ᓘᑲᓯᐅᑉ ᐊᒡᓚᖏᑦ 18 - Aglait Ijjurnaittut

Jiisusiup Ajjiutitanga Uiggarniq Iqqaqtuijilu

¹ Jiisusiup ilinniaqtini ajjiujumik ajuriqtuqpait, tuksianginnaqataqullugit sapiliqtailiqullugillu.

² Uqautivait, “Nunalingni iqqaqtuijitaqalauqpuq Guutimik sivuuranngittumik, inungniglu ilirasugani.

³ Tavvani nunalingni uiggarniqtaqalauqpuq taassuma iqqaqtuiji upaqattaqpaa uqautiqattaqtlugu, ‘Saputilaunnga akiraqtuqtinnit!’

⁴ Iqqaqtuiji akuni upalaunngilaq; kinguningagulli isumaliqpuq, ‘Guutimik sivuuranngikkaluaqpunga inungniglu ilirasungnanga.

⁵ Uumali uiggarniup pagvisainnalirmanga, pijumajanganik piniarvigilaurlagu, kamaginngikkukku qaiqattatuinnarniarmat iqianngunaqsimmarigluni.’”

⁶ Ataniq uqaqpuq, “Tusaqpasi iqqaqtuijiup ukpinngittuup uqausingit.

⁷ Guutiulli inuqutini, qinuinnaliqpata ullukkut unnuakullu ikajuqtaujumalutik? Pigiarnasaarajaqpa ikajuqtaujumatillugit?

⁸ Uqautivassi, inuqutini tavvainnaq ikajurumagajaqpait. Inuup Irninga nunarjuarmut tikikkuni, ukpirniqatsiaqtunik nanisigajaqpa?”

Ajjiujuq Paarisilu Ruumamiullu Kiinaujaiqtitsijingat

⁹ Ajjiujumiktauq Jiisusiup uqautivait inuit immingnik qanuinnasuginngittut asimingniglu narrujut:

¹⁰ “Angutiingnik marruungnik tuksiarvigjuarmut tuksiariaqtuqalauqpuuk, aippanga Paarisi, aippangalu Ruumamiut kiinaujaiqtitsijinga.

¹¹ Paarisi inutuulluni nangiqpuq tuksiarluni, ‘Guuti, qujagivagit asittut taimainnginnama, pijumatujualuktitut, tiglitujualuktitulluunniit, nuliamingnik asinniaqpaktutitut, uutunaq Ruumamiut kiinaujaiqtitsijingatut.

¹² Pinasuarusiq marruviglugu nirittailivakpunga, kiinaujaqtaarijamalu tallimaujuqtuujjutinginnik tunisivakpunga.’

¹³ Ruumamiulli kiinaujaiqtitsijinga, qaninngittumi nangiqpuq, qummulluunniit aarlurumanngittuq, sagvinilu patiktarlugu uqaqpuq, ‘Guuti nikagilaunnga ajuqtulijialuugama!’

¹⁴ Uqautivassi, taanna Ruumamiut kiinaujaiqtitsijinga Guutimut naammagijauniqsaulirluni aipparijaminit igluminut angirralauqpuq; nalliat imminik angijuruqtittuq Guutiup mikiglitirniaqpaa, immingnigli mikiglitiqtuq taanna angijuruqtitauniaqpuq.”

Jiisusiup Tunngasuktauqattaqujininga Nutarakulungnik

¹⁵ Nutarakulungniktauq Jiisusimuarujjivut taassumunga patimmijauqullugit; ilinniaqtingitali takugamijjuk, taakkua iniqtiqpait.

¹⁶ Jiisusiulli nutarakuluit qaiquvait uqarluni, “Nutarakuluit uvannut qaitisiuk, iniqtinngillugit; taimaittunut Guutiup Ataniuvinga pigijaungmat.

¹⁷ Sulijumik uqautivassi, Guutiup Ataniuvinganik nutarakuluktitut ilaliuqsinngittuq taanna tavvunga itirnianngilaq.”

Angut Ajuqsanngiqtuq

¹⁸ Juutit angajuqqaangatta Jiisusi apirivaa, “Piujutit ajuriqtuiji, sunamik pinasuariaqaqpunga inuusirmik nungusuittumik kingurngujjiqullunga?”

¹⁹ Jiisusiup uqautivaa, “Sungmat piujumik taivinga? Guutiup asianik piujuqtaqanngilaq.

²⁰ Piqujait qaujimavatit: ‘Nulialit uilillu asinniaqtuksaunngilat, pijaarilutit inuaqtuksaunngilatit, tigliktuksaunngilatit; inuuqatingnik sulinngittumik uqausiqaqtuksaunngilatit; ataatangnik anaanangniglu upigusutsiaqtuksauvutit!’”

²¹ Taassuma kiuvaa, “Tamakkua taimanngat inuusuktuuninnit piqujait malikpakka.”

²² Jiisusiup tusaramiuk, uqautivaa, “Suli atausirmik pisimanngilatit. Piqutilimaatit niurrutigijaqtukkit kiinaujataarijaatillu tuniuqautigilugit ajuqsaqtunut, qilangmi tavva piqutiqatsiarniaqputit; qailutit malinnga.”

²³ Angulli tamatuminga tusarami quviasugunniiqpuq; ajuqsanngittualuugami.

²⁴ Jiisusiup quviasugunniiqtuq takugamiuk uqaqpuq, “Pijarninngittuungmat ajuqsanngittunut Guutiup Ataniuvinganut itirasuarniarluni!

²⁵ Pijariakinniqsauvuq Kaamiliup itirasuarajarninganit miqqutiup ijingagut ajuqsanngittuup itirasuarajarninganit Guutiup Ataniuvinganut.”

²⁶ Inuit tusaajut apirivaat, “Kinali taima piulijaujunnarniaqpa?”

²⁷ Jiisusiup uqautivait, “Inungnut ajurnaqtut Guutimut ajurnanngilat.”

²⁸ Piitturuusi uqaqpuq, “Takugit, angirravut qimalauqpavut ilingniglu malilirluta.”

²⁹ Jiisusiup uqautivait, “Sulijumik uqautivassi, nalliat angirraminik qimaijuq nuliaminik, qatanngutiminiglu angajuqqaaminiglu qiturngaminigluunniit, Guutiup Ataniuvinga pijjutigilugu,

³⁰ anginiqsammarialungmik tunisiviulaaqpuq maanna inuutillugu, inuusiksamiglu nungusuittumi pijumaaqtumi.”

Jiisusiup Pingajungannik Uqausiqarninga Tuqutaulaarnirminik

³¹ Jiisusiup ilinniaqtini 12 inutuutillugit uqautivait, “Takugit Jiruusalimmualiqpugut, uqausiusimajut tamarmik nalauttaijuni Inuup Irningata miksaanut kajusititauniaqput.

³² Juutiunngittunut tunijaujumaaqpuq, taakkua mitautigijumaaqpaat, kanngusuutinnaqtumik pinasuarviujumaaqpuq, tivvuluktaulunilu;

³³ tiigaqturumaaqpaat tuqullugu, ulluilli pingajuannik makittumaarivuq.”

³⁴ Ilinniaqtingit uqausirnik taakkuninga tukisinngilat; uqausingita tukingit ijiqsimalaurmata taakkununga, tukisilaunngilat qanuq Jiisusi uqaraluarmangaat.

Jiisusiup Tautuliqtittininga Tuksiratimik Tautunngittumik

³⁵ Jiisusi Jirikuumut qagliliqtillugu, tautunngittumik iksivajuqaqpuq aqqutiup saniani, kiinaujanik tuksiraqtimik.

³⁶ Inugiagaaluit saniqquttut tusaagamigit, apirivuq, “Sujuqalirmat?”

³⁷ Uqaujjauvuq, “Jiisusi Naasariitimiuq aqqusaalirmat.”

³⁸ Nillialiqpuq, “Jiisusi, Taivitiup irninga, nikaginnga!”

³⁹ Sivulliujut iniqtiriliqput taassuminga nipiqaqunagu; nipiqquqtusivalliatuinnaqpurli, “Taivitiup irninga, nikaginnga!”

⁴⁰ Jiisusi nuqqaqpuq, tautunngittuq qaititauquvaa, qaglilirmat apirivaa,

⁴¹ “Sunamik uvannut piniarviujumavit?” Uqaqpuq, “Ataniq tautuliqtitaujumavunga.”

⁴² Jiisusiup uqautivaa, “Tautulirit; ukpirusungnirnut aaqqiktauvutit.”

⁴³ Tavvainnaq tautuliqpuq Jiisusi malilirlugu, Guutilu niqtuqpaa; inulimaat tamatuminga takugamik, Guuti niqtuliqpaat.