ᓘᑲᓯᐅᑉ ᐊᒡᓚᖏᑦ 21 - Aglait Ijjurnaittut

Uiggarniup Tunisininga

¹ Jiisusi takusarami ajuqsanngittunik takuvuq tunirrutimingnik puuqsiqattaqtunik tuksiarvigjuap tunirrusirvinganut;

² amma takugivuq uiggarnirmik ajuqsaqtumik tunisijumik kiinaujaakuluungnik kannujaangnik marruungnik.

³ Jiisusi uqaqpuq, “Sulijumik uqautivassi, una uiggarniq ajuqsaqtuq tunisiniqsauvuq asilimaaminit;

⁴ asingit tunisingmata aturnianngitamingnik; unali arnaq ajuqsaqtuugaluarluni pijjutiksatuaminik tamainnik tunisivuq.”

Jiisusiup Uqausiqarninga Tuksiarvigjuap Siquttiqtaujumaarninganik

⁵ Ilinniaqtingita ilangit uqaqatigiigutiqalauqput tuksiarvigjuarmik, takuminarninga uqausirillugu, ujaraillu sanasimatsiarninginnik, Guutimut tunirrutigijauvaktut pillugit, Jiisusili uqaqpuq,

⁶ “Takujasi tamakkua, ulluni nalliutijumaaqtuni ujaralimaatsiat atausirmigluunniit inigijamini ilisimajuqarunniirumaaqput urruutitaujumaarmata.”

Kappianaqtut Akiraqtuqtaunirlu

⁷ Ilinniaqtingita apirivaat, “Ajuriqtuiji, qanga tamakkua taimaittumaaqpat? Qanuq nalunaikkutaqarumaaqpat pigialirutik?”

⁸ Jiisusi uqaqpuq, “Qaujisarissi silairrijauqunasi; amisut tikittumaarmata uvannut pijiuniraqtut, uqarlutik, ‘Taannauvunga Christuusi!’ Ammalu, ‘Maanna piviksanga nalliutivuq!’ Taakkua malingniarasiuk.

⁹ Unataqtunik tusarussi saalagiqattautinasuktunik, sivuuraniarasi; tamakkua sivulliujariaqarmata, silarjuulli isua suli nalliutinngilaq.”

¹⁰ Jiisusi tavva uqaliqpuq, “Inuuqatigiigjuat inuuqatigiigjuanut asimingnut unatarumaaqput, angajuqqaarjuaqarvit asimingnut angajuqqaarjuaqarvingnut unatarumaaqput;

¹¹ nuna angijumik sajukpiluqattarumaaqpuq naukkutuinnaq, kaangnaqtualuuqattarluni nanituinnaq aannianaqtuqaqpaglunilu; kappianaqtunik qaujijariurnaqtunik saqqittuqarumaaqpuq qilangmit.

¹² Tamakkua pilauqqaaqtinnagit tigujaujumaaqpusi, akiraqtuqtaulusi, aataujumaaqpusi Juutit ukpirnirmut katimavinginnut tigujausimavingmuaqtaujumaaqpusilu, angajuqqaarjuanut aulatsijinullu pititaujumaaqpusi uvanga pijjutigilunga.

¹³ Taimaitauliqtillusi piviksaqarumaaqpusi uqausirnik tusaruminaqtunik uqausiqarunnarlusi.

¹⁴ Isumajaarniarasi, qanuq uqausiksaqarniarmangaassi;

¹⁵ uvanga uqausiksaqaqtittumaaqpassi silatuniqaqtillusilu, akiraqtuqtissinnilluunniit akiraqtuqtaujunnarumaanngilasi kiggusiksairujjijumaaqpusili taakkuninga.

¹⁶ Tigujautitaujumaaqpusi angajuqqaassinnit, qatanngutissinnillu, ilassinnillu nangminissinnit, ilannaarijassinnillu, ilangit ilasi tuqutaujumaaqput.

¹⁷ Tamainnut uumigijaujumaaqpusi uvanga pijjutigilunga,

¹⁸ niaqussinni atausirmigluuniit nujamik asiujuqarnianngilaq.

¹⁹ Qinuisaarnissinnut kisiani ilissinnik piulijumaaqpusi.”

Jiisusiup Uqausiqarninga Jiruusaliup Siquttiqtaujumaarninganik

²⁰ “Jiruusalim takugussiuk unataqtuksanut ilumajaujuq, qaujijumaaqpusi tavva siquttiqtauviksanga qaglingmat.

²¹ Tavva taimailiqpat Juutiami nunaqaqtut qaqqanut qimaajariaqalirumaaqput, iglugasagjuanilu nunaqaqtut aullariaqalirlutik, iglugasagjuat asiani nunaqaqtut iglugasagjuanut itirasuaqtuksaunngilat.

²² Taakkua ulluit sugiaqtauviungmata, aglangni uqausiusimajulimaat nalausiqullugit.

²³ Angijumik kappianarumaaqpuq taakkunani ulluni arnanut nutaraksaqaqtunut, nutaralaaqaqtunullu! Nunarjuarmi kappianaqtuqarumaarmat angijumik Guutiullu ninngausinga tikiutijumaarmat inungnut taakkununga.

²⁴ Ilangit savigjuamut tuqutaujumaaqput, ilangillu tigujaulutik aullarujjaujumaaqput Juutiunngittunut; Jiruusalimlu tulliraqsaujumaaqpuq Juutiunngittunut, piviksangat isulilaunginningani.”

Inuup Irningata Tikinniksanga

²⁵ “Kamanaqtuqarumaaqpuq siqinirmi taqqirmilu ullurianilu, nunarjuarmilu inuuqatigiigjualimaat nalulirnaqtumiittumaaqput kappiasummariglutiglu imarjuap iktuulijaarninganut ingiulialungnullu.

²⁶ Inuit nukiqarunniirumaaqput kappiasungnirmut utaqqinirmullu nunarjuarmut tikippalliajut pillugit; qilaup pijunnarningit aulataujumaarmata.

²⁷ Tavva Inuup Irninga takujumaaqpaat nuvujatigut qaijuq pijunnarnirjuaqaqtuq niqturnarnirjuaqarlunilu.

²⁸ Tamakkua pivallialiqpata, qummut takusalirissi, piulijauviksasi qaglingmat.”

Napaaqtuup Paurngaliup Ilinniarutiksauninga

²⁹ Jiisusiup ajjiujumik uqautivait, “Napaaqtuq paurngalik isumagiliqsiuk, napaaqtulimaallu asingit.

³⁰ Uqaujangit piruliqpata, qaujimavakpusi aujallarinngurniaqtuq qanittuulirmat.

³¹ Taimaaktauq, tamakkua pivalliajut takulirussiuk, qaujimajjutiginiaqpasi Guutiup Ataniuvingata qanittuulirninganik.

³² “Sulijumik uqautivassi, tamakkualimaat nalliutijumaaqput inuit maanna inuujut tuqujuinnaulauqqaaqtinnagit.

³³ Qilaglu nunalu nungujumaaqpuuk, uqausikkali nungujumaanngilat.”

Qaujisatsiariaqarniq

³⁴ “Qaujisatsiarissi ilissinnik uummatissigut uqumailititauqunasi niriluarnirmut imiluarnirmullu inuusirmullu isumajaanaqtutaqarninganut, ullumut taissumunga upaluijauqunasi nigaqtitaujutitut.

³⁵ Tamanna tikittumaarmat inulimaanut nunarjuarmiittunut.

³⁶ Taimanngat qaujisatsainnarissi, tuksiaqattarlusi pijunnarniqaqtitauqullusi aniguijunnaqullusi tamakkua pijumaaqtut atuliqpata, nangirunnaqullusilu Inuup Irningata saangani.”

³⁷ Qautamaat Jiisusi ajuriqtuiqattaqpuq tuksiarvigjuarmi, unnugaangalli anivagluni unnualimaaq qaqqamiippagluni napaaqtulingmi paurngaqaqpaktunik uqsuksaujunnaqtunik.

³⁸ Qautamaat ullaaraarjukkut inulimaat tuksiarvigjuarmuaqattaqput tusaajaqturlutik taassuminga.