ᔪᐊᓇᓯᐅᑉ ᐊᒡᓚᖏᑦ 6 - Aglait Ijjurnaittut

Jiisusiup Nirititsininga 5,000-nik

¹ Tamatuma kingurngagut Jiisusi ikaaqpuq Tasiup Galiliap akianut (taijaujumut, Taipiuriasiup Imanganik).

² Inugasagjuat malikpaat, nalunaikkutarnik takulauramik qanimajunik aaqqiksitillugu.

³ Jiisusili qaqqamut majurarami, qaanganut ingippuq ilinniaqtini ilagillugit.

⁴ Juutilli Qaangiqtauvingmik Nalliunniqsiurvingat qagliliqpuq.

⁵ Jiisusi takusarami, takuvuq inugasagjuanik qailiqtunik imminut, Pilippuusimut uqaqpuq, “Qanurli niuvirunnarniaqpita ukua nirijaksanginnik?”

⁶ Jiisusi taimaak uqaqpuq Pilippuusi qaujisarluniuk, qaujimagaluarluni qanuiliurunnarnirminik.

⁷ Pilippuusiup kiuvaa, “Siulvirinik 200 ungataaniittunik aturiaqarajaqpugut taakkuninga nirititsinasukkutta mikijukulungmigluunniit atunit pigaluaqpata.”

⁸ Ilinniaqtingita ilangat, Aanturuu Saimuuniup Piitturuusiup nukanga, uqaqpuq,

⁹ “Uvani nukappiaqtaqaqpuq niaquujanik tallimanik iqalungniglu marruungnik taquaqaqtumik; kisianili inugiaraalungnut taakkua sunaunngilat.”

¹⁰ Jiisusiup uqautivait, “Inuit ingiqulauqsiuk,” tamanna najuqtangat nuna iviksugajaangungmat; tavva inulimaat ingipput, taakkua 5,000 qanigijaaniipput.

¹¹ Jiisusiup niaquujait tiguvait, qujalijjutigijariiramigillu, iksivajunut tuniuqaqtauquvait; taimaaktauq iqaluit qujalijjutigillugit tunigivait, naammaksillutik nirivut.

¹² Aqiattuqtuinnaungmata, ilinniaqtini uqautivait, “Amiakkugijaujut katiqsuqsiuk, mikijumigluunniit tamaungatuinnaatuqaqunagu.”

¹³ Tavva amiakulimaanik katitsigamik iviujanik 12-nik tataivut amiakkugijaujunik niaquujanit tallimanit, inuit nirilauqtanginnit.

¹⁴ Inuilli nalunaikkutarmik takugamik, Jiisusiup pinasuaqtanganik uqaqput, “Taanna qularnarunniiqpuq Nalauttaijungmat silarjuarmut tikiniaqsimajuq!”

¹⁵ Jiisusi qaujigami inuit qanuiliurumaninginnik, tigulugu angajuqqaarjuannguqtitsinasuarumalirmata pijumanngigaluaqpat, taakkunanngat qimaruutilluni qaqqamut majuraqpuq inutuulluni.

Jiisusiup Pisungninga Imaup Qaangagut

¹⁶ Unnungmalli, Jiisusiup ilinniaqtingit tasirmuaqput,

¹⁷ umiamut ikillutik, utirasualiqput Kapiirniamut. Taaqsingmat, Jiisusiup suli upalaunngimmagit.

¹⁸ Anuraaliqtualuungmat imaq malliliqpuq.

¹⁹ Ilinniaqtit iputtlutik ingirraliraluaqtillugit immaqaa pingasunik sitamanigluunniit mailinik, takuliqput Jiisusimik imaup qaangagut pisuktumik umiamut qagliliqtumik. Kappiasuliqput,

²⁰ Jiisusiup uqautivait, “Uvangauvunga kappiasungnasi!”

²¹ Tavva umiamut ikiquliqpaat, akuniunngittuq nunamut tikipput upagasuaqtamingnut.

Inuit Qinirningat Jiisusimik

²² Qautillugu inugasagjuat tasiup akianiittut takuliqput umiaq atausiungmat, qaujilaurlutiglu Jiisusi umiamut ilinniaqtiminut ikiqataulaunngimmat, ilinniaqtingilli umiaqtusilaurmata taakkutuullutik.

²³ Umialli asingit, Taipiriasimit pijut nunamut tulagiaqtuliqput, Ataniup niaquujanik qujalijjutiqalaurluni nirititsivigilauqtangata qanigijaanut.

²⁴ Inugasagjualli qaujigamik Jiisusi tavvaniinngimmat, ilinniaqtingillu tavvaniimminatik, umiamut ikivut Kapiirniamullu umiaqtuliqput, Jiisusimik qinirlutik.

Jiisusiup Niaquujaunirarninga Inuusiqtalik

²⁵ Inuit Jiisusimik nanisigamik tasiup akiani, uqautivaat, “Ajuriqtuiji, qanga tamaunngaqpit?”

²⁶ Jiisusiup kiuvait, “Sulijumik uqautivassi; qiniqpassinnga nalunaikkutait takulauqtasi pijjutiginagit, nirilaurassili niaquujanik aqiatturlusi pijjutiqaqpusi.

²⁷ Niqiksamik nungusaraittumik pinasuarniarnasi, niqiksamigli pinasualirissi inuusiqtaarnaqtumik nungusuittumut, Inuup Irningata tuniniaqtanganik ilissinnut; taanna Guutiup Ataataup nalunaikkusiqsimangmagu naammaksarnirminik.”

²⁸ Tavva apirivaat, “Qanuq pinasuaqtuksauvita? Guutiup pinasuaqtauqujanganik pinasuarunnaqulluta?”

²⁹ Jiisusiup kiuvait, “Tavva Guutiup imaak piquvaasi; ukpiqullusi tilijanganut.”

³⁰ Taakkua kiuvaat, “Tavva qanuittumik nalunaikkutaqarniaqpit uvagut takuluta, ilingnut ukpiliqulluta? Qanuiliurniaqpit?

³¹ Sivulivut maanamik niqiksamik nirilauqput inuqanngittumi; aglangni uqaqsimangmat, ‘Niaquujamik qilangmit pijumik niritilauqpait.’”

³² Tavva Jiisusiup uqautivait, “Sulijumik uqautivassi, Muusisiup niaquujamik qilangmit pijumik tunisivigilaunngilaasi; Ataatamali niaquujamik niqiksallaringmik tunisivigivaasi qilangmit pijumik.

³³ Tavva Guutiup niaquujaqutinga taannauvuq qilangmit tikittuq, inuusirmiglu tunisijuq silarjuarmiunut.”

³⁴ Taakkua uqautivaat, “Ataniq, niaquujamik taassuminga tunisivigitigut piqattainarniaqtattinnik.”

³⁵ Jiisusiup uqautivait, “Uvanga niaquujauvunga inuusiqarnaqtuq; uvannut qaijuq kaalirnianngilaq, uvannullu ukpiqtuq imirulauqsimanianngilaq.

³⁶ Maannali uqautigaluarassi uvanniglu takusimalirlusi ukpirinngilassinnga.

³⁷ Ataatama tunijjutigijalimaangit uvannuarniaqput, uvannuaqtuniglu qujanaaqsinianngilanga.

³⁸ Qilangmit tikilaurama, pijumajannik pinasuariaqturnanga, taassumali tilijima pijumajanganik pinasuariaqturlunga.

³⁹ Taassuma tilijima pijumajanga tamajja, uvannut tunisimajanginnik asiujiqunanga, uummaqtitsiqullungali ulluit kingulliqpaanganni.

⁴⁰ Tamajja Ataatama pijumajanga, Irninganik takujulimaat ukpilirlutiglu taassumunga inuusirmik nungusuittumik piqaqullugit; uvangalu uummaqtittumaaqpara ulluit kingulliqpaanganni.”

⁴¹ Juutilli akauksarunniiqput taassuminga, uqarninga pillugu, “Uvanga niaquujauvunga qilangmit tikisimajuq.”

⁴² Tavva uqaqput, “Una Jiisusiunngilaq Juusipiup irninga, ataatanga anaanangalu qaujimanngilavut? Qanuimmalliuna uqaliriva ‘Qilangmit tikisimavunga’?”

⁴³ Jiisusiup kiuvait, “Akauksanngillusi ilissinnut uqaqattautinngilaurissi.

⁴⁴ Uvannut qaijuqarunnanngilaq Ataataup tilijima uvannuaqtingippagu; uvangalu uummaqtittumaaqpara ulluit kingulliqpaanganni.

⁴⁵ Nalauttaijutigut titiraqsimavut, ‘Tamarmik ajuriqtuqtaujumaaqput Guutimut.’ Nalliat Ataatamik tusaqtuq, taassumanngallu ilinniarluni taanna uvannut qaivuq.

⁴⁶ Ataatamik takulauqsimajuqanngilaq; Guutimilli pijuup kisimi Ataata takusimavaa.

⁴⁷ Sulijumik, sulijumik uqautivassi; uvannut ukpiqtuq inuusiqaqpuq nungusuittumik.

⁴⁸ Uvanga inuusiup niaquujarivaanga.

⁴⁹ Sivulisi maanamik nirilauqput inuqanngittumi, kisianili tuqulauqput.

⁵⁰ Niaquujarli taannauvuq qilangmit tikittuq; nalliat tavvannga nirijuq tuququnagu.

⁵¹ Uvanga niaquujauvunga uumajuq qilangmit pisimajuq; kinatuinnaq tavvanngat niaquujatuqtuq, inuusiqalirniaqpuq isuqanngittumut; niaquujarlu tuniniaqtara inuusiqaliqtitsijunnaqpuq silarjuarmiunik, taanna tavva timiga.”

⁵² Tavva Juutit immingnut akiraqtuutiliqput, uqarlutik, “Qanuq uuma timiminik niritittumavaatigut?”

⁵³ Tavva Jiisusiup uqautivait, “Sulijumik uqautivassi, Inuup Irningata timinganik nirinngikkussi aunganiglu iminngikkussi, inuusiqarunnanngilasi ilussinniittumik.

⁵⁴ Timinnik nirijuq aunniglu imiqtuq nungusuittumik inuusiqaqpuq, uvangalu uummaqtittumaaqpara ulluit kingulliqpaanganni.

⁵⁵ Timiga niqiksallariuvuq, augalu imiksallariulluni.

⁵⁶ Nalliat timinnik nirijuq, aunniglu imirluni taanna uvanniippuq, uvangalu taassumaniillunga.

⁵⁷ Ataataup uumajup tilisimangmanga, uvangalu inuuvunga Ataataga pillugu, taimaaktauq uvannik nirijuq inuuniaqpuq uvanga pillunga.

⁵⁸ Taanna niaquujaq qilangmit tikittuq, sivulisili nirilauqtangatituunngilaq nirigaluaramik tuqulauqtutitut; niaquujamigli taassuminga nirijuq inuuniaqpuq isuqanngittumut.”

⁵⁹ Jiisusi tamakkuninga uqausiqalauqpuq Juutit ukpirnirmut katimavinganni, Kapiirniamiittumi ajuriqtuilluni.

Uqausit Inuusirmik Nungusuittumik

⁶⁰ Jiisusiup ilinniaqtingit amisut, tamakkuninga tusaajut uqaqput, “Uqausit taakkua nalunaluaqput, kiali tukisijunnaqpait?”

⁶¹ Jiisusi qaujimagami ilinniaqtingit uqausirnut tamakkununga akauksarunniirmata, uqautivait, “Tamakkununga uqausirnut sapiliqpisi?

⁶² Qanurli isumavisi Inuup Irninga takugajarussiuk qummualiqtillugu sivurngani inigilauqtaminut?

⁶³ Anirniq Inuusiqtaaqtitsivuq; timiup pijunnarninga ikajurunnanngilaq tamatumunga; ilissinnut uqausirijakka anirniuvut inuusiullutiglu.

⁶⁴ Akunnassinniittuqaqpurli ilagijassinnik ukpirusungniqanngittumik.” Jiisusi pigiarninganit qaujimatsialaurmat nalliangungmangaat ukpirusunngittuq, nalliattalu pijaukkarumaarmangaagu.

⁶⁵ Jiisusi uqaqpuq, “Tamanna pijjutigillugu uqautilauqpassi uvannuaqtuqarunnanngilaq Ataatamut pijumaniqtaaqtitaunngikkuni.”

⁶⁶ Tamanna pijjutigillugu Jiisusiup maliktingit amisut Jiisusi qujanaaqpaat ingirraqatigijumairlugu.

⁶⁷ Tavva Jiisusiup ilinniaqtini 12 apirivait, “Ilissittauq uvannik qimaijumavisi?”

⁶⁸ Saimuuni Piitturuusiup kiuvaa, “Ataniq, kinamigli maligaksaqarniaratta? Uqausiqarunnaqtututillutit inuusiqarnaqtunik isuqanngittumut.

⁶⁹ Ukpilirlutalu qaujivugut Guutiup Ijjurnaittuqutigingmatit.”

⁷⁰ Jiisusiup kiuvait, “Ilissi 12-ngulusi nirualaunngilassi? Ilassili ilangat Saataanasiuvuq.”

⁷¹ Juutasimik uqausiqalauqpuq Saimuuni Iskariatiup irninganik, Juutasi Jiisusiup ilinniaqtinginnut 12-nut ilagijaugaluarluni, kinguningagut Jiisusimik pijautitsijumaarmat.