ᓘᑲᓯᐅᑉ ᐊᒡᓚᖏᑦ 16 - Aglait Ijjurnaittut

Piji Isumaksaqsiuqsaraittuq

¹ Jiisusiup ilinniaqtini uqautivait, “Angummik ajuqsanngittuqtaqalauqpuq piqutiminut kamajiqutiqaqtumik, angajuqqaanga uqaujjauvuq piqutiminik pimajiqutinga kiinaujanginnik nungusaituinnarniraqtaulluni.

² Angajuqqaangata qaiquvaa uqautillugu, ‘Tusaqtara tamanna suliva? Kamagijatik piqutikka nalunaitsiarlugit qailikkit, piqutinnik kamajiujariaqarunniiravit.’

³ Tavva kamaji isumaliqpuq, ‘Qanurli pinialiqtunga? Angajuqqaama piqutiminik kamajiuqujunniirmanga, sanngiiluarama nunamik qalurarasugiaksaq, qinunasuariaksarlu inungnit kanngusuktlunga.

⁴ Imaak pijumaliqpunga, iqqanaijaaksaqarunniiruma inuit angirranginnut tunngasuktitauqattarniarama!’

⁵ Taassuma angajuqqaaminut akiliksalit qaiquliqpait atausiunaaqtirlugit, sivulliqpaaq apirivaa, ‘Angajuqqaara qatsinik akiliksaqarvigiviuk?’

⁶ Taassuma kiuvaa, ‘Napaaqtuup piruqtungita uqsunginnik qattaujanik 100-nik,’ uqautivaa, ‘Uvvauna akiliksaqautiit inngillutit titiralirit 50-nik,’

⁷ amma asianik apirigivuq, ‘Ivvilli qatsinik akiliksaqaqpit?’ Taanna kiuvuq, ‘Niaquujaksanik puuqsimajunik 100-nik.’ Kamajiup uqautivaa, ‘Uvvauna akiliksaqautiit titiralirit 80-nik.’

⁸ Angajuqqaangata quviagililauqpaa taimaak silatujumik pinasuarmat; matuma silarjuap inungit silatuaqinasuarunnarniqsaungmata qaumajumiutanit, pijariaqaqtamingni pinasuaqtillugit.

⁹ “Uqautivassi, ilannaaqarasuarissi silarjuarmiut ajuqsangijjutingit aturlugit, ajuqsalirussi tunngasuktitauqullusi angirraksassinut isuqanngittumut.

¹⁰ Mikijukulungmik kamatsiaqtuq, angijunik kamatsiarunnaqpuq; mikijukulungnik kamatsianngittuq angijunik kamatsiarunnannginnivuq.

¹¹ Kamatsiaqsimanngikkuvit silarjuarmiut ajuqsanngijjutinginnik, qanurli taima ukpirijaujunnarajaqpit pillariuniqsanik pilirijunnarmangaaqpit?

¹² Piginngitarnik kamatitaulutit kamattiaqsimanninngikkuvit, qanurli nangminirijaksarnik pitaaqtitaujunnarajaqpit?

¹³ “Piji angajuqqaangnik marruungni pijitsirunnanngimmat; aippanga uumigigajaqpaa aippangalu nagligilugu; uvvalu aippanga tunisimavigittiarlugu aippangalu narrugilugu. Atautsikkut pijitsiviqarunnanngilasi Guutimik kiinaujaniglu!”

Jiisusiup Ajuriqtuiningit

¹⁴ Paarisit kiinaujanik pillariqutiqarami, tamatuminga tusaramik, Jiisusi mitautigivaat.

¹⁵ Jiisusiup uqautivait, “Ilissi tavva inungnut naammagijautsiarasuaqpusi, Guutiulli uummatisi qaujimavait; inungnut niqtuqtaujut Guutimut atuutiqanngimmata.

¹⁶ “Muusisiup piqujangit, nalauttaijullu aglangit atulauqput Juanasi Paaptitsiriji tikillugu; kinguningagut uqausit tusaruminaqtut Guutiup Ataniuvinganik uqausiqaqtut uqausiuliqput, unuqtualuit ajuinnarlutik itirasulirmata.

¹⁷ Pijariakinniqsauvuq qilaglu nunarjuarlu nunguppatik, piqujani naanikuluulluunniit atausiup atuqtitaugajannginninganit.

¹⁸ “Angut nuliaminik avitsillarikpat asianik nulianigluni, taassuma nuliarilauqtaniq asinniaqpaa, angullu arnamik avitaullariksimajumik nulianikpat taanna asinniarivu.”

Angut Ajuqsanngittuq Laasaruusilu

¹⁹ “Ajuqsanngittungmik angutitaqalauqpuq annuraasimavaktumik annuraanik akituniqpaanik aupallariktunik, qautamaat nirivigjuaqtitsiinnaqtumik.

²⁰ Ajuqsatualuktaqalaurivuq Laasaruusimik atilingmik, taassuma timilimaanga ajuaqtualuk, taanna aatauqattaqpuq ajusanngittualuup iglungata isiriarvingata sanianut.

²¹ Isumaqattalauraluaqpuq nirijumalluni ajuqsanngittuup nirivinganit kataktunik; aglaat qimminit ajuangit alukturiatuqtauvaglutik.

²² Ajuqsaqtualuk tuqungmat aingilinit agjaqtauvuq Aiprahaam sanianut. Kinguningagut ajuqsanngittualuktauq tuqugivuq iluviqtaullunilu.

²³ Tuqungajut iningani aanniajualuulluni qaujiliqpuq, qummut takusarami Aiprahaam takuvaa ungasiktumiittuq, Laasaruusilu sanianiittuq.

²⁴ Qaigalaaliqpuq, ‘Ataataak Aiprahaam, nikagilaunnga, Laasaruusi tililauruk tikini misuglugu imirmut, uqannik niglitiriqulugu; aanniajualuugama uvani ikumaalungmi.’

²⁵ Aiprahaam uqautivaa, ‘Irniik, iqqaumagit inuutillutit piujunik piqalauravit, Laasaruusili piunngittunik pititauqattalauqpuq; maanna maani quviasuliqpuq, ivvillu aanniaqtitauvutit.

²⁶ Suli akunnattinni itiqsaaluktaqarmat, maanngat ilissinnut ikaarumajut ajuqput, taimaaktauq ilissinnit ikaarumajut maunga ajurivut.’

²⁷ Taanna uqaqpuq, ‘Tavvali ataataak Aiprahaam qinuvigivagit, Laasaruusi tililauruk ataatama iglunganut.

²⁸ Tallimanik qatanngutiqarama, taassuma uqautiniarmagit, uvunga aannianaqtumuaqunagittauq.’

²⁹ Aiprahaam uqautivaa, ‘Qatanngutitit Muusisiup nalauttaijullu aglanginnik piqaqput taikkunanngat uqaujjaulirlit.’

³⁰ Taassuma kiuvaa, ‘Aakka ataataak Aiprahaam; tuqungajumigli makittuqarluni uqaujjaujaqturutik qaqialirajaqput.’

³¹ Aiprahaam kiuvaa, ‘Muusisiup nalauttaijullu aglanginnik naalanngikkutik, ukpirusukkajannginnivut tuqungajumik makittuqaraluaqpat.’”