ᔪᐊᓇᓯᐅᑉ ᐊᒡᓚᖏᑦ 8 - Aglait Ijjurnaittut

Arnaq Angunniaqtillugu Angujaujuq

¹ Jiisusili qaqqamut majuaqpuq uqsuksaujunnaqtunik paurngaqasuunik napaaqtulingmut.

² Ullaamarikkulli Tuksiarvigjuarmuarivuq; inuillu Jiisusiup avataanut kativut, ingilluni ajuriqtuliqpait.

³ Piqujanik ilisaijiit Paarisillu arnamik tavvunngaujjivut asinniaqtillugu angujaujumik, inugiaktut akurngannuarutivaat.

⁴ Jiisusimut uqaqput, “Ajuriqtuiji, una arnaq asinniaqtillugu angujaungmat.

⁵ Pikujattinni Muusisiup Piquvaatigut arnaq taimaittuq milluqtauluni tuqutaujariaqarniraqtlugu. Ivvilli qanuilijauqurmangaaqpiuk?”

⁶ Taimailivulli Jiisusimik uukturasuarlutik, pasijaksannguqtitsijumallutik taassuminga. Jiisusili ukulluni tikirminut nunakkut titiraliqpuq.

⁷ Apiqsukkannilirmata nikuvilluni uqautivait, “Nallisi ajuqtulilauqsimanngittuup ujaqqamut miluriaqqaalaurliuk.”

⁸ Amma ukugilluni nunakkut titiralirivuq.

⁹ Tamatumingali tusaramik, qimaruutiliqput, atausiunaaqtirlutik, inutuqaulaanit pigiaqqaarlutik. Jiisusilu qimaktauvuq inutuulirluni, arnarlu nangiqtuq piqatituariliqpaa.

¹⁰ Jiisusiulli takusarluniuk arnaq uqautivaa, “Arnaq, namunngaqtulliikkua? Uvaniittuqarunniiqpa ilingnik sugiaqtauqujijumik?”

¹¹ Arnaup kiuvaa, “Ataniq tavvaniittuqarunniiqpuq.” Jiisusiup uqautivaa, “Uvangattauq sugiagaksautittunniiqpagit; tamaanngat nuulirit, kingurngagullu ajuqtulikkanniqtaililirit.”

Jiisusi Silarjuarmut Qaumaniuvuq

¹² Jiisusiup Paarisit uqautikkanniqpait, “Silarjuarmiut qaumanirivaanga; uvannik maliktuq taaqtumi inuunianngilaq, qaumajumili inuuniaqpuq.”

¹³ Tavva Paarisit uqautivaat, “Ilingnik tavva nalunailivutit; nalunaijarutiit tamanna sulinngilaq.”

¹⁴ Jiisusiup kiuvait, “Uvannik nalunairaluaruma, nalunaijarnira sulivuq, qaujimagama nakit pisimangmangaarma namullu ainiarmangaarma, ilissili qaujimanngilasi nakit pingmangaarma namullu ainiarmangaarma.

¹⁵ Timiup iliqqusinga maliglugu iqqaqtuivusi, uvangali iqqaqtuinngilanga kinamigluunniit.

¹⁶ Ilaak iqqaqtuiguma, iqqaqtuinira sulivuq, inutuujjinnginnama iqqaqtuinirmik, Ataataulli tilijima ilagivaanga.

¹⁷ Piqujassinni titiraqsimajuqaqpuq inuuk marruuk qaujisimaningik sulivuuk;

¹⁸ uvanga uvannik nalunaiqpunga, Ataatagalu tilijiga nalunaijaigivuq uvannik.”

¹⁹ Taimaimmat tavva apirivaat, “Nauktaima Ataatait?” Jiisusiup kiuvait, “Uvannik Ataatamigluunniit qaujimanngilasi; uvannik qaujimagussi, Ataataga qaujimagajarivasi.”

²⁰ Uqausiit Jiisusiup uqausirivait Tuksiarvigjuarmi, tunirrutinik puuqqaiviup sanianiilluni; tigusijuqanngilarli taassuminga, pijauviksanga suli nalliutisimanngimmat.

Upangniaqtannut Upagutijunnanngilasi

²¹ Tavva Jiisusiup uqautikkanniqpait, “Aullarniaqpunga, qinirumaaqpassinngalu tuqujumaaqpusilu ajurnissinniinginnarlusi; upangniaqtannut aijunnannginnassi.”

²² Tavva Juutit uqaqput, “Upangniaqtanganugguuq aijunnannginnatta, unaa imminik tuquttumalirami taimaak uqaqpa?”

²³ Jiisusiup uqautivait, “Ilissi maanngat pivusi, uvangali tappaanngat pivunga; ilissi silarjuarmit tamatumanngat pivusi, uvangali silarjuarmit tamatumanngat pinngilanga.

²⁴ Taimaimmat uqautivassi tuqujumaarnirarlusi ajurnissinniillusi, tuqujumaaqpusi ajurnissinniillusi ukpilinngikkussi Uvangauninnik.”

²⁵ Tavva uqautivaat, “Kinauviit?” Jiisusiup uqautivait, “Uqautisimalauqpassi taimanngat pigialisaarninnit.

²⁶ Amisunik uqausiksaqaqpunga ilissinnut iqqaqtuijjutiksaqarlungalu; tilijigali sulijuuvuq, silarjuarmiullu uqautivakka taassumanngat tusalauqtannik.”

²⁷ Tukisinngilalli Jiisusiup uqausirijanganik Ataatamik.

²⁸ Tavva Jiisusiup uqautivait, “Inuup Irninga nappautigussiuk, tukisilaaqpusi Uvangaugama, tukisilusilu uvannik pinasuaqsimannginninnik uqausiqaramali Ataataup uvannut ajuriqtuutigilauqtanginnik.

²⁹ Tilijimalu ilagivaanga; inutuutinngilaanga, taassuma quviagijanganik pinasuatsainnarama.”

³⁰ Jiisusi taakkuninga uqaqtillugu, amisut ukpiliqput taassuminga.

Aiprahaam Qiturngangit

³¹ Tavva Jiisusiup Juutit ukpirijini uqautivait, “Uqausikka malitsainnalirussigik, sulijumik ilinniaqtigiliqpassi,

³² sulijuq qaujiniaqpasi, sulijuullu qilarujjaarniaqpaasi.”

³³ Tavva kiuvaat, “Aiprahaam kinguvaarivaatigut, nalliannuulluunniit sialaarijaulauqsimanngilagut. Qanuq tukilingmik uqaqpit, ‘Qilarujjaarniaqpaasi’?”

³⁴ Jiisusiup kiuvait, “Sulijumik uqautivassi, nalliat ajuqtulijuq ajuliqtitausimavuq ajurnirmut.

³⁵ Ajurnirmut qilaksuqtausimajuq iglumiitsainnarunnanngilaq; irnirli tavvaniitsainnarniaqpuq.

³⁶ Irniup qilarujjaaqpasi, tavva qilarujjaaqsimallaringniaqpusi.

³⁷ Qaujimavunga Aiprahaam kinguvaaringmasi; tuqunnasuaqpassinngali, uqausikka itirviksaqanngimmata ilissinnut.

³⁸ Uqallakpunga Ataatannit takulauqtannik, taimailiurivusi tusalauqtassinnik ataatassinni.”

³⁹ Taakkua kiuvaat, “Aiprahaam ataatagivavut.” Jiisusiup uqautivait, “Aiprahaap qiturngarikpasi, Aiprahaam pinialauqtangit pinasuarajarivasi,

⁴⁰ maannali tuqunnasuaqpassinnga, sulijumik uqallaktillunga Guutimit tusalauqtannik; Aiprahaamli taimailiulaunngilaq.

⁴¹ Ataatasi pinialauqtanginnik pinasuaqpusi.” Taakkua uqautivaat, “Asinniarnirmut qiturngaqtaangusimanngilagut; atausirmik Ataataqaqpugut Guutimik.”

⁴² Jiisusiup uqautivait, “Guuti Ataatagigussiuk, nagligigajaqpassinnga, Guutimit pilaurama tavvanngaaqsimallungalu maanna tavvaniippunga; uvannik tamaunngaqtilaunnginnama, taassumali tililauqpaanga.

⁴³ Sungmat uqausirijakka tukisinngippisiuk? Uqausikka naalagumannginnassigik tusaajumanagillu.

⁴⁴ Ataatassinnit Saataanasimit pivusi, ataatasilu pijumajangit maligumavasi. Taanna pigiarninganit inuaqtiuvuq, sulijumiglu pisimalauqsimanngilaq, suliniq taassumaniinngimmat. Sagluguni, piusiminik atuqpuq, saglutujuugami sagluniullu ataatagivaa.

⁴⁵ Uvangali sulijumik uqallakkama, ukpirinngilassinnga.

⁴⁶ Nallisi ajuqtulininnik nalunaiqsijunnaqpaa sulijumigli uqallakkuma, sungmat ukpirinngilassinnga?

⁴⁷ Guutimit pijuup Guutiup uqausingit tusaqpait; taimaimmat Guutimit pinnginnassi, tusarunnanngilasi.”

Jiisusilu Aiprahaamlu

⁴⁸ Tavva Juutit Jiisusi apirivaat, “Nalaussinngilagut uqaqtilluta Samiariarmiutauvutit anirnirlungmiglu ilummiqtausimallutit?”

⁴⁹ Jiisusiup kiuvait, “Anirnirlungmik ilummiqtausimanngilanga; Ataatagali upigivara, ilissili narrugivassinnga.

⁵⁰ Niqtuqtauniksara qininngilara; tamatumingali qiniqtuqariiqpuq taannalu iqqaqtuijumaaqpuq.

⁵¹ Sulijumik uqautivassi, nalliat uqausinnik maliktuq, taanna tuqunianngilaq.”

⁵² Tavva Juutit uqautivaat, “Maanna qularnanngittumik tukisivugut anirnirlungmik ilummiqtausimagavit. Aiprahaam tuqulauqpuq, nalauttaijullu tuqulaurivut; ivvilli uqaqputit, ‘Nalliat uqausinnik maliktuq taanna tuqunianngilaq.’

⁵³ Aiprahaammit ataatattinnit anginiqsauvit, tuqulauqtumit? Nalauttaijullu tuqulaurivut! Ilingnik sunautinnasukpit?”

⁵⁴ Jiisusiup kiuvait, “Uvannik niqtuutiguma, niqtuutinira aturajanngilaq; Ataatagali taannauvuq uvannik niqturnaqtitsijuq, taanna Guutiginiraqtasi.

⁵⁵ Taannali qaujimannginnassiuk; uvangali qaujimavara. Qaujimannginnirarajarukku, ilissituttauq sagluqitsinajaqpunga; qaujimavarali uqausingillu malikpakka.

⁵⁶ Aiprahaam ataatasi quviasulauqpuq takujumaalirami ullurijumaaqtannik; takugamiuglu quviasulauqpuq.”

⁵⁷ Tavva Juutit uqautivaat, “50-nigluunniit suli arraaguqanngilatit, Aiprahaamlu takulauqsimaviuk?”

⁵⁸ Jiisusiup kiuvait, “Sulijumik uqautivassi, Aiprahaam inuulauqtinnagu, tavvaulauqpunga.”

⁵⁹ Tavva ujaqqanik tigusivut millurumallugu; Jiisusili ijiqpuq, anillunilu Tuksiarvigjuarmit.