ᓘᑲᓯᐅᑉ ᐊᒡᓚᖏᑦ 20 - Aglait Ijjurnaittut

Jiisusi Nakit Pijunnarniqarmangaat Apiqqusiuninga

¹ Ulluit ilanganni Jiisusi tuksiarvigjuarmi inungnik ilisaitillugu uqausirnik tusaruminaqtunik ajuriqsuijjutiqarluni, tunirrusiqtitsijit angajuqqaangit piqujaniglu ilisaijit, Juutillu angajuqqaangit ilagillugit tavvunngaqput.

² Uqautillugu, “Uqautilauqtigut nakit pijunnautiqarlutit taimailiurunnaqattaqpit? Kinakkunnullu pijunnautitaatitausimagavit?”

³ Jiisusiup kiuvait, “Uvangattauq apirijumagivassi; uqautilauqsinnga;

⁴ Juanasiup paaptitsijunnarninga Guutimit pilauqpaa uvvalu inungnit?”

⁵ Taakkua immingnut uqaqatigiiliqput, uqarlutik, “Guutimit pilaurniraruttigu, tavva uqautiniaqpaatigut, ‘Sungmalli ukpirilaunngippisiuk?’

⁶ Uvvalu inungnit pilaurnirarlugu uqarutta, inulimaanit milluqtauniaqpugut; Juanasi nalauttaijuunasugijaungmat.”

⁷ Tavva kiuvaat, “Nakit pijunnaqtitaungmangaat qaujimanngilagut.”

⁸ Jiisusiup uqautivait, “Uvangattauq uqautiniannginnivassi, nakit pijunnarniqaqtitaullunga taimailiurunnarmangaarma.”

Paurnganik Uainiksaulirumaaqtunik Piruqsiivingmik Kamajiujut Ajjiutitauningit

⁹ Inuit ajjiujumik imaittumik uqarvigivait: “Angutitaqalauqpuq paurngaliksanik kanngaqsuijumik piruqsiivingmi, kiinaujaliurutigijumallugu atuqtautippaa kamajinut, nunaup asianut aullaqpuq akuni aullaqsimajaqturluni.

¹⁰ Paurgait katitauviksangat nalliutingmat, pijiminik tilisivuq paurnganik pitaarijariaqaqtaminik tigusiqullugu piruqsiivingminit; taakkuali kamajiutitangita piji aanniqsiqpaat, naksaqtinnagu utiqtippaat.

¹¹ Angut pijiminik asianik tilisigivuq; taannattauq aanniqsirivaat iliijarillugulu, naksaqtinnagu utiqtippaat.

¹² Angut pijiminik pingajuannik tilisigivuq; taanna kamajinit ikiliqtauvuq aanniqsiqtaulluni aullaqtippaat.

¹³ Piruqsiiviup inua uqaqpuq, ‘Qanurli pinialiqtunga? Irnira nagligijara tilijumaliqpara; taanna pittiaqtauniaqtuksauvuq!’

¹⁴ Kamajiujut taanna takugamijjuk, immingnut uqaliqput, ‘Una tavva piruqsiivingmik piqutiliup irninga kingurngujjijuksaq; tuqulaurlavut, kingurngutijaksangit pitaariniarattigu!’

¹⁵ Piruqsiivingmit anitippaat tuquttlugu. “Qanurli taima piruqsiiviqaqtuup pilaliqpait taakkua tuqutsijut irninganik?

¹⁶ Nangminiqaqtuq piruqsiivingmik tikikkuni taakkua kamajit tuqunniaqpait, asinginnut kamagijautilirlugu.” Inuit tamatuminga tusaramik uqaqput, “Taimaittuqarnianngilaq!”

¹⁷ Jiisusiup inuit takusarlugit, uqautivait, “Uqausit imailijut qanuq tukiqaqpat? ‘Ujarak igluliuqtinit narrugijaujuq atunnginniraqtaulluni Taanna aturiaqarniqpaanguliqpuq tiriqquulirluni.’

¹⁸ “Tavvunga ujarangmut kataktulimaat siquminniaqput; ujaraglu nalliannut katakkuni katagvigijaminik siqallisiniaqpuq.”

Gavamakkunnut Taaksiijariaqarniup Miksaanut Apiqqusiq

¹⁹ Piqujanik ilisaijit tunirrusiqtitsijillu angajuqqaangita Jiisusi tigunasukkaluaqpaat tavvaniitillugu, inunigli sivuuragamik tigunngilaat; qaujigamik ajjiujutigut taakkutiguuna uqausirijaunirmingnik.

²⁰ Tavva piviksaqsiuliqput, angutinik akiliiviqarlutik tilisivut sulijurnattiarasuaqtunik, Jiisusi apiqsurlugu kiujjutiksairujjinasuarniaqtunik, piviirujjigutik Ruumamiut aulattijinginnut pijautittumallugu.

²¹ Taakkua qaujisaqtitaujut Jiisusimut apirivut, “Ajuriqtuiji, qaujimavugut uqaujjitsiaqpakkavit ajuriqtuitsiaqpaglutillu akaujunik, inungnik ajjigiiktitsigavit, sulitsiaqtumiglu Guutiup atuqtauqujanganik ajuriqtuiqattaravit.

²² Uqautilauqtigut piqujavut taaksijaqujivaat Siisarimut? Tunisiqujinngilalluunniit?”

²³ Jiisusiup silairriksinasungningit qaujigamigit, uqautivait,

²⁴ “Kiinaujaq takulagu. Kinamik ajjinnguaqtaqaqpa? Kinaullu atinganik atiliusimava?” Taakkua kiuvut, “Siisarimik.”

²⁵ Tavva uqautivait, “Taimaimmat tunisiuk Siisarimut, Siisariup pigingmagit, Guutimullu tunilugit Guutiup pingit.”

²⁶ Tilijausimajut inuit takkuani pasiksirutisaqtaarunnanngilat Jiisusiup uqausinginnit; kamaniarutiqalauqpulli kiggusinganik uqausiksairujjaugamik.

Tuqungajunit Makittumaarniup Apiqqusiuninga

²⁷ Saajjusit ilangit Jiisusimuaqput, taakkua ukpirusunngittut tuqungajut makittumaarninginnik,

²⁸ apirivaat uqarlutik, “Ajuriqtuiji, Muusisi piqujanik titiraqsimangmat: ‘Angut nulialik tuqukpat, qiturngaqtaalauratik, nuliavininga angutiup nukangata nuliaqtaarijaksarivaa qiturngaqtaaqullugik, kinguvaanginnik angajuata qiturnganginnik taijaujuksauqullugit.’

²⁹ Taimali qatanngutigiiktaqalauqpuq angutinik 7-nik; angajuktliqpaaq nulianilauqpuq, qiturngaqtaalaurani tuquvuq.

³⁰ Nukangata arnaq nuliaqtaarivaa, qiturngaqtaalaurani tuqugivuq,

³¹ amma nukangata pingajuatta nuliaqtaarigivaa, tuqugivuq, kinguningagut taakkua nukariilimaat 7 arnamik taassuminga nuliaqalauqput, tuqullutik qiturngaqtaaqtuqalauratik.

³² Kingulliqpaanngullunili arnaq tuqulaurivuq.

³³ Tuqungajut makivvinganni, nalliattali taima arnaq nuliarilaaqpauk? Taikkua qatanngutigiilimaat 7 arnamik taassumingatsainnaq nuliaqalaurmata.”

³⁴ Jiisusiup uqautivait, “Maani inuujut angutit nulianisuunguvut, arnaillu uitaaqpaglutik;

³⁵ angutiilli arnaillu tuqungajunit makittumaaqtut sivuniksattinni nulianigiaqarumaanngilat uinigiaqarumaaratiglu.

³⁶ Guutiup qiturngaringmagit, tuqumit makisimanirmingnut aingilititut taimaittumaarmata tuqujunnarunniirlutiglu.

³⁷ Muusisi nalunanngitsiaqtumik qaujititsilauqpuq tuqungajut makittumaarninginnik, unikkaangusimajumi ukpigarni ikualajumi, Atanirmik uqausiqarmat, ‘Aiprahaam Guutinga, Aisakiullu Guutinga, Jaikuullu Guutinga.’

³⁸ Guuti inuujunut Guutiuvuq tuqungajulli Guutiginngilaat; inuujulimaat taassumunga inuungmata.”

³⁹ Piqujanik ilisaijit ilangat uqaqpuq, “Kiutsiaqputit ajuriqtuiji.”

⁴⁰ Kinguningagullu apirikkannirumajunniiqpaat.

Misaiasimik Apiqqusiqarningat

⁴¹ Jiisusiup uqautivait, “Qanurli Christuusi Taivitimut kinguvaarijauniraqtaujunnaqpa?

⁴² Taiviti nangminiq uqaqsimangmat inngirutini: ‘Ataniq Ataninnut uqaqpuq, “Uvani taliqpinni iksivagit,

⁴³ akiraqtuqtingnik itigangnut ikurraliujjiqqaaqtinnanga.”’

⁴⁴ Taivitiup Atanirmik taigamiuk; qanurli tavva Christuusi kinguvaarijunnaqpauk?”

Jiisusiup Ilimasuqujininga Piqujanik Ilisaijinik

⁴⁵ Inulimaat tusaatillugit Jiisusiup ilinniaqtini uqautivait,

⁴⁶ “Ilimasugissi piqujanik ilisaijinik, taakkua pisukkatagumavangmata takijunik annuraaqsimalutik, nilliujjautsiarumavaglutik niuvirvingni Juutillu ukpirnirmut katimavinginni piuniqpaani iksivajumavaglutik; nirivigjuariaqtuqtunit upigijaujut ininginni iniqarumavaglutik.

⁴⁷ Silairriksivaglutik uiggarnirnik tigligarvigijumallugit angirranginnit, takunnaqtaunasuarlutiglu tuksiujjiliqpaglutik takijualungnik. Taakkua sugiaqtauningit piunnginniqsallarialuujumaaqput.”