ᓘᑲᓯᐅᑉ ᐊᒡᓚᖏᑦ 23 - Aglait Ijjurnaittut

Jiisusiup Iqqaqtuqtauninga Pailaatuusiup Saangani

¹ Iqqaqtuivingmiititijulimaat nikuvinnamik, Jiisusi Pailaatuusimuarutivaat,

² Jiisusimik iqqaqtugaksanguqtitisimajut uqaqput, “Una qaujilauqpavut inuuqatittinnik tammaqsaijuq, iniqtilauqpaatigut Siisarimut taaksiijaqattaqunata, imminik Misaiasiunirarluni angajuqqaarjuanguniralunilu.”

³ Pailaatuusiup apirivaa, “Juutit angajuqqaarjuarivaatit?” Jiisusiup kiuvaa, “Tavva uqariiqputit.”

⁴ Pailaatuusi uqaqpuq tunirrusiqtitsijit angajuqqaanginnut inugiaktunullu, “Nanisinngilanga taassuma pasijaujjutiksanganik.”

⁵ Taakkua pigiallakkanniqput aksurulirlutik, uqaqput, “Uuma inuit ajuriqtuijjutiminut uimajaaqtippait, Juutialimaami, Galiliamillu pigiarluni maungaluunniit aglaat tikippuq.”

Jiisusiup Iqqaqtuqtauninga Iruutasiup Saangani

⁶ Pailaatuusi tamatuminga tusarami, apirivaa Jiisusi Galiliamiungungmangaat.

⁷ Tukisititaugami Jiisusi Iruutasiup angajuqqaarjuanguvinganit pisimangmat, Iruutasimuarujjautippaa, taanna Jiruusalimmiimmat pinasuaqtillugit tamatuminga.

⁸ Iruutasi quviasummarilauqpuq Jiisusimik takugami, tusaumajatuqarigamiuk takujumajatuqarillugu, kamanaqtulitillugu takutitauniarasugilluni.

⁹ Iruutasiup amisunik apiqsuqpaa; Jiisusili kiulaunngilaq.

¹⁰ Tunirrusiqtitsijit angajuqqaangit piqujaniglu ilisaijit sanianuaqput aksururlutik pinasualiqpaat Jiisusi.

¹¹ Iruutasiup unataqtuksaqutingita Jiisusi mitautigivaat narrugillugulu; amma uligjuamik piujualungmik atitippaat, utiqtillugu Pailaatuusimut.

¹² Ullumillu tavvanngat pigiarlutik Iruutasikkuk Pailaatuusikkuk ilannaariiliqpuuk, sivuningani akirariilauraluaramik.

Jiisusiup Tuqutaksannguqtitauninga

¹³ Tavva Pailaatuusiup tunirrusiqtitsijit angajuqqaangit, aulatsijit inuillu katiquvait,

¹⁴ uqautillugit, “Una uvannuarutijasi uqausirillugu tammaqsainirarlugu inungnik; qaujisarakku takunnaqtillusi, takugit, nanisinngilanga taassuma tuqutaujjutiksanganik pasiksirutigijassinnit;

¹⁵ Iruutasiluttauq nanisinnginnami pasijaujjutiksamik taassumunga utiqtikkivaa uvattinnut. Takugit, angut una pinialauqsimanngilaq tuqutaujjutiksamik;

¹⁶ taimaimmat tiigaqtuqtautinniaqpara anitillugulu.”

¹⁷ Qaangiqtauvik nalliutijaraangat Pailaatuusi piusiqaqpakpuq tigujausimajut ilangannik anititsijariaqaqpagluni.

¹⁸ Inugiakturjualli atausikkut nillialiqput, “Una tuqutauli, Parapaasi anititaungaarluni.”

¹⁹ Parapaasi tigujausimavingmuaqtitausimavuq akiraqtuliqtitilluni uimajaaqtitsilaurmat tavvani iglugasagjuani, inuaqsimallunilu.

²⁰ Pailaatuusiup inugiaktut uqautikkanniqpait, Jiisusi anititauqugaluaramiuk;

²¹ inugiaktulli qaigalaaliqput, “Kikiaktuqtauli, kikiaktuqtauli!”

²² Pailaatuusiup pingajuannik suli uqautikkannirivait, “Sungmat, sunamik pirajautiqaqsimangmat? Nanisinnginnama atuqsimajanganik tuqutaujjutiksamik taassumani; taimaimmat tiigaqtuqtautillugu sakkutauquliqpara.”

²³ Inuilli aksurummariliqput qaigalaarlutik nipilimaamingnut Jiisusi kikiaktuqtauqullugu. Qaigalaarnirmingnullu saalaqaliqput.

²⁴ Pailaatuusi tavva piqujiliqpuq Jiisusiup tuqutaujjutiksanganik, inugasagjuat taimaak piqujingmata.

²⁵ Pailaatuusiup anititaukuliqpaa Parapaasi tigujausimavingmiittuq inuit anititauqujangat, uimajaaqtitsininganut inuaqsimaninganullu tigujausimajuq, Jiisusi pijautiliqpaa inuit pijumajangit maliglugit; isumaqsuutigilugu piniarviginiarmajjuk.

Jiisusiup Kikiaktuqtauninga Sanningajulingmut

²⁶ Unataqtuksait Jiisusi tasiurlugu annisiliqpaat, anilirlutik katisivut angummik Sairinimiurmik Saimuunimik atilingmik, nunaup asianit iglugasangnut tikisimajumik, taanna sanningajulingmik iqsuktiliqpaat Jiisusiup kinguningani.

²⁷ Inugiakturjuat malikput taassuminga, arnaillu ilangit maliqataujut quvviuqput ugguarutiqarlutik Jiisusimik.

²⁸ Jiisusiup takusarlugit uqautivait, “Arnait Jiruusalimmiut, qiajjutiginasinnga, ilissinnik qiajjutigilirissi qiturngassinniglu.

²⁹ Takugit, ulluit tikittumaaqput inuit uqarvigijumaaqtangit, ‘Saimmaqtiusimajumik inuusiqaqput arnait qiturngaqtaarunnanngittut, nutaraktaalauqsimanngittullu, amaamaktittilauqsimanatiglu!’

³⁰ Tamanna nalliutikpat inuit uqarumaaqput qaqqanut, ‘Katagvigitigut’; pingungnullu uqarumaarivut, ‘Talititigut.’

³¹ Tamakkua atuqtaujunnaqpata piruqtut tungujuqtillugit, paniqsimaliqtillugilli qanuittuqarumaaqpaa?”

³² Angutiiktauq marruuk asingik, piunngittulisimajuuk, amma tuqutaujaqturlutik kikiaktuqtauviksamuaqtitaugivuuk Jiisusi ilagillugu.

³³ Qaqqamut tikinnamik atilingmut Niaquvinirmik, tavvani Jiisusi kikiaktuqpaat, piunngittulisimajuuglu, aippaa taliqpiani, aippangalu saumiani.

³⁴ Jiisusi uqaqpuq, “Ataataak, isumagijunnairvigikkit; qanuiliurnirmingnik qaujimanngimmata.” Jiisusiup annuraangit nalautaarutigillugit atunit pitaarasuaqput.

³⁵ Inuit tavvani nangiqput takunnaarlutik; Juutilli angajuqqaangit mitautiqaqput Jiisusimik, uqarlutik, “Asiminik piulisilauqpuq; imminik piulilirli, Misaiasiuguni Guutiup niruaqsimajanga!”

³⁶ Unataqtuksaittauq mitautigivaat; majurarvigillugu uainimik qakkinnaqtumik pitinnasuaqpaat,

³⁷ uqarlutiglu, “Juutit angajuqqaarjuarikpatit, ilingnik piulilaurit!”

³⁸ Qulaanilu titiraqsimajuqaqpuq imailijunik: “Una Juutit angajuqqaarjuangat.”

³⁹ Nivingaqatingatalu aippangata mitautigivaa, uqarluni, “Misaiasiunngilatit? Ilingnik piulilaurit uvaguglu!”

⁴⁰ Aippangatali iniqtiqpaa uqarluni, “Guutimik sivuurannginnavit? Taimaalluaqtauq taatsutunaq sugiaqtaujutit tuqutauniarlutit.

⁴¹ Uvagugli taimaak pijaujjutiksaqarannuk piniarviuvuguk piniarnirilauqtavuuk maliglugit; unali angut naammanngittumik pilaunngilaq.”

⁴² Jiisusimut uqaqpuq, “Jiisusi iqqaumalaaqparma Ataniuvingnut tikiguvit!”

⁴³ Jiisusiup uqautivaa, “Sulijumik uqautivagit, ullumi aippariniaqparma quvianaqtuvingmi.”

Jiisusiup Tuquninga

⁴⁴ Ulluq qitiraliqtillugu, nunalimaaq taaqsilauqpuq unnusangmut 3-mut tikillugu,

⁴⁵ siqiniq qaumajunniiqsimatillugu; tuksiarvigjuap iluaniittuq taalutarjuaq alikpuq marruulilluni.

⁴⁶ Jiisusi nipiqquqtulluni qaigalaaqpuq, uqarluni, “Ataatak, anirnira ilingnut tunivara!” Taimaak uqariirami anirnangiqpuq.

⁴⁷ Unataqtuksait angajuqqaangat takugami piniarniujumik, Guuti niqtuliqpaa, uqarluni, “Ilaak angut taanna sulilluni pasijaujjutiksaqalaunngilaq!”

⁴⁸ Inulimaat tavvaniittut takujaqtuqsimajut, tamatuminga qaujigamik qanuittuqarmangaat, angirraliqput sagvingmingnik patiksiqattarlutik qiksaangnirmut.

⁴⁹ Jiisusimik qaujimallariktulimaat, arnaillu Galiliamit pisimajut ungasigijangani nangiqput takunnaarlutik tamakkuninga.

Jiisusiup Iluviqtauninga

⁵⁰ Angutitaqalauqpuq Juusipimik atilingmik Juutit nunangita ilangannit Arimatiami nunaqaqtumik. Taanna Juutit katimajirjuanginnut ilagijaujuq, inutsiavauvuq nalaaguuqtumik inuusiqarluni,

⁵¹ taanna katimajiuqatiminik angiqatiqalaunngilaq pijjutigijanginnik piniarninginniglu, Guutiup Ataniuvingata tikittumaarninganik niriugijaqaqpuq.

⁵² Taanna Pailaatuusimut upagutilauqpuq Jiisusiup timinganik pijunnaqtitaujumalluni.

⁵³ Jiisusiup timinga sanningajulingmit aqqaqtippaa immusirlugu qallunaaqtamik saattumik, ilillugu iluvirmut iluliuqsimajumut qaiqsumi, tuqungajumit suli iluvirviulauqsimanngittumut.

⁵⁴ Taanna ulluq upalungairjarviungmat, Sapatimut Sapatinnguqpallianialirluni.

⁵⁵ Arnait Jiisusimik malilauqtut Galiliamit Juusipi malikpaat, takullutik iluvirmik, Jiisusiup timinga qanuq iluviqtaungmangaat takunnaarlutik;

⁵⁶ angirraramik tipitsiariksautit mamaqsautillu timinganut minguarutiginiaqtatik upalungaijaqpait. Sapatimi qikaqput, piqujanik maliglutik.