ᓘᑲᓯᐅᑉ ᐊᒡᓚᖏᑦ 10 - Aglait Ijjurnaittut

Jiisusiup Tilisininga Angutinik 72-nik

¹ Tamatuma kinguningagut Ataniq nirualaurivuq 72-nik, tilillugi marruunaaqtirlugit nunalilimaanut upalaarumajaminut.

² Uqautillugit, “Piruqsiivik angijuuvuq, katiqsijuksalli amigaqput; taimaimmat piruqsiiviup ataninga tuksiarvigisiuk tilisiqullugu katiqsiqatauniaqtunik piruqsiivingani.

³ Aullalirissi; takugit, siipiup nurrangititut tilivassi amaqqut akurngannut.

⁴ Kiinaujakkuvilijarniarasi, ikpiajulijarasilu, itigagutilijarasilu; aqqutissinni nilliujjiniarasiluunniit.

⁵ Iglumut itiraigussi, sivullirmik uqaqattarissi, ‘Iglumi uvani saimanaqtuqarli!’

⁶ Tavvani iglumi saimmaqtitsinissinnik ilaliuqsijuqaqpat, tavva saimaniq tavvaniinniaqpuq; ilaliuqsinngippatali saimmaqtitsinisi ilissinnut utirniaqpuq.

⁷ Iglumit tavvanngat nuunniarasi, nirivaglusi imiqpaglusilu manijaujunik ilissinnut, pinasuaqtuq akiliqtaujariaqarmat; siniktarvigijassi asianut nuktirniarasi.

⁸ Nunalingnut tikituarussi tunngasuktitaugussilu, niqinik qaitanginnik niriqattarissi;

⁹ qanimajut tavvani aaqqiqattarlugit uqautilugit, ‘Guutiup Ataniuvingata tikippaasi.’

¹⁰ Nunalingnulli tikivvigijassinnut tunngasuktitaunngikkussi, aturiamuarlusi uqaqtuksauvusi,

¹¹ ‘Sanit nunassinnit pisimajut, itigattinnit piijaqpavut nammagijaunginnissinnik kaujijjutauqullugit, Guutiup Ataniuvingata qanigilirmasi.’

¹² Uqautivassi, iqqaqtuivik nalliutikpat nunalit taakkua nikagijaunginniqsaujumaaqput Sutuumamiunit.”

Nunalit Ukpirusunngittut

¹³ “Kappiannamik Kurasin! Kappiannamiiglu Pitsaita! Ilissinni kamanaqtulinirijaulauqtut taimaalluaq kamanaqtulijuqaqpat Tairimi Saitunimilu, taakkua inungit qaqialiriiqsimalirajalauqput, guutsiup miqquvininganik annuraarlutik arjalinirniglu katagaatitsivigilutik immingnut iksivaarajalauqput qaqialirlutik.

¹⁴ Iqqaqtuivigli nalliutikpat sugiaqtauniqsaujumaaqpusi Tairimit Saitunimillu.

¹⁵ Ivvillu Kapiirniam, ilingnik quvvaqtittumavit qilangmut tikillutit? Kataktitaujumaaqputit kappianaqtuvingmut!

¹⁶ “Ilissinnik naalaktut, naalakkivaanga; ilissinniglu narrujuup narrugivaanga; uvannigli narrujuup tilisilauqtuq uvannik narrugivaa.”

Tilijaulauqtut 72 Utirningat

¹⁷ Angutit 72 utiqput quviasuktualuullutik uqarlutik, “Ataniq, anirnirluit aglaat naalaqattalauqpaatigut atirni!”

¹⁸ Jiisusiup kiuvait, “Saataanasi takulauqpara qilangmit kataktuq qaummaallaktutitut.

¹⁹ Takugit, pijunnaqtitaunirmik tunisivigilauqpassi, quglugiat sikuaqpiunillu tullirarunnarlugit, akiraqtuqtiullu pijunnarnilimaanginnik saalaqarunnaqullusi; sunamulluunniit aanniqtaunianngilasi.

²⁰ Anirnirluit naalangmasi tamanna quviasuutiginasiuk, quviasugissili atiqsi titiraqsimangmata qilangmi.”

Jiisusiup Quviasuktitauninga

²¹ Tavvani ikarrami Jiisusi Anirnikkut Ijjurnaittukkut quviasuktitauvuq uqarluni, “Ataataak, qujagivagit, Ataniujutit qilangmi nunamilu, tamakkua ilisimajunut silatujunullu ijiqsimagavigit, nutaraqtituuqtunulli tamakkua nalunarunnaiqtinnavigit; iilaak, Ataataak, taimaak piqusimagaviuk quviagigaviuglu.

²² “Ataatama sunalimaanik tunisivigivaanga, nalliattalu Irniq kinaungmangaat qaujimanngilaa, Ataata kisimi qaujimavuq, Ataatalu kinaungmangat qaujimajuqannginnivut, Irniq kisimi qaujimavuq, Irniullu niruarlugit qaujitittumajangita kisimi qaujimavaat.”

²³ Tavva Jiisusiup ilinniaqtini saavvigillugit taakkuatuutillugit uqautivait, “Tusunnaqtumiippusi takunnaqtasi tamakkua pillugit!

²⁴ Uqautivassi nalauttaijut amisut, angajuqqaarjuallu takujumalauraluaqput maanna takuqattaqtassinnik, takulaunngilallu, tusaqtassinniglu tusarumalauraluaqput, tusalaunngilallu.”

Jiisusiup Ajjiujuutitanga Samiariarmiutatsiaq

²⁵ Takugit, piqujanik ilisimajuq qaigivuq Jiisusimut uukturlugu, uqarluni, “Ajuriqtuiji, qanuq pijuksauvunga inuusirmik nungusuittumik pitaaqullunga?”

²⁶ Jiisusiup kiuvaa, “Qanuq piqujait uqaqsimavaat? Qanurli tukisisimavigit?”

²⁷ Taassuma kiuvaa, “Ataniq, Guutisi nagligijaksarivasi uummatissinnut tamainnut, tarnissinnullu tamainnut, pijunnarnissinnullu tamainnut, isumaillu tamaat aturlugu; inuuqatingnik iliktut nagligusuktuksauvutit.”

²⁸ Jiisusiup kiuvaa, “Taimaatsiaq kiuvutit; taimailiurit tavva inuuniaqputit.”

²⁹ Piqujanik ilisaiji naammattiaqtumiinnirmingnik qaujimajaujumalirami Jiisusi apirivaa, “Kinali taima inuuqatigivara?”

³⁰ Jiisusiup kiuvaa, “Angummik Jiruusalimmit ammuaktuqalauqpuq Jirikuumunngaujumik, tigliktinit taanna upaktauvuq, katujjaulluni annuraijaqtauvuq aanniqsiqtaulluni, anauliqtauvuq, tuquligaaliqtuq qimakpaat.

³¹ Taissumani pisuktuqalauqpuq tunirrusiqtitsijimik tamauna aturiakkut; taanna tuquligaajuq takugamiuk qaangiinnaqpaa aturiap akiagut.

³² Ammattauq Livaiti tamaunaalaurivuq, tuquligaajuq takugamiuk qaagiinnarivaa aturiap akiagut.

³³ Samiariarmiutaup tamauna ingirrajuup tikinnamiuk tuquligaajuq; takugamiuk, nagligiliqpaa.

³⁴ Upaglugu killingit uqsumik uainimiglu quvvirillugit mattusiqtuqpait, uumajuqutiminut ikitillugu siniktarvingmuarutivaa, tavvanilu kamagilirlugu.

³⁵ Qautillugu kiinaujaangnik marruungnik siniktarviup inua tunisivigivaa, uqautillugu, ‘Una kamagitsiaruk; anginiqsamik kiinaujairutigiguviuk utilirmiguma tamauna akilikkannilaaqpagit.’

³⁶ “Nalliat taima angutit pingasut inuuqatigijauniqpaanguvaa taassumunga tuqutaukasalauqtumut?”

³⁷ Piqujanik ilisaijiup kiuvaa, “Taanna pitsialauqtuq taassumunga tuqutaukasaktumut.” Jiisusiup uqautivaa, “Ivvittauq taimailiuriaqtulirit.”

Jiisusiup Pulaariarninga Maatamik Miarimiglu

³⁸ Jiisusi ilinniaqtini ilagillugit ingirrallutik, nunalingnut tikipput; tavvani arnaup Maatamik atiliup tunngasuktippaa angirraminut.

³⁹ Maata qatanngutiqaqpuq Miarimik atilingmik, Miari iksivaalauqpuq Ataniup saattiangani ajuriqtuusinginnik naalagluni.

⁴⁰ Maatali isumajaarutiqaliqpuq pijaksaqaluarnirminut; Jiisusi upaglugu uqautivaa, “Ataniq, qanuiksanngilatit Miariup pilirijutuutigaluaqpanga? Uvannik ikajuqulauruk.”

⁴¹ Ataniup kiuvaa, “Maataa, Maataa, isumajaarutiqaluaravit pinasuagaksavit unurninginnik;

⁴² atausirli pijariaqaluaqtutuuvuq. Miari piuniqsamik pijumangmat, taanna aqsaaqtaunianngilaq tamatuminga.”