ᓘᑲᓯᐅᑉ ᐊᒡᓚᖏᑦ 2 - Aglait Ijjurnaittut

Jiisusiup Irnianguninga

¹ Ulluni taikkunani Ruumamiut angajuqqaarjuangat Siisari Aagastasi angajuqqauvingminiittut inulimaat naasaqtauqulauqpait piqutingit piqasiutilugit.

² Tamanna naasaqtauniq sivulliqpaangulauqpuq Kuiriniasi aulatsijiutillugu Siriami.

³ Inulimaat titiraqtaujaqtulauqput sivuliviningita nunavininginnut aillutik.

⁴ Juusipittauq Naasariitimit pilluni Galiliamiittumit Pitliamuarivuq Juutiamiittumut, Taivitiup iglugasanginnut, Pitliamik atilingmut, tavvunngalauqpuq Taivitiup kinguvaaringmagu.

⁵ Titiraqtaujaqtulauqpuq Miari piqatigillugu, taanna nuliaksariingnirmut angiqatigisimajani, nutaraksalik.

⁶ Pitliamiiliqtillugik, Miariup irniviksanga nalliutivuq,

⁷ tavvani nutaraqtaariurutiminik irniqtaaqpuq, annuraanik immusiqpaa, uumajuit nirivinganut ilillugu, siniktarvingmi iniksaqannginnamik.

Siipilirijit Aingilillu

⁸ Pitliamlu qanigijaani paiqsijitaqalauqpuq siipiqutimingnik mianiqsijunik unnuakkut.

⁹ Ataniup aingilingata saqqivvigivait, Ataniullu niqturnarningata qaummagvigivait, kappiasulirlutik.

¹⁰ Aingiliup uqautivait, “Kappiasunngillusi; takugit, tusaruminaqtumik uqautijaqtuqpassi quvianaqturjuamik inulimaanut tikinniaqtumik;

¹¹ ullumi tavva piuliji Ataniq Christuusi irniangungmat Taivitiup iglugasanginni.

¹² Imaak qaujimajjutiqarniaqpusi; nutarakuluk takuniaqpasi annuraavinirnik immusiqsimajuq uumajuillu nirriviani ilisimajuq.”

¹³ Tavvainnaq aingiligasagjuat qilangmit pijut aingilik taanna ilagiliqpaat, inngirlutik Guuti niqtuqpaat, uqarlutik,

¹⁴ “Guuti niqtuqtauli quttingniqpaangujuq, Saimanarniqarlunilu nunarjuarmi inungnut, Guutimut quviagijaujunut!”

¹⁵ Aingilit qilaliarmata, siipilirijit immingnut uqaqput, “Pitliamualauqta tainna uqausiurataaqtuq takujaqturlugu, Ataniup qaujititsijjutigijanga uvattinnut.”

¹⁶ Tuavirlutik ailiqput, nanisillutik Miarimik Juusipimiglu, nutarakulungmiglu uumajut nirivingani nalajumik.

¹⁷ Takujariiramijjuk unikkaaliqput uqaujjaulaurnirmingnik nutarakuluk taanna pillugu;

¹⁸ tusaqtulimaat kamaniaqput siipilirijit uqausinginnik.

¹⁹ Miariulli tamakkualimaat isumamiutariliqpait, isumaksaqsiurutigillugillu.

²⁰ Siipilirijit tavva utirivut, Guuti niqtuqpaat quviasuutigillugu tusalauqtatik takulauqtatiglu pijjutigillugit, uqaujjaulaurnitik aingilimut nalautsitsiarmata.

Jiisusiup Atiqtaarninga

²¹ Ulluit sitamaujuqtut anigurmata, kipijauviksanga nalliutingmat, attiqtauvuq Jiisusimik, aingiliut taimaak atiqaqulaurmagu nutaraksarijaulauqtinnagu suli.

Jiisusiup Tunirrutauninga Tuksiarvigjuarmi

²² Juusipiup Miariullu ukpirnikkut salummaqtitauviksangat nalliutingmat Muusisiup piqujangit maliglugit, Jiisusi tuksiarvigjuarmut pitippaat Jiruusalimmut, Atanirmut tunijaqturlugu.

²³ Imaak uqaqsimangmat Ataniup piqujanginni, “Nutarakuluit angutaukpata sivulliqpaamik nutaraqtaarijaujut tunijaujuksauvut Atanirmut.”

²⁴ Juusipikkuk tunisijariaqalauqpuuk Ataniup piqujangit maliglugit tingmiangnik marruungnik, tuuvingnigluunniit marruungnik aqiggiujaaqtuungnik, akiggiujaaqtuungniglu marruungnik qakuqtaunngittuungnik.

²⁵ Taissumani angutitaqalauqpuq Jiruusalimmi, Simiunimik atilingmik, inuusiqaqtumik Guutimut naammagijaujumik tunisimatsiaqtuulluni, taanna utaqqilauqpuq Isarialimiut piulijauviksangannik, Anirniup Ijjurnaittuup najuqpaa.

²⁶ Taanna nalujunniiqtitaulauqpuq Anirnikkut Ijjurnaittukkut tuquniannginnirminik Ataniup Christuusinganik takulaunnginnirmini.

²⁷ Anirnirmut Ijjurnaittumut tasiuqtaulluni tuksiarvigjuarmuaqpuq; nutarakuluk Jiisusi angajuqqaangingnit tuksiarvigjuamut pititautillugu, piqujat maliktaujariaqarningit maliglugit,

²⁸ Simiuniup nutarakuluk tiguvaa, Guuti niqturlugu uqaqpuq:

²⁹ “Ataniq maanna pijiit saimanirmi angirraqtiliruk, Uqausirilauqtait maliglugu;

³⁰ Piulijiksautitait nangminiq ijinnut takugakku,

³¹ Taanna upalungairutigisimagaviuk inulimaat qaujiqullugit,

³² Qaumajuq qaummaksaiqullugu Juutiunngittunik, Inuqutivillu Isarialimiut niqturnarutiksangat.”

³³ Ataatangata Anaanangatalu nutarakuluup taimaak uqaujjauninga kamagimmarikpaak;

³⁴ Simiuniup saimmaqtippait anaananganut Miarimut uqarluni, “Takugit, una nutarakuluk unuqtunut Isarialimiunut katagutaujumaaqpuq makijjutaujumaarlunilu, nalunaikkutaujumaaqpuq akiraqtutauluni.

³⁵ Ivvit Miari uummatiit killiktaujumaaqpuq savigjuatitut, inuit amisut isumangit saqqitittumaaqpait.”

³⁶ Tavvaniittuqalaurivuq nalauttaijumik arnarmi Aanamik atilingmik, Panuiliup paninganik, Aasuriup kinguvaanginnut ilagijaujumik; taanna ningiungulilauqpuq, sivuningagut uiqalauqtuq arraagunik 7-nik,

³⁷ uiggarniuliqtuq arraaguqalirluni 84-nik. taanna qautamaat tuksiarvigjuarmiiqattalauqpuq tuksiarluni nirittailivaglunilu.

³⁸ Ikarrami tavvanitsainnaq itiqpuq Guuti niqtulirlugu, nutarakuluk uqausirivaa utaqqijulimaanut Jiruusalimmiunut piulijauviksauninganik.

Juusipikkut Utirningat Naasariitimut

³⁹ Ataniup piqujangitigut aturiaqaqtamingnik pijariramik, angirramingnut utiqpuuk Naasariitimut Galiliamiittumut.

⁴⁰ Nutarakuluk piruqpallialiqpuq sanngijuulirluni, silatujuulirlunilu; Guutiup saimmaningata najuqpaa.

Jiisusiup Surusiulluni Tuksiarvigjuarmuarninga

⁴¹ Arraagutamaat Jiisusiup angajuqqaangik Jiruusalimmuaqattalauqpuuk nalliunniqsiuriaqturlutik Qaangiqtauvingmik.

⁴² Jiisusi 12-nik arraaguqaliqtillugu, angajuqqaangikta ilagillugu Jiruusalimmuaqput nalliunniqsiuriaqturlutik iliqqusirivaktamiktitut;

⁴³ nalliunniqsiurvik isulimmat, utililauqput, Jiisusili Jiruusalimmit nuulaunngilaq. Angajuqqaangik qaujilaunngilaak nuulaunngittumik,

⁴⁴ isumalaurmatik ilagijamingnut ilaunasugillugu ullulimaaq pisulauqput, kinguningagut qiniliqpaak ilamingni ilannarijamingnilu;

⁴⁵ naninnginnamijjuk, Jiruusalimmut utiqpuuk, qiniriarlugu.

⁴⁶ Ulluit pingajunganni nanivaak tuksiarvigjuarmi, Juutit ilisaijinginnit iksivaqataujuq, naalalaurlugit apiqsuqattaqpait.

⁴⁷ Tusaajulimaat taassuminga kamaniaqput qaujimaninganik kiggusinginniglu.

⁴⁸ Angajuqqaangikta takugamijjuk quaqsaarutigivaak; Anaanangata uqautivaa, “Irniik, sungmat taimailiuqpitiguk? Takugit, ataataillu qinilauqpattigit pingigammariglunuk.”

⁴⁹ Jiisusiup kiuvaa, “Sungmat uvannik qiniqpisik? Qaujimanngilasik Ataatama iglunganiiksariaqarninnik?”

⁵⁰ Angajuqqaangik tukisinngilaak kiggusirijanginnik.

⁵¹ Jiisusiup angajuqqaangni angirrauqatigiliqpaak Naasariitimut, naalatsiarlugik; Anaanangatali tamakkua uqausilimaangit isumamiutariliqpait.

⁵² Jiisusi piruqpallialauqpuq timimigut silatuliqpallialluni, quviagijaullunilu Guutimut inungnullu.