ᓘᑲᓯᐅᑉ ᐊᒡᓚᖏᑦ 14 - Aglait Ijjurnaittut

Jiisusiup Aaqqiksininga Aanniajumik

¹ Sapatit ilanganni Jiisusi nirijaqtuqpuq Paarisit sivuliqtingatta ilangatta iglunganut, taakkua qaujisatsiarasukpaat.

² Takugit, angummik tavvaniittuqaqpuq niumigut talirmigullu immaksimanirminut puvittumik,

³ Jiisusi uqaqpuq, piqujanik ilisaijinut Paarisinullu, “Piqujait Sapatimi aaqqiksiqujivaa aaqqiksiqujinngilalluunniit?”

⁴ Taakkua nillinngilat. Tavva Jiisusiup upaglugu angut aaqqikpaa, tavvanngat aniqullugu.

⁵ Taakkua uqautivait, “Nallisi irninga uumajuqutingaluunniit imiqtarvingmut katakpat, tuavirluni qilusigajanngilaq Sapatiutillugu?”

⁶ Taakkua tamatuminga kiujunnanngilat.

Mikiglitirnirmik Tunngasuktitsinirmiglu

⁷ Jiisusi qaujigami inuit ilangit nirijaqtuqsimajut iksivautarni initsiavauniqpaani iksivajumangmata, ajjiujumik uqautivait,

⁸ “Nirijaqtuqujaugussi nalliannutuinnaq katititaurataaqtunut, initsiavauniqpaani inginniarasi, ilissinnit pillariuniqsamik nirijaqtuqtuqatuinnariaqarmat,

⁹ taassuma ilissinnik nirijaqtuqujijuup upaglunitit uqautikpatit, ‘Una agvairuk,’ tavva kanngusulirlutit initsiavaunnginniqsamut ingitsariaqalirajaqputit.

¹⁰ Taimaimmat nirijaqtuqujauguvit, initsiavaunnginniqsamut ingitsaqturit, taassuma nirijaqtuqujijuup ilissinnik upaglunitit uqautikpaatit, ‘Ilannaak, initsiavauniqsamut ingitsaqturit’; tavva taakkunanngat nirijaqtuqatigisimajarnit quviagijaugajaqputit.

¹¹ Immingnik angijuruqtittulimaat mikiglititauniaqput, immingniglu mikiglitiqtut angijuruqtitauniaqput.”

¹² Amma uqarivuq nirijaqtuqujisimajumut, “Unnugummitarmik nirivigjuaqtitsinirmigluunniit nirijaqtuqujiguvit, ilannarijatit qatanngutitilluunniit ilagijatilluunniit inuuqatitilluunniit ajuqsanngittut nirijaqtuquniarnagit, taakkunanngat nirijaqtuqujaulaarmigavit niritittinirilauqtait pillugu.

¹³ Nirijaqtuqujiguvilli, ajuqsaqtut qaiqukkit, ilakunnguqsimajut, nuqiqattianngittut, tautunngittullu;

¹⁴ tavva saimmaqtitauniaqputit, taakkua nirijaqtuqtitijuktiksaqanngimmata ilingnik. Akiliqtaujumaaqputilli iluaqtut tuqungajunit makivviani.”

Jiisusiup Ajjiutitsininga Nirivigjuaqtunik

¹⁵ Tavvani niriqataujut ilangatta tamanna tusaramiuk, Jiisusi uqautivaa, “Saimaqtitausimajumik inuusiqaqput taikkua niriqataujumaaqtut Guutiup Ataniuvingani!”

¹⁶ Jiisusiup uqautivaa, “Angummik nirivigjuaqtitsijuqalauqpuq, amisunik nirijaqtuqujilluni;

¹⁷ nirivigjuarnaq nalliutingmat pijini tilivaa nirijaqtuqujaminut uqaujiqullugu, ‘Qailirissi maanna niriniaqtasi atuinnaulirmata!’

¹⁸ Taakkua qaiqujausimajut atunit upanngijjutiksaqsiuliqput. Sivulliqpaaq uqariaqtuqtumut uqaqpuq, ‘Piruqsiivingmik niuvirama, maanna takujaqturiaqarakku; qaijunnannginnama pasijauttaililanga.’

¹⁹ Asia uqarivuq, ‘Immuksiugarnik 10-nik piruqsiivilirijjutiksannik niuvirama, taakkua uukturiaqturniarakkit; qaijunnannginnama pasijauttaililanga.’

²⁰ Asia uqarivuq, ‘Nulianirataarama, taimaimmat qaijunnanngilanga.’

²¹ Piji angajuqqaaminut utiqpuq tamakkuninga uqarvigilluniuk. Angut ninngaktualuulluni pijini uqautivaa, ‘Tuavirlutit aturianut ailirit aqqutillaringnullu nunalingni, uvunngautillugit ajuqsaqtut, piggaqtullu tautunngittullu, tusiattullu.’

²² Akuniunngittuq piji uqariaqturivuq, ‘Angajuqqaaq, taimaak piqujiqqaugavit pijariiqpuq, sulili iniksaqaqpuq.’

²³ Angajuqqaanga uqaqpuq pijiminut, ‘Iglugasait silataaniittunut aqqutinut, nunalingnurianullu ailirit, inuit qaiqulugit igluga tatattauqullugu.

²⁴ Uqautivagit, taikkua qaiqulauqtaraluakka niriniaqtattinnik uuksinianngilalluunniit.’”

Jiisusimut Ilinniaqtigijauniup Akiqarninga

²⁵ Taissumani inugiaktualuit Jiisusi ilagingmajjuk; saavvigillugit uqautivait,

²⁶ “Nalliat uvannut qaijuq unganiqsaukpat ataataminik anaanaminiglu, nuliaminik qiturngaminiglu, qatanngutiminik najangminiglu, aglaallu imminik, taanna ilinniaqtigijunnanngilara.

²⁷ Sanningajuliksaminik agjaqsijumanngittuq maliglunga, taanna ilinniaqtigijunnanngilara.

²⁸ Naliqsi igluliurumaguni puqtujumik, isumaksasiurutigiqqaarajanngilaa qanuq akitutiginiarmangaat, kiinaujat naammangniaraluarmangaata pijariirunnarlugu?

²⁹ Taimaagli pilaunngikkuni tunngaviksanga pijariiraluarlugu, iglu puqtujuq pijariirunnailikpagu, qaujijunit mitautigijaulirajaqpuq.

³⁰ Uqarlutik, ‘Una iglumik puqtujumik sanagialauqtuugaluaq pijariirunnanngittuq.’

³¹ Uvvaluunniit angajuqqaarjuaq angajuqqaarjuarmiktauq asiminik unatariaqturniaruni, unataqtuksanik 10,000-nik ilaqarluni, isumaksaqsiurajanngilaq? Akirangit unataqtuksait 20,000-upata, saalagijunnarniaraluarmangaarmiuk?

³² Saalagijunnarniaqtuujaanngikkuniugli, ungasiktillugit suli tilisilirajaqpuq qanuq unatanngijjutiksamingnik apirititsijaqturluni.

³³ Taimaaktauq tavva, naliqsi pigijalimaaminik qujanaaqsinianngittuq ilinniaqtigijunnanngilara.”

Tariup Tariungujunniiqtuup Atuqtuksaunnginninga

³⁴ “Tariuq piujualuuvuq; kisianili tariuqsunnittunniiqpat, qanurli tariunngukkanniqtitaujunnaqpa?

³⁵ Taimaippat atuqtuksaujunniiqpuq nunamulluunniit, piruqtunulluunniit piruqsautiksamut; igitaksatuinnauliqpuq. Tusaajunik siutilik tusarli.”