ᓘᑲᓯᐅᑉ ᐊᒡᓚᖏᑦ 15 - Aglait Ijjurnaittut

Siipi Asiusimajuq

¹ Taissumani Ruumamiut kiinaujaiqtitsijiqutingit piunngittulininginnullu narrugijaujut Jiisusimuaqput tusaajumallutik.

² Paarisit piqujaniglu ilisaijit uqarnirluutiliqput uqarlutik, “Uuma piunngittulijut ilaliuqpait niriqatigillugillu.”

³ Ajjiujumik uuminga uqautivait:

⁴ “Naliqsi siipiqutiqaruni 100-nik, ilangat atausiq asiukpat, taakkua 99 inuqanngittumut qimakkajanngilait, tainna atausiq qiniriarlugu qiniinnarajanngilauk naniqqaarnagu?

⁵ Naniguniuk, quviasugluni iqsulirajaqpaa.

⁶ Angirraruni, ilannaarijani inuuqatinilu qaiqugajaqpait, uqautilugit, ‘Quviasuqatigisinnga siipiqutiga asiusimalauqtuq nanigakku.’

⁷ Taimaaktauq uqautivassi, anginiqsamik qilangmi quviasuutigijauniaqpuq ajuqtulijuq atausiq saagiaqpat aglaat taikkunanngat 99-nit iluaqtunit saagiariaqanngittunit quviasuutauniqsauvuq.”

Kiinaujaq Asiusimajuq

⁸ “Uvvalu arnaq, 10-nik kiinaujaqutiqaqtuq, atausirmik asiujiguni, naniruamik ikitsigajanngilaq, iglu sanirlugu qinitsiarajanngilauk naniqqaarnagu?

⁹ Naniguniuk, ilannaarijani inuuqatinilu qaiqugajaqpait uqautilugit, ‘Quviasuqatigisinnga, kiinaujara asiujisimalauqtara nanigakku.’

¹⁰ Taimaaktauq uqautivassi, Guutiup aingiliqutingit angijumik quviasuktitauvut ajuqtulijuq atausiq saagiaqpat.”

Irniq Asiusimajuq

¹¹ Jiisusi uqaqpuq, “Angutitaqalauqpuq marruungnik irniqaqtumik.

¹² Nukaqtliup ataatani uqautivaa, ‘Ataataak, piqutitit inuujunniiruvit pitaaksakka maanna qailikkit.’ Ataatangata piqutini avikpait tunillugit atunit irniingminut.

¹³ Ulluit ununngittut kingurngagut, irningata nukaqtliup piqutilimaani katillugit nunamut ungasiktumut aullaqpuq, tauvani piqutilimaani nunguppait isumaqsuuluarnirmut.

¹⁴ Piqutilimaaminik nungutisimaliqtillugu, nunalingni najuqtangani kaangnaqturjuaqaliqpuq, tavva ajuqsanaqturjuamiiliqpuq.

¹⁵ Najuqtami nunalit inungita ilangannut iqqanaijariaqtuqpuq, taassuma upaktangata tilivaa piruqsiiviqutiminut kuukkuusiqutiminik kamajiuqullugu.

¹⁶ Kuukkuusit nirijaksanginnik nirijumagaluaqpuq; niriniaqtaminik tunisiviuvannginnami.

¹⁷ Taimali iqqailirami isumaliqpuq, ataatama iqqanaijaqtiqutingit niqiksamik amigaqsingitsiaqput, uvangali maani pirliliqpunga!

¹⁸ Utirnialiqpunga ataatannut, uqautilugu, ‘Ataataak ajuqtulilauqpunga Guutimut qilangmiittumut ilingnullu;

¹⁹ irnirnik taijaujuksaujunniirama; iqqanaijaqtiqutiktut taimaak pilaunnga.’

²⁰ Aullarami ataataminut utiliqpuq. “Suli ungasiktumiitillugu ataatangata takuvaa, ilatsugilirlugu, ataatanga ullaksilluni parriaqpaa, tikinnamiuglu iqippaa kuniglugulu,

²¹ irningata uqautivaa, ‘Ataataak ajuqtulilauqpunga Guutimut qilangmiittumut ilingnullu; irnirnik taijaujuksaujunniiqpunga.’

²² Ataatangata pijini uqautivait, ‘Tuavirlusi annuraanik piuniqpaanik qaitsilirissi, annuraarlugu; nagguarmiktauluni, itigagusiqtaulunilu;

²³ immuksiugaup nurranga quiksitsiangujuq tuqusiuk, nirivigjuarluta quviasuqatigiiliqta;

²⁴ una irnira tuqungalauqtuq uummarmingmat; asiusimalauqtuq nanijaungmat.’ Tavva quviasuqatigiiliqput.

²⁵ “Irningali angajuktliq piruqsiivingmiilauqpuq; angirralirami iglumut qaglilluni, tusaaliqpuq nijjausijaqtunik taanisiqtuniglu.

²⁶ Pijit ilangannik qaiqujivuq apirilluni sujuqarmangaat.

²⁷ Pijiup kiuvaa, ‘Nukait tikimmat, ataatavit immuksiugaup nurranga quiksitsiangujuq tuquttauquqqauvaa, nukait qanuigani utiqsimalirninga pijjutigillugu.’

²⁸ Angajuktlirli ninngakpuq iglumut itirumajunniirluni. Ataatanga anigami itiquliqpaa,

²⁹ taassuma ataatani kiuvaa, ‘Takugit, arraagunik amisunik pijitsiliqpagit, qanutuinnaq tusaanngisalauqsimananga piqujitillutit; kisiani tunisilauqsimanngittutit guutsiup nurranganik ilannaarijakka quviasuqatigilugit niriqatiginiarakkit.

³⁰ Irniit utirmat, piqutingnik nunguutsijuq arnanut angunniaqtinut, immuksiugaup nurranganik quiksitsiangusimajumik tuqutautitsivutit!’

³¹ Ataatangata kiuvaa, ‘Irniik, uvannik najuutiinnaravit, pigijalimaakkalu pigivatit,

³² maanna akaunaatsiarmat quviasuqatigiigluta sirilutalu, nukait tuqungalauqtuq, uummarmingmat; asiusimalauqtuq maanna nanijaungmingmat.’”