ᓘᑲᓯᐅᑉ ᐊᒡᓚᖏᑦ 11 - Aglait Ijjurnaittut

Jiisusiup Ajuriqtuininga Tuksiarnirmik

¹ Jiisusiup upaktani tikinamiuk tuksiaqpuq, tuksiariirmat ilinniaqtingita ilangatta uqautivaa, “Ataniq, tuksiarnirmik ajuriqtuqtigut, Juanasiuttauq ilinniaqtini ajuriqtulaurmagit.”

² Jiisusiup uqautivait, “Tuksialiraangassi imaak uqaqattarissi: Ataataak, atiqpit ijjurnainninga isumagijautsiarli; Ataniuniit qailaurli,

³ Qautamaat niqiksattinnik tunisivigitigut;

⁴ Piunngittulinivut isumagijunnaikkit, Piunngittulivigijivuttauq isumagijunnairvigivakkattigut; Piunngittumik pijumisaaqtaunaqtumut tikitittailitigut.”

⁵ Uqautikkanniqpait, “Naliqsi ilannarijaqaruni, unnuaraalukkut upaglugu uqautigajaruniuk, ‘Ilannaak utiqtilaaqtannik aittulaunnga niaquujanik pingasunik;

⁶ ilannarijara ungasiktumit tikimmat, uvattinni niqiksaqanngimmat’;

⁷ ilannarijailli igluup iluaniittuq imaak kiukpat, ‘Sinigasualirama! Ukkuaq atsungiqsimalirmat, qiturngakka sinigasuqatigillugit; makittumajunniirama qaitsijunnanngilanga.’

⁸ Uqautivassi, taanna makittumanngikkaluaruni tunisijumanngikkaluarluni; ilannarigamitit, makilluni tunisivigigajaqpaatit pijumajarnik, pijumavigiinnaruviuk.

⁹ Uqautivassi, pijumagussi, tavva tunisiviuniaqpusi; qinirissi, tavva nanisiniaqpusi; tiglukturissi, tavva matuirujjauniaqpusi.

¹⁰ Nalliat pijumajuq tunisiviuniarmat, qiniqturlu nanisiniarmat, tigluktuqturlu matuirujjauniarmat.

¹¹ Nallisi ataataujusi irnisi quglugiamik tunisivigigajaqpisiuk, iqalungmik pijumatillugu?

¹² Uvvalu manningmik pijjumatillugu, sikuaqpiunimik tuqunnaqtuqaqtumik tunisivigigajaqpisiuk?

¹³ Ilissi piunngittuugaluaqtusi, piujumik tunisijariaksaq qiturngassinnut qaujimagassi, anginiqsamigli Ataatasi qilangmiittuq tunisijunnarniqsauvuq Anirnirmik Ijjurnaittumik pijumavigijiminut!”

Jiisusilu Piulsipaapilu

¹⁴ Jiisusi anititsitillugu anirnirlungmik uqarunnanngititsijumik; anirnirluk inungmit aningmat, uqarunnanngittuq uqarunnaqsivuq, inuit kamammariliqput,

¹⁵ ilangit uqaqput, “Una anirnirlungnik anititsivaktuq Piulsipaapikkut, anirnirluktut angajuqqaangattigut pijunnarniqaqtitaulluni.”

¹⁶ Asingitalu Jiisusi uukturumavaat, qilangmit kamanaqtumik nalunaikkutarmik takutitsiqullugu.

¹⁷ Jiisusiup isumangit qaujigamigit, uqautivait, “Angajuqqauvilimaat, immigut ilaakkuuqtiliqpata akiraqtuutilutik, asirurlutik nungunniaqput. Iglumiuqatigiit akiraqtuutilirutik asirurlutik nungunniarivut.

¹⁸ Saataanasittauq aggurluni imminut akiraqtuliruni, qanuq Ataniuvinga makitajunnarajaqpa? Uqarassi anirnirlungnik anititsiqattarnirarlunga Piulsipaapikkut.

¹⁹ Anirnirluit anitippakkukkit Piulsipaapikkut, sunamulli maliktisi anirnirlungnik anititsivakpaat? Taimaimmat maliktitsigut sulinnginnisi saqqitauvuq.

²⁰ Guutiulli pijunnarningagut anirnirlungnik anititsivakkuma, tavva Guutiup Ataniuvingata tikisimavaasi.

²¹ “Angut sanngijualuk, sugiutiqatsiarluni, igluni qaujisatsiaqpagu, piqutingit pijauniajjanngilat.

²² Sannginiqsamulli upaktuqtauguni saalagijaugunilu, sugiutinginnik aqsaaqtauniaqpuq tatigijanginnik, piqutingit aggurlugit pitaarijaugajaqput.

²³ “Uvannik ilaqanngittuq akiraqtuqtigivara, katiqsuiqatiginngitaralu siammaktirivuq namutuinnaq.”

Anirniup Saataanasiminngaaqtuup Utirninga

²⁴ “Anirnirluk inungmit anigami, ingirravuq nunakkut piruqtuqanngittukkut paniqtualukkut iniksaqsiurluni; iniksaqsiannginnami isumaliqpuq, ‘Iglunnut utirnialiqpunga anivigilauqtannut.’

²⁵ Utirami takuvaa salummaqsaqsimatialiqtuq inillaktiqsimattiarlunilu.

²⁶ Tavva anivuq aiksirluni 7-nik anirnirlungnik imminit piunnginniqsaujunik, tavvunngaramik tavvani iniqaliqput; inuglu sivuninganit piunnginniqsauliqpuq qanuinnirilauqtaminit.”

Sulitsiaqtumik Quviasungniq

²⁷ Jiisusi taimaak uqaqtilugu, arnamik nilliqtuqaliqpuq uqarluni, “Saimmaqtitausimajumik inuusiqaqpuq arnaq tainna ilingnik qiturgataatuviniq piruqsaillunilu!”

²⁸ Jiisusi uqaqpuq, “Saimmaqtitausimajumik inuusiqaqpurli Guutiup uqausinginnik tusaqtut malitsiarlugillu!”

Kamanaqtumik Takutitaujumajut

²⁹ Inuit Jiisusiup avataaniittut katiqsuqpalliangmata uqautivait, “Maannaujuq ullumi inuit piunngittuuniqsaulirmata; kamanaqtumiglu takujumavaktlutik, kamanaqtumik takutitaunianngilat Juunaup kamanaqtumiilaurningata asianik.

³⁰ Juuna nalunaikkutaulilaurmat inungnut Ninivimiunut, taimaaktauq Inuup Irninga nalunaikkutauniarivuq maanna inuujunut.

³¹ Ulluq iqqaqtuivik nalliutikpat Siipamiut angajuqqaajuangat arnaq nikuvittumaaqpuq iqqaqtuiluni maanna inuujuunik sugiaqtaujuksauqullugit; tainna nunaminit ungasiktualungmit tikilaurmat tusaajaqturluni Suulumuuniup silatuninganik; takugit, uqautivassi Suulumuunimit anginiqsamik tamaaniittuqaqpuq.

³² Ullumi iqqaqtuivingmi Ninivimiut makittumaaqput maanna inuujut iqqaqturlugit sugiaqtauqullugit; taikkua Ninivimiut qaqialilaurmata piunngittulinirmingnik nalauttaijuq Juuna ajuriqtuitillugu tusaagamik, takugit uqautivassi Juunamit anginiqsamik uvaniittuqaqpuq!”

Timiup Qaumaninga

³³ “Naniruarmik ikitsijuqaraangami ijiqtauvanngilaq, makkaujaulluunniit ataanut ilijauvanngilaq; naniruakkuviulli ininganut ilijauvakpuq, iglumut itiqtut qaumajumik takuqullugit.

³⁴ Ijisi timissinnut naniruatitut taimaipput; ijiikkik takunnatsiaqpatik timiit iluunnaat qaumajumiippuq; ijiikkigli takunnanngippatik timiit iluunnaat taaqtumiippuq.

³⁵ Taimaimmat qaujisatsiarit qaumajuq ilungniittuq taaqsiqunagu.

³⁶ Timilimaat qaumasiuqpat, taaqtuuniqanngilluni, tavva timilimaat qaumasiurniaqpuq, naniruatitut ilingnik qaumatitsitsiaqtutitut.”

Jiisusiup Naammaksannginninga Paarisit Piqujaniglu Ilisaijit Piniarninginnik

³⁷ Jiisusi taimaak uqaqtillugu, Paarisiup nirijaqtuquvaa igluminut; tavvunngaramilu ingippuq nirivingmut.

³⁸ Paarisili kamavigjuaqpuq Jiisusi uasaqqaanngimmat nirilaunnginnirmini.

³⁹ Ataniup uqautivaa, “Ilissi Paarisit tiituutiit nirritiillu silatingit salummaqsaraluaqpasi, ilusili pitaarumaanialungmik piunngittulinirmiglu tatappuq.

⁴⁰ Silaittusi! Taassuma silataanik sanalauqtuup iluattauq sanalaunngilauk?

⁴¹ Tiituutiup nirrisiillu iluaniittut tunisigik aktlujunut; takugit, tavva salummatsialirniaqpusi iluunnangagut.

⁴² “Ilissinnut kappiannamik ilissi Paarisit! Tallimaujuqtuijaqpaktusi aglaat niqimut ilaksakulungnik piruqtunik mintinik ruuniglu atiqaqtunik, asinginniglu piruqtunik, naammanaaqtumik pinasuarniq, nagligusungnirlu Guutimik kamaginagit; taakkua pijariaqaqpasi, asingillu aturialit qujanaanngillugit.

⁴³ “Ilissinnut kappiannamik ilissi Paarisit! Juutit ukpirnirmut katimavinginni iksivautani piuniqpaani iksivajumavaktusi, inungnullu nilliujjautsiarumavaktusi niuvirvingni.

⁴⁴ Ilissinnut kappiannamik! Iluviqtitut nalunaikkutaqanngittutitut taimainnassi, inungnut tulliraqtaullutik pisugviuvut qaujimajaunatik.”

⁴⁵ Piqujanik ilisaijit ilangatta uqautivaa, “Taimaak uqaqtillutit, uvattinnik narrunaqtitsigivutit!”

⁴⁶ Jiisusiup kiuvaa, “Ilissinnut kappiannamik ilissi piqujanik ilisaijiujusi! Inuit uqumaittualungnik agjaqsitinnasuarassiuk agjagaksaunngittunik, nangminirlu mikijukulungmigluunniit agjarasuaqtanginnik ikajurasuarasiuk.

⁴⁷ Ilissinnut kappiannamik ilissi! Nalauttaijut sivulisi tuqulauqtangit iluviqarviliurassiuk iqqaumajaujjutiksanginnik.

⁴⁸ Tavva nalunaiqsivusi naammaksarnissinnik sivulissi piniarnirilauqtanginnik; sivulissi nalauttaijunik tuqutsilauqput, ilissili tuqulauqtangit iluviqarviliuqpasi iqqaumajaujjutiksanginnik.

⁴⁹ Taimaimmat Guuti silatunirmigut uqalauqpuq, ‘Nalauttaijunik uqariaqtuqtitanniglu tilisivigijumaaqpakka; taakkuali tuqutsijumaaqput ilanginnik, ilangillu akiraqturlugit.’

⁵⁰ Taima maanna inuujut sugiaqtaujjutiqarumaaqput nalauttaijunik tuqutausimajunik pijjutiqaqtumut, silarjuup pigiarninganit maannamut tikillugu tuqutauqattaqsimajunik.

⁵¹ Aipiliup tuqutauninganit Sakaraiaup tuqutauninga tikillugu, taanna tuqutaulaurmat tuksiarvigjuarmi tunirrusirviup ijjurnaittuviullu akunningani. Ilaak uqautivassi, maanna ukua inuujut sugiaqtaujumaaqput taikkua tamarmitsiaq sugiaqtaujjutigilugit!

⁵² “Ilissinnut kappiannamik ilissi piqujanik ilisaijit! Ilisimaniup matungata piirutaa pisimagassiuk; ilissili nangminiq itirnianngilasi, itirumajullu itiqtittailillugit!”

⁵³ Jiisusi tavvanngat qimaruutitillugu, piqujanik ilisaijit, Paarisillu akiraqtummariliqpaat apiqsurlutik Jiisusiup miksaanut sunatuinnarnik amisunik,

⁵⁴ upaluinasuaqpaat qanutuinnaq, uqausingit qaujimanasuattiaqpait, uqaqtangagut saataksannguqtittumallugu.