ᓘᑲᓯᐅᑉ ᐊᒡᓚᖏᑦ 12 - Aglait Ijjurnaittut

Jiisusiup Takkurmuurnirmik Qaujimanasuqujininga

¹ Inuit 1,000 ungataaniittut kativalliatillugit, aglaat immingnut tulliraqattautilirlutik unuluamut, Jiisusiup ilinniaqtini sivulliullugit uqautivait, “Qaujisarissi Paarisit puvallaqqutinganik, tamanna takkurmuurniungmat.

² Ijiqsimajut tamarmik saqqitaujumaarmata, anngiarijaujullu tamarmik qaujijaujumaaqput.

³ Taimaimmat taaqtumi uqausirilauqtasi qaumajumi uqausiujumaaqput, iglumilu matusimajumi nipikittuullusi uqausirilauqtasi igluup qaanginni qaigalaarutaujumaaqput.”

Kinamik Sivuurajuksaungmangaatta

⁴ “Ilannarijakka uqautivassi, sivuuraginiarnagit timimik tuqutsijunnaqtut, kinguningagut pijunnarniqanngilat qanuilisikkanniriamik.

⁵ Uqautijumavassi sivuuragijariaqaqtassinnik: taanna sivuuragisiuk, tuqutsijariiruni, pijunnarniqarmijuq kappianaqtuvingmut igitsinirmik; ilaak, uqautivassi taanna sivuuragisiuk!

⁶ “Qupanuat tallimat kiinaujakuluungnut marruungnut niuvianguvanngilat? Aglaat qupanuaq atausiq Guutimut puiguqtausimanngilaq.

⁷ Aglaat niaqussinni nujalimaasi naasaqtausimavut. Taimaimmat sivuuraniarasi; qupanuanit unuqtunit pillariuniqsaugassi!”

Jiisusimik Uqausiqarniq Qujanaaqsinirlu

⁸ “Uqautivassi, nalliat inungnut uvannik uqausilik taimaalluaq Inuup Irningata uqausirijumaarivaa Guutiup aingilinginnut;

⁹ nallialli inungnut uvannik qaujimannginniraqtuq, taimaaktauq Inuup Irningata qaujimannginnirarumaarivaa Guutiup aingilinginnut.

¹⁰ “Nalliat Inuup Irninganik akiraqturluni nilliajjutilik isumagijunnairviujumaaqpuq; nallialli Anirnirmik Ijjurnaittumik piunngittumik uqarnirluutilik isumagijunnairviunianngilaq.

¹¹ “Juutit ukpirnirmut katimavingannut aataugussi iqqaqtuqtauniarlusi aulatsijinut angajuqqaarjuanullu, isumajaarniarasi qanuq kiggusiksaqarniarmangaassi uvvalu qanuq uqarniarmangaassi;

¹² Anirniup Ijjurnaittuup ajuriqturniarmasi tavvani ikarrami uqausirijariaqaqtassinnik.”

Ajuqsanngittuulluni Silairuqtuningata Ajjiutitauninga

¹³ Inuk uqaqpuq inugiaktunit Jiisusimut, “Ajuriqtuiji, qatanngutiga uqautilauruk aviqatiqaqullugu ataatama qimaktanginnik uvattinnut.”

¹⁴ Jiisusiup kiuvaa, “Inuuk, kia iqqaqtuijunnaqtimmanga, uvvalu agguijiuqujauvunga? Piniaqtassinnik ataatavit qimaktanginni?”

¹⁵ Inulimaanut uqarivuq, “Qaujisarissi, kamatsiarlusi pitaarumaluarnirmik; inuup inuusinga makitatitaunngimmat amisunik piqutiqarnirminut.”

¹⁶ Jiisusiup uqautivait ajjiujumik, uqarluni, “Ajuqsanngittuup piruqsiiviqutinga piruviulauqpuq unuqtunik.

¹⁷ Taanna isumaliqpuq, ‘Qanurli pinialiqtungaa? Piruqtut niqiksait iniksaqarunniirmata.’

¹⁸ Uqalirluni, ‘Niqiksakkuvikka igluit piijarniaqpakka; anginiqsanik sanalunga; niaquujaksaqutikka piqutikkalu iniqaliqullugit.

¹⁹ Tarniralu uqautilugu, tarniik, arraagunik amisunik piujunik piksaqaliqputit; pinasuarunniirit nirilutit imilirit, quviasuglutillu.’

²⁰ Guutiulli uqautivaa, ‘Silaittutit! Maanna unnuk inuujunniirniaqputit; kiali taima katiqsulauqtatit pinialiqpait?’

²¹ “Taimainnivuqtauq imminut piksaminik katiqsuijuq, aktlujutitut takunnaaqtauvut Guutimut.”

Guutimik Tatiqarniq

²² Ilinniaqtini uqautivait, “Taimaimmat uqautivassi, isumajaarutikaqunasi inuujjutiginiaqtassinnik, sunamik niriniarmangaassi, timisilu aturniaqtanginnik sunamik annuraaqarniarmangaassi.

²³ Inuusiq isumagittiariaqarniqsauvuq niqiksamit, timilu isumagittiariaqarniqsaugivuq annuraaksamit.

²⁴ Tulugait takulauqsiuk; piruqsiaksanik kanngaqsuivanngittut piruqtuniglu katiqsuivagatik, sirluaqanngittut iglumigluunniit niqikkuviqanngittut, taimaikkaluaqtillugit Guutiup niritiqattaqpait. Ilissi tingmianit pillariuniqsammariuvusi.

²⁵ Nallisi inuusirminik uigusijunnaqpaa isumajaarutigilugu?

²⁶ Taimaak mikitigijumik ajurussi, sungmat asingit isumajaarutigivisiuk?

²⁷ Piruqtut nunarait qanuq pirurmangaata takulauqsiuk; sanajunnanngittut annuraaksaliuqpagatiglu immingnik; kisiani uqautivassi, Suulumuuni aglaat ajuqsanngittualuulluni annuraaqsimavalaunngilaq piruqsiat takuminarningititut.

²⁸ Guutiup nunami iviksugait annuraaqtippait maanna ullumi piruqtut, qaukpallu piijaqtaulutik igitauniarmijut igamut, taassumali annuraaksaqaqtittunarivaasi nalunanngilaq, ilissi ukpirnikittusi!

²⁹ “Taimaimmat isumajaarniarasi sunamik niqiksaqarniarmangaassi imiksaqarniarmangaatsiluunniit.

³⁰ Silarjuarmiut taimanngat taimaittunik pinasuaqput; Ataatasi qaujimavaasi tamakkuninga pijariaqarassi.

³¹ Imaagli pijuksauvusi, taassuma Ataniuvinga pinasuangaaqsiuk, tavva tamakkuninga tamainnik tunisiviginiaqpaasi.”

Qilangmi Piksaqarniq

³² “Sivuuranngillusi, ununngikkaluaqtusi, Ataatasi quviasugluni tunisivigijumangmasi Ataniuvingminik.

³³ Piqutisi niurrutigisiuk, kiinaujait tunilugit ajuqsaqtunut; puuksaqtaarissi pituqanngurnianngittunik, piksaqtaarlusilu qilangmi nungunnianngittunik, tigliktinut pijaujunnanngittunik, qupirrunullu qallunaaqtanik nirisuunut sukkutaunianngittunik.

³⁴ Uummatitsigu pinnarijassinnik piqutiqarvigijasi najuinnaujarniarassiuk.”

Pijit Qaujisatsiaqtut

³⁵ “Upalungaiqsimagissi sunalimaamut annuraaqsimalusi naniruasilu ikumalutik.

³⁶ Pijititut angajuqqaamingnik utaqqijutitut katititaujuni nirivigjuariaqtuqsimalaurluni angirraminut utirniaqtumik, utiqpat tigluktuqpat pijit matuirujjituinnarniaqput taassuminga.

³⁷ Saimaqtitausimajumik inuusiqaqpuq pijit angajuqqaamingnut tikitaujut iqqumatsiaqtillugit upalungaiqsimalutiglu; sulijumik uqautivassi, angajuqqaanga saalisarmik atisiniaqpuq, taakkua ingiqulugit nirivingmi, niriniaqtanginnik pijitsirarniaqpait.

³⁸ Saimaqtitausimajumik inuusiqaqpuq pijit tikitaujut upalungaiqsimatillugit, unnuap qitilluangani, uvvalu ullaannguqpallialiqtillugu.

³⁹ Una qaujimasiuk, inuk igluqaqtuq qaujimaguni qanga tiglikti qainiarmangaat qaujisarajaqpuq igluminut itiqunagu.

⁴⁰ Ilissittauq upalungaiqsimajariaqaqpusi; Inuup Irninga tikittumaarmat ikarrami niriugviginngitassinni.”

Piji Kajusitsiaqtuq Uvvalu Kajusitsianngittuq

⁴¹ Piitturuusiup uqautivaa, “Ataniq, ajjiujumik taassuminga uvagutuaq uqautivitigut? Uvvalu asivuttauq uqautiqasiutivigit?”

⁴² Ataniup kiuvaa, “Kinali taima kajusitsiaqtuulluni silatullunilu pijiuva? Taimaittuq angajuqqaangata aulatsijinnguqtinniaqpaa pijiqutiminut, taassuma niritiqattarniaqpait niriviksangat nalliutijaraangat.

⁴³ Saimaqtitausimajumik inuusiqaqpuq piji taimailiuqtuq angajuqqaangata tikippagu taimailiuqtillugu.

⁴⁴ Sulijumik uqautivassi, angajuqqaangata aulatsijinnguqtinniaqpaa piqutilimaaminut.

⁴⁵ Piji isumaliqpat, ‘Angajuqqaara utirnasaalualirmat,’ pijiujut angutit arnaillu aanniqsikataliqpait, niriluni imilirlunilu aangajaakattaliqpuq,

⁴⁶ tavva angajuqqaanga tikinniaqpuq niriugviginngitangani ikarrami qaujimanngitangani, angajuqqaangata sugiarumaaqpaa, kajusitsianngittunut ilaliutilugu.

⁴⁷ “Piji angajuqqaami piqujanganik qaujimajuq, upalungaijaranilu pinialaunngittuq piqujanganik, sugiaqtaujumaaqpuq nikagijaunngilluni tiigaqtuqtaujumaaqpuq.

⁴⁸ Pijili qaujimanngittuq angajuqqaami piqujanganik, tiigaqtuqtaujjutiksamik pilauraluarluni mikijumik tiigaqtuqtaujumaaqpuq. Amisunik tunisiviujuq amisuniktauq pijumaviujumaaqpuq; suli anginiqsakannirnik tunisiviujuq suli anginiqsakannirnik pijumaviujumaaqpuq.”

Jiisusi Ilagiigunniiruqtauvuq

⁴⁹ “Tikilauqpunga nunarjuarmi ikuallaktitsijaqturlunga; qilanaammarikpungali maannakkut ikuallaquliqtlugu!

⁵⁰ Paaptijjutimut paaptitaujariaqaqpunga suli; akuniuksaqpunga tamanna anigulauliqullugu.

⁵¹ Isumavisi nunarjuarmi qanuingitsiaqtitsinirmik tikijutiqaqsimanasugilusinnga? Taimainngilaq ilagiigunniiqtitsijaqtuqpungali.

⁵² Maannamit pigiarlugu ilagiit tallimat iglumiuqatigiit avingniaqput akiraqtuqtigiilirlutik, pingasut akiraqtulirlutik marruungnut, marruuglu akiraqtulirlutik pingasunut.

⁵³ Ataatangat akiraqturniaqpuq irnirminik, irningalu akiraqturniaqpuq ataataminut, anaanangallu akiraqturniaqpuq paningminik, paningalu akiraqturniaqpuq anaanaminik, sakingalu akiraqturniaqpuq ukuaminik, ukuangalu akiraturniaqpuq sakiminik.”

Pivallialiqtunik Tukisiumaniq

⁵⁴ Inugiaktut uqautivait, “Siqiniup nipiviani nuvujamik saqqittumik takujaraigassi, tavvainnaq uqaqpakpusi, ‘Silalungnialirivuq’ asuilaak taimaippakpuq.

⁵⁵ Ullulluap nalaanit anuraaliraingmat uqaqpakpusi, ‘Kijjilirnialiqpuq’ asuilaak taimaippakpuq.

⁵⁶ Takkurmuuqtusi! Nunarjuap silaullu qanuinniarninga qaujimavakpasi takuksauningagut; sungmat maannauliqtuq qanuittuqalirmangaat qaujimajunnanngilasi?”

Akiraqtuqtit Saimmaqsaruk

⁵⁷ “Qanuimmat iqqaqtuinisi naammatiarlugu pinasuarunnanngilasi?

⁵⁸ Iqqaqtugaksannguqtitauguvit iqqaqtuivingmuuqtaulirlutit, taanna inuk iqqaqtuivingmuuqtitsijuq saimmaqsaruk iqqaqtuivingmuulaunnginnissingni, saimmaqsanngikkuviuk iqqaqtuijimuuqtinniaqpaatit, iqqaqtuijiullu puliisimuuqtinniaqpaatit, puliisiullu tigujausimavingmuuqtillunitit.

⁵⁹ Uqautivagit, tavvaniititauniaqputit akiliksalimaatit akililauqqaaqtinnagit, aglaat 1-sansikuluk kingulliqpaaq akiliqasiutilugu tigujausimajjutigijait.”