ᓘᑲᓯᐅᑉ ᐊᒡᓚᖏᑦ 19 - Aglait Ijjurnaittut

Jiisusilu Sakiasilu

¹ Jiisusi Jirikuumut tikinnami aqqusaatuinnaqpaa.

² Tavvani Ruumamiut kiinaujaiqtitsijiqutingatta angajuqqaangat tavvaniippuq, Sakiasimik atilik, taanna ajuqsanngittuuvuq.

³ Taassuma Jiisusi takunasuaqpaa qanuittuungmangaat, inugiaktunulli takujunnanngilaq mikijuugami.

⁴ Tavva sivuningannut ullakpuq napaaqtumut sikamuamik taijaujumut majuraqpuq Jiisusimik takuttiarumatluni, tamauna aqqusaarniarmat.

⁵ Jiisusi tavvunngarami, qummut takusaqpuq uqautillugu, “Sakiasi tuavirlutit aqqarit; ullumi iglungniigiaqarama.”

⁶ Sakiasi tuavirluni aqqaqpuq, Jiisusi quviasugluni igluminut tunngasuktippaa.

⁷ Inuit takugamik uqamajautigiliqpaat uqarlutik, “Una angut ajuqtulijuup iglunganut tujurmijaqtuqtuq!”

⁸ Sakiasi nikuvilluni Atanirmut uqaqpuq, “Takugit Ataniq, piqutima avvangit tuniniaqpakka aktlujunut; sagluqitsisimannirumalu nalliannituinnaq utiqtitsiviginiaqpara sitamaiqsulluaqtumik.”

⁹ Jiisusiup uqautivaa, “Ullumi piulijauniq iglumut uvunga tikippuq, unattauq Aiprahaam kinguvaaringmagu.

¹⁰ Inuup Irninga tikisimangmat asiusimajut qiniriarlugit piulijaqturlugillu.”

Ajjiujuq Kiinaujait Guuluit

¹¹ Inuit tamatuminga naalaktillugit, Jiisusiup unikkautivait ajjiujumik, Jiruusalimmut qagligamik, inuit isumangmata Guutiup Ataniuvinga maannakkut saqqitsautiginiarasugilirlugu.

¹² Taimaimmat uqaqpuq, “Angutitaqalauqpuq angajuqqaamik nunamut ungasiktumut aullalauqtumi angajuqqaarjuannguqtitaujaqturluni pijariiruni angirraminut utilaarluni.

¹³ Aullalaunnginnirmini pijini qulit qaiquvait, kiinaujamik guulumi atausirmik atunit tunisivigivait uqautillugit, ‘Ukua niurrutigisiuk kiinaujaqtaakkannirutiginasuarlugit utilaunnginninni.’

¹⁴ Nunaqatingita taanna angajuqqaaq uumigigamijjuk, tilisivut uqariaqtuqtunik, ‘Una angajuqqaarjuaqtaarijumanngitavut.’

¹⁵ “Taanna angajuqqaarjuannguqtitaugami angirraminut utiqpuq. Pijini kiinaujanik aittulauqtani qaiquvait, qaujijumalluni qatsinik ilakkannirnirmangaajjuk.

¹⁶ Sivulliqpaaq qaigami uqaqpuq, ‘Angajuqqaak, kiinaujait atausiq qailauqtait, qulinik ilakkannilauqpuq.’

¹⁷ Angajuqqaangata uqautivaa, ‘Pinasuatsiaqtutit, pijitsiavaullutit! Kamatsialauravit mikijunik, angajuqqaangunialiqputit nunalingnut qulinut.’

¹⁸ Aippanga qaigivuq, uqarluni ‘Angajuqqaak, kiinaujait atausiq qailauqtait tallimanik ilakkannilauqpuq!’

¹⁹ Angajuqqaangata uqautivaa, ‘Ivvittauq aulatsijiunialiqputit nunalingnut tallimanut.’

²⁰ Suli pijingata ilangat qaigivuq uqarluni, ‘Angajuqqaak uvvauna kiinaujait kakkiutiksajamut immusilauqtara ijiqsimallugu.

²¹ Ilingnik ilirasulaurama, nikagusuqannginnavit; ililaunngitarnik tigusisuungugavit, kanngaqsulaunngitatillu katiqsuqpatit.’

²² Angajuqqaangata kiuvaa, ‘Iqqaqturniaqpagit uqausiqtit maliglugit, pijitsiavaunngittutit! Qaujimagavit nikagusuqanngittunga, ililaunngitakkalu tigugakkit, kanngaqsuutigilaunngitakkalu katiqsurakkit.

²³ Sungmalli kiinaujara kiinaujakkuvingmualaunngippiuk? Utiruma ilakkanniqsimaliqtillugu pigajalauqpara.’

²⁴ Tavvaniittut uqautivait, ‘Kiinaujaq guulu taassumangat tigusiuk, tunilugu qulinik kiinaujalingmut.’

²⁵ Taakkua uqautivaat, ‘Angajuqqaaq, taanna qulinik kiinaujaqaliriiqpuq!’

²⁶ Taassuma kiuvait, ‘Uqautivassi, piqaqtulimaat tunisiviukkannirniaqput; piqanngittulli mikijumik piqaraluaqpata aqsaaqtauniaqput.

²⁷ Taikkua uvannik akiraqtuqtut, uvannik angajuqqaarjuanguqujinngittut, qaitisiuk takunnaqtillunga tuqullugit.’”

Jiisusiup Jiruusalimmuarninga Kingulliqpaamik

²⁸ Jiisusi taimaak uqariirami, sivulliqpaulluni Jiruusalimmut ailiqpuq.

²⁹ Pitpaigi Pitanilu qagligamigik, qaqqaq napaaqtulik uqsuksaujunnaqtunik paurngaqasuuq tikinnamiuk, ilinniaqtiminik marruungnik tilisivuq,

³⁰ uqautillugik, “Sivunittinniittunut nunalingnut aigissik, taikunngarussik takuniaqpusik siutiqquqtujuup nurranganik pituksimajumik, suli ikimaviulauqsimanngittumik; taanna pituijjaarlugu qaijjutisikkuk.

³¹ Apirijaugussik ‘Sungmat pituijjaaqpisiuk?’ Kiuniaqpusik, ‘Ataniup aturumangmagu.’”

³² Tilijaujuuk taikunngaramik Jiisusiup uqausiriqqaujangit taimaatsiaq nalautsivut.

³³ Siutiqquqtujuup nurranganik piiqsinasuliqtillugik, inuata apirivaak, “Sungmanuna pituijjaarasuaqpisiuk?”

³⁴ Taakkuak kiuvuuk, “Ataniup aturumangmagu.”

³⁵ Siutiqquqtujuup nurranga Jiisusimuarutivaak, annuraatik siutiqqutujuup nurrangata qaanganut ilivait, Jiisusi ikitippaat.

³⁶ Jiisusilu ikimalluni ingirraliqtillugu, inuit annuraatik aqqutiginiaqtanganut isivitiqpait.

³⁷ Jiruusalimmut qagligamik, qaqqaq napaaqtulik uqsuksaujunnaqtunik paurngaqasuup aqqutaanuaqput, maliktingit unuqtualuit quviasummariliqput Guuti niqtuqpaat nipiqquqtullutik; Jiisusiup kamanaqtuliningit takusimajatik pijjutigillugit.

³⁸ Uqarlutik, “Guutiup saimmarliuk, angajuqqaarjuaq Ataniup atingani tikittuq! Qilangmi quvianaqtuqarli quttingniqpaangujurlu niqtuqtauli!”

³⁹ Paarisilli ilangit inugiaktut akurnganniittut Jiisusimut uqaqput, “Ajuriqtuiji, ilinniaqtitit nipanngiqulaukkit.”

⁴⁰ Jiisusiup kiuvait, “Uqautivassi, taakkua nipanngiraluaqpata, makkua ujarait qaigalaalirniaqput.”

Jiisusiup Quvviurutiqarninga Jiruusalimmik

⁴¹ Jiruusalim qaglillugu takunnaliramiuk quvviurutigivaa,

⁴² uqarluni, “Qaujilauqsiuktuq akiraqtuutinngijjutiksaq! Maannali kisiani tukisijunnanngilasi!

⁴³ Ulluq nalliutijumaaqpuq, akiraqtuqtissinnit ilumajauviksasi avatilimaassinnit, ilujaulusi tikitaujumaarviksasi.

⁴⁴ Asiruqtaujumaaqpusi avalurjuat iluaniittulimaat nungutaulusi qiturngalimaasilu, ujaraillu sanasimajut atausirmigluunniit qaliriiktuqarunniirumaaqput; Guutiup sapujjijaqturninga ilissinnik kamagilaunnginnassiuk.”

Jiisusiup Tuksiarvigjuamuarninga

⁴⁵ Jiisusi tuksiarvigjuarmuarami niuviqtitsijut tavvaniittut anitiliqpait;

⁴⁶ uqautillugit, “Titiraqsimavuq, ‘Igluga tuksiarviujumaaqpuq’; ilissili tigliktinut inigijautiliqpasi.”

⁴⁷ Qautamaat Jiisusi ajuriqtuiqattaqpuq tuksiarvigjuarmi. Tunirrusiqtitsijit angajuqqaangit piqujaniglu ilisaijit inuillu aulatsijingita tuquttumagaluaqpaat;

⁴⁸ tuquttivigigajaqtamingnili nanisijunnalaunngilat, inungnut piviksaqaqtitaulaunginnamik, inuit tusaajumavigjualaurmata uqausirijanginnik.