ᔪᐊᓇᓯᐅᑉ ᐊᒡᓚᖏᑦ 5 - Aglait Ijjurnaittut

Jiisusiup Aaqqiksininga Pisugunnanngittumik

¹ Tamatuma kinguningagut Jiisusi Jiruusalimmuaqpuq, Juutit nalliunniqsiurmata.

² Jiruusaliulli itiqtarvingani taijaujumi “Siipiit Itiqtarvinganik” qanigijaani tasikuluktaqaqpuq, tallimanik iglurusilingmik; Iipruutitut taijaujuq Pitistamik.

³ Taakkunani iglurusirni inuit timimigut ajurutiliit amisut nalavut, tautunngittut, tusiattut, nukiqanngittullu. [Taakkualu utaqqivut imaup aulatitauniarninganik.

⁴ Ataniup aingilinga tasirmuaqpangmat imanganik aulatitsijaqturluni. Nalliallu sivulliqpaulluni imaanuaqtuq aulatitaurataaqtillugu aaqqiktauvalauqput qanuittutuinnarmik qanimmasiqaraluaqpat.]

⁵ Tavvanili angutitaqaqpuq, arraagunik 38-nik qanimmasilingmik.

⁶ Jiisusiup nalajuq takugamiuk, qaujimagamiuglu akunialuk qanimalluni tavvani nalangmat, uqautivaa, “Aaqqiktaujumavit?”

⁷ Qanimajuup kiuvaa, “Ataniq, ikajuqtiksaqaqattannginnama imaanuaqtitsijiksannik imaq aulatitaujaraangat, imaanuarasuliqtillunga sivuliuqtauqattaqpunga.”

⁸ Jiisusiup uqautivaa, “Makigit, nalaviit tigulugu, pisulirit.”

⁹ Tavvatsainnaq angut aaqqiktauvuq, nalavvini tigulluniuk, pisuliqpuq. Ullurli taanna Sapatiuvuq.

¹⁰ Tavva Juutit angajuqqaangita angut aaqqiktaurataaqtuq uqautivaat, “Ullumi Sapatiuvuq, piqujattinnik naalanngilatit nalaviit agjaraviuk.”

¹¹ Taannali taakkununga kiuvuq, “Angutiup aaqqikkaminga uqautiqqauvaanga, ‘Nalaviit tigulugu pisulirit.’”

¹² Taakkua apirivaat, “Kina ilingnut taimaak uqaqpa, ‘Nalaviit tigulugu pisulirit’?”

¹³ Aaqqiktaujuulli Jiisusi qaujimalaunngilaa kinaungmangaat, tavvani inulialuulaurmat, Jiisusi tavvanngat nuugiilaurmat.

¹⁴ Kinguningagut, Jiisusiup katigamiuk tuksiarvigjuarmi, uqautivaa, “Takugit, maanna qanuinngitsialiqputit! ajuqtulikkannirunniirit, piunnginniqsamut tikitauqunak.”

¹⁵ Angut tavvanngat qimaruutigami Juutit angajuqqaangit uqautivait, aaqqiksilauqtuq Jiisusiuninganik.

¹⁶ Taimaimmat Juutit Jiisusi akiraqtuliqpaat, aaqqiksilaurmat Sapatiutillugu.

¹⁷ Jiisusiup kiuvait, “Ataataga taimanngat maannamut pinasuaqpuq, uvangalu pinasuarivunga.”

¹⁸ Taimaimmat Juutit angajuqqaangita Jiisusi tuqutauviksaqsiukkanniliqpaat, Sapatimi piqujamik naalalaunnginninga pijjutigituinnarnagu, uqaqsimaninganulli Guutimik nangminirillugu Ataataqarnirarmat, Guutimik imminik taimailluaqaqtiqarasungniraqtlunijjuk.

Irniup Pijunnarniqaqtitauninga

¹⁹ Jiisusiup uqautivait, “Sulijumik uqautivassi, Irniq iminiinnaq pinasuarunnanngilaq, pinasuaqpurli Ataataup pinasuaqtanginnik takujaminik, Ataataup pinasuaqtanga Irningatattauq pinasuarivaa.

²⁰ Ataataup Irnini nagligivaa, nangminirlu piniarnilimaani qaujimajautippait taassumunga; sulilu piniarnirnik pillariuniqsanik tamakkunangat qaujitinniaqpaa, ilissilu kamaniarutiginiaqpasi.

²¹ Suurluttauq Ataataup tuqungajut makitimmagit uummaqtillugillu, taimaaktauq Irniq uummaqtitsivuq uummaqtittumajaminik.

²² Ataata iqqaqtuinngilaq kinamigluunniit, Irninili iqqaqtuijunnarnirmik tunisivigisimavaa.

²³ Irniq tamainnut upigijautsiaqullugu, suurlu Ataata upigijautsiarmat. Irnirmik upigusunngittuq Ataatamiktauq upigusunngilaq tilijinganik.

²⁴ “Sulijumik uqautivassi, uqausinnik tusaqtuq ukpirilugulu tilijiga, taanna inuusiqaqpuq nungusuittumik; iqqaqtuqtaujjaananilu, tuqumilli nuktiqsimaliqpuq inuusirmut.

²⁵ Sulijumik uqautivassi, ikarraq nalliutiniaqsimajuq nalliutijariiqpuq, tuqungajut Guutiup Irningata nipinganik tusarvingat, tusaqtut taakkua inuuniaqput.

²⁶ Suurlu Ataata nangminiq inuusiqarmat immikkut, taimaaktauq Irnini tunisivigivaa inuusiqaqullugu immikkut.

²⁷ Irnini tunisivigivaa pijunnarnirmik iqqaqtuijunnaqullugu, Inuup Irniringmagu.

²⁸ Tamanna kamaniarutiginasiuk; ikarraq nalliutijumaarmat tuqungajut iluvirmiittut iluunnatik nipinganik tusarumaarmata.

²⁹ Iluvirmit anilutik, piujumik inuusiqalauqtut, makittumaaqput inuunialirlutik, piunngittumigli inuusiqalauqtut, makittumaaqput iqqatuqtaunialirlutik.”

Jiisusimik Nalunaiqsiniq

³⁰ “Uvanniinnaq pijunnarninnut sunamigluunniit pinasuarunnanngilanga; Guutimit tusaqtakka maliglugit iqqaqtuivunga; taimaimmat iqqaqtuinira ajjigiiktitsivuq, nangminiq pijumajannik pinasuannginnama tilijimali pijumajanganik pinasuaqpunga.

³¹ “Uvanga nangmininnik nalunairasuaruma, nalunaiqsinira suligajanngilaq;

³² asigali uvannik nalunaiqsivuq, qaujimavungalu uqausiqarninga uvannik sulitsiarmat.

³³ Apirijaqtuqtitsilauqpusi Juanasimut, taanna nalunaiqsilauqpuq sulijumik.

³⁴ Nalunaiqtaunira inungmit pinngilaq; tamannali uqausirivara piulijauqullusi.

³⁵ Taanna naniruatitut ikumalluni qaumajutitut taimaippuq, ilissi sivikittumik quviasuutiqarumalauqpusi taassuma qaumaninganik.

³⁶ Uvangali nalunaiqsiniqaqpunga Juanasiup nalunaiqsininganit anginiqsamik; piniarniit piniarnirijakka, Ataatama qailauqpait uvannut pinasuaqtauqullugit, tamakkua pinasuarniit uvannik nalunaiqsivut saqqititsillutiglu Ataatamut tilijausimaninnik.

³⁷ Ataatalu tilijiga uvannik nalunaiqsivuq. Taassuma nipinga tusalauqsimanngitasi, qanuittuuningalu takulauqsimanagu;

³⁸ uqausingaluunniit ilumiutarinngilasi, taassuma tililauqtanga ukpirinnginnassiuk.

³⁹ Aglangnik qiniqpusi, inuusirmik nungusuittumik piniarasugillusi taakkunangat; taakkuali uvannik nalunaiqsivut;

⁴⁰ uvannulli qaijumanngilasi inuusiqtaarvigijunnaqtassinnut.

⁴¹ “Inungnut niqtuqtaunasuanngilanga.

⁴² Qaujimavungali Guutiup naglingninganik ilumiutaqannginnassi.

⁴³ Ataatama atingagut tikilauqpunga, ilissili ilaliunngilassinnga; asigali tikippat nangminiq pijunnarnirmigut, taanna ilaliurajaqpasi.

⁴⁴ Qanuq ukpirunnaqpisi? Inuuqatissinnut niqtuqtaujumanirmik pinasuaqattarlusi Guutimullu niqtuqtauniksatuaq qinirnagu.

⁴⁵ Isumaniarasi Ataataup saangani pasiksirniarasugilunga ilissinnik; Muusisiulli niriungnirmik tunngaviqarviginasuaqtassi, taassuma pasijumaaqpaasi.

⁴⁶ Muusisi ukpirigussiuk, uvannik ukpirajaqpusi, taanna uvannik titirausiqalaurmat.

⁴⁷ Taassumali titiralauqtangit ukpirinngikkussiuk, qanurli uqausirijannik ukpirusugajaqpisi?”