.

⁵² Taakkualu Jiruusalimmut utiqput quviasummariglutik.

⁵³ Taimanngal tuksiarvigjuamiipput Guuti niqturlugu.