ᓘᑲᓯᐅᑉ ᐊᒡᓚᖏᑦ 22 - Aglait Ijjurnaittut

Jiisusiup Tuqutaunasuarumaninga

¹ Nalliunniqsiurvik puvallaqqutiqanngittumik niaquujaqturvik qagliliqtillugu, Qaangiqtauvingmik taijaujuq.

² Tunirrusiqtitsijit angajuqqaangit piqujaniglu ilisaijit isumaksaqsiuliqput qanuq Jiisusi tuqutaujunnaqsijunnarmangaat; inungnik sivuuragamik.

Juutasiup Angirutiqarninga Jiisusimi Pijautitsijumalluni

³ Saataanasi itilauqpuq Juutasimut Iskariatimik taijaujumut, taassumunga ilinniaqtinut 12-nut ilagijaujumut;

⁴ Juutasi uqaqatiqariaqtuqpuq tunirrusiqtitsijit angajuqqaanginnik, tuksiarvigjuarmilu qaujisaqtit angajuqqaanginnik, qanuq Jiisusimik pijautitsijunnarmangaarmi taakkununga.

⁵ Taakkua uqaqatigijangit quviasuliqput, akilirumaliqpaallu kiinaujanik.

⁶ Juutasi tamatuminga angiqpuq, qinilirluni qanuq piviksaqarunnarmangaarmi Jiisusi tigujautittumallugu taakkununga inungnut qaujijaunngillutik.

Jiisusiup Upalungaijarninga Qaangiqtauviksiutimik Niriqatigiingnirmik

⁷ Ulluq nalliutingmat puvallaqqutiqanngittunik niaquujaqturvik, siipiulu nurranganik tuqutsiluni tunirrusirviusuuq.

⁸ Jiisusiup Piitturuusikkuk Juanasikkuk tilivaak, uqautillugik, “Ailirissik Qaangiqtauvingmik nalliunniqsiurutiksavut atuinnaruriaqturlugu, niriqatigiiqulluta.”

⁹ Taakkuak apirivuuk, “Nani aaqqiksuijaqtuqujivit?”

¹⁰ Jiisusiup uqautivaak, “Iglugasagjuanut tikikkussik, angut imaqautimik agjaqsijuq paarniaqpasik; taanna maliksikkuk iglumut itirvigijanganut,

¹¹ igluup inuanut uqaniaqpusik, ‘Ajuriqtuijiup uqaujjauqungmatit, nauktaima iniksaq ilinniaqtikkalu niriviginiaqtavut Qaangiqtauviksiutimik?’

¹² Taassuma takutinniaqpaasik iglurusirmik angijumik atuinnarmik igluup qulaaniittumik; tavvani aaqqiksuiniaqpusik niriviginiaqtattinnik.”

¹³ Taakkuak tilijaujuuk taikunngaqpuuk, taimaalluaq tamainnik Jiisusiup uqausirijanginnik pinasuaqpuuk; tavvani niriniaqtatik Qaangiqtauviksiurutiksaq aaqqiksuqpaak.

Ataniup Unnugummitarninga

¹⁴ Ikarraq nalliutingmat, Jiisusiup iniginiaqtani upakpaa, aapuusitalit ilagillugit.

¹⁵ Uqautillugit, “Uuminga qilanaammariglunga Qaangiqtauviksiutimik niriqatigijumalauqpassi aanniatitaunnginninni;

¹⁶ uqautivassi nirikkannirniarunniirama taimaittumik Guutiup Ataniuvingani nalliutijarialit pijariilaunnginninginni.”

¹⁷ Jiisusiup imiuti tiguvaa, qujalijariirami uqaqpuq, “Taanna tigulugu atunit niuqsivigisiuk;

¹⁸ uqautivassi maannamit pigiarlugu uainimik imirniarunniirama Guutiup Ataniuvinga tikiqqaaqtinnagu.”

¹⁹ Niaquujaq tigugamiuk, qujalijariirami avikpaa taakkununga tunillugu, uqaqpuq, “Una tavva timiga tunijaujuq ilissinnut. Taimailiuqattarissi iqqaumajjutigilugu uvannik.”

²⁰ Taimaaktauq imiuti tiguvaa nirijariirami, uqarluni, “Una imiuti kuvijaujuq ilissi pillusi angiqatigiiguti nutaaq aunnik nalunaikkutalik.

²¹ “Takugissi uvannik pijautitsijuq uvaniippuq niriqatigijara nirrivingmi.

²² Inuup Irninga tuqutauniaqpuq taimaak aaqqiktausimangmat; kappiannamigli angut taanna pijautitsijuq taassuminga!”

²³ Taakkua immingnut apiqsuqattautiliqput, nalliat taimaak pijautitsiniarmangaat.

Anginiqsaujumanirmut Aivautiniq

²⁴ Ilinniaqtilli immingnut aivaqatigiiliqput, nalliat anginiqsamik isumagijaujuksaungmangaat.

²⁵ Jiisusiup uqautivait, “Juutiunngittut angajuqqaarjuangit pijunnarniqarmata inuqutimingnut; aulatsijillu taijaujumavakput inungnut sivuliqtinnik.

²⁶ Ilissili taimaittariaqanngilasi; naliqsili anginiqpaangujuq ilissinnit inuusungniqpaatitut taimaittariaqaqpuq, sivuliqtiujurlu pijigijaujutut taimaittariaqaqpuq.

²⁷ Nalliak anginiqsauvaa, nirivingmi iksivajuq uvvalu niriniaqtanginnik qaitsijuq? Ilaak taannauvuq iksivaaqtuq niriniarluni taanna anginiqsauvuq; uvangali ilissinnik nirititsijuq ajjigivara.

²⁸ “Ilissi ilagiinnalauqpassinnga uqumaittukkuuqtillunga;

²⁹ Ataatama tunisivigilaurmanga aulatsijunnarnirmik, taimaaktauq tunisivigijumavassi aullatsijunnarnirmik Ataniuvingmi,

³⁰ niriqatigijumaarassi imiqatigilusilu Ataniuvingma niriviani, iksivajumaaqpusilu iksivautarjuani angajuqqaangulusi Isarialimiup kinguvaanginnut 12-nut.”

Jiisusiup Pijuqarniaqtumik Uqaujjininga Piitturuusimik

³¹ “Saimuuni, Saimuuni, naalagit! Saataanasi pijumagaluaqpuq Atangirlusi saniijarumallusi piruqsiivilirijiup niaquujaksanik saniijainingatut,

³² tuksialauqpungali ukpirniit saalauqunagu; utiruvit uvannut, inuuqativit ukpirnirngit makitikkanniriaqalaaqpatit.”

³³ Piitturuusiup kiuvaa, “Ataniq, upalungaiqsimavunga tigujauqatigijumallutit tuquqatigijumallutillu.”

³⁴ Jiisusiup uqautivaa, “Piitturuusi uqautivagit, angutiviaq unnuk nillirniaqpuq pingasuiqsurlutit uvannik qaujimannginniraqattaqsimaliqtillutit.”

Kiinaujakkuvik, Ikpiarjuk, Savigjuarlu

³⁵ Ilinniaqtini uqautivait, “Taissumani tililaurassi kiinaujakkuvilijaqunasi ikpiarjulijaqunasilu itigagutilijarasiluunniit, sunatuinnarmik kinnguumajaqalauqpisi?” Taakkua kiuvaat, “Sunamigluunniit kinnguumajaqalaunngilagut.”

³⁶ Jiisusiup uqautivait, “Maannali, naliqsi kiinaujakkuviqaruni ikpiarjuqaruniluunniit naksariaqaliqpuq. Naliqsi savigjuaqanngikkuni uligjuani niurrutigijaksarivaa savigjuaqtaarutigilugu.

³⁷ Tamakkuninga uqautivassi; aglait naalautsiqullugit uvannik uqausiqaqsimajut, ‘Piunngittulijurjuanut ilaliujjauvuq,’ taakkua uvannik uqausiqaqsimajut nalautsiniarmata.”

³⁸ Ilinniaqtingita uqautivaat, “Ataniq takugit, uvva savigjuak marruuk.” Kiuvait, “Taakkuak naammakpuuk.”

Jiisusiup Tuksiarninga Qaqqami Napaaqtulingmi Uqsuksaujunnaqtunik Paurngaqasuunik

³⁹ Jiisusi anigami, ailiqpuq piusirivaktamitut, qaqqamut napaaqtulingmut uqsuksaujunnaqtunik paurngaqasuumut; ilinniaqtingita malikpaat.

⁴⁰ Upaktaminut tikinnami uqautivait, “Tuksiarissi piunngittumik pijumisaaqtaunirmut tikiqunasi.”

⁴¹ Qimakpait miluutimut tikitaksaujumut, siiqqurluni tuksiaqpuq,

⁴² uqarluni, “Ataataak, pijumaguvit, imiut una piiqtilauruk uvannit; pijumajaraunngitturli, pijumajailli pili.”

⁴³ Aingilimut qilangmit upaktauvuq suungusititaullunilu.

⁴⁴ Uqumaiksalualirami aksururniqsaulluni tuksialiqpuq, aukkarningalirluni auktitut kutuktunik nunamut.

⁴⁵ Tuksiarnirminit makinnami, ilinniaqtiminut utiqpuq siniktut upakpait qiksaaluarnirmut sinigumatuinnaliqtut.

⁴⁶ Uqautillugit, “Sungmat sinikpisi? Makigissi tuksiarlusi piunngittumut pijumisaaqtaunirmut tikiqunasi.”

Jiisusiup Tigujauninga

⁴⁷ Jiisusili suli uqallaktillugu, inugiaktut tikipput, Juutasiup ilinniaqtit 12 ilangatta tavvunngautijangit. Jiisusi upakkamiuk kunikpaa;

⁴⁸ Jiisusiup uqautivaa, “Juutasi, Inuup Irninga kuniglugu pijaukkaqpiuk?”

⁴⁹ Ilinniaqtingit qaujigamik qanuiliuqtuqalirmangaat, Jiisusi apirivaat, “Ataniq, savigjuamik atutuinnariaqaliqpita?”

⁵⁰ Ilangattali tunirrusiqtitsijit angajuqqaangatta pijikataanga savigjuaminut siutingata taliqpia nakappaa.

⁵¹ Jiisusi uqaqpuq, “Taimailiurunniirissi!” Angutiup siutinga akturlugu aaqqikpaa.

⁵² Jiisusi uqaqpuq tunirrusiqtitsijit angajuqqaanginnut tuksiarvigjuallu angajuqqaanginnut inuillu angajuqqanginnut, tavvunngaqsimajut tigusijaqturlutik taassuminga, “Qaivisi savigjualijarlusi anautalijarlusilu pirajaksimajumik tigusijaqtuqtutitut?

⁵³ Qautamaat ilagiqattalauqpassi tuksiarvigjuarmi, tigulaunngilassinnga. Maannali ikarrasi nalliutivuq, taaqtuullu pijunnarninga aulatsiliqpuq.”

Piitturuusiup Qaujimannginnirarninga Jiisusimik

⁵⁴ Tavva Jiisusi tiguvaat aullarutillugu, tunirrusiqtitsijit angajuqqaangatta iglunganuurutivaat; Piitturuusi ungasigijaani malikpuq;

⁵⁵ ikualatitsijuqaqpuq igluup silataani iksivallutik avataani, Piitturuusiullu iksivaqatigivait.

⁵⁶ Arnaup pijiup, takugamiuk ikumamut qaummitausimajuq, takunnaarluniuk uqaqpuq, “Uuma angutiup Jiisusi ilagivaa.”

⁵⁷ Piitturuusi qaujimannginnirarluni uqaqpuq, “Arnaq, qaujimanngilara.”

⁵⁸ Akuniuluaqtinnagu asiata takugivaa uqarluni, “Ivvittauq taikkua ilagivaatit.” Piitturuusi uqaqpuq, “Taikkununga ilagijaunngilanga.”

⁵⁹ Ikarraq aniguqsimaliqtillugu suli asia uqalirivuq, “Uuma ilaak qularnanngittumik Jiisusi ilagivaa; Galiliamiungungmat.”

⁶⁰ Piitturuusi uqaqpuq, “Uqausirijatilluunniit qaujimanngilakka” sulili uqallaktillugu, tavvainnaq angutiviaq nilliqpuq.

⁶¹ Ataniullu qiviarluniuk Piitturuusi takusaqpaa. Piitturuusi iqqailiqpuq Ataniup uqausinginnik, uqautiqqaungmagu, “Angutiviaq nilliqqaaqtinnagu, ullumi pingasuiqsurlutit uvannik qaujimannginniraqattarniaqputit.”

⁶² Piitturuusi anivuq aksualuk qialluni.

Jiisusiup Mitautigijauninga Aanniqsiqtauningalu

⁶³ Jiisusimik tigusisimajut taassuminga mitautiqaqput anaulirlugulu.

⁶⁴ Ijingik matuarlugik apiriqattaliqpaat, “Nalauttailaurit! Kia tiglukpaatit?”

⁶⁵ Asinginniglu amisunik uqausiqaqput uqarnirluglutik akiraqturlugu.

Jiisusiup Iqqaqtuijirjuaniititauninga

⁶⁶ Ullaannguqtillugu qaumalirmat, tuksiarvigjuap angajuqqaangit tunirrusiqtitsijillu angajuqqaangit, piqujaniglu ilisaijit kativut; Jiisusi katimajut saangannuaqtippaat, uqarlutik,

⁶⁷ “Christuusiungmangaaqpit uqautilauqtigut.” Jiisusiup uqautivait, “Uqautigussi ukpirinianngilassinnga;

⁶⁸ apirigussiluunniit kiujunnarnianngilasi.

⁶⁹ Maannamit pigiarlugu Inuup Irninga iksivajumaaliqpuq Guutiup ajugaqanngittuup taliqpiani.”

⁷⁰ Taakkualimaat apirivaat, “Tavvaa Guutiup irnirivaatit?” Jiisusiup kiuvait, “Tavva uqariirassi taannauvunga.”

⁷¹ Taakkua uqaqput, “Asianik qaujisimajuksamik qiniriaqarunniiqpugut, nangminiq uqaqtillugu tusaratta.”