ᓘᑲᓯᐅᑉ ᐊᒡᓚᖏᑦ 17 - Aglait Ijjurnaittut

Ajurniq

¹ Jiisusiup ilinniaqtini uqautivait, “Ajurnirmut pijumisaaqtauniq pitaqainnarniaraluaqpuq; kappiannamiigli tainna aqqutigijaujuq!

² Piuniqsaugajaqpuq tainna aqqutigijaujuq niaquujaksanik siqallisiviup ujaraktanganik qungasingagut nivingairviuluni imavingmut kivititaukpat, ukuningakuluk ajuqtulititsininganit.

³ Piniarnirijassinnik qaujimanasuatiaqattarissi; qatanngutiit ajuqtulikpat iniqtiruk, qaqialiqpallu isumagijunnairvigiluguk;

⁴ ullumik atausirmi 7-iturluni ajuqtulivigikpatit, ilingnut qaivagluni uqaraikpat ‘Qaqialiqpunga,’ isumagijunnairvigiqattataksarivat.”

Ukpirniq

⁵ Aapuusitalit Atanirmut uqaqput, “Ukpirnivut angiglivaalliqtilauruk!”

⁶ Ataniup uqautivait, “Ukpirniqarussi piruqsiaksait mikinniqpaangatitut mastarttitut, uumunga napaaqtumut uqarunnaqpusi, ‘Ilingnik nusuglutit, imavingmualirit,’ tavva naalangniaqpaasi.”

Pijiup Pijaksanga

⁷ “Nallisi pijiqaruni piruqsiivingmi nunalirijumik uumajunigluunniit siipinik kamajumik, qaikpat uqautigajaqpiuk ‘Tuavirlutit nirilirit?’

⁸ Taimailivanngilasi, imailivakpusili pijissinnut, ‘Niriniaqtannik niqiliulirit, sailisarlutillu uvannik pijitsilirit niritillunga imiqtillungalu, kinguningagullu nirilutit imirniarivutit.’

⁹ Piji angajuqqaangata qujagijariaqaqpauk naalatsiarninganut?

¹⁰ Ilissittauq taimaikkivusi, piqujaujjutigijassinnik pijariiraangassi uqaqtuksauvusi, ‘Pijituinnauvugut; pijariaqaqtavut pituinnarattigu.’”

Jiisusiup Aaqqiksininga Angutinik Qulinik

¹¹ Jiisusi Jiruusalimmunngautillugu, Samiariallu Galiliallu akunningaguulauqpuq.

¹² Nunalingnualiqtillugu, upaktauvuq angutinit qulinit, kappiagijaujumik paqtiqtunit, taakkua qaninngittumi nangiqput,

¹³ qaigalaarlutik uqaqput, “Ataniq Jiisusi, nagligitigut.”

¹⁴ Jiisusiup takugamigit uqautivait, “Tuksiarvigjuarmi tunirrusiqtitsijinut takujautitsaqtulirissi.” Taikunga ailiqtillugit aqqutaani aaqqiktauvut.

¹⁵ Ilangat aaqqiktaunirminik qaujigami, utiqpuq Guuti niqtuqpaa nipiqquqtulluni.

¹⁶ Nunamut paammagluni Jiisusiup saanganut, qujagimmarikpaa. Angut taanna Samiariarmiutauvuq.

¹⁷ Jiisusi uqaqpuq, “Angutit quliuqqaunngilat aaqqiktaujut? Naugli taikkua 9 taassuma asingit?

¹⁸ Utiqtuqanngilat Guutimut qujalijaqturlutik nunaqatiginngitavut taanna utiqtutuuva?”

¹⁹ Jiisusiup uqautivaa, “Makillutit tavvannga ailirit; ukpirusukkavit aaqqitauvutit.”

Guutiup Ataniuvingata Tikinninga

²⁰ Paarisit ilangita Jiisusi apirivaat qanga Guutiup Ataniuvinga tikinniarmangaat, Jiisusiup kiuvait, “Guutiup Ataniuvinga nalunaikkutakkut takuksaujaqturluni tikinnianngilaq.

²¹ Uqaqtuqarnianngilarluunniit, ‘Takugit maaniippuq!’ Uvvaluunniit, ‘Ikaniippuq!’ Guutiup Ataniuvinga ilussinniinniaqpuq.”

²² Ilinniaqtini uqautivait, “Nalliutijuqalaamiijut, Inuup Irningata ullurmik saqqivviksanganik takujumallirvigisimajassinnik kisiani ullurmik takuviksaqtaqalaagittuq.

²³ Inungnit uqautijaujumaaqpusi, ‘Avunga takujaqtulirit!’ Uvvalu, ‘Maunga takujaqtulirit!’ Taimailiuqtunut takujaqtuqtailigissi malingniarnagillu.

²⁴ Suurlu qaummaallak qaumatitsikainnasuungungmat silakkut ingirralluni sukkajumik, taimaittumaarivuqtauq Inuup Irningata ullungani.

²⁵ Taimailauqqaaqtinnagu Inuup Irninga angijumik aanniatitaujariaqaqpuq narrugijaujariaqarlunilu maanna inuujunut.

²⁶ Suurlu Nua inuutillugu taimailaurmat, taimaittumaarivuqtauq Inuup Irningata ullungata nalliunningani.

²⁷ Taissumani Nuap nalliunningani, inuit nirilauqput imirlutiglu, nulianikput uiniglutiglu, ulluq Nuap umiarjuamut itirvinga tikillugu, ulivigjuaq tikimmat taikkualimaat tuqulauqput.

²⁸ Suurluttauq Luuti inuutillugu inuit nirilauqput, imirlutiglu, niuvirlutik, niurrutiqarlutiglu, niqiksanik piruqsiivut, igluliurlutiglu,

²⁹ ullumi taissumani Luuti Sutuumamit aullarmat, ikuma ujaraillu aumait qilangmit katakput inulimaallu tuqullugit.

³⁰ Taimaittumaarivuqtauq ullumi Inuup Irningata saqqivviani.

³¹ “Ulluq tainna nalliutikpat, igluup qaanganiittuq igluminut itirniarani piqutiminik aiksirasugluni; taimaaktauq piruqsiivingmiittuq igluminut utiqtuksaunngilaq.

³² Luutiup nulianga iqqaqsiuk.

³³ Inuusirminik annirusuktuup inuusini asiujijumaaqpaa; inuusirminigli asiujijuup inuusini saputijumaaqpaa.

³⁴ Uqautivassi, tamanna nalliutikpat unnuami marruuk iglirmi atausirmi sinigumaaqpuuk; aippaa aullarujjaujumaaqpuq aippangalu qimaktauluni.

³⁵ Arnaak marruuk niqiksamik siqallisiqatigiigumaaqpuuk; aippaa aullarujjaujumaaqpuq, aippangalu qimaktauluni. [

³⁶ Angutiik marruuk piruqsiivingmi pinasuaqatigiigumaaqpuuk; aippaa aullarujjaujumaaqpuq, aippangalu qimaktauluni.]”

³⁷ Ilinniaqtingita apirivaat, “Ataniq nani?” Jiisusiup uqautivait, “Nanituinnaq uumajumik tuqungajuqtaqaqtillugu tingmiarjuat niqitusuut kativakput.”