ᓘᑲᓯᐅᑉ ᐊᒡᓚᖏᑦ 13 - Aglait Ijjurnaittut

Piunngittulinisi Tunusiuk Tununngikkusiuk Tuquniaqpusi

¹ Taissumani inuit tavvaniittut ilangita Jiisusi unikkautivaat Galiliamiunik Pailaatuusiup tuqutautilauqtanginnik tunirrusiqtillugit Guutimut tunirrusirvingmi.

² Jiisusiup uqautivait, “Taikkua Galiliamiut taimaak tuqutaugamik piunngittuliniqsaunasugivisiuk asimingnik Galiliamiunguqatimingnit?

³ Uqautivassi, taimainngilaq; ilissittauq piunngittulinissinnik tunutsinianngigussi, taimaaktauq tuqujumaarivusi.

⁴ Uvvaluunniit taikkua inuit 18 napajualungmut Sailuami urruviulauqtut tuqullutik, nalunaikkutaunasugivisiuk taikkua piunngittuliniqpaangunasugillusiuk Jiruusalimmi?

⁵ Uqautivassi, taimainngilaq; ilissittauq piunginnissinnik qaqialirnianngikkussi taimaaktauq tuqujumaarivusi.”

Ajjiujuq Napaaqtuq Paurngaliksaq Pirurviunngittuq

⁶ Uuminga ajjiujumik uqautivait: “Angutitaqalauqpuq piruqsiiviqutimini napaaqtuqutiqaqtumik pigilingnik paurngaliksamik; paurnganik qiniriaqpuq napaaqtumut, nanisinani.

⁷ Piruqsiivilirijiqutiminut uqaqpuq, ‘Takugit, arraagunik pingasunik takujaqtuqattaraluaqpunga uvunga napaaqtumut paurngaqsiuriarlunga pitaqalauqsimanngimmat. Nakaliruk; sungmanuna piruqsiivingmi agviaqpa?’

⁸ Piruqsiivilirijiup kiuvaa, ‘Angajuqqaak taimailingakalaurli suli tamaani arraagumi; avataa qalurarniaqpara piruqsautiksanganik uumajut ananganik ilisivigilugu.

⁹ Arraagu paurnganik pirurviukpat naammakpuq; pirurviunngimmikpat tavva nakatautigunnalaaqpat.’”

Jiisusiup Aaqqiksininga Arnamik Iliqqusirluktumik Sapatiutillugu

¹⁰ Sapatimik ajuriqtuitillugu Juutit ukpirnirmut katimavinganni.

¹¹ Arnamik tavvaniittuqalauqpuq anirnirlungmut ilummiqtausimajumik taassuma aanniatippaa ukiunik 18-nik, taanna piringalauqpuq isivittunnarani.

¹² Jiisusiup takugamiuk, qaiquvaa uqautillugu, “Arnaaq, aanniagijarnit aaqqiktauvutit.”

¹³ Patimmingmagu, tavvainnaq arnaq isivippuq, taassuma Guuti niqtuliqpaa.

¹⁴ Juutit ukpirnirmut katimavingatta aulatsijingat Jiisusimut ninngakpuq Sapatimi aaqqiksingmat, inuit uqautivait, “Ullunik pingasuujuqtunik pinasuarviksaqtaqaqpuq; ulluni taakkunani qaigissi aaqqiktaujaqturlusi, Sapatimiunngittuq.”

¹⁵ Ataniup kiuvaa uqarluni, “Ilissi takkurmuuqtusi! Uumajuqutissinnik siutiqquqtujuqutiminigluunniit ininganit pituijjaaqsivakpusi imiqtigiaqturlugu Sapatiutillugu?

¹⁶ Unali arnaq, Aiprahaam kinguvaanga saataanasiup qilaksuqsimalauqtanga arraagunik 18-nik, taanna qilarujjaaqtaujariaqanngilaq Sapatimi?”

¹⁷ Taimaak uqarmat, akiraqturasuaqtulimaat kanngusuliqput; inulimaat quviasuktualuulirlutik, Jiisusiup kamanaqtitalimaangit pijjutigillugit.

Ajjiujuq Piruqsiaksat Mikinniqpaangat Masitart

¹⁸ Taimaimmat Jiisusi uqaqpuq, “Sunamik Guutiup Ataniuvinga ajjiqaqpa? Sunamut ajjiutittunnaqpara?

¹⁹ Imaittuujaaqpuq, piruqsiaksaq mikinniqpaaq masitart angutiup piruqsiaksaq mikijukuluk pigamiuk piruqsiivingminut kanngaqsuutigivaa; taanna piruliqpuq napaaqtunngurluni, tingmiat tavvani avalangajunginni ivaviqarunnaqsillutik.”

Ajjiujuq Puvallaqqut

²⁰ Suli Jiisusi uqarivuq, “Sunamulli Guutiup Ataniuvinga ajjiutittunnarivara?

²¹ Imaittuujaaqpuq, puvallaqqut, arnaup puvallaqqut ilaliutivaa niaquujaksangmut angijumut, niaquujaksalimaaq taanna puvallaqtippaa.”

Itirvik Nirukittuq

²² Jiisusi nunaliktigut iglugasaktigullu aqqusaaqpuq, inuit ajuriqturlugit Jiruusalimmuaqpallialluni.

²³ Inuit ilangatta uqautivaa, “Ataniq inuit ununngittut piulijaujumaaqpat?” Jiisusiup uqautivait,

²⁴ “Aksururissi itirvikittukkut itirasuarlusi; amisut itirasuarniarmata itirunnarniaratiglu.

²⁵ Igluup inuata makilluni matu matukpagu; ilissi tavva silataani nangilirumaaqpusi tiglukturlusi, uqarumaaqpusi, ‘Ataniiq, matuirutitigut,’ taassuma kiujumaaqpaasi, ‘Nakinngaarmangaassi qaujimanngilassi.’

²⁶ Tavva kiujumaaqpusi, ‘Niriqatigilauqpattigit imiqatigillutillu, ajuriqtuilauqputit nunattinni.’

²⁷ Taanna kiujumaarivuq, ‘Nakinngaarmangaassi qaujimanngilassi; tamaaniinngilaurissi, piunngittulijualuujusi!’

²⁸ Tavvani qiajumaaqpusi aglirularlusilu, Aiprahaam Aisakilu Jaikulu nalauttaijuulauqtullu Ataniuvinganiittut takugussiuk ilissi anititaulusi.

²⁹ Inuit tikittumaaqput siqiniup nuiviata nalaanit, siqiniullu nipiviata nalaanit, unnuallu nalaanit, ulluullu nalaanit, taakkua iksivaqataujumaaqput nirivingmi Guutiup Ataniuvingani.

³⁰ Takugit, kingulliujut sivulliujumaaqput, sivulliillu kingulliujumaarlutik.”

Jiisusiup Nagligusungninga Jiruusalimmik

³¹ Taissumani ikarrami Paarisit Jiisusimuaqput uqautillugu, “Tamaanngat aullarit, Iruutasiup tuquttumangmatit.”

³² Jiisusiup uqautivait, “Tiriganiaq tainna uqautijaqtuqsiuk, ‘Takugit, ullumi anirnirlungnik anititsivunga aaqqiksillungalu, qaukpat suli, ulluillu pingajuanni pijariiniaqpunga.

³³ Sulili maanna ingirrajariaqaqpunga ullumi qaukpallu ungaliagulu; naammanngimmat nalauttaijuq tuqutaujariaksaq Jiruusaliup asiani.’

³⁴ “Jiruusalim, Jiruusalim, nalauttaijunik tuqutsijutit ujaqqanut milluqtutit nalauttaijunik! Unuqtuiqsurlunga inugijatit iqittumakattalauraluaqpakka suurlu aqiggiujaup qiturngani isarurmi ataanut katititangititut, taimaitaujumalaunngilasili!

³⁵ Takugit, iglusi qimaktaujumaaliqpuq. Uqautivassi, takuniarunniiqpassinga uqalauqqaaqtinnasi, ‘Guutiup saimmarliuk Ataniup atingani tikittuq!’”