ᔪᐊᓇᓯᐅᑉ ᐊᒡᓚᖏᑦ 7 - Aglait Ijjurnaittut

Jiisusiup Ukpirijaunginninga Qatanngutiminut

¹ Tamatuma kingurngagut Jiisusi Galiliakkut ingirravuq; Juutiakkulli ingirrajumanngilaq, Juutit angajuqqaangita tuquttumangmajjuk.

² Juutit Siniktarvingmi Angirraqaqpalaurnirmingnik Nalliunniqsiurvingat qaglilirmat.

³ Taimaimmat qatanngutingita, Jiisusi uqautivaat, “Tamaanngat aullarlutit Juutiamualaurit, ilinniaqtitit takuniarmata pinasuarnirijarnik.

⁴ Pinasuaqtamingnik ijiraqtuqtuqarunnanngilaq inungnut qaujijautsiarumajaraangamik. Tamakkuninga pinasuaqattaravit, silarjualimaami ilingnik qaujijautilaurit.”

⁵ Aglaat qatanngutingit ukpilaunngimmata Jiisusimik.

⁶ Jiisusiup uqautivait, “Suli piviksara naammaksinngimmat, ilissili pinasuarviksasi qangalimaaq nalliutisimavuq.

⁷ Silarjuarmiut uumigijunnanngilaasi, uvangali uumigijauvunga piunngittumut aulatauninginnik nalunaiqsiqattarnira pijjutigillugu.

⁸ Nalliunniqsiuriaqtulirissi; uvangali nalliunniqsiuqtunut ainiannginnama, piviksara suli naammaksisimanngimmat.”

⁹ Tamatumingali uqariirami Galiliamit nuulaunngilaq.

Jiisusiup Nalliunniqsiurvingmut Aiqatauninga

¹⁰ Qatanngutingilli nalliunniqsiuqtunut aingmata, Jiisusittauq maliksarivuq; inungnut saqqijaaluarnani qaujimajaujumannginnami.

¹¹ Juutit angajuqqaangita qiniraluaqpaat nalliunniqsiuqtuni, uqarlutik, “Naugli Jiisusi?”

¹² Inugasait tavvaniittut uqamajautiqarliqput Jiisusimik, ilangit uqaqput, “Inutsiavaalunginna,” ilangit uqaqput, “Aakkai, inungninginna tamaqtitsiliqtuq.”

¹³ Juutilli angajuqqaanginnik sivuuragamik uqamajautiqarnitik Jiisusimik tusaajautittailivaat.

¹⁴ Nalliunniqsiurniq aniguliqtillugu Jiisusi Tuksiarvigjuamuaqpuq tavvani ajuriqtuilirluni.

¹⁵ Juutit angajuqqaangit kamajualuuliqput uqarlutik, “Qanualunguna qaujimajualuuliqpaa ilinniarvingmi ilinnialauqsimanani?”

¹⁶ Jiisusiup kiuvait, “Ajuriqtuivunga uvannit nangminiq pinngittunik, taassumanngalli tilijinnit pijunik.

¹⁷ Nalliat Guutiup pijumajanganik pinasuarumajuq, qaujiniaqpuq ajuriqtuijutigijakka Guutimit pingmangaata uvvalu uvannituinnaq uqallangmangaarma.

¹⁸ Nalliat pijunnarnituinnarmigut uqallaktuq imminik niqtuqtaujjutiksaminik pinasuaqpuq; nallialli tilijiminik niqtuqtautitsinasuaqtuq sulitsiaqpuq, taassumanilu sagluniqtaqarnani.

¹⁹ Muusisiup piqujanik tunisivigilaunngilaasi? Nallisiluunniit piqujanik maliktuqanngilasi. Sungmat tuqunnasuaqpisinnga?”

²⁰ Inugiakturjuat kiuvaat, “Anirnirlungmik ilummiqtausimavutit! Kinamut tuqutaunasuaqpit?”

²¹ Jiisusiup kiuvait, “Pinasuarnirmik atausirmik saqqititsigama, iluunnasi kamaniarutigilauqpasi.

²² Muusisiup piqulauqpaasi irnisi kipijauqullugit Muusisi nangminiq pigiaqtitsilaunngikkaluaqpuq, sivulisili pigiaqtitsilauqput, taimaimmat nukappiat kipivakpasi Sapatiutillugu.

²³ Nukappiarli kipijaukpat Sapatimi, Muusisiup Piqujanginnik siqumitsittailimanirmut, sungmalli taima uumigivisinnga inuup timilimaanganik aaqqiksilaurama Sapatiutillugu?

²⁴ Takuksaujutuinnaq maliglugu iqqaqtuiniarasi, naammanaatsiaqtumigli iqqaqtuiqattarissi piniarnillaringa maliglugu.”

Inuit Tukisijumaningat Jiisusi Misaiasiungmangaat

²⁵ Taimaimmat Jiruusalimmiut ilangit uqaqput, “Unaa taannaunngilaq angajuqqaujut tuquttumajangat?

²⁶ Takuliritsi, inugasagjuanut uqallakpuq, iniqtiqtaunngilarluunniit! Angajuqqaat qaujillariliqpaat Christuusiuninganik?

²⁷ Christuusili tikippat, qaujimajuqarnianngilaq nakit pisimangmangaat; unali tamatta qaujimajavut nakit pisimangmangaat.”

²⁸ Jiisusi Tuksiarvigjuarmi ajuriqtuilluni, nipiqquqtulluni uqaqpuq, “Qaujimallarikpisinnga? Qaujimallarikkaluaqpisi nakit pisimangmangaarma? Uvannik tikitisimannginnama; uvannik tilisijuq sulitsiaqtuuvuq, taanna qaujimanngitasi.

²⁹ Uvangali qaujimavara, taassumanngat pilaurama, taassumalu tililaurmanga.”

³⁰ Tavva tigunasuaraluaqpaat; aktuqtaunngilarluunniit, suli pijauviksanga nalliutisimanngimmat.

³¹ Inuit amisut ukpirusuliqput taassuminga; uqarlutik, “Christuusi tikikkuni nalunaikkutarnik pinasuarniqsaugajaqpaa taassumanngat?”

Tuksiarvigjuap Qaujisaqtingit Tigusijaqtuqujauvut Jiisusimik

³² Paarisilli tusaramik inugasagjuat immingnut taimaak uqausiqaqtillugit Jiisusimik, Paarisit tunirrusiqtitsijiillu angajuqqaangit tuksiarvigjuap qaujisaqtinginnik tilisivut Jiisusi tigujauqullugu.

³³ Jiisusili uqaqpuq, “Maanna suli akuniunngittuq najurniaqpassi, kinguningagullu tilijinnut ainiaqpunga;

³⁴ qinirumaaqpassinnga naninangalu; aiviginiaqtannut tikittunnannginnassi.”

³⁵ Juutilli angajuqqaangit immingnut uqaqatigiiliqput, “Namunngauniaramiuna uvattinnut nanijaujunnailliniarniraqpa? Una Guriikit nunanginnuarumaliqtuq Guriikinik ajuriqtuijaqturumalluni?

³⁶ Uqarmat, ‘Qinirumaaqpassinnga naninangalu, aiviginiaqtannut tikittunnannginnassi.’ Qanurngunaa tukilingnik uqallaliqtuq?”

Imiq Kuuktuq Inuusiqtaarnaqtumik

³⁷ Nalliunniqsiurviup ullungita kingulliqpaanganni, pivigjuanguniqpauliqtillugu, Jiisusi nikuvippuq nipiqquqtulluni uqaqpuq, “Imiruktuqaqpat, uvannut qailirli imirniarmat.

³⁸ Uvannut ukpiqtuq, suurlu aglangni uqausiusimangmat, ‘Imiit inuusitaarnaqtumik kuuktut uummatinganit kuulirumaaqput.’”

³⁹ Jiisusili tamatuminga uqaqpuq Anirnirmik Ijjurnaittumik uqausiqarluni, taassumunga ukpiqtunut tunijaujumaaqtumik; taissumani suli Guutiup Anirninga tunijaulaunngimmat, Jiisusi suli niqturnaqsititauviksaminut tikiutisimalaunngimmat.

Inuit Ajjigiinngittumik Isumaqarningat Jiisusimik

⁴⁰ Inuilli ilangit uqausirnik tamakkuninga tusaqtut uqaqput, “Una Nalauttaijullariuvuq.”

⁴¹ Ilangilli uqaqput, “Una Christuusiuvuq.” Ilangilli uqarivut, “Christuusi Galiliamit tikittuksauva?

⁴² Aglait uqaqsimavut, Christuusiguuq Taivitiup kinguvaarilaaqpaa, irniangulaarlunilu Pitliami, Taivitiup nunaviningani.”

⁴³ Taimaimmat inugasagjuat aviksimalilauqput Jiisusi pijjutigillugu.

⁴⁴ Ilangita Jiisusi tigujumagaluaqpaat, aktuijuqanngilarli taassuminga.

Juutit Angajuqqaangita Ukpinnginningat

⁴⁵ Tuksiarvigjualli qaujisaqtingit utirmata, tunirrusiqtitsijiit angajuqqaangita Paarisillu apirivait, “Sungmat qaijjutinngippisiuk?”

⁴⁶ Tuksiarvigjuap qaujisaqtingit kiuvut, “Taassutunaq uqallagunnaqtigijumik pitaqanngilaq!”

⁴⁷ Tavva Paarisit kiuvut, “Taassumungattauq silairrijaugivisi?

⁴⁸ Juutit angajuqqaangita ilanginnik, Paarisinigluunniit ukpiqtuqaqpaa taassumunga?

⁴⁹ Ukua inugasagjuat, Piqujanik qaujimanngittut, asiruqtaujumaaqput.”

⁵⁰ Nikutimuusili Paarisit ilangat tavvaniittuq, taannatsainnaq Jiisusimik takujaqtulauqtuq, uqaqpuq,

⁵¹ “Piqujavut maliglugit inungmik sugiaqtauqujijunnanngilagut, tusalauqqaarata qaujisalauqqaaratalu inuup piniarnirisimajanganik.”

⁵² Taakkua kiuvut, “Galiliamiunguqataugivit? Tukisinasulaurit, tavva qaujiniaqputit nalauttaijumik Galiliamit pijuqalauqsimanngimmat.”

⁵³ Tamarmik atuni nangminiq angirramingnut angirraqput.