ᔪᐊᓇᓯᐅᑉ ᐊᒡᓚᖏᑦ 4 - Aglait Ijjurnaittut

Jiisusiup Uqaqatiqarninga Arnamik Samiariarmiutarmik

¹ Jiisusili qaujiliqpuq Paarisit tusaumalirmata Jiisusiup ilinniaqtitaaqattalirninganik paaptitsiqattaninganiglu unurniqsanik Juanasimit.

² Jiisusili nangminiq paaptitsilaunngittuugaluaq, ilinniaqtingilli kisimi paaptitsiqattalauqput,

³ tavva Jiisusi Juutiamit aullaqpuq Galiliamullu utilirluni.

⁴ Aqqutaanili aqqusaaqsijariaqaqpuq Samiariamik.

⁵ Nunalingnut Samiariamiittumut Saikarimik atilingmut tikippuq, piruqsiivingmut Jaikuup irnirminut Juusipimut tunilauqtangata qanigijanganiittumut.

⁶ Jaikuup imiqtarvinga tavvaniippuq, Jiisusi pisungnirminut mirnguqturami, imiqtarviup sanianut ingippuq. Ulluq qitiraliqtillugu.

⁷ Samiariamiutaq arnaq tavvunngaqpuq imiqtarluni. Jiisusiup uqautivaa, “Imiqtilaunnga.”

⁸ Ilinniaqtingilli nunalingnut niqiksanik niuviriaqsimavut.

⁹ Arnaup kiuvaa, “Juutiugavit, Samiariarmiutaugama sungmat uvannut imiqtitaujumavit?” Juutit Samiariarmiunik inuuqatiqarumanngimmata.

¹⁰ Jiisusiup kiuvaa, “Qaujimaguvit Guutiup tunirrutaanik, kinaungmangaallu ilingnut imiqtitaujumajuq, tunisiviujumagajaqputit taassumunga, taassumalu tunisivigigajaqpaatit imirmik inuusiqarnaqtumik.”

¹¹ Arnaup uqautivaa, “Qallutiqanngilatilluunniit, una imiqtarvik unungaaluungangmat; nakilli imirmik inuusiqarnaqtumik pigajaravit?

¹² Anginiqsauvit sivulittinnit Jaikumit? Jaikuup una imiqtarvik tunilaurmagu uvattinnut, nangminirlu qiturngangillu uumajuqutingillu tavvanngat imiqattalauqput.”

¹³ Jiisusiup uqautivaa, “Nalliat tavvanngat imirmit imiqtuq imirulirniarivuq,

¹⁴ nallialli imirmik tunijannik imirniaqtuq imirulikkannirnianngilaq; imiq tuniniaqtara taassumunga iluanit kuulirniaqpuq inuusiqarnaqtumik nungusuittumik.”

¹⁵ Arnaup uqautivaa, “Imirmik tamatuminga tunisiviginnga, imirukkannirniarunniirama, imiqtarvingmullu uvunga imiqtariaqaqattarniarunniirama.”

¹⁶ Jiisusiup uqautivaa, “Angirralirit uit qaiqujaqturlugu, uvunga utirniarmigavit.”

¹⁷ Arnaup kiuvaa, “Uiqanngilanga.” Jiisusiup kiuvaa, “Sulivutit uqaravit, ‘Uiqanngilanga’;

¹⁸ uiniqattaqsimagavit tallimaiqturlutit, maannalu angut najuqtigijait uigillarinnginnaviuk; sulillutit tamatuminga uqaqputit.”

¹⁹ Arnaup uqautivaa, “Qaujivunga nalauttaijuugavit.

²⁰ Sivulivut uvani qaqqami Guutimut tuksiaqattalauqput; ilissili Juutiujusi uqaqpusi Jiruusalimmi kisiani Guutimut inuit tuksiariaqarnirarlugit.”

²¹ Jiisusiup uqautivaa, “Arnaaq ukpirinnga, nalliutijumaaqpuq inuit tavvani qaqqami Jiruusalimmiluunniit Ataatamut tuksiaqattarunniirviksangat.

²² Tuksiarvigijasi qaujimannginnasiuk; uvagulli qaujimavugut tuksiarvigijattinnik, Juutinit piulijauniq pingmat.

²³ Nalliutijumaaqpurli, maannalu nalliutisimaliqpuq, Ataatamut tuksiaqtut sulitsiaqtumik tuksiaqattalirviksanngat, Anirnikkuurlutik sulitsiaqtumik, Ataata taimanna tuksiaqattarunnaqtunik qinirmat.

²⁴ Guuti Anirniungmat, taassumunga tuksiaqtut Anirnikkuurlutik sulitsiaqtumik tuksiaqattaqtuksaungmata.”

²⁵ Tavva arnaup uqautivaa, “Qaujimavunga Misaia, Christuusimik taijaujuq, tikittumaarmat; tikikkunilu, taassuma tukisitittumaaqpaatigut sunalimaanik.”

²⁶ Jiisusiup kiuvaa, “Taannauvunga uqaqatigijait.”

²⁷ Taimaak suli uqaqtillugu ilinniaqtingita tikippaat. Kamammarikpullu Jiisusiup arnamik uqaqatiqarninganik, nalliannigluunniit apirijuqanngilaq arnamut “Sunamik pijumavit?” Uvvalu, Jiisusimut apirijuqanngilaq, “Sungmanuna arnaq uqaqatigiviuk?”

²⁸ Tavva arnaup imiqtautini qimagluniuk, nunalingnut utiqpuq, inuit tavvaniittut uqautivait,

²⁹ “Qailusi angut takujaqtuqsiuk pinialauqsimajalimaannik uqaujjijigijara. Christuusiunngimmangaat.”

³⁰ Tavva inuit nunalingnit pillutik Jiisusiup najuqtanganuaqput.

³¹ Tikilauqtinnagilli Jiisusi ilinniaqtingita uqautivaat, “Ajuriqtuiji, nirikainnarit.”

³² Jiisusiulli kiuvait, “Nirijaksaqaqpunga qaujimanngitassinnik.”

³³ Tavva ilinniaqtingit immingnut uqaqattautiliqput, “Unaa niriniaqtanganik tunisiviujuviniq?”

³⁴ Jiisusiup uqautivait, “Nirijaksakka tavva tilijima pijumajanganik naalaglunga, pinasuaqtauqusimajangalu pijariirlugu.

³⁵ Uqaqpanngilasi, ‘Taqqiit suli sitamauvut, taakkua naakpata katiqsuiviqalaarniaqpuq?’ Uqautivassili, piruqsiivik takutsialauqsiuk; piruqtut piruriiqput qakuqsillutik katiqsuqtautuinnariaqaliqput.

³⁶ Nakatirijurli akiliqtauniaqpuq, katiqsuilluni piruqtunik inuusirmut nungusuittumut; tavva kanngaqsuijuq katiqsuijurlu taimaak quviasuqatigiingniaqpuk.

³⁷ Uqausiuvaktuq sulivuq imailijuq; ‘Inuk kanngaqsuivuq, asiali katiqsuivuq.’

³⁸ Tililauqpassi piruqsiivingmi katiqsuiqullusi piruriiqtunik pinasualaunngitassinnit; asisi aksururlutik pinasualauqput, ilissilu pinasuaqsimajanginnik pinasualiqpusi.”

³⁹ Samiariarmiulli amisut nunaliit tavvani Jiisusimik ukpirusukput arnaup uqalauninga pillugu, “Pinialauqsimajalimaannik uqaujjijigijara.”

⁴⁰ Taimaimmat taakkua Samiariarmiut Jiisusimut tikiutigamik, ajuinnaariliqpaat siniktarviujumallutik; Jiisusi ulluungnik marruungnik tavvani ullivuq.

⁴¹ Unurniqsailli ukpiliqput uqausingit pijjutigillugit.

⁴² Arnamut uqaqput, “Maanna ukpiliqpugut uqausiqtit pijjutigituinnarnagit, uvagulli nangminiq tusarattigu, tukisillutalu ilaak taanna sulijumik piulijiungmat silarjuarmiunut.”

Jiisusiup Aaqqiksininga Angajuqqaap Irninganik

⁴³ Ulluuk marruk anigurmatik Galiliamut aullaqpuq.

⁴⁴ Jiisusi nangminiq uqalaurmat, “Nalauttaijuq nunatuqarmini upigijaunngimmat.”

⁴⁵ Galiliamulli tikimmat, Galiliamiut tunngasuktippaat, takulauramik Jiruusalimmi nalliunniqsiuqtillugit Jiisusi pinasuaqtillugu, taakkuattauq tavvaniilauramik.

⁴⁶ Kinguningagut Jiisusi Kainamut Galiliamiittumut tikikkivuq, imirmik uaininnguqtitsivigilauqtaminut. Kapiirniamilu angajuqqaap ilangatta irninga qanimavuq.

⁴⁷ Taanna tusarami Jiisusi Juutiaminngaarluni Galiliamut tikimmat, upakpaa ajuinnarlunilu Kapiirniamuaquvaa irninganik aaqqiksiqullugu, tuqutuinnariaqarluni qanimangmat.

⁴⁸ Jiisusiup uqautivaa, “Nalunaikkutarnik kamanaqtuniglu takunngikkussi ukpirumanngilasi.”

⁴⁹ Angajuqqaap uqautivaa, “Uvattinnualaurluk qiturngara tuqunnginningani.”

⁵⁰ Jiisusiup uqautivaa, “Angirralirit; irniit inuuniaqpuq.” Angut Jiisusiup uqausinganik ukpirusukkami angirrasivuq.

⁵¹ Angirauliqtillugu pijingita paaqpaat uqautillugu, “Irniit qanuittunniiqpuq.”

⁵² Tavva apirivait qatsinnguqtillugu irninga piusivalliasilaurmangaat, taakkua kiuvaat, “Ippaksaq 1-muaqtillugu uutirnarunniilauqpuq.”

⁵³ Ataatangata qaujivaa tavvani ikarrami Jiisusiup uqautilaurmagu, “Irniit inuuniaqpuq”; imminiglu iglumiuqatilimaangillu ukpiliqput.

⁵⁴ Tamanna tavva Jiisusiup nalunaikkutangata aippanga Juutiaminngaarluni Galiliamuaqsimaningata kinguningani.