ᓘᑲᓯᐅᑉ ᐊᒡᓚᖏᑦ 1 - Aglait Ijjurnaittut

Pigiarutingit Sungmallu Taakkua Titiraqtausimangmangaata

¹ Amisut titiqqatigut aaqqiksutsiaqsimalutik unikkaarasuaqsimangmata piniarniusimajunik akunnattinni.

² Taikkua titiralauqput nangminiq pigiarninganik qaujilauqtamingnik nangminirlu takuqattalauqtaminik, uvattinnut uqausiqaqsimavut ajuriqtuijjutiqarlutik.

³ Tavvali Tiupiluusii, tamakkua qaujinasuatsialaurlugit pigiarnivininginnit, piuniqsaunasugilirakku titirausirigukkit, pivalliasimaningillu unikkausirilugit ilingnut.

⁴ Tukisitsiarniaravit sulitsiaqtumik tamakkuninga tusaqtitaujjutigisimajarnik.

Aingiliup Uqariaqturninga Juanasiup Irniangujumaarninganik

⁵ Taissumani Iruutasi angajuqqaarjuangutillugu Juutiami, tunirrusiqtitsijitaqalauqpuq Sakaraiamik atilingmik, tunirrusiqtitsijinut nalliutiqattaqtunut Apaijakkunnut ilagijaulluni; nulianga Ilisapimik atiqaqpuq Airuunikkut kinguvaangat; tunirrusiqtitsijinut kinguvaarijaugilluni.

⁶ Taakkuak inuusiqalauqpuuk Guutiup quviagijanganik, Ataniup piqujalimaanginnik atuqtaukujanginniglu malitsiarlutik.

⁷ Qiturngaqalaunngilagli, Ilisapi qiturngisuittuulaurmat, uigiik tamarmik inutuqaulilauqpuuk.

⁸ Sakaraia pinasuaqtillugu tunirrusirnirmik Guutiup saangani qautamaat atuqtauvaktumik tuksiarvigjuami; pinasuarviksanga nalliutisimalirmat.

⁹ Tunirrusiqtitsijiup iliqqusirivaktangit maliglugit, nalauttaarutikkut nalautaugami pinasualilauqpuq tipitsiariktumik pujuuqtitsijariaqalirluni Ataniup tuksiarvigjuaqutinganut isilauqpuq.

¹⁰ Inugiakturjuat silataani tuksiaqtillugit tipitsiariktuq pujuuqtitautillugu,

¹¹ Ataniup aingilingata Sakaraia saqqivvigivaa tunirrusirviup tipitsiariktumik pujuuqtitsiviup taliqpiani nangirluni.

¹² Sakaraiaup takugamiuk quaqsaaqpuq, kappiasutualuulirluni.

¹³ Aingiliup uqautivaa, “Sakaraia kappiasunngillutit, Guutiup tuksiarniit tusaqpaa, nuliat Ilisapi irniqtaalaaqpuq, taanna Juanasimik atiqtatitaksarivat.

¹⁴ Qujalinirmut quviasugumaaqputit, unuqtunut nutaraq irniangukpat quviasuutaujumaaqpuq;

¹⁵ ajunngitturjuangujumaarmat Ataniup saangani, imiqattarumaanngilaq uainimik imialungmigluunniit sanngijumik, anaanangata iglianganiilluni suli Anirnirmik Ijjurnaittumik ilummiqtaujumaaqpuq.

¹⁶ Utiqtitsijumaaqpuq Isarialimiunik amisunik Atanirmut taakkua Guutingannut.

¹⁷ Anirniqarluni pijunnarniqarlunilu nalauttaijutut Ilaijjatut, ataataujut isumagijaqatsialiqtittumaaqpait qiturngamingnik; naalanngittullu utiqtittumaarlugit silatujumik isumaqaliqtillugit; Ataniup inuqutingit upalungaijjarlugit taassumunga.”

¹⁸ Sakaraia uqaqpuq aingilimut, “Qanurli tamanna qaujimajumaaqpara? Ittuulirama, nuliaralu ningiungulirilluni.”

¹⁹ Aingiliup kiuvaa, “Gaipuriuliuvunga, Guutiup najuganganinngaaqpunga; taassuma tilivaanga ilingnut uqariaqtuqullunga; tamatuminga tusaruminaqtumik uqaujjauqungmatit.

²⁰ Takugit, uqarunnailliniaqputit nillirunnaillilutillu ulluq tainna uqausirijara nalliutilauqqaaqtinnagu, uqausikka ukpirinnginnavigit, nalliutivvisanga tikippat nalautsilaaqput.”

²¹ Inuit utaqqilauqput Sakaraiamik, isumallutik sungmat akuniulualirmangaat.

²² Anigami, inungnut uqarunnalaunngilaq, inuit qaujillutik takutitaujuviniuninganik tuksiarvigjuarmiitillugu; Sakaraia uqarunnannginnami inuit uukturarvigivait aggangminut.

²³ Sakaraiaup pinasuarninga tuksiarvigjuarmi isulimmat, igluminut angirraqpuq.

²⁴ Kinguningagut nulianga Ilisapi nutaraksaqaliqpuq, igluminit anilaunngilaq taqqinik tallimanik, uqarluni,

²⁵ “Tavva Ataniup ikajuqpaanga takunnaliraminga, qiturngaqtaarunnannginnira kanngusuutigijara inungnut piiqpaa.”

Aingiliup Uqariaqturninga Miarimut Irniqtaalaarninganik

²⁶ Taqqiit pingasuujuqtut aniguqtillugit Guutiup aingiliqutini Gaipuriul tilivaa nunalingnut Naasariitimik atilingmut Galiliamiittumut,

²⁷ arnamut angummut aktuqtaulauqsimanngittumut Miarimik atilingmut; angirutausimajumut uiksaqaqtluni Juusipimik atilingmik, Taivitiup kinguvaanganut.

²⁸ Aingiliup Miari saqqivvigivaa uqautillugu, “Quviasulirit, Guutimut quviagijaugavit, Ataniup ilagivaatit!”

²⁹ Miarili quaqsaaqpuq uqausirijanginnut, isumalluni qanuq nilliujjauninga tukiqarmangaat.

³⁰ Aingiliup uqautivaa, “Miari kappiasunngillutit, Guutiup quviagingmatit.

³¹ Takugit, nutaraksaqalirniaqputit irniqtaarumaarlutillu, taanna Jiisusimik atiqtaaqtilaaqpat.

³² Taanna anginiqpaangujumaaqpuq, taijaujumaarlunilu Qulliqpaujuup Irninganik; Ataniup Guutiup angajuqqaarjuannguqtittumaaqpaa sivuliviningatut Taivititut.

³³ Angajuqqaarjuangujumaaqpuq Jaikuup kinguvaanginnit isuqanngittumut; ataniuninga isuqarumaanngilaq.”

³⁴ Miariup aingili uqautivaa, “Qanuq tamanna pilaaqpa, uiqannginnama?”

³⁵ Aingiliup uqautivaa, “Anirniup Ijjurnaittuup tikivviginiaqpaatit, quttingniqpaujuullu pijunnarningata ulingniaqpaatit; taimaimmat qiturngaqtaarilaaqtait ijjurnainniraqtaujumaaqpuq, Guutiup Irninganik taijauluni.

³⁶ Takugit, ilagijait Ilisapi inutuqauliraluarluni irniqtaarumaaliqpuq; taqqinik pingasuujuqtunik nutaraksaqaliqpuq taanna qiturngisuittuuniraqtaujuq.

³⁷ Guutimi ajurnaqtuqanngimmat.”

³⁸ Miari uqaqpuq, “Takugit, Ataniup pijigivaanga; uqausirijait maliglugu taimailirlanga.” Aingiliup tavva qimakpaa.

Miariup Pulaariarninga Ilisapimut

³⁹ Ulluit taakkua kingunitsiangattigut Miari parnaliqpuq tuavirluni ailiqpuq nunamut qaqqalingmut, Juutaup iglugasanginnut,

⁴⁰ tikinnami Sakaraiakkut iglungannuaqpuq Ilisapilu nilliutivaa.

⁴¹ Ilisapiup Miariup nipinga tusaramiuk, nutaraksanga naangani aulajjakpuq; Ilisapilu Anirnirmik Ijjurnaittumik ilummiqtauvuq.

⁴² Nipiqquqtulluni uqaqpuq, “Tusunnarniqpaangujutit arnalimaanit nunamiittunit, nutaraksait igliarniittuq tusunnarniqpaugivuq.

⁴³ Tamanna piujurjuaq uvannut ukpirnatsianngimmarikpuq, Atanirma anaanangata upangmanga?

⁴⁴ Takugit, nipiit tusarakku, nutaraksara iglianni quviasungnirmut aulaliqpuq.

⁴⁵ Quviasungniit tusunnammarikpuq ukpirusukkavit Atanirmut uqaujjausimanirnik nallautsijumaaqtumik.”

Miariup Niqtuilluni Inngirninga

⁴⁶ Miari uqaqpuq, “Tarnirma Ataniq angijuruqtippaa;

⁴⁷ Anirnirma Guuti Piulijiga quviasuutigivaa,

⁴⁸ Taimaak pijaujuksautinnanga pitimmanga, Takugit, maannamit pigiarlugu quviasungnira inungnut uqausiuvagumaaliqpuq;

⁴⁹ Angijurjuamik pitsiarviugama Guutimut ajugaqanngittumut, Atinga Ijjurnaittuuvuq.

⁵⁰ Nikagusukpuq sivuuragijiminut, Kinguvaariinit kinguvaariinut.

⁵¹ Talirminut suungujumut pijunnarnini saqqitilauqpaa, Isumamigut piujurijut siammaqtippait.

⁵² Angajuqqaarjuat pijunnarninginnit urrutippait, Pijunnarniqanngittullu nikuvitippait.

⁵³ Kaaktut niqiksanginnik tunisivigivait piujunik, Ajuqsanngittut sunataaqtinnagit aullaqtippait.

⁵⁴ Nikagusungnini sivullivinittinnut kajusitippaa, Inuqutinilu Isarialimiut ikajuqpait.

⁵⁵ Iqqaumagami nikagusungnirminik Aiprahaammut, Kinguvaalimaanginnullu isuqanngittumut.”

⁵⁶ Miari najuutilauqpuq Ilisapimi taqqinik pingasunik, kinguningagut angirraqpuq.

Juanasi Paaptitsirijiup Irnianguninga

⁵⁷ Ilisapiup irniviksanga nalliutingmat, irniqtaaqpuq.

⁵⁸ Nunaqqatingita ilagijangitalu tusaramijjuk Ataniup nikagusungnirminik angijumik saqqititsivigingmagu, quviasuqatigivaat.

⁵⁹ Nutarakuluk ulluqalirmat 8-nik kipijaujaqtuqpuq; atiqaqujaulirluni ataatangatut Sakaraiamik.

⁶⁰ Anaanangali Ilisapi uqaqpuq, “Taimaak atiqaqunngilara, Juanasimigli atiqariaqaqpuq.”

⁶¹ Taakkua Ilisapimut uqaqput, “Taimaagli atilingmik ilaqanngittutit.”

⁶² Ataatanga Sakaraiasi uukturarvigivaat, qanuq nutarakuluk atiqaqungmangaagu.

⁶³ Sakaraiasi titirarviginiaqtaminik qaitauqujivuq, titirarluni, “Juanasimik atiqaqpuq.” Tavvaniittulimaat kamajualuuvut.

⁶⁴ Tavvainnaq Sakaraiasi uqarunnaqsigivuq, Guuti niqturlugu uqallaliqpuq.

⁶⁵ Nunaqatilimaangillu quaqsaangaliqput, tamanna uqausiuliqpuq Juutiami qaqqani nunaqaqtulimaanut.

⁶⁶ Tusaqtulimaat isumaksaqsiuliqput, uqarlutik, “Qanuiliuqtiksaugaamiinna nutarakuluk?” Nalunalaunngimmat Ataniup pijunnarningata najurmagu.

Sakaraiasiup Guutimit Uqaqtitauninga

⁶⁷ Juanasiup ataatanga Sakaraia Anirnirmik Ijjurnaittumik ilummiqtaugami, Guutiup uqausiriqujanginnik uqaliqpuq:

⁶⁸ “Ataniq saimmaqtitauli, Isarialimiut Guutingat, Inuqutini aqqarvigillugit saputijaqturmagit,

⁶⁹ Piulijirjuamik tunisivigingmatigut, Pijimi Taivitiup kinguvaanginni.

⁷⁰ Uqaqsimagami nalauttaijuqutimigut ijjurnaittutigut,

⁷¹ Saputijumalluta akiraqtuqtittinnit, Qiimigijittalu agganginnit.

⁷² Nikagusungnini saqqitittumallugu sivulivinittinnut, Angiqsimaninilu ijjurnaittuq iqqaumallugu.

⁷³ Aiprahaammut sivulivinittinnut uqaviksimagami,

⁷⁴ Saputijumalluta akiraqtuqtitta agganginnit, Sivuuragijaqanngilluta pijitsitsiarunnaqulluta Guutimik,

⁷⁵ Ijjurnainnirmi naammagijaunirmilu Taassuma saangani inuusitta isuanut.

⁷⁶ Ilaak ivvit nutaraq, Taijaujumaaqputit quttingniqpaap nalauttaijuqutinganik; Ataniup sivulirijumaarmatit aqqutiksanganik aaqqiksuilutit,

⁷⁷ Qaujititsiqullutit inuqutinginnik piulijauviksamik, Ajurningita isumagijunnaiqtauningitigut.

⁷⁸ Guutitta nikagusungnirjuangagut, Piulijauniq qauliqtutut ullaatut saqqitittumaaqpaa uvattinnut.

⁷⁹ Qaummaktillugit taaqtumi inuujut tuquullu tarralininganiittut, Itigavullu tasiurlugit aqqummut saimmaqtitaunaqtumut.”

⁸⁰ Nutarakuluk piruqpallialiqpuq timimigut anirnikkullu sanngijuulirluni, inuqanngittumi iniqalauqpuq ulluq Isarialimiunut pinasuarviginiaqtani tikillugu.