ᔪᐊᓇᓯᐅᑉ ᐊᒡᓚᖏᑦ 9 - Aglait Ijjurnaittut

Jiisusiup Tautuliqtitsininga Irniangunirminit Tautunngittumik

¹ Jiisusi pisugluni, angummik takuvuq irniangunirminit tautunngittumik.

² Ilinniaqtingitalu apirivaat, “Ajuriqtuiji, nalliatta ajuqtulininganut taanna tautungnani irniangusimavaa nangminirluunniit ajuqtulinirminut? Angajuqqaanngitaluunniit ajuqtulininginnut?”

³ Jiisusiup kiuvait, “Taassuma tautunnginninga ajuqtulinirminut, angajuqqaangiktaluunniit ajuqtulininginnut pijjutiqanngilaq, tautunngilarli Guutiup ajugaqanginninga taassumuuna saqqiqullugu.

⁴ Ulluuningani tilijima piniarningit piniagaksarivavut; unnuangujumaarmat kialuunniit pinasuarvigijunnanngitanganik.

⁵ Silarjuarmiinninni, silarjuarmiut qaumanirivaanga.”

⁶ Taimaak uqariirami, nunamut uriaqpuq, nuvak marrarlu katillugik akuppaa; tautunngittuup ijingik tamatumunga minguaqpaak,

⁷ uqautillugu, “Irruqturiaqtulirit Sailuap Tasinganut.” (Sailua tukiqaqpuq “Tilijaq,”) Tavvungalu aivuq irruqturluni tautulirlunilu utiqpuq.

⁸ Nunaqqatingit tavva, taassuminga takuqattaqsimajut kiinaujanik tuksiraqtiuvalaurmat, uqaliqput, “Una taannauva iksivalluni tuksiraqtiuvalauqtuq?”

⁹ Ilangit uqaqput, “Taannatsainnarnguna”; ilangit uqarivut, “Taannaunngitturnguna tainnaujaatuinnaqtuq.” Taannali uqaqpuq, “Taannauvunga.”

¹⁰ Tavva uqautivaat, “Qanurli maanna tautuliqpiit?”

¹¹ Taanna kiuvuq, “Angutiup Jiisusimik atiliup marraq sanalaurlugu ijiikkaglu minguarlugik uqautilauqpaanga, ‘Sailuamuarlutit irruqturiaqtulirit’; tavva ailauqpunga irruqturiiramalu tautulilauqpunga.”

¹² Taakkua uqautivaat, “Tainnaa naniippa?” Taanna uqaqpuq, “Qaujimanngilara.”

Paarisit Qaujinasuarningat Aaqqiktaujumik

¹³ Tavva apiqsulauqtut Paarisinuarutivaat taanna tautulaunngittuq.

¹⁴ Sapatiutillugu Jiisusiup marraq sanalaurmagu tautulaunngitturlu tautuliqtilluniuk.

¹⁵ Tavva Paarisittauq taanna apiqsulirivaat qanuq tautulilaurmangaat. Taassuma uqautivait, “Marraq taassuma ijinnut minguarutigilauqpaa imirmut irruqturama, tautulilauqpunga.”

¹⁶ Tavva Paarisit ilangit uqaliqput, “Taanna angut taimailiuqtuq Guutimit pinngilaq, Sapatimi piqujait malinngimmagit.” Ilangilli uqaqput, “Qanurli inuk ajuqtulijuq taimaak nalunaikkutarmik saqqititsijunnaqpaa?” Tavvaniittullu isumaqatigiigunniiqpuq aviksimalirlutik.

¹⁷ Tavva Paarisit taanna tautulaunngittuq apirikkanniliqpaat, “Qanurli tanna uqausirijunnaqpiuk ilingnik tautuliqtitsilauqtuq?” Taassuma kiuvait, “Taanna Nalauttaijuuvuq.”

¹⁸ Juutilli ukpirinngilaat tautulaunnginninga maannalu tautulirninga, tassuma tautuliqtuup angajuqqaanginnik qaiqujiqqaaratik.

¹⁹ Qaingmatiglu Juutit apirivut, “Unaa irnirivisikkuk? Tautungnani irniangusimaniraqtasik; qanurliuna maanna tautuliqpa?”

²⁰ Tautuliqtuup angajuqqaangik kiuvuuk, “Qaujimavuguk taanna irnirigattikkuk, qaujimallunuglu tautungnani Irniangusimaninganik;

²¹ qaujimanngilagugli qanuq maanna tautulirmangaat, qaujimannginnivuguglu kinamut tautuliqtitaungmangaat. Apirilauqsiuk; surusiujunniirami imminik kiujunnaqtuq.”

²² Angajuqqaangigli taimaak uqaqpuuk Juutit sivuuragigamigit, Juutit angiqatigiiksimalirmata nalliat Christuusiuniraikpat taassuminga, Juutit ukpirnirmut katimavingannut itirunnaillititsijunnarninginnik.

²³ Taimaimmat angajuqqaangik uqaqpuuk, “Surusiujunniirmat, apiqsuliqsiuk.”

²⁴ Tavva kingullirmi tautulaunngittuq qaiqulirivaat, uqautillugulu, “Guuti niqtulauruk; qaujimavugut angut taanna ajuqtulijuungmat.”

²⁵ Taassuma kiuvait, “Ajuqtulijuungmangaat qaujimanngilara; atausirmigli qaujimagaluaqpunga, tautulaunnginnama, maannalu tautulirama.”

²⁶ Taakkua uqautivaat, “Qanuq pinasuarvigilauqpaatit? Qanurlu tautuliqtippaatit?”

²⁷ Taassuma kiuvait, “Uqautijariiqqauvassi, naalagumaqqaunngilasili, sungmat tusakkannirumalirivisi? Taassumunga ilinniaqtiujumalirivisi?”

²⁸ Tavva uqarnirlugvigillugu uqautivaat, “Ivvit taassuma ilinniaqtigivaatit, uvagulli Muusisiup ilinniaqtigivaatigut.

²⁹ Qaujimavugut Guutiup Muusisi uqaqatigiqattalaurmagu, tainnali angut, qaujimanngilavut nakit pisimangmangaat.”

³⁰ Taassuma kiuvait, “Tamanna kamaniarnatsiaqpuq! Qaujimannginnassi taanna nakit pisimangmangaat, taassumalu tautuliqtilauqpaanga.

³¹ Qaujimavugulli Guutiup ajurnirmiittut tusanngimmagit; Guutimigli kamatsiaqtut piqujanganiglu atutsiaqtut, Guutiup tusarmagit.

³² Silarjuup pigiarninganit tusaumajuqanngilaq irniangunirminit tautunngittumik tautuliqtitsijuqalauqsimangmangaat.

³³ Taannali Guutimit pisimanngikkuni, sunamigluunniit pinasuarunnarajanngilaq.”

³⁴ Taakkua kiuvaat, “Ajurnirmi irniangusimallutit piruqsajauvigillugulu, uvattinnik ajuriqtuinasuaqpit?” Juutillu ukpirnirmut katimavingannit anitippaat.

Anirnikkut Tautunnginniq

³⁵ Jiisusili tusarami anititausimalirninganik, katigamiuglu uqautivaa, “Inuup Irninganut ukpiqpiit?”

³⁶ Taassuma kiuvaa, “Nalliangungmangaat uqautilaunnga, taassumunga ukpiliqullunga.”

³⁷ Jiisusiup uqautivaa, “Takulauqpat, taannauvurlu uqaqatigijait.”

³⁸ Taanna uqaqpuq, “Ataniq ukpiqpunga”; saanganullu siiqquqpuq.

³⁹ Jiisusi uqaqpuq, “Iqqaqtuijaqturlunga silarjuarmut tikippunga, tautunngittut tautuliqullugit, tautuktullu tautugunniiqullugit.”

⁴⁰ Paarisilli tavvaniittut ilangit, tamatuminga uqaqtillugu tusaramik uqautivaat, “Tautunnginnivita?”

⁴¹ Jiisusiup uqautivait, “Tautunngikkussi, pasijaksauniqarajanngilasi; maannali tautunngnirarassi, pasijaksauvusi suli.”