ᔪᐊᓇᓯᐅᑉ ᐊᒡᓚᖏᑦ 3 - Aglait Ijjurnaittut

Jiisusilu Nikutimuusilu

¹ Angutitaqalauqpuq Paarisiuqataujumik, Nikutimuusimik atilingmik, Juutinut angajuqqauqataujuq.

² Taanna unnuakkut Jiisusimuaqpuq uqautillugu, “Ajuriqtuiji, qaujimavugut Guutimit pisimallutit ajuriqtuijiugavit; iliktut tatannaqtunik pijuqarunnanngimmat, Guutiup najunngippagu.”

³ Jiisusiup kiuvaa, “Sulitsiaqtumik uqautivagit, nutaamik irniangunngittuup, Guutiup ataniuvinga takujunnanngilaa.”

⁴ Nikutimuusiup uqautivaa, “Qanuq inuk piruriiqsimalirluni irniangukkannirunnaqpa? Anaanami iglianganut itikkannirunnaqpa irniangukkannirlunilu?”

⁵ Jiisusiup kiuvaa, “Sulitsiaqtumik uqautivagit, nutaamik irniangunngittuq imarmut Anirnirmullu Ijjurnaittumut, Guutiup ataniuvinganut itirunnanngilaq.

⁶ Timimit irniangujuq inutuinnauvuq timiqarluni, anirnirmilli irniangujuq Anirnikkut inuuliqpuq.

⁷ Kamaniarutiginagu uqautigakkit, iluunnasi irniangukkanniriaqaqpusi.

⁸ Anuri namutuinnaq anuraarvigijumajaminut anuraaqpakpuq; suluksurninga tusaagaluaqpat, qaujimanngilatilli nakit pingmangaat namullu aingmangaat; taimaikkivuttauq Anirnirmit irniangujut.”

⁹ Nikutimuusiup uqautivaa, “Qanurli tamanna taimaigunnaqpa?”

¹⁰ Jiisusiup kiuvaa, “Isarialaitini ajuriqtuijiuvit, tamannalu qaujimanagu?

¹¹ Sulitsiaqtumik uqautivagit, qaujimajattinnik uqasuunguvugut, takulauqtattinniglu unikkaarluta; uqausirijattinnigli ukpinngilasi.

¹² “Nunaup pinginnik uqausiqaqtillunga ukpirusunngikkuvit; qanurli ukpirusukkajaqpit qilaup pinginnik uqautigajarukkit?

¹³ Qilaliaqtuqalauqsimanngilaq, qilangmit aqqaqtuq kisimi, tavva Inuup Irninga.

¹⁴ “Suurlu Muusisiup quglugiannguaq nappaqtilaurmagu inuqanngittumi, taimaaktauq Inuup Irninga nappaqtaujariaqaqpuq,

¹⁵ kinatuinnaq ukpiqtuq taassumunga inuusiqaliqullugu nungusuittumik.

¹⁶ Guutiup silarjuarmiut nagligillarikkamigit Irnituani tunilauqpaa, tamarmik taassumunga ukpiqtut asiuqunagit nungusuittumigli inuusiqaqullugit.

¹⁷ Guutiup Irnini tililaunngimmagu silarjuarmut, silarjuarmiunik igitaksannguqtitsiqulugu, silarjuarmiulli piulijauqullugit taassumuuna.

¹⁸ “Nalliat taassumunga ukpiqtut iqqaqtuqtaunngilat; nallialli taassumunga ukpinngittut iqqaqtuqtauliriiqput, Guutiup Irnituangata atinganut ukpinginnamik.

¹⁹ Iqqaqtuqtauniq imailingavuq, qaumajuq silarjuarmut tikisimavuq, inuit taarjuaq ungaginiqsarivaat qaumajumit, piniarningit piunngittuliniungmata.

²⁰ Piunngittulijuup qaumajuq uumigivaa, qaumajumuarumananilu, piunngittuliningit saqqititauqunagit qaumajumut.

²¹ Sulijumigli piniarniqaqtuq qaumajumuaqpuq, piniarningit saqqititautsiaqullugit qaumajumut Guutimit pisimangmata.”

Juanasi Paaptitsirijiup Nalunaiqsininga Jiisusimik

²² Tamatuma kingurngagut Jiisusi ilinniaqtingillu Juutiamuaqput; tavvani pinasuaqatigivait paaptitsillunilu.

²³ Juanasittauq paaptitsivuq nunami Ainanimi Salimmiup qanigijanganiittumi, tavvani imaqarmat amiganngittumik; inuillu tavvunngaqput paaptitaullutiglu.

²⁴ Juanasi suli tigujaulauqtinnagu.

²⁵ Juutilli ilangat Juanasiup ilinniaqtinginnik aivaqatiqaliqpuq ukpirnikkut salummaqtaunirmik pijjutiqarlutik.

²⁶ Tavva ilinniaqtingita Juanasi upakpaat uqautillugulu, “Ajuriqtuiji, angut Juartaniup kuungata akiani ilingnualauqtuq, uqausiriqattaqtait, taanna paaptitsiqattaliqpuq, inulimaallu taassumunngaqattaliqput.”

²⁷ Juanasiup kiuvait, “Inuk nalliat imminiinnaq pitaarunnanngilaq Guutiup tunisivigikpagu kisiani piniarunnaqpuq.

²⁸ Ilissi nangminiq qaujimajigivassi uqalaurama, ‘Christuusiunngilanga, tilijausimavungali taassumanngat sivuliuqullunga.’

²⁹ Uiksaq taannauvuq nuliaksamik nangminilik; uiksaulli piqannarijangata, saniani nangiqtuup tusaqtuullu, quviasugutigivaa uiksaup nipinganik tusarami; taimaak tavva uvanga nangminiq quviasungnira naammaksitsiaqpuq.

³⁰ Taanna angiglivalliajariaqaqpuq, uvangali mikiglivalliajariaqaqpunga.”

Taanna Tavva Qilangmit Tikittuq

³¹ Tappaanngat tikittuq tamainnik pillariuniqpauvuq; nunamit pijuq nunamiutauvuq, nunaullu pinginnik uqausiqarluni, qilangmilli tikittuq tamainnit pillariuniqpauvuq.

³² Takulauqtaminik tusalauqtaminiglu uqausiqaqpuq, nalliattaluunniilli taassuma uqausirijangit ilaliunngilait.

³³ Nalliat taassuma uqausinginnik ilaliuqsijuq qularnanngittumik qaujivuq, Guutiup sulitsiarninganik.

³⁴ Guutiup tilisimajanga Guutiup uqausinginnik uqausiqaqpuq, Guutiup Anirnirminik tunisivigingmagu amiganngittumik;

³⁵ Ataataup Irnini nagligivaa, tamaittalu tunilauqpait taassuma pijunnarninganut.

³⁶ Nalliat taassuma Irninganut ukpiqtuq inuusirmik nungusuittumik piqaqpuq; nallialli taassuma Irninganik ilaliuqsinngittuq inuusirmik takunianngilaq, Guutiulli ninngausingata qulangianginnaqpaa.